Buku wa Kujingunik Urumburikin ik Kud Ey Nlel Unou?

1-2. Diyingishin ik diakusambish difanyidina kutubachik kushinshikin buku wa Kujingunik?

OV, AKUTAZUKINAP kal kutal yipich mu album wa muntu? Pautadina yipich, waman yifu ya antu wakad kwijik. Kupwa chipich chimwing chakusangaresh nakash ni chakupwit nkeu. Mulong wak? Mulong niyey udiap. Pauchishinshikidina, wasal usu wa kuvurik chisu ni ndond yachikwatinau. Kupwa wasal kand usu wa kumuvurik muntu ni muntu udia pa chipich chinech. Chipich chinech chirumburikin yom yivud nakash kud ey.

² Buku wa Kujingunik ud mud chipich chinech. Mulong wak? Tujimbulaku kwetu mayingishin maad. Chakusambish, buku winou udia mu Bibil amufunda mulong wetwetu. Mu shapitre ni verse wa kusambish, tutangin anch: “Mu mukand winou mudi yom yajinguninay Yesu Kristu. Nzamb wamuleja Yesu yom yikushika mu chisu chikemp, chakwel ndiy ukuyijingunin atushalapol end.” (Kuj. 1:1) Chawiy, yom yifundinau mu buku winou yidiap mulong wa antu in awonsu, pakwez mulong wetwetu ipanina kal kud Nzamb mud atushalapol end. Mulong tud atushalapol a Nzamb, chitukashimwishinap pa kujingunin anch tukat kukwash kuwanyish uprofet udia mu buku winou usangareshina. Mu kulond kukwau, niyetu tud nau “pa chipich.”

3-4. Kukwatijan ni buku wa Kujingunik, chisu ik chafanyina kuwanyin uprofet udiamu, ni chinech chifanyidin kutubachik kusal ik?

³ Diyingishin dia kaad did piur pa chisu chikuwanyina uprofet winou. Kambuy Yohan warumburila chisu chikuwanyina uprofet winou palonday anch: ‘Kusutin spiritu utumbila, nashika pa dichuku dia Nsalejetu.’ (Kuj. 1:10) Pafunday Yohan mazu minam mu muvu wa 96 C.C., “dichuku dia Nsalejetu” diading dichid kulemp. (Mat. 25:14, 19; Luka 19:12) Chawiy, kukwatijan ni uprofet wa Bibil, dichuku dined diasambisha mu muvu wa 1914, pikalay Yesu mwant mwiur. Kusambish kamu muvu winiwa, uprofet udia mu Kujingunik uyitadina atushalapol a Nzamb wasambisha kuwanyin. Chakin, tushich katat pa “dichuku dia Nsalejetu”!

⁴ Mulong tushich pa chirung chinech chisangareshina, chitwitin kushinshikin nakash pa chiyul cha rukat chidia mu Kujingunik 1:3 chilondina anch: ‘Wayuk muntu ukata kutang nich dizu dia piur ni antu akata kutesh mazu ma uprofet winou ni kumalam mu michim yau, mulong chisu cha kumekan kwa yom yiney chashik kal piswimp.’ Chawiy, tufanyidin ‘kutang nich dizu dia piur,’ ‘kutesh mazu ma uprofet winou,’ ni “kumalam mu michim” yetu. Mazu ik mamwing tufanyidina kulam mu michim yetu?

SHINSHIKIN MULONG WA KUMAN ANCH DIFUKWIL DIEY ADITIYIN KUD YEHOVA

5. Kukwatijan ni buku wa Kujingunik, mulong wak chid cha usey kushinshikin ni kuman anch difukwil dietu aditiyin kud Yehova?

⁵ Kusambishin kamu ku shapitre wa kusambish wa Kujingunik, twilejin anch Yesu wij nawamp yom yisadikina mu yikumangen ya atushalapol end. (Kuj. 1:12-16, 20; 2:1) Yesu wamekesha kashinsh kinak mu uruu watumay ku yikumangen sambwad ya mu Aziy Mukemp. Mu uruu winou, wapana umutakel wa pakampwil mulong wa kuyikwash in Kristu a mu mivu chitot ya kusambish kwishinshikin mulong wa kuman anch difukwil diau aditiyin kud Yehova. Ni yom yalonday mu uruu winou yiyitadin kand atushalapol a Yehova nlel unou. Dilejan ik tukutwisha kudioshaku? Ntakel wetu Kristu Yesu umen nawamp mwikadil wetu wa mu spiritu. Tud mu diking diend; umen yom yawonsu. Wij yom tufanyidina kusal mulong wa kudandamen kusanger dilau dia Yehova. Umutakel ik wapanay tufanyidina kulondul nlel unou?

6. (a) Mud mulejenau mu Kujingunik 2:3, 4, mulong ik wa pa dishin wadinga mu chikumangen cha ku Efes? (b) Yom ik twilejidinaku?

⁶ Tang Kujingunik 2:3, 4. Tufanyidinap kushadish rukat retu ra kusambish mulong wa Yehova. Uruu wa Yesu kud in Kristu ading mu chikumangen cha mu Efes umekeshin anch amekesha kujijaman ni ading adandamedin kumusadin Yehova chikalap nchik yikokujol kushalijan yarishangau nich. Chikalap nchik mwamu, ashadisha rukat rau radingau nich kwinsambishin. Ading afanyidin kuchirish rukat riner chakwel Yehova adandamen kwitiyij difukwil diau. Chisik chimwing ni nlel, tufanyidin kusal yom yivud kusutamu kwau kwimen pa kumekesh kujijaman. Tufanyidin kujijaman nich mayingishin mawamp. Nzamb wetu ukat kushinshikin kadiap kwau ching kusu yom tusadina pakwez kand mulong wak tuyisadina. Ukwatining nich usey nakash yibachikin yetu, mulong ukatining difukwil dietu dimena pa rukat rikurikina mulong wendendiy ni muchim wetu wa kujikitish.​—Jnsw. 16:2; Mar. 12:29, 30.

7. (a) Mud mulejenau mu Kujingunik 3:1-3, mulong ik wamanay Yesu wading urishinau nich in Kristu a ku Sarides? (b) Yom ik tufanyidina kusal?

⁷ Tang Kujingunik 3:1-3. Tufanyidin kudandamen kuchish ku mes ni kubabal. In Kristu a mu chikumangen cha Sarides ading ni milong kushalijan. Ap anch ipana nich mushiku mu mijikit ya mu spiritu pasak, pa chisu chinicha ading ashadishin kal mushiku mu mudimu wa Yehova. Yesu wayileja kand “kulank.” Dilejan ik tukutwisha kudioshaku? Chakin kamu, Yehova kakuvuramenap mudimu wetu. (Heb. 6:10) Chawiy, tufanyidinap kutongijok anch mulong twamusadidin kal Yehova kudiokal pakur, tukwetap kand kwetu kuswir kwa kumusadin nlel. Ap anch nlel tukutwish kwikal ni mimbu ya kusal yom yimwing kusutamu pasak, tufanyidin kudandamen kushal akwatikena mu “midimu ya Nsalejetu,” kushal iminya dang ni achila ku mes djat ni kwinsudien.​—1 Kor. 15:58; Mat. 24:13; Mar. 13:33.

8. Dilejan ik tudioshina ku mazu mayituminau akadivar a ku Laodisey, mud mulejenau mu Kujingunik 3:15-17?

⁸ Tang Kujingunik 3:15-17. Tufanyidin kwikal nich mushiku ni kumwifukwil Yehova nich muchim wetu wawonsu. Yesu wisambina milong kushalijan mu uruu watumay kud in Kristu a ku Laodisey. Ading nich “kalengidij” mu difukwil diau. Mulong wa kalengidij kinak, Yesu wayela anch ading mu mwikadil wa “ntany, ni chimana mar.” Ading afanyidin kumekesh mushiku ujim mulong wa Yehova ni difukwil diend. (Kuj. 3:19) Dilejan ik tukutwisha kudioshaku? Anch twashadishin kal mushiku wetu mu chilik kanang, tufanyidin kwikal in kujikitish nakash mulong wa yom yitusadidinay Yehova ni dirijek diend. (Kuj. 3:18) Tukatinap ap pakemp kwipan mu kukimb mwom usangareshina mu chilik cha kwikal ni kampuw ni kutek mijikit ya mu spiritu pa ndond ya kaad.

9. Mud mumekeshina uruu wa Yesu watumay kud in Kristu a ku Perigam ni Tiatir, ubaj ik tufanyidina kwipuk?

⁹ Tufanyidin kwipuk mafundish ma in kupumbok. Yesu wayikanda antu amwing a mu Perigam ading aletishina kwaurok. (Kuj. 2:14-16) Wayijikitisha in Kristu a ku Tiatir asala usu wa kwipuk “ujindj uyimp wa Sakudimban,” ni wayikasikesha ‘kulam baang’ uyakin. (Kuj. 2:24-26) In Kristu ading aziyina alondula mafundish minam ading afanyidin kukarumuk. Chid nchik piur petwetu nlel? Tufanyidin kwipuk mafundish mawonsu makad kutanijan ni yitongijok ya Yehova. Kwinsambishin in kupumbok akutwish kumekan mud alimishin yom yifundishinay Bibil, pakwez yisalijok yau yimekeshin anch kimwawiyap chidia.” (2 Tim. 3:5) Chikutuswapel kujingunin ni kwipuk mafundish ma makasu anch tud in kwilej akweta mushiku a Dizu dia Nzamb.​—2 Tim. 3:14-17; Jud 3, 4.

10. Dilejan ik dikwau tukutwisha kudiosh ku uruu watumay Yesu ku yikumangen ya mu Perigam ni Tiatir?

¹⁰ Tufanyidin kwipuk mulad win wawonsu wa mwikadil wijondila. Akadivar a mu Perigam ni Tiatir ading ni mulong ukwau. Yesu wayifisha nich in Kristu amwing a mu yikumangen yiney, mulong kipukap mikadil yimwing yijondila. (Kuj. 2:14, 20) Dilejan ik tukutwisha kudioshaku? Tufanyidinap kutong anch Yehova ukudiul mwikadil wetu wijondila, ap anch twamusadidin kal mu mivu yivud ni tukwet katat yisend yivud. (1 Sam. 15:22; 1 Pita 2:16) Ukatin anch tulimish yijil yend ya piur ya mwikadil wishitwila ap anch mikadil ya antu a mu mangand tushicha yiyil mu kuyip nakash.​—Efes 6:11-13.

11. Yom ik twadiokala kal mu kwilej? (Tal kand mushet: “Malejan Tudioshinaku Nlel.”)

¹¹ Mutapu ik tukutwisha kulond mu wiswimp yom twadiokala kal mu kwilej? Twaman kal anch tufanyidin kushinshikin mulong wa kwikal nich kashinsh anch difukwil dietu aditiyin kud Yehova. Anch tusadin yom tumena anch yikutwish kumukangesh Yehova kwitiy difukwil dietu, tufanyidin kuswimp pakad kulab. (Kuj. 2:5, 16; 3:3, 16) Pakwez, Yesu wajimbula chom chikwau mu uruu wend watumay ku yikumangen. Chom ik chinech?

IKAL WIRIJEKINA MULONG WA KUJIJAMEN KUZENGOL

12. Yom ik tukutwisha kwilejin ku uruu wa Yesu watumay kud akadivar a ku Simirin ni ku Filadelifiy? (Kujingunik 2:10)

¹² Tushinshikinany katat uruu watumay Yesu ku yikumangen ya mu Simirin ni Filadelifiy. Wayikasikesha in Kristu inay kulik kwov wom wa kuyizengol, mulong afanyina kuyifut mulong wa kushinshaman kwau. (Tang Kujingunik 2:10; 3:10) Dilejan ik tukutwisha kudioshaku? Tufanyidin kutek mu manangu anch akutwish kutuzengol ni kwikal irijekina mulong wa kujijaman. (Mat. 24:9, 13; 2 Kor. 12:10) Mulong wak chivurish chinech chid cha usey?

13-14. Yinship yilejenau mu Kujingunik shapitre wa 12 yikala ni yibudikin ik pad atushalapol a Yehova?

¹³ Buku wa kujingunik utulejin anch atushalapol a Nzamb afanyina kuyizengol pa “dichuku dia Nsalejetu,” charumburik anch chirung chitushicha nlel. Kujingunik shapitre wa 12 ulejen anch kwalanka njit mwiur kapamp kamwing kupwa kwa Yesu kwikal Mwant wa Want wa Nzamb. Mikayel, udia Yesu Kristu kupwa kwa kuchirik mwiur, pamwing ni chisak chend cha amasalay, arisha ni Satan pamwing nau ayilembil end. (Kuj. 12:7, 8) Mud chibudikin, ayipandikana akankuny inay a Nzamb, ni ayidjibula pansh, chawiy aletisha mar nakash kud antu ading ashicha pa divu. (Kuj. 12:9, 12) Pakwez chinship chinech chikala ni yibudikin ik pad atushalapol a Nzamb?

¹⁴ Buku wa Kujingunik utulejin kand yom yikwau yasalay Satan. Kadingap kand ni mutapu wa kuchirik mwiur, chawiy wapwishina ujim wend padiau in Kristu azizidilau many achidia pa divu. In Kristu inay ad antimesh a Want wa Nzamb ni ‘akat kulejan uman wau piur pa Kristu.’ (Kuj. 12:17; 2 Kor. 5:20; Efes 6:19, 20) Mutapu ik weza kuwanyin uprofet winou?

15. Anany afanikeshinau ni ‘atuman aad’ ajimbwilau mu Kujingunik shapitre wa 11, ni yom ik yayishikena?

¹⁵ Satan wayibachika akankuny a Nzamb kuyirishikish akadivar azizidilau many ading atakedina mudimu wa kulejan rusangu ra Want. Amakundj inay awiy afanikeshinau ni ‘atuman aad’ isambidinau mu Kujingunik afanyinau kujip.b (Kuj. 11:3, 7-11) Mu muvu wa 1918, antu chinan pakach pa akadivar ading atakedina dirijek ayifunda kwa mafef, ayifisha nich, ni dirumburish diakwata mupak anch afanyidin kusal mivu yivud nakash mu rukat. Mu kuman kwa antu, chamekana mud mudimu wa akadivar inay azizidilau many “aujipa.”

16. Yom ik yishimokishena yasadika mu muvu wa 1919, pakwez yom ik yadandamenay kusal Satan kudiosh kamu pa chisu chinicha?

¹⁶ Uprofet udia mu Kujingunik shapitre wa 11 walejana kand anch ‘atuman aad’ inay afanyina kuchirik ku mwom kupwa kwa chisu chikemp. Mu kuwanyin kwa uprofet winou, kwasadika yom yishimokishena muvu walondulaku kupwa kwa kuyikas akadivar azizidilau many. Mwi Ngond wa 3, 1919, ayibudisha akadivar inay mu rukan, ni kupwa mayingishin ma makasu mayifishinau nich amalika. Kapamp kamwing, akadivar inay achirika ku mudimu wau wa Want. Pakwez chinech chamukangeshap Satan kudandamen kuyirishikish atushalapol a Nzamb. Kudiokal kamu pinipa, Satan ukat kuletish “wit mujim” wa kuzengol pantaliken ni atushalapol a Nzamb. (Kuj. 12:15) “Wawiy mulong winou ufanyidinau antu a Nzamb kudandamen mu ritiy [ni kujijaman].”​—Kuj. 13:10.

SHAL UKWATIKENA MU MUDIMU WATWINKISHAY YEHOVA

17. Ukwash ik wakad kuchingejin watambulau atushalapol a Nzamb, chikalap nchik kurishikish kwa Satan?

¹⁷ Kujingunik shapitre wa 12 ulejen kand anch atushalapol a Nzamb akutambul ukwash udiokila kwi ndond yakad kuchingejin. Urumburil anch “divu” dikuminy “wit” wa rupompat. (Kuj. 12:16) Chinech chawiy kamu chom chasadika. Yisu yimwing, yom yimwing yidia mu mangand ma Satan, mud dirumburish dia mangand, yikat kuyilondin antu a Nzamb. Yisu yivud, atushalapol a Yehova ayingang nich ku dirumburish, ni chinech chasalang anch ikal ni want ipau mu chilik kanang. Mutapu ik wasadinangau want ipau winou? Asadina chisu chinech nich manangu mulong wa kwipan mu mudimu wayinkishau kud Yehova. (1 Kor. 16:9) Yom ik yading yitina kusal mu mudimu winou?

18. Mudimu ik tufanyidina kutek pa ndond yakusambish mu machuku minam ma nsudien?

¹⁸ Yesu wasambela kulond anch in kwilejend afanyina kulejan “rusangu ruwamp ra Want wa Nzamb” pa mangand mawonsu kurutu disudiel dieza. (Mat. 24:14) Mu kusal mwamu, akat kutambul ukwash wa mwangel, ap chisak cha angel, alejenau anch akwet “rusangu ruwamp rushichinga chikupu mulong wa kuyirumburil antu ashicha pa mangand, antu a mangand mawonsu, ni a michid yawonsu, ni a jindim jawonsu, chakin, kudi antu awonsu.”​—Kuj. 14:6.

19. Uruu ik ukwau ufanyidinau kulejan antu amukatina Yehova?

¹⁹ Atushalapol a Nzamb kafanyidinap ching kusu kwimen pa kulejen rusangu ruwamp ra Want. Pakwez afanyidin kand kukwash mudimu wa angel alejenau mu Kujingunik shapitre wa 8 kushik ku 10. Angel inay akat kulejan milad kushalijan ya yom yiyimp yikuyishikena antu abwambwidina ku Want wa Nzamb. Chawiy, Atuman a Yehova akat kulejan uruu wa dirumburish, ufanikeshinau ni “mayal ma ruvul ni kasu,” marumburishina dirumburish dia Nzamb pantaliken ni yom kushalijan yidia mu mangand mayimp ma Satan. (Kuj. 8:7, 13) Antu akwet kuswir kwa kwijik anch disudiel did piswimp chakwel ashiken kuswimp mwom yau ni kupand ku dichuku dia ujim wa Yehova. (Sof. 2:2, 3) Pakwez antu avud kasangaredinap uruu winou. Mulong wa kulejan uruu winou, chitin kutakaman ku mutambu wetu. Pa chirung cha mar makash, uruu wansudiel wa dirumburish ukuyitap antu ku muchim nakash.​—Kuj. 16:21.

ZIYIN MAZU MA UPROFET

20. Yom ik tukwisambina mu mitu ya milong yaad yambakedinap?

²⁰ Tufanyidin chakin kamu kuziyin “mazu ma uprofet winou” mulong kuwanyin kwa yom tutangina mu buku wa Kujingunik kututadin kand niyetu. (Kuj. 1:3) Pakwez mutapu ik tukutwisha kujijamen nich kushinshaman kuzengol, ni kudandamen kwipan nich kutakaman mu kulejan uruu winou? Kud yom yaad yikutwisha kutukasikesh: chakusambish, yom yilondinay buku wa Kujingunik piur pa akankuny a Nzamb, cha kaad, yiyukish tukutambula machuku ma kurutu anch twashal ashinshamena. Tukwisambin yom yiney mu mitu ya milong yaad yambakedinap.