Yakul ku Yipul Yen

◼ Yiyukish ik yidiaku ya kukumangan ku chikumangen chikweta teritwar mutushichinga?

Kusutin ku ditenchik dia chikumangen, kwawiy tukata kutambwil dikasikesh dia ‘kukwashijan kumekesh rukat ni kusal yisalijok yiwamp.’ (Heb. 10:​24, 25) Kusutin ku chikumangen tukat kwilej uyakin ni kwikal awanyishinau nawamp chakwel kuwanyish mudimu wetu wa kwikadish in kwilej. (Mat. 28:​19, 20) Akat kutukasikesh kand kujijaman ku yoziu nich kushinshaman ni tukwet atulam in rukat akata kutukwash kupandakan yipwichik ni yakamish yikash-yikash. Chidi kwau chovikena anch, chikumangen chidi cha usey nakash ku dipandish dietu dia muspiritu. Chawiy lel, ov kudi yiyukish ya kukumangan ku chikumangen chikweta teritwar mutushichinga?

Mashakamin ma muntu ni muntu makat kukarumuk, ni yom yimwing mud mudimu wa ku mujimbu, mwin kwol kwend wakad kwitiyij, ni mutapu wa kwend (transport) yikutwish kwikal nich usu pa mupak wa nsudiel ukukwatay muntu pa mulong utadila chikumangen kufanyidinay kukumangan. Chikalap nchik mwamu, kudi yiyukish ya muspiritu ni yibudikin yikwau, anch muntu winungin pamwing ni chikumangen chikweta teritwar mushichay? Amakurump akutwish kwisamb ni antwarubil awonsu swa-swa mu chisu kudia kuswir kukash kwa ukwash. Yakul ku Yipul Yen yikur yisambidina uvud kanang wa yiyukish yikwau.​—⁠Kalang 1991.

Chakin kamu, kukumangan piswimp ni kwol kwetu kupandaken kuwap, mulong kukat kututwishish kushik kurutu kwa chisu chiwanyidina ni kwisamb ni antu akwau, kubangin piur pa milong tuswiridina, ni kwikalaku pa chisu cha muminy ni malembil ya kusambish. Anch kudi antu asu ashicha piswimp netu, tukutwish kwikal nich chisu chipandakena kuwap cha kwisamb nau chisu ni chisu, kutakel malejan ma Baibel pamwing nau, ni kuyishikij ku yikumangan mutapu uyifanyidina kamu nawamp.

Tukwet ruchingej anch mitu ya majuku yikez kushinshikin mulong winou mu malembil, kushinshikin nawamp yom yiney yawonsu chakwel kukwat mupak upandakena kuwap mulong wa ukash wa muspiritu ni wa mujimbu wa majuku mau.​—⁠1 Tim. 5:⁠8.