Akadivar—Kunany Ku Spiritu Ni Wanyishany Yisend Ya Mudimu!

“Ndiy ukata kukunyin ku spiritu, ukez kapodil ku spiritu mwom wa chikupu.”—GAL. 6:8.

1, 2. Ov, mutapu ik ukata kuwanyin Mateu 9:37, 38, ni ukulet kuswir ik mu yikumangen?

RIDI rusangu ripanina uman rashikena! Mudimu watakelau kulejan kudi Yesu usadikin nlel unou. Yesu walonda anch: “Yakwangul yidi yivud, pakwez in mudimu wa kwangul adi akemp. Mulembilany mwin chir chakwel [atuma] in mudimu wa kwangul avud.” (Mat. 9:37, 38, MN) Yehova Nzamb witiyin malembil minam mu mutapu umwing wa pakampwil. Mu muvu wa 2009 wa mudimu, uvud wa yikumangen ya Atuman a Yehova pa mangand mawonsu wiwejinaku kudiokal ku 2031, kushik ku 105298. Mwayen wa antu, 757 ayibatishinau dichuku ni dichuku!

² Kuvulijan kwinoku kwasarumuna kuswir kwa akadivar awanyishina yisend mulong wa kutakel malejan ni mudimu wa ukafung mu yikumangen. (Efes 4:11) Mu mivu dikum yasutina, Yehova watekin kal antu awanyishina yitinau mulong wa kuwanyish maswir ma amikoku end, ni tuchingejin anch ukez kandandamen kuyitek. Uprofet wafundau mu Mike 5:5, (NW) utukasikeshin anch mu machuku mansudiel, antu a Yehova akez kwikal ni “atufung sambwad” ni “ayilol chinan,” ukez kwikal uvud upandakena wa antu awanyidina mulong wa kuyitakel.

3. Rumburil dizu ‘kukunyin ku spiritu.’

³ Anch udi ikundj wabatishau kal mudi Kaman wa Yehova, chom ik chikeza kukukwash kusot kuwanyish yisend ya midimu? Chom cha usey chiufanyidina kusal chidi ‘kukunyin ku spiritu.’ (Gal. 6:8) Pakusal mwamu chifanyidin kwikal nich mwikadil wa kulikidil spiritu asala usu musotinay mu mwom wey. Itekina mupak wa kulik ‘kukunyin ku mujimbu.’ Kwipuk kulikidil yom mudi mashakim mawamp, kwiswedish, ni kwipuwangesh kukepisha rusot rey ra kwipan nakash mu mudimu wa Nzamb. In Kristu awonsu afanyindin ‘kukunyin ku spiritu,’ pakwez, amakudj asadina mwamu akutwish kuwanyish yisend mu chikumangen. Mulong nlel unou kudi kuswir kukash kwa ankwash a mudimu ni amakurump, mutu wa mulong winou aufundin pakampwil mulong wa amakundj in Kristu. Pakwez, tukukasikeshinany akadivar, chakwel ushinshikinany mutu wa mulong winou mu malembil.

Wanyish Mudimu Uwamp

4, 5. (a) Ov, yisend ik yiyikasikeshinau amakundj abatishinau kuwanyish mu chikumangen? (b) Mutapu ik ukutwishay muntu kuwanyish yisend yiney?

⁴ Mwin Kristu kakutwishap kwikal kalam kapamp kamwing. Ufanyidin kuwanyish “mudimu uwamp.” (1 Tim. 3:1) Mu mudimu uwamp mudi kuyisadin ambay akaritiy mu kuwanyish maswir mau mu mutapu wakin. (Tang Isay 32:1, 2.) Muntu usotina kwikal kalam nich yitongijok yiwamp kakimbiningap kwibaz bwat. Pakwez, ukwet rusot ra kuyikwash antu akwau.

⁵ Muntu ukutwish kusal usu chakwel ikala nkwash a mudimu ni kupwa kwikal kalam kusutil ku kuwanyish yitinau yifundinau mu Mukand wa Nzamb. (1 Tim. 3:1-10, 12, 13; Titus 1:5-9) Anch udi ikundj wipanina kal, iyipula amwiney anch: ‘Ov, nipanin nakash mu mudimu wa kulejan, ni niyikwashin antu akwau kusal mwamu? Ov, mutapu ik niyikasikeshina ambay nam akaritiy kusutil ku kubangin maswir mau? Ov, nikwet katumb ka kwikal mwin kwilej muwamp wa Dizu dia Nzamb? Ov, nikat kwakulang nawamp? Ov, nisadining nawamp midimu yikatau kwinginkish kudi amakurump?’ (2 Tim. 4:5) Chifanyidin kushinshikin nakash pa yipul yiney.

6. Ov, chom ik chidia cha usey mu kuwanyish yisend mu chikumangen?

⁶ Mutapu ukwau wa kuwanyish yisend mu chikumangen udi “[kukasakan] nich usu ku spiritu wend mukach mwa muntu.” (Efes 3:16) Kwikiling kutond chakwel anch muntu ikala nkwash a mudimu ap mukurump mu chikumangen cha win Kristu. Pakwikal nich chisend chinech chifanyidin kukul muspiritu. Ov, mutapu ik chitwishikina kuya kurutu? Mutapu wa kusambish, ufanyidin ‘kwendil ku spiritu’ ni kukudish dibuj diend. (Gal. 5:16, 22, 23) Anch wamekesh patok mikadil ya muspiritu yitinau mulong wa kuwanyish yisend yikwau, ni wasadil yiyul chakwel uya kurutu, “kujimb kwey kukumekan kudi antu awonsu.”—1 Tim. 4:15.

Chifanyidin—Kwikal ni Spiritu wa Kwipan

7. Kuyisadil antu akwau kwitin chom ik?

⁷ Kuyisadil antu akwau kwitining mudimu ukash ni spiritu wa kwipan. Mulong atulam in Kristu adi atufung a muspiritu, milong ya chisak cha amikoku yiyitadin nakash. Tal mutapu wakwachikay kambuy Paul nich yisend ya mudimu wend wa ukafung. Ndiy wayileja ambay nend in Korint anch: “Ni ushon uvud ni muchim unenganena, ni mansoj ku mes, kichidip mulong en wovany ushon, pakwez chidi mulong en wijikany kujimb kwa rukat rininukatila nich en.” (2 Kor. 2:4) Chimeken anch Paul wateka muchim pa mudimu wend.

8, 9. Let yilakej ya Bibil yimekeshina mutapu wawanyishau antu maswir ma antu akwau.

⁸ Spiritu wa kwipan uding chijingidij cha antu asala mudimu mulong wa kuyikwash atushalapol a Yehova. Chilakej, chikutwish kutukasiken kumuman Nowa mu manangu metu ukat kudilej dijuku diend anch: ‘Nlejany bil dichuku dikeza kupwa waat chawiy lel ni kukukwashany kuusal.’ Moses kayilejap in Isarel mu Idjibit anch: ‘Nikez kakutanany ku karung Musuz. Tondany njil yiwamp yiukutwishany kulondul.’ Yoshua kalondap anch: ‘Nlejany bil chisu jikeza kuwa jimbumbu ja Yeriko.’ Ni Isay kamujimbulap muntu mukwau ni kulond anch: ‘Ndiy! Mutuma.’—Isay 6:8.

⁹ Chilakej chetu cha kusambish cha muntu walikidila spiritu wa Nzamb amubachika chadinga cha Yesu Kristu. Ndiy witiya cha kwikatil mudimu wend wa kwikal mupandish wa antu. (Yoh. 3:16) Ov, rukat ra kwipan rutubachikinap ni yetu chakwel twikala nich muchim wa kwipan? Palejanay yovil yend piur pa chisak cha amikoku, mukurump umwing walabina kal walonda anch: “Pamwelau Pita kudi Yesu anch—lam amikoku am—mazu minam mankasikesha nakash. Pasuta mivu, nashikena ku kwitiyij mutapu ukutwisha mazu makemp ma rukat ap chisal chikemp chiwamp kumukasikesh muntu mukwau. Ukafung udi mudimu unisangaredina nakash.”—Yoh. 21:16.

10. Chom ik chikutwisha kumubachik ikundj mwin Kristu kwimburij chilakej cha Yesu cha kuyisadil antu akwau?

¹⁰ Anch chifanyidin kulam chisak cha amikoku a Nzamb, amakundj ipanina kal adia mu chikumangen asotining chakin kamu kumekesh mwikadil wa Yesu, walonday anch: “Am ni kuninkishany kwiswedish.” (Mat. 11:28) Ritiy mudi Nzamb ni rukat ra chikumangen riyibachikin amakundj in Kristu kuwanyish mudimu winou uwamp, pakad kutong anch ukasiken ap witin yom yivud ya kusal. Chidi nchik anch, muntu kasotinap kuwanyish yisend ya mudimu? Ov, mukadivar ukutwish kusot kusadil chikumangen?

Kudish Rusot ra Kusal Mudimu

11. Ov, mutapu ik ukutwishay muntu kukudish rusot ra kuyisadil antu akwau?

¹¹ Anch yovil ya kuburen kuwanyish ya kukangesh kusal mudimu, ufanyidin kulembil mulong wa kwak spiritu utumbila. (Luka 11:13) Spiritu wa Yehova ukez kakukwash upandakana wom wawonsu ukutwisha kwikal nich pa milong yiney. Rusot ripandakena ra kusal ridi chipan cha Nzamb, mulong spiritu wa Yehova ndiy ukata kuyibachik akadivar chakwel akasikesha kupan usu wa kusal mudimu utumbila. (Fil. 2:13; 4:13) Chawiy lel, chidi cha usey kumwit Yehova chakwel atukwasha kukasikesh rusot ra kwitiy yisend ya mudimu.—Tang Kuseng 25:4, 5.

12. Mutapu ik ukutwishay muntu kwikal ni manangu ma kuwanyish yisend yimwinkishinau?

¹² Pakumanay anch maswir ma chisak cha amikoku makasiken kumawanyish ap madi makash, mwin Kristu ukutwish kukwat mupak wa kulik kwikal nich yisend ya mudimu. Ap ukutwish kwiyov anch uburedin manangu mawanyidina mulong wa kuwanyish yisend yiney. Anch chidi mwamu, ukutwish pamwing ap kutambul manangu ma kwikal mwin kwilej Dizu dia Nzamb nich mushiku ni mikand yimedina pa Bibil. Ukutwish kwiyipul amwinend anch, ‘Ov, nitekidin chisu cha kwilej Dizu dia Nzamb, ni kulembil mulong wa kwikal ni manangu?’ Mwin kwilej Jakobu wafunda anch: “Anch umwing wenen waburen chiyul, lik amwita Nzamb, ndiy ukat kupan yiwenaku, kakwitatangip, akez kachimwinkish.” (Jak. 1:5) Ov, witiyijin dizu dined diapepilau kudi Nzamb? Pamwakulay Salomon ku malembil mend, Nzamb wa mwinkisha “muchim wa manangu wa kwijik” wamukwasha kujingunin pakach pa uwamp ni uyimp padingay ni kurumburish. (1 Ant 3:7-14) Chakin, mwikadil wa Salomon wading wa pakampwil. Chikwau kand, tukutwish kwikal nich ruchingej anch Nzamb ukez kapan manangu kudi amakundj akweta yisend mu chikumangen chakwel atwisha kuyilam amikoku nawamp.—Jinsw. 2:6.

13, 14. (a) Rumburil mutapu “rukat ra Kristu” ramusadisha Paul (b) Mutapu ik ritukasikeshina “rukat ra Kristu”?

¹³ Chom chikwau chikutwisha kukwash kukudish rusot ra kuyisadil antu akwau chidi kutongijokin nakash pa yawonsu yasalay Yehova ni Mwanend mulong wetwetu. Chilakej, shinshikin 2 Korint 5:14, 15. (Tang.) Mutapu ik “rukat ra Kristu rukat kutusadish etu”? Rukat ramekeshay Kristu papanay mwom wend mulong wetwetu kwambatan nich rusot ra Nzamb ridi ramushena nakash chawiy lel kujikitish kwetu kupandiken, ni muchim wetu ukwachikin nakash. Rukat ra Kristu ramutakela Paul. Ramukangesha kwisotil amwinend ni ramukwasha kwikal nich yitongijok ya kumusadil Nzamb, ni kuyisadil amby netu adia mu chikumangen ni adia pol pa chikumangen.

¹⁴ Kutongijokin nakash pa mutapu wayikatay Yesu antu kutubachikin kwikal nich muchim wa kujikitish. Kupwa, tukez kaman anch chikwikal chom chiyimp nakash anch twadandamen ‘kukun mu mujimbu’ kusutil ku kulondul yitongijok ya choy ni kushakam mulong wa kwisangaresh ayinetu. Pakwez, tufanyidin kutenchik midimu yetu mulong wa kutek mudimu watwinkishay Nzamb kusal pandond ya kusambish. Atukasikeshin kwikal ‘atushalapol’ a akadivar netu mu rukat. (Tang Galate 5:13.) Anch twisal ayinetu kwikal atushalapol ayisadidina nich kwitudish atushalapol ipanina kudi Yehova, tukez kashakam nau nich kalimish. Chakin kamu, tukezap kwimburij spirit wa kuyikand akwau, ni kunyinyit kwakasikeshau kudi Satan.—Kuj. 12:10.

Usu wa Dijuku

15, 16. Ov, yid ya dijuku yikukwash mutapu ik anch tatuku usotil kuwanyish yitinau chakwel ikala nkwash a mudimu ap mukurump?

¹⁵ Anch mukadivar udi ngatan ukweta an, mwikadil wa dijuku diend udi wa kushinshikin pakusambishau kutal anch uwanyishin yitinau anch bwat chakwel ikala nkwash a mudimu ap mukurump. Chikwau kand, mwikadil wa muspiritu ni katumb ka dijuku diend yikwatijadin nich chisend chikutambulay. Chinech chikasikeshidin usey wa mudimu ukweta dijuku mu kumukwash ikundj ni tatuku ukimbina kusadil yisakim ya chikumangen mudi nkwash a mudimu ap mukurump.—Tang 1 Timote 3:4, 5, 12.

¹⁶ Yehova ukat kusangar anch yid ya dijiku dia win Kristu yisadil mu kwovijan. (Efes 3:14, 15) Mutu wa dijuku ufanyidin kwikal wisikena mulong wa kuwanyish yisend ya chikumangen ni kutakel dijuku diend “nawamp.” Chawiy lel, chidi cha usey anch mukurump ap nkwash a mudimu ileja Bibil ni mukajend, ni anend chawiy lel awonsu akutwish kutaninamu yiyukish mu Difukwil dia Dijuku rubing ni rubing. Ndiy ufanyidin kusal mudimu wa chingand pamwing nau pakad kujing. Chawiy lel, chidi cha usey anch yid ya dijuku yasadil pamwing mu kwovijan nich usu wa mutu wa dijuku.

Ov, Ukez Kasal Kand?

17, 18. (a) Anch mukadivar kand kal awanyisha chisend cha mudimu, yik yifanyidinay kusal? (b) Ov, chitongijok ik chikutwishay kwikal nich mukadivar wikala pasak mukurump ap nkwash a mudimu?

¹⁷ Pamwingap wading mukurump ap nkwash a mudimu pa chisu kanang pakwez katat ukwetap yisend yiney. Umukatin Yehova ni ukwet kashinsh anch udandamedin kukulam. (1 Pita 5:6, 7) Ov, watongin kal anch uswiridin kutenchik yom yimwing mu mwikadil wey? Itiyij chilim chiukweta ni sal usu chakwel Nzamb akukwasha. Ipuk kwov kuyip. Ikal ni manangu, ni mekesh spiritu muwamp. Mukurump umwing wasala mivu yivud kupwa washadish yisend yend ulejen anch: “Nitekina rutong ra kudandamen kukumangan, kuya kulejan, ni kutang Bibil mudi pa chisu pinadinga mukurump—rutong rinatwisha kuwanyish. Nileja kushimpish muchim mulong nading nitongin anch nikez kachirikin kand yisend yam mu muvu umwing ap yaad, pakwez pasuta mivu piswimp musamban kurutu kwa kuchirikin kand chisend cha ukurump. Pa chisu chinicha dikasikesh dia kwel anch kangal waziy, pakwez dandamen kuwanyish yisend ya mudimu diankwasha nakash.”

¹⁸ Anch udi mukadivar kwetu mwikadil ufanikena ni ulejenau pinap, kangal waziy. Tongin pa mutapu uyukishinay Yehova mudimu wey wa kulejan ni dijuku diey. Kasikesh mwikadil wa muspiritu wa dijuku diey, yendila ayej, ni yikasikesha aziyina. Kupwa, sanger chisend chey cha kumushiman Nzamb ni cha kulejan rusangu ruwamp ra Want mudi umwing wa Atuman a Yehova.a—Kus. 145:1, 2; Isay 43:10-12.

Shinshikin Kand pa Mwikadil Wey

19, 20. (a) Amakundj awonsu abatishau kal ayilejin kusal ik? (b) Ov, yik yikezau kwisambin mu mutu wa mulong wambakedinap?

¹⁹ Kuswir kwa amakurump ni kwa ankwash a mudimu kudi kukash nlel unou kupandakanamu pasak. Pakwez tuyikasikeshin amakundj awonsu abatishau kal ishishikina kand pa mikadil yau ni kwiyipul ayinau anch, ‘Anch nidap nkwash a mudimu ap mukurump, ov nifanyidin kushinshikin mulong wak nikwetap yisend yiney?’ Mulika spiritu wa Nzamb akukwasha kwikal nich chitongijok chiwamp pa mulong winou wa usey.

²⁰ Yidi yawonsu ya chikumangen yikez kutaninamu yiyukish yidiokila ku usu wa kwipan kwa winzamb kwa ambay nau akaritiy. Anch twasal yom yiwamp, ni yakad choy, tukez kukun musangar udiokila ku kuyisadil antu akwau ni wa kukun ku spiritu. Pakwez mudi mutapu ukeza kalejan mutu wa mulong wambakedinap, tufanyidinap kumwovish spiritu wa Yehova ushon. Ov, mutapu ik tukutwisha kwipuk kusal mwamu?

[Dizu didia kwishin kwa paj]

Mutapu ik Ukutwisha Kwakul?

• Ov, uprofet wa Mike 5:5 utukasikeshin kusal ik?

• Rumburil spiritu wa kwipan.

• Ov, mutapu ik ukutwishay muntu kukudish rusot ra kuyisadil antu akwau?

• Mutapu ik kudia kwa usey kwovijan mu dijuku anch muntu usotin kuwanyish yisend ya nkwash a mudimu ap ya ukurump?

[Yipich yidia pa paj wa 25]

Chom ik ukutwisha kusal chakwel uwanyisha yisend ya mudimu?