Mitapu ya Kulejan Rusangu Ruwamp

MULONG wading mwin kulejan wa mushiku wa rusangu ruwamp, Yesu wayishila in kwilejend chilakej chiwamp. Wasalang usu wa kuya kuyital antu, kuyilej ni kuyifundish ku yikumbu yau ni pibur. (Mat. 9:35; 13:36; Luka 8:1) Yisu yimwing Yesu wambambang ni muntu panrend, wayifundishang in kwilejend kuns ni wafundishang kand yisak ya antu avud. (Mar. 4:10-13; 6:35-44; Yoh. 3:2-21) Wasalang usu wa kuyilej antu mazu makasikeshina ni maletina ruchingej. (Luka 4:16-19) Ap anch wading ni kuswir kwa kupim ap kwiswedish, wasalang usu wa kupan uman. (Mar. 6:30-34; Yoh. 4:4-34) Anch twatang nsangu piur pa mudimu wa kulejan wasalay Yesu, ov, tukat kwiyov abachikinau kumwimburij? Tukat kwiyov mwamu, mudi mwiyovau atwimbuy.—Mat. 4:19, 20; Luka 5:27, 28; Yoh. 1:43-45.

² Tushinshikinany mitapu yimwing ya mudimu wa kulejan usadinau in Kristu nlel mu mudimu wasambishay Yesu kwasutin kal piswimp mivu 2000.

KULEJAN KU CHIKUMBU NI CHIKUMBU

³ Mulong tudi Atuman a Yehova, twij usey wa kulejan rusangu ruwamp ra Want pakad kanrumbangesh ku chikumbu ni chikumbu. Tukat kusadin nakash mutapu winou wa kulejan ni wikadin kal chijingidij cha kutwijikin. Yibudikin yisangareshina yimekeshin anch chidi cha manangu kusadin mutapu winou mulong wa kukimb antu avud mu chisu chikemp. (Mat. 11:19; 24:14) Mudimu wa kulejan ku chikumbu ni chikumbu udi mutapu uwamp kudi etu wa kumekesh rukat tukweta mulong wa Yehova ni amutej netu.—Mat. 22:34-40.

⁴ Kadiap Atuman a Yehova asambisha mudimu wa kulejan ku chikumbu ni chikumbu. Kambuy Paul walonda anch wading kufundish antu ku yikumbu yau. Palejanay piur pa mudimu wend wa kulejan kudi amakurump a mu Efes, walonda anch: ‘Kudiokal dichuku dia kusambish dinashika mwi ngand ya Aziy, . . . Nakulejanya yom yawonsu yikutwisha kukukwashany ni kukufundishany . . . mu yikumbu yen.’ Pa kusadin mutapu winou ni yikwau, Paul ‘wapana uman kudi in Yuda ni kudi in Grek piur pa kukarumuk ni kwez kudi Nzamb ni kumwitiyij Nsalejetu Yesu.’ (Mid. 20:18, 20, 21) Pa chisu chinicha, ant a in Rom ayikasikeshang antu kwifukwil akish, ni antu avud ading ‘akwet wom wa akish.’ Antu afanyina kusal usu wa kumukimb ‘Nzamb watanga mangand ni yom yawonsu yidiamu,’ mulong “ndiy ukat kuyitazuk antu awonsu adia mu jindond jawonsu chakwel akarumuk ni kudiokal ku yitil yau.”—Mid. 17:22-31.

⁵ Nlel unou, chidi cha usey kuswapej kuyilej antu rusangu ruwamp. Disudiel dia mangand diasej kal piswimp. Mulong twij anch kudi maswir minam, yawiy yiney yom yitubachikina kusal usu nakash. Kwikil mutapu ukwau wa kuyikimb antu akweta impu ya uyakin usutinamu kulejan ku chikumbu ni chikumbu. Mutapu winou uletin yibudikin yiwamp mudi muchasadika pa chirungu cha Yesu ni cha atwimbuy.—Mar. 13:10.

⁶ Ov, ukat kusal mudimu wa kulejan ku chikumbu ni chikumbu? Anch chidi mwamu, ijik anch Yehova ukat kukusanger. (Ezek. 9:11; Mid. 20:35) Pamwing ap chikukasikedin kulejan ku chikumbu ni chikumbu. Pamwing ap ukwetap ukash wa mujimbu uwamp, ap mulong ulejen mu teritwar wakad antu kukutesh. Ap mulong antakel a ngand akangeshin mudimu wa kulejan. Pamwing ap ukwet usany ni chikukasikedin kusambish mambamb nau antu wakad kwijik. Pakwez, chisu chawonsu usadina mudimu wa kulejan ku chikumbu ni chikumbu, yom umena yikutwish kukovish wom. Chawiy kangal waziy. (Kub. 4:10-12) Yom yikushikedina yishalijadinap ni yikata kuyishiken akadivar ni anambaz adia ndond jikwau.

⁷ Yesu wayikana in kwilejend anch: ‘Nikwikal ni yenen machuku mawonsu, djat ni kwinsudiel kwa mangand.’ (Mat. 28:20) Mazu minam matukasikeshin mu mudimu wa kwikadish antu in kwilej. Tukat kwiyov mudi mwovay kambuy Paul, palonday anch: ‘Nikat kusal yom yawonsu mulong wa ndiy ukata kwinginkish am usu.’ (Fil. 4:13) Sal usu wa kulimish program wa chikumangen piur pa kupan uman ku chikumbu ni chikumbu mu kwipan ni mushiku. Mu kusal pamwing ni akwen, akutwish kukukasikesh ni ukutaninamu nakash. Mulembila Nzamb chakwel akukwasha kurish ni yom yikushikedina, ni sal usu wa kulejan rusangu ruwamp.—1 Yoh. 5:14.

⁸ Piuyilejina antu akwau piur pa rusangu ruwamp, ukwikal ni mutapu wa kuyilej ‘kurumburik kwa ruchingej ukweta.’ (1 Pita 3:15) Ukusankanijan ni antu akweta ruchingej ra Want ni akad ruchingej riner. (Isay 65:13, 14) Ukwikal ni musangar wa kwijik anch waziyina kwi mbil ya Yesu ya ‘kumunyik kutok kwey,’ ni ukwikal ni chisend cha kuyikwash antu akwau chakwel ashikena kumwijik Yehova ni kwijik uyakin utwadina ku mwom wa chikupu.—Mat. 5:16; Yoh. 17:3; 1 Tim. 4:16.

⁹ Akwatin kal mupak wa kulejan ku chikumbu ni chikumbu Diarubing ni Diampos ni machuku makwau ma mukach mwa rubing. Mwi ndond mukasikena kuyitan antu ku yikumbu chisu cha muten, yikumangen yimwing yirijekin kal mulong wa kulejan urel. Antu amwing itiyining kwez kuyital kupwa kwa midi ap urel kulik pamanch.

KIMBANY ANTU AWAMP

¹⁰ Yesu wayileja in kwilejend anch ‘kimbany’ antu awamp. (Mat. 10:11) Mulong wa kuyikimb antu awanyidina kutambul mwom wa chikupu, chitinap ching kulejan ku chikumbu ni chikumbu. Yesu wapanang uman anch waman antu akufundish, mu mutapu wa kwirijek ap wa kukashimwish. (Luka 8:1; Yoh. 4:7-15) Atwimbuy niyau apanang uman kudi antu mu jindond kushalijan.—Mid. 17:17; 28:16, 23, 30, 31.

¹¹ Chilik chimwing ni nlel, chitongijok chetu chidi cha kuyilej antu awonsu uruu wa Want. Chinech chimekeshin anch twimburijin mitapu yasadinay Yesu ni atwimbuy end mulong wa kuyikadish antu in kwilej pakad kuvuramen kuswimp kwa mashakamin ma antu a mu teritwar wetu. (1 Kor. 7:31) Pakwez, tukat kwipan kand mu kupan uman wa patok pamwing ni antu a mu teritwar wa chikumangen chetu. (Mid. 20:20) In kulejan amen yibudikin yiwamp pakatau kuya kuyital antu pa ndond jisadidinau mudimu. Mu jingand jimwing kupan uman mu jinjil ap mu ma park (ku ferm), mwi ndond mukata kwiman ma motak ap kand ndond yidia antu avud kukweting yibudikin yiwamp. Yikumangen yimwing yisadidin ma tebur ma kutek mikand ap tuyom twa kwendish tukweta ndond ya kutek mikand. Chikwau kand, biro wa mutiy ukutwish kurijek program wa kupan uman mu mutapu wa pakampwil mu misumb yijim pa ndond pasutinau antu avud pa kutazuk akadivar ni anambaz a mu yikumangen kushalijan. Chinech chikat kusal anch antu akad kwikalang ku yikumbu yau chisu chikatau in kulejan kuya kuyital atesha niyau rusangu ruwamp.

¹² Kupan Chinong cha Kalam ni Réveillez-vous ! udi mutapu uwamp nakash wa kupan uman ndond yidia antu avud. Tukutwish kwambamb nau antu kusutin kwikal ni nkeu ni rukat, ni kwisamb nau piur pa mutu wa mulong usangareshina udia mu gazet. Tukutwish kand kupan mikand yikwau. Tukutwish kwirijek mulong wa kuyichirikin antu. Kupan uman mu jindond jidia antu avud kukusangaresh ni kukukwash kutanduril mudimu wey wa kulejan.

¹³ Pakwez, mudimu ukwetau in Kristu nlel udiap kwau ching wa kulejan rusangu ruwamp. Anch ukimbin kuyikwash antu kwitiy uyakin utwadina ku mwom wa chikupu, ufanyidin kusal usu wa kuyichirikin tupamp tuvud chakwel aya kurutu ni ashikena ku kwikal in Kristu aswila mu spiritu.

KUYICHIRIKIN ANTU

¹⁴ Yesu wayileja in kwilejend anch: “Ukez kwikalany atuman amam . . . djat ni kusudiedila mangand.” (Mid. 1:8) Pakwez wayileja kand anch: ‘Yangany, uyikadishany antu a michid yawonsu in kwilej, . . . ni yilejany kuziyin ku yom yawonsu yinakulejanya.’ (Mat. 28:19, 20) Kuyichirikin antu kukutwish kwikal musul wa musangar mu mudimu wa Yehova. Antu akata kusanger rusangu ruwamp kapamp ka kusambish akweting kuswir kwa kuyichirikin kand. Piukata kuyiwejinaku jinsangu jikwau piur pa Bibil, ukutwish kukasikesh ritiy rau mudiay Nzamb ni kuyikwash chakwel ijika anch akwet kuswir kwa yom ya mu spiritu. (Mat. 5:3) Anch wirijek nawamp mulong wa kuyichirikin antu pa chisu chiwamp, ukutwish kusambish kwilej nau Bibil. Ufanyidin kwikal ni chaku cha kuyichirikin antu. Tufanyidinap kwetu ching kukun mbut ja uyakin, pakwez tufanyidin kand kujichil mem.—1 Kor. 3:6.

¹⁵ Kuyichirikin antu kukutwish kuyikasiken antu amwing. Pamwing ap wijididin kal kupan uman wa rusangu ruwamp mu wiswimp ni usangaredin mutapu winou wa mudimu wa kulejan. Pakwez piutongina kuyichirikin antu mulong wa kwambamb nau piur pa Bibil, ukutwish kuman anch yikukukasiken. Kangal kwey wov wom. Chidi chakin anch wapanin mikand kudi antu asangaredina piwasutina kapamp ka kusambish. Umenap anch ukutwish kushinshikin mutu wa mulong umwing udia mu mikand yiney? Ukutwish kwirijek kurutu kwa kuya kumutal. Anch umen anch ukutwishap, kimbap mwin kulejan ukweta ukaliweny uvud mu mudimu wa kulejan chakwel akutwalaku.

KUTAKEL MALEJAN MA BIBIL

¹⁶ Pambambay ni muntu witiyijina mafundish ma in Yuda wading kutang Dizu dia Nzamb, mwin kulejan rusangu Filip wamwipula anch: “Ov, wovil kurumburik kwa yom yiutangina?” Ikundj wamwakula anch: “Ov, nikutwish nchik kwov anch kwikil muntu mwin kwinrumburil?” Rusangu rilejenau mu Midimu shapitre 8 ritulejin anch kusutin yom ya mu Mufund yading yitanginay ikundj winou, Filip ‘wamuleja rusangu ruwamp piur pa Yesu.’ (Mid. 8:26-36) Twijap kamu chisu chasalay Filip ni ikundj winou, pakwez Filip warumburila rusangu ruwamp rasala anch ikundj winou itiyija ni amuleja anch mbatisha. Kupwa wikala mwin kwilej wa Yesu Kristu.

¹⁷ Antu avud nlel kijap nawamp Bibil, chawiy chitin kuyichirikin tupamp tuvud ni kwilej nau Bibil mu jimbing jivud, ap mu angond, ap kand mu mivu kurutu akasikesha ritiy ni kuwanyish yitinau mulong wa kutambul dibatish. Pakwez kushimpish kwey kwa muchim ni rukat kukuyikwash antu awamp kwikal in kwilej a Yesu ni kutambul yiyukish mudi mwalonday Yesu anch: “Chiyukish cha mwin kupan chipandakenamu cha mwin kutambul.”—Mid. 20:35.

¹⁸ Chakin, mulong wa kutakel malejan ma Bibil, ufanyidin kusadin mikand yisadinau mulong wa kutakel nich malejan ma Bibil. Anch walondul chilakej cha muntu wakufundisha Bibil, ukutwish niyey kutakel malejan ma Bibil mayila kurutu ni kuyikwash antu kwikal in kwilej a Yesu Kristu.

¹⁹ Anch ukwet kuswir kwa kukukwash mulong wa kusambish ni kutakel dilejan dia Bibil, sal usu wa kwambamb ni mukurump umwing ap Kaman mukwau ukweta ukaliweny mu kutakel malejan ma Bibil. Yom yilejenau ku chikumangan Mudimu ni Mashakamin Mukand wa Chikumangan yikutwish kukukwash nakash. Muchingejina Yehova ni mulembila chakwel akukwasha kutakel dilejan dia Bibil ap dimwing. (1 Yoh. 3:22) Pakwez anch chidi mwamu, sal usu wa kutakel dilejan dia Bibil ap anch ukat kwilej ni muntu wa mu dijuku diey. Mu kutakel dilejan dia Bibil, musangar wey mulong wa kusal mudimu wa kulejan ukupandakan.

KUYITWAL ANTU ASANGAREDINA UYAKIN KU DIRIJEK DIA YEHOVA

²⁰ Anch twayikwash antu ku kushiken kumwijik Yehova Nzamb ni kwikal in kwilej a Yesu Kristu, akwikal niyau pakach pa antu a mu chikumangen. In kwilej a Bibil akuya kurutu ni akukul mu spiritu anch ijik dirijek dia Yehova ni kusal nad pamwing. Chidi cha usey kuyifundish kusal mwamu. Mavideo ni broshir Ov, Anany Asadina Rusot ra Yehova Nlel Unou? ayisala pakampwil mulong wa kwijik dirijek nawamp. Jinsangu jimwing jidia mu Shapitre wa 4 wa buku winou jidi kand ja usey.

²¹ Piukusambisha kamu kwisamb ni muntu piur pa Bibil, mukwasha kwijik mutapu usadidinay Yehova dirijek mulong wa kuwanyish mudimu wa kulejan usadikina nlel pa divu. Muleja usey ukweta mikand yetu ya kwilej nich Bibil, ni murumburila mutapu ukatau kuyisal ni kuyipalangesh pa mangand mawonsu kudi in kusal mudimu kwa kwikatin ipanina kudi Nzamb. Mutazuka mwin kwilej wa Bibil ku yikumangan yikata kusadik ku Chot cha Want. Murumburila mutapu ukata kusadik yikumangan, ni mwijikisha kudi akadivar nau anambaz. Ukusal kand usu wa kumwijikish kudi Atuman akwau ku yitentam ya munyingumuku ni ya rejon. Mu yisu yikwau, mulika mwin kwilej winou ajingunin amwinend mutapu umekeshinau antu a Yehova rukat ridia chijingidij cha in Kristu akin. (Yoh. 13:35) Pakusangeray mwin kwilej winou dirijek dia Yehova, ukumusejin Yehova piswimp.

MUTAPU WA KUSADIN MIKAND YIMEDINA PA BIBIL

²² In Kristu a kusambish ading in kulejan a mushiku a Dizu dia Nzamb. Abudishang makopi mulong wa kuyikwash antu kwilej Bibil panrau ap kwilej mu chikumangen. Ayilejang antu akwau uyakin wa Dizu dia Nzamb. Makopi mabudishau ku makas madingap mavud ni amalama nawamp nakash. (Kol. 4:16; 2 Tim. 2:15; 3:14-17; 4:13; 1 Pita 1:1) Nlel Atuman a Yehova asadidin mashiny ma katat mulong wa kubudish ma miliyon ma Bibil ni yitot ya ma miliyon ya mikand yimedina pa Bibil. Pakach pa mikand yiney padi matrakt, mabroshir, mabuku ni magazet mu yitot ya mazu.

²³ Piulejena rusangu ruwamp kudi antu akwau, sal usu wa kusadin nawamp mikand ya kwilej nich Bibil yibudishinau kudi dirijek dia Yehova. Kudi mikand kushalijan yikatau kubudish pa ngond. Mwamu, ukutwish kupan magazet mu yisu kushalijan ngond ni ngond, kuwejinaku ni machuku matekinau mulong wa kupan gazet. Kuvurik chisu chawonsu anch ukat kutaninamu mu kutang kwey kwa mikand ya Atuman a Yehova, ukwikal ni mushiku wa kuyilejamu antu akwau.—Heb. 13:15, 16.

²⁴ Antu avud nakash akat kusadin Internet mudi musul wa kwijikin jinsangu. Pakwez, kuwejinaku mikand yimedina pa Bibil, kapend ketu kijikena ka jw.org, chidi chom chitukwashina kupalangesh rusangu ruwamp. Antu a pa mangand mawonsu akutwish kusadin ordinater mulong wa kutang ap kutesh Bibil ni mikand ya mazu makwatau, mu mazu chitot ni kusut. Antu akata kwidjidjek kwambamb netu ap ashicha mwi ndond mukasikena kwambamb nau Atuman a Yehova akutwish kwijik yitiyij yetu anch asadin jw.org ku yikumbu yau.

²⁵ Chawiy tukat kulejan kapend ka jw.org chisu chin chawonsu. Anch muntu watwipul piur pa yitiyij yetu, tukutwish kusadin telefon ap ordinater mulong wa kumulej kapamp kamwing chakul. Anch twasankan muntu ulondina dizu dikwau, kuwejinaku ni dizu dia yijingidij, tukutwish kumulej kapamp kamwing kapend ketu ka web mulong wa kutan Bibil ni mikand yimedina pa Bibil ya mu dizu diend. In kulejan avud akat kusadin mavideo madia pa Internet mulong wa kusambish mambamb piur pa Bibil.

KUPAN UMAN WA KUKASHIMWISH

²⁶ Yesu wayileja antu ading amuteshina anch: ‘En udiany chitokish cha mangand . . . . Chifanyidin uman wen ni yisalijok yen yimekan kurutu kwa antu chakwel amushiman Tatukwen udia mwiur.’ (Mat. 5:14-16) In kwilej amekesha mutapu winou wa kusal wa Nzamb kusutil kumwimburij Yesu walonda anch: ‘Am nidi chitokish cha mangand.’ Yesu washa chilakej kudi in Kristu cha kumunyik ‘chitokish cha mwom’ mulong wa antu awonsu ading amuteshina.—Yoh. 8:12.

²⁷ Kambuy Paul niyend watushila chilakej cha kulondul. (1 Kor. 4:16; 11:1) Padingay mu Aten, walejanang dichuku diawonsu kwi ndond ya kwisakin. (Mid. 17:17) In Kristu a ku Filip imburija chilakej chend. Pa mulong winou, Paul washikena kuyifundin anch ading ashicha “mukach mwa in matung ni akayitil a chirung chinech,” pakwez en ‘umunyikinany chitokish mu mangand minam.’ (Fil. 2:15) Nlel niyetu tufanyidin kumunyik chitokish cha uyakin wa Want mu kulond ni mu yisal yetu chisu chawonsu tukweta mutapu wa kulond piur pa rusangu ruwamp. Chakin, chilakej ni mwikadil wetu uwamp yikutwish kuyikwash antu chakwel amana anch tushalijadin ni antu akwau a mu mangand. Pakwez, anch twayilej piur pa rusangu ruwamp, akwijik mulong wak tushalijadin ni antu akwau.

²⁸ Antu a Yehova avud akat kulejan rusangu ruwamp kudi antu asadina nau mudimu, ku shikol, mu motak ap chisu chisadinau midimu yikwau. Anch twasal weny, tukutwish kwisamb ni antu tuyila nau. Muntu ni muntu ufanyidin kusal usu wa kuswimp yom twisambina nau antu mulong wa kupan uman. Tusalany komb usu wa kwirijek mulong wa kwambamb nau antu akwau anch kudi mutapu wa kusal mwamu.

²⁹ Tukutwish kusal mwamu anch twalam mu manangu anch tumushimen Sakatang ni tutumbishin dijin diend. Chikwau kand, tukutwish kuyikwash antu a kashinsh kushiken ku kumwijik Yehova chakwel niyawiy amusadina ni ikal ni ruchingej ra kutambul mwom wa chikupu kusutin ritiy mudiay Yesu Kristu. Yehova ukat kusanger usu tusadina mu mudimu winou ni umen anch udi mudimu utumbila.—Heb. 12:28; Kuj. 7:9, 10.

TERITWAR

³⁰ Yehova ukatin anch uruu wa Want aulejana pa mangand mawonsu, chikalap mu misumb ap mu mal. Mulong wa chinech, biro wa mutiy ukat kupan materitwar ku yikumangen ni kudi in kulejan adia mu jindond jakad yikumangen. (1 Kor. 14:40) Mudimu winou usadikin mudi mwarijekay Nzamb mu mivu chitot ya kusambish. (2 Kor. 10:13; Gal. 2:9) Mulong mudimu wa kulejan Want usadikin swa swa machuku minam mansudien, yom yivud yikat kusadik nawamp anch chikumangen charijek nawamp mudimu mu teritwar wach.

³¹ Ntakel wa mudimu wa kulejan ndiy ukata kurijek program winou. Nkwash a mudimu akutwish kumwink chisend cha kwangan materitwar ni kusal usu wa kumizwish nawamp. Kudi mitapu yaad ya materitwar, materitwar ma antu avud ni teritwar wa muntu panrend. Anch teritwar udi mukemp, in kulejan akutwish kulejan mu materitwar ma chisak chau, kwawiy kulond anch teritwar utakedinau kudi ntakel wa chisak chau. Pakwez, ndond yidia teritwar mujim, mwin kulejan mwawonsu ufanyidin kwikal ni teritwar wend.

³² Mwin kulejan ukweta teritwar wend ufanyidin kulejan mu teritwar winou anch kwikil chikumangan cha mudimu wa kulejan ni anch chimukasikedin kushik kudia chisak chend. Chilakej, in kulejan amwing akat kwit materitwar piswimp ni ndond yikatau kusadin mudimu mulong wa kulejan chisu cha kupim ap kupwa kwa mudimu. Majuku mamwing makat kwit nimawiy teritwar udia piswimp ni ndond yishichau, ni akat kulejanamu chisu cha urel. Kwikal ni teritwar wa muntu panrend kukutwish kumukwash mwin kulejan kusadin chisu mu mudimu wa kulejan mu mutapu ukatinay. Pakwez, mu materitwar ma muntu panrend akutwish kand kulejanamu kudi chisak chakabuj. Anch ukwet kuswir kwa kwikal ni teritwar wey, ukutwish kwit kudi nkwash utadina milong ya materitwar.

³³ Anch ntakel wa chisak ap mwin kulejan watambul teritwar, ufanyidin kusal usu wa kulejan mu teritwar wakabuj. Chinech chimekeshin anch chifanyidin kusal usu wa kwambamb ni antu a ku yikumbu yin yawonsu. Pamwing ap antu amwing ukutwish kuyikimb kusutin kuyifundin mukand, kuyitazuk ku telefon ap mu balibal. Ntakel wa chisak ap mwin kulejan ukweta teritwar ufanyidin kusal usu wa kulejan mu angond anying. Anch wapwish, afanyidin kumulej nkwash utadina milong ya materitwar anch teritwar wapwa kal, mwamu ukutwish kwizwish madosiye. Ntakel wa chisak ap mwin kulejan ukutwish kulam teritwar mulong wa kusalamu kapamp kakwau ap kumuchirish kudi nkwash utadina milong ya teritwar.

³⁴ Anch antu awonsu adia mu chikumangen asal mu kwovijan, akutwish kulejan mu teritwar mwawonsu. Mwamu in kulejan akutwish kwipuk kusankanijan mu teritwar umwing mulong wa kulik kuyijimesh in ku yikumbu. Chinech chikumekesh anch tuyilimishin akadivar netu ni antu a mu teritwar.

TUSALANY PAMWING MULONG WA KUPAN UMAN KUDI ANTU A MAZU MAWONSU

³⁵ Antu awonsu afanyidin kwilej piur pa Yehova Nzamb, piur pa Mwanend ni piur pa Want. (Kuj. 14:6, 7) Tukwet musangar wa kuyikwash antu a mazu mawonsu chakwel atazuka pa dijin dia Yehova mulong apand ni adjal wuntu wa win Kristu. (Rom 10:12, 13; Kol. 3:10, 11) Milong ik tukata kurish nich anch tulejen rusangu ruwamp mwi ndond mulondinau mazu mavud? Mutapu ik tukutwisha kuyilej antu avud chakwel atesha rusangu ruwamp ra Want mu dizu diteshinau nawamp?—Rom 10:14.

³⁶ Akat kupan materitwar kukwatijan ni dizu dia chikumangen. Pakwez, mwi ndond mulondinau mazu mavud, in kulejan a mu yikumangen kushalijan akat kulejan mu teritwar umwing. Anch chidi mwamu, chiwapin kudi in kulejan akimba ni alejan ching kudi antu alondina dizu dia chikumangen chau. Yisu yivud, anch alejen ku chikumbu ni chikumbu, afanyidin kupan mikand ching ya dizu dia chikumangen chau. Akutwish kumatik yikumbu yikweta antu alondina dizu dia yikumangen yikwau. Chidi kand cha usey kusal mwamu chisu tusadina kampany wa kupan maladikij. Pakwez chisu chipaninau in kulejan uman wa kukashimwish ap wa patok, akutwish kwambamb ni antu awonsu ni kupan mikand mu dizu din diawonsu.

³⁷ Yisu yimwing, yikumangen yisadidina dizu dikwau yikutwishap pamwing ap kulejan mu materitwar mau madia kulemp, mwamu akutwish kwit ku yikumangen yilejena mwi ndond yiney, alejana pakad kumatik chikumbu ap chimwing. In kulejan akutwish kusal usu wa kulejan uruu wa Want kudi antu alondina dizu dikwau. Anch atan muntu usangaredina uyakin, chidi cha usey kukudish musangar wend kudi antu a chikumangen alondina dizu diend. Mulong mashakamin makat kuswimp, antakel a mudimu wa kulejan a yikumangen yiney, afanyidin kwambamb mulong wa kuman mutapu ukutwisha yikumangen yau kusal nawamp mu teritwar winou. Chinech chikukwash chakwel muntu mwawonsu atesha uruu wa Want ni kumatik kand ku yikumbu yalejenau kal in kulejan akwau, chakwel antu a mu teritwar kangal ajiman.—Jinsw. 15:22.

³⁸ Chom ik tufanyidina kusal anch mwin chikumbu ulondin dizu dikwau? Kangal twatong anch in kulejan alondina dizu diend akwez kumutal. Pakwez, tufanyidin kusadin ka broshir Une bonne nouvelle pour des gens de toutes nations mulong wa kwijik dizu diend ni kumulej rusangu ruwamp. In kulejan amwing akat kwilej yom yikemp mu dizu dindjing yikutwishau kusadin mu teritwar. Tukutwish twamulej muntu atanga ap atambula mikand mu dizu diend pa kapend ketu ka web jw.org, ap tukutwish kumwinkish mikand mu dizu diend.

³⁹ Anch wamekesh kusanger kwakin, tufanyidin kusal usu wa kukimb muntu mulong wa kumukwash mu dizu diteshinay. Tukutwish kand kumulej ndond ya piswimp yisadikidina yikumangan mu dizu diend. Anch ukwet kuswir kwa kwambamb ni muntu ulondina dizu diend, tukutwish kumulej ambamba netu kusutin jw.org. Chad, biro wa mutiy ukukimb mwin kulejan, ap chisak cha in kulejan ap chikumangen chakwel amukwasha.

⁴⁰ Kushik ni pakutulejinay muntu usangaredina uyakin anch amwambambishin kudi muntu ulondina dizu diend, tufanyidin kudandamen kumuchirikin. Yisu yimwing biro wa mutiy ukutwish kuyilej amakurump anch kamenap mwin kulejan ulondina dizu dia muntu winou. Anch chidi mwamu, tufanyidin kusal usu wa kudandamen kukudish musangar wa muntu winou. Anch chitwishikin, tukutwish kwilej nend Bibil, kusutin mukand wa dizu diend. Anch twasadin nawamp yipich ni anch twamutangish maverse malejenau, ukwijik uyakin wa pa dishin wa Bibil. Antu a mu dijuku diend ija nawamp dizu diend ni dizu diey akutwish kukwash mudi in kukarumun.

⁴¹ Mulong wa kumutwal muntu usangaredina uyakin mu dirijek dia Nzamb, tufanyidin kumutazuk ku yikumangan ap anch kateshinap nawamp program. Chisu chitanginau maverse, tukutwish kumukwash kumatan mu Bibil wa dizu diend anch udiaku. Kumwijikish kudi antu akwau a mu chikumangen kukutwish kumukasikesh ni kumukwash chakwel akula mu spiritu.

⁴² Anch kudi antu avud a mu teritwar wa chikumangen chen alondina dizu dikwau, chisak cha amakurump chikutwish kwit chakwel biro wa mutiy ayinkisha mbil ya kusambish ka chisak kakemp mu dizu dined. Ka chisak kakweta in kulejan akemp alejena mu dizu dia wingendj, kadi ka chisak kaburedina mukurump a nkwash wa mudimu uwanyidina mulong wa kutakel yikumangan ya pa rubing mu dizu dined. Chisu ni chisu, amakurump akutwish kuman mutapu wa kukwash program wa yikumangan yisadikina mu dizu dined pa kusal anch kwikala diskur dia patok ni dilejan dia Chinong cha Kalam ap akusal anch ka chisak kinak kalondula yikumangan yisadikina mu dizu diau kusutin telefon.

⁴³ Kudi yom yinying ya pa dishin yifanyidina kushinshikin mulong wa kusambish chisak: (1) Chifanyidin kwikala antu avud asangaredina uyakin ni yom yimekeshina anch kukwikal kuya kurutu mu dizu dined. (2) Kudi uvud kanang wa in kulejan ija dizu dined ap adilejina. (3) Kudi mukurump ap nkwash wa mudimu uwanyidina wishadidina mulong wa kutakel yikumangan ya pa rubing mu dizu dined. (4) Anch chisak cha amakurump chikatin kukwash chisak chinech. Anch yom yiney ayiwanyishin mu chilik kanang, chisak cha amakurump chikufund ku biro wa mutiy piur pa yom kanang yiwanyishina chisak ni kwit chakwel chikumangen chijikana ku biro wa mutiy anch chikat kukwash chisak cha dizu dikwau. Mukurump utakedila chisak chinech ukwikal mudi ntakel wa chisak, chad anch udi nkwash wa mudimu ukwikal nkwash wa chisak.

⁴⁴ Yisu yivud, chikunku cha kusambish cha Chikumangan Mudimu ni Mashakamin chikusambishau kusal mu dizu dia wingendj rubing ni rubing chidi Dilejan dia Bibil dia Chikumangen. Chikat kusadikinang mu kapalikany kakwau ka Chot cha Want. Kupwa, yikunku ya ansand a shikol ya Chikumangan Mudimu ni Mashakamin akutwish kuyisadin mu kapalikany kakwau anch kudi mukurump ap nkwash wa mudimu wija kulond dizu dined ni ukwikal ntakel wa chikumangan. Amakurump akutwish kwitiy kusambish kusal yikumangan yikwau mudi Diskur dia patok ni Dilejan dia Chinong cha Kalam. Akutwish kand kusambish kusal yikumangan ya mudimu wa kulejan ya chisak. Antu awonsu adia mu chisak chinech afanyidin kusal mu kwovijan ni chisak cha amakurump. Amakurump akulet umutakel kanang ni akusal usu mulong wa kukwash maswir ma chisak. Chisu chikwendinay kalam wa munyingumuku chikumangen chikwashina chisak chinech, ukufund rapor mwiswimp ku biro wa mutiy ulejena kuya kurutu kwa chisak ni ukulejan maswir makweta chisak. Mu chisu chiwanyidina, chisak chikutwish kwikal chikumangen. Anch antu awonsu alejena mu teritwar wa dizu dia wingendj alimish umutakel wa uteokras, Yehova ukusangar.—1 Kor. 1:10; 3:5, 6.

KUPAN UMAN MU CHISAK

⁴⁵ In Kristu ipanina kal akwet chisend cha kulejan rusangu ruwamp kudi antu akwau. Kudi mitapu yivud ya kusal mwamu, pakwez antu avud pakach petu akat kusanger kulejan pamwing ni in kulejan akwau. (Luka 10:1) Mulong wa chinech, yikumangen yikat kusal yikumangan ya mudimu mukach mwa rubing ni kwinsudien kwa rubing. Machuku makadiau antu kusal mudimu mading mawamp kusal mudimu wa kulejan mu chisak mulong akadivar avud niyau kakatap kusal mudimu machuku minam. Ntakel wa mudimu wa kulejan ufanyidin kusal usu wa kwovijan ni chisak cha amakurump mulong wa kutond chisu ni ndond yakusadin yikumangan ya mudimu wa kulejan pamanch ap urel.

⁴⁶ Kupan uman mu chisak kukat kuyikwash in kulejan kusal pamwing ni kudi kwa usey chakwel “etu awonsu tukwashijanany.” (Rom 1:12) In kulejan asu akutwish kulejan pamwing nau in kulejan akweta ukaliweny mulong wa kuyifumb ni kuyikwash. Mu jindond jimwing, in kulejan afanyidin kuya aad aad ap avud mulong wa kwiyep ubaj. Ap anch warijekang kuya kulejan mu teritwar amwiney, chikuyikasikesh antu awonsu anch wasutin bil ku chikumangan cha mudimu wa kulejan. Kwijik anch antu akwau asadin niyau mudimu wa kulejan mu teritwar winou kukukukasikesh. Ayibol ni in kulejan akwau kayishindidinap kukumangan ku yikumangan yin yawonsu ya mudimu wa kulejan yirijekinau kudi chikumangen, nakash anch yikumangan yiney yikat kusadik dichuku diawonsu. Pakwez, akutwish kuya ku yikumangan yimwing ya mudimu wa kulejan yisadikina mu rubing.

⁴⁷ Tulondulany amboku chilakej chashay Yesu ni atwimbuy end! Tukutambul yiyukish ya Yehova mulong wa usu tusadina wa kwipan mu mudimu winou ujim wa kulejan rusangu ruwamp ra Want.—Luka 9:57-62.