Nsand—Kasikesh Rusot Rey Ra Kumusadil Yehova
“Muvurika Sakatang wey mu machuku ma usand wey.”—MUL. 12:1.
1. Ov, diladikij ik diapanau kud an mu Isarel?
PASUTIN kal mivu 3.500, Moses muprofet wa Yehova wayileja in kupesh ni amakurump a in Isarel anch: “Yikumangejany antu, amakundj, ni amband, ni an, . . . , chakwel niyau atesha, ilej kumwov [Yehova] Nzamb wen wom chakwel kand alama ni kusadil mazu mawonsu ma Yijil yiney.” (Kuv. 31:12) Tumen anch antu ayulau anch akumangana mulong wa kwifukwil ading: amakundj, amband, ni an. Mwawiy, ap ansand adinga pakach pa antu alejau anch atesha, ilej, ni alondula umutakel wa Yehova.
2. Mutapu ik wamekeshay Yehova anch uyibangidin ansand mu chikumangen cha in Kristu chakusambish?
2 Mu chitot cha mivu chakusambish, Yehova wadandamena kuyibangin ansand amwovila Nzamb wom. Chilakej, ndiy wamupepidila kambuy Paul chakwel afunda yany yisamibina piur pa ansand mu mutapu wa pakampwil mu mikand yimwing yatumay ku yikumangen. (Tang Efes 6:1; Kolosay 3:20.) Ansand in Kristu asadila yiyul yiney aya kurutu mu kumusanger Tatukwau mukatish wa mwiur ni atambula yiyukish yend.
3. Ov, mutapu ik umekeshinau ansand nlel unou rusot rau ra kumusadil Nzamb?
3 Ov, ansand ayitazukin nlel unou chakwel akumangana mulong wa kumwifukwil Yehova? Mwawiy! Chidi kamu chom chisangareshina kudi antu awonsu a Nzamb pakuyimanau atushalapol ansand avud mu mangand mawonsu pitiyijinau nich muchim wawonsu chiyul chiletinay Paul anch: “Tutongijokany kulangwish muntu ni muntu ku rukat ni midimu yiwamp; kangal tulikany kukumangan kwetu ayinetu, mudi mudia chaku cha antu amwing, pakwez tubabeshijany muntu ni mukwau; chipandikenamu mudi en wijanya anch dichuku dikat kusej piswimp.” (Heb. 10:24, 25) Chikwau kand, an avud ipanin pamwing ni anvaj au mu kulejan rusangu ruwamp ra Want wa Nzamb. (Mat. 24:14) Mulong wa kumekesh anch amukatishin Yehova nich muchim umwing, mamiloyon mavud ma ansand ipanin ayinau mulong wa kuyibabatish ni asangeridin yiyukish yidiokila ku kwikal in kwilej a Kristu.—Mat. 16:24; Mako 10:29, 30.
Itiyij diladikij—Katat
4. Ov, Ansand a chimbu cha mivu yinch afanyidina kwitiyij diladikij dia Nzamb dia kumusadil?
4 Mulej 12:1 ulondin anch: “Muvurika Sakatang wey mu machuku ma usand wey.” Ov, ey nsand ufanyidin kwikal nich mivu yinch chakwel witiyija diladikij dia chirungul dia kumwifukwil ni kumusadil Yehova? Kwikil chimbu cha mivu chitinau mu Bibil. Chawiy lel, kangal walik kumutesh Yehova ni kumusadil mulong uchidi mwanikanch nakash. Chikalap nchik chimbu cha mivu ukweta, akukasikeshin kwitiy ku diladikij dined pakad kulab.
5. Mutapu ik ukutwishau anvaj kuyikwash anau kuya kurutu muspiritu?
5 Avud pakach pen ayikwashin kuya kurutu mu spiritu kudi nvaj wend umwing ap awonsu aad. Pachinech, ukutwish kwikal mudi Timote wa pa chirung chafundau Bibil. Padingay mwanikanch, amufundisha Mukand wa Nzamb kud makwend Yunice, ni ngakend Lois. (2 Tim. 3:14, 15) Chilik chimwing, anvajey akufundishin chilik chimwing kusutil ku dilejan dia Bibil, ni kulembil pamwing ney, ayil ney ku yikumangan ya chikumangen ni yitentam yijim ya antu a Nzamb, ni kuya ney mu mudimu wa chingand. Chakin kamu, kukufundish jinjil ja Nzamb chidi chisend cha usey nakash chatambulau anvajey kudi Yehova amwinend. Ov usangeridin rukat rau ni mutapu ukubangidinau?—Jinsw. 23:22.
6. (a) Kwambatan nich Kuseng 110:3, difukwil dia mutapu ik dimusangareshina Yehova? (b) Ov, yom ik tukushinshikina katat?
6 Piupaminanya en Ansand, Yehova usotin anch “wijikangany yiwapila ni yirijekidina ni yiwanyidina ku rusot ra Nzamb,” mudi mwasalay Timote. (Rom 12:2) Anch wasalany mwamu, ukwipananyap mu mijikit ya chikumangen anch mulong anvajen asotin mwamu bwat, pakwez mulong usotinany kusal rusot ra Nzamb. Anch wamusadilany Yehova nich muchim wa kwipan, ukez kamusangareshany. (Kus. 110:3) Chad mutapu ik ukutwishanya kumekesh anch usotinany kukasikesh rusot ren ra kumutesh Yehova ni kulondul umutakel wend? Tukez kushinshikin mitapu yisatu ya usey yiukutwishanya kusadil mwamu. Kudi dilejan, malembil, ni yisal. Shinshikinany amboku yom yiney.
Mwijika Yehova Mudi Muntu
7. Mutapu ik washay Yesu chilakej cha kwikal mwin kwilej Mukand wa Nzamb, ni yik yamukwasha kusal mwamu?
7 Mutapu wa kusambish wa kumekesh anch usotin ku kasikesh rusot rey ra kumusadil Yehova udi kutang Bibil dichuku ni dichuku. Ukutwish kuwanyish maswir mey ma muspiritu ni kutambul ronganyin ruwamp ra Bibil kusutil ku kutang Dizu dia Nzamb dichuku ni dichuku. (Mat. 5:3) Yesu washa chilakej. Pa chisu chimwing padingay ni mivu 12, anvajend amutana mu tempel, “ushich nau alej a in Yuda, ukat kuyitesh, chad ukat kuyipul kand.” (Luka 2:44-46) Padingay uchidi mwanikanch, Yesu wading wakudishin kal rukat rend ni kutesh kwa Mukand wa Nzamb. Yik yamukwasha kusal mwamu? Makwend, Mariy, ni Tatukwend Josef amulila amukwasha nakash. Ading atushalapol a Nzamb amufundisha Yesu malejan ma Nzamb kudiosh ku wanikanch wend.—Mat. 1:18-20; Luka 2:41, 51.
8. (a) Chisu ik chifanyidinau anvaj kuyandjik anau rukat ra Dizu dia Nzamb mu michimu yau? (b) Rumburil yom yashikena yimekeshina usey wa kuyifundish an kudiosh ku wanikanch wau.
8 Chilik chimwing, anvaj amwovila Nzamb wom itiyijin usey wa kuyandjik anau mu michim rukat ra uyakin wa Bibil kudiosh pawanikanch. (Kuv. 6:6-9) Yawiy yasalay Rubi, nambaz umwing mwin Kristu, kupwa kwa kuvadik kwa mwanend wa kusambish, Josef. Wading umutangidin dichuku ni dichuku Recueil d’histoires bibliques. Pasambishay kupam, ndiy wamukwasha kulam ma verse mavud. Ov, Josef wataninamu mu malejan minam? Pilejay kulond, ndiy watwisha kurumburil jinsangu jivud ja Bibil mu mazu mend. Ni pawanyinshay mivu yitan, wasala diskur diend diakusambish ku Shikol ya Mudimu wa Uteokras.
9. Ov, mulong wak kutang Bibil ni kutongijokin pa yiutangina kudi kwa usey?
9 Chakwel uyany kurutu mu spiritu, en ansand ufanyidinany kwikal nich chaku cha kutang Bibil dichuku ni dichuku piukwetanya mivu dikum ni piupaminanya. (Kus. 71:17) Mulong wak kutang Bibil kukez kakukwash kuya kurutu? Tesh yalonday Yesu pamulembilay Tatukwend anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.” (Yoh. 17:3) Chikwau kand, piudandamedina kuwejinaku ku ronganyin ra Yehova, ukez kumuman patok anch udi Muntu chakin kamu ni ukez kukasikesh rukat rey padi ndiy. (Heb. 11:27) Chikwau kand, chisu ni chisu chiutangina chikunku cha Bibil, sadil chisu chinech mulong wa kwilej yom yivud piur pa Yehova. Iyipula amwiney anch: ‘Ov, jinsangu jinej jinlejin chom ik piur pa untu wa Yehova? Mutapu ik umekeshinay verse winou wa Bibil rukat ra Nzamb ni kwimbangin kwend?’ Kwitekin chisu cha kutongijokin pa yipul yiney kukez kakukwash wileja mutapu ukatay kutong Yehova, kwov ni yikwitinay kusal. (Tang Jinswir 2:1-5.) Mudi mwadingay nsand Timote, ukez ‘kwitiyij’ yiwilejina mu Mukand wa Nzamb, ni yikez kakubachik kumwifukwil Yehova nich muchim wa kwisotin.—2 Tim. 3:14.
Malembil Makasikeshin Mutapu ik
Rukat Rey Kudi Yehova
10, 11. Mutapu ik ukukwashina malembil kukasikesh rusot rey ra kumusadil Nzamb?
10 Mutapu wakaad ukutwisha kukasikesh rusot rey ra kumusadin Yehova nich muchim wawonsu madi malembil mey. Mu Kuseng 65:2, tutangin anch: ‘Antu awonsu akwez kudi ey anch yitil yapandikena, ey ukata kutesh kulembil.’ Ap pa chisu chadingau in Isarel antu a manswik ni Nzamb, angendj eza mu temple wa Yehova niyawiy adinga ni kumushejin kusutil malembil mau. (1 Ant 8:41, 42) Nzamb kakwetap katond. Antu aziyidila ku yijil yend akwet kashinsh anch ukez kayitesh. (Jinsw. 15:8) Chakin kamu, ‘antu awonsu’ kuwejinaku ni ansand.
11 Wij anch mufulandal wa urund win wawonsu wakin kudi kwambamb kuwamp. Pamwingap, usangeridin kwisambin yitongijok, milong ni yovil yey nau arund a piswimp nakash. Chilik chimwing, kusutil ku malembil madiokila ku muchim, ukutwish kwisamb nenday Sakatang wey mujim. (Fil. 4:6, 7) Muleja Yehova yom yawonsu yiukweta ku muchim mudi muukata kwisamb ni nvaj mukatish ap murund wa piswimp nakash. Pakwez, kwikil kushalijan pakach pa mutapu wa kulembil kwey ni yovil yey piur pa Yehova. Ukez kuman anch ang wakasikesh urund wey ni Yehova, malembil mey makwikal ma usey nakash.
12. (a) Mulong wak malembil ma usey nakash mimediningap ching pa mazu? (b) Yik yikeza kukukwash ujingunina anch Yehova udi piswimp ney?
12 Vurik anch, chikalap nchik, malembil ma usey mimediningap ching pa mazu, mimedining kand pa yovil yidia mu muchim wey. Mu malembil mey, mekesh rukat rey rikash, kalimish kajim, ni kumuchingejin nakash Yehova. Anch wajingunin mutapu wakwilay Yehova ku malembil mey, ukez kuman anch: “[Yehova] udi piswimp kudi awonsu akat kutazuk padi ndiy.” (Kus. 145:18) Mwaning, Yehova ukez kakusejin piswimp, ukez kakukasikesh chakwel urisha nend Djabul ni ukwata yiyul yiwamp mu mwom.—Tang Jakob 4:7, 8.
13. (a) Mutapu ik wamukwasha urund nenday Nzamb nambaz umwing? (b) Mutapu ik ukukwashina urund ni Nzamb kurish nich yipwichik ya ambay?
13 Shinshikin mutapu wikasikeshay Cherie kusutil urund wa piswimp nakash wadingay ni Yehova. Ku universite, ndiy watwisha mulong wileja nawamp ni wasala masengan nawamp. Papwishay shikol, amwinkisha bourse wela kumukwash kudandamen nich shikol ya piur. Cherie ulondin anch: “Changinkishau chading mulong wa kwingoz, alej ni ambay a shikol ankasikesha nakash chakwel nitiyij.” Ndiy wajingunina anch kuya nich shikol ya piur nakash kwela kumwit yisu yivud nakash mulong wa kwilej ni kurijek yinship pa masengan—ni kusha ka chisu kakemp mulong wa kumusadil Yehova. Ov, chom ik chasalay Cherie? Ndiy ulondin anch: “Kupwa kwa kumulembil Yehova, nalika kusend bourse ni nasambisha kusal mudimu wa uchibol wa rawonsu.” Pa chisu chinicha, wasala mudimu wa uchibol mu mivu yitan. Ulondin anch: “Ningenganenap. Nij anch nakwatin chiyul chinech mulong wa kumusangaresh Yehova, ni chinsangareshin nakash. Chakin kamu anch watek Want wa Nzamb pa ndond ya kusambish , ndiy ukukuwejinaku yom yiney yawonsu.”—Mat. 6:33.
Yisal Yiwamp Yimekeshin anch
Ukwet “Muchim wa Zwang”
14. Mulong wak Yisal yey yiwamp yidi ya usey kumes kwa Yehova?
14 Mutapu wakasatu ukutwisha kumekesh anch umusadidil Yehova nich muchim wa kwisotin yidi yisal yey. Yehova uyiyukishin ansand akweta yisal yishitwila. (Tang Kuseng 24:3-5.) Mwan nsand Samuel walika kwimburij Yisal ya masandj ya an a Mwin kupesh Mujim Eli. Yisal yiwamp ya Samuel yamekana patok. Bibil ulondin anch: “Nsand Samuel wakudila mu chimbu ni mu dilau kudi [Yehova] ni kudi antu.”—1 Sam. 2:26.
15. Ov, mayingish ik, makubachikina kudandamen kusal yom yiwamp?
15 Tudi mu mangand mwizwila ni antu ikatina ayinau, in kwibaz, in kuyibwambwil anvajau, akad kujikitishang, akad kulimish yom yitumbila, in chisum, in kwitutul, in kukat yom ya kwisangarish ayinau kupandakan kumukat Nzamb.—anch twajimbul yisal yawonsu yafundau kud Paul. (2 Tim. 3:1-5) Chawiy lel chikutwish kukukasiken chakin kamu kusal yom yiwamp mulong udi mukach mwa antu ayimp. Pakwez, chisu ni chisu usadina yom yitentamina ni kulik yisal yiyimp, umekeshin anch udi kumutambu wa Yehova piur pa chipul chijim cha ukaleng wa mangand mawonsu. (Job 2:3, 4) Usangaredin kand pa kwijik anch witiyijin ku yom yitinay Yehova nich chirungul anch: “Mwanam ikundj, ikal mwin manangu chakwel wez usangarish muchim wam, mwamu niyam nikutwish kumwakul muntu ukwinsala masaal.” (Jinsw. 27:11) Chikwau kand, anch wijik anch Yehova ukwitiyijin chinech chikez kakasikesh rusot rey ra kumusadil ndiy.
16. Mutapu ik wasangareshay nambaz umwing muchim wa Yehova?
16 Padingay nich mivu dikum, changadim umwing mwin Kristu upidilau anch Carol wipana ku kulondul yany ya Bibil padingay ku shikol, ni yisal yend yiwamp yamekana patok. Ov, yik yashikena? Carol warisha nich kumusipol kudi ambay nend a shikol mulong kom kend kilejina Bibil kakangesha kwiyandjik mu misambu ya machuku matumbila ni mu misambu ya wan-a-ngand. Pa yisu yiney, ndiy watwisha kuyirumburil antu akwau yitiyij yend. Pasuta mivu yivud, Carol watambula ka mukand kadiokila kudi changadin umwing wadinga pasak mbay nend wa shikol wafunda anch: “Nichingejining kukuman chakwel nikujikitisha. Yisal yey yiwamp ni chilakej chey cha nsand mwin Kristu, nich kushinshaman kwey piur pa kulik kwiyandjik mu misambu, kwamekana patok. Yeya wadinga muntu wakusambish wanleja mutapu mudingau Atuman a Yehova.” Chilakej cha Carol chayishimokisha nakash ambay nend a shikol ni kupwa asambisha kwilej Bibil. Ndiy wafunda mu mukand wamutuminay Carol anch kudiosh pamubatishay wikal kaman pasutin kal mivu 40! Mudi Carol, Nlel unou, ansand alondwila nich kushinshaman yany ya Bibil akutwish kuyibachik antu akweta muchim uwamp chakwel amwijika Yehova.
Ansand Akata Kumushiman Yehova
17, 18. (a) Ov, wiyovil nchik piur pa ansand adia mu chikumangen chey? (b) Yom ik yikezau kutambul ansand amwovila Nzamb wom mu machuku ma kurutu?
17 Etwawonsu tudia mu dirijek dia Yehova mu mangand mawonsu tusangaredin pa kuman mamiliyon mavud ma ansand akweta mushiku ipanina mu difukwil diakin! Ansand inay akasikeshin rusot rau ra kumwifukwil Yehova kusutil ku kutang Bibil dichuku ni dichuku, kusutil ku malembil, ni kusutil ku kushakam ayinau kukwatijan nich rusot ra Nzamb. Ansand inay akweta chilakej chiwamp ayisangareshin nakash anvajau ni antu awonsu a Yehova.—Jinsw. 23:24, 25.
18 Mu machuku ma kurutu, ansand ashinshamena akez kwikal pakach pa antu akeza kupand ni kwandam mu mangand masu ma kushilamu kwa Nzamb. (Kubur. 7:9, 14) Mwinimwa, akez kuman yiyukish yivud nakash pakezau kudandamen kukul mu kumusanger Yehova, ni akez katwish kumushiman chikupu.—Kus. 148:12, 13.
Ov, Uvurikin?
• Mutapu ik ukutwishau ansand kwipan nlel unou mu difukwil diakin?
• Mulong wak kutongijokin kudi kwa usey chakwel utaninamu mu kutang kwa Bibil?
• Mutapu ik makukwashina malembil kusej piswimp ni Yehova?
• Yom ik yashikena kusutil ku yisal yiwamp ya mwin Kristu umwing?
[Chipich chidia pa paj wa 17]
Ov, ukwet chaku cha kutang Bibil dichuku ni dichuku?