‘El Rusot ra Nzamb Arusala’
1. Ov, wisu mutu wa mulong wa program wa chitentam cha pakampwil cha dichuku dimwing wa muvu wa mudimu 2012, ni mulong wak chidi cha usey anch twashinshikinany mutu wa mulong winou?
1 Atutanga mulong wa rusot ra Yehova. (Kuj. 4:11) Pakwez, chikutwish kwikal chikasikena kuwanyish rutong ra kwikalaku kwetu pakad kwilej ni kusal rusot ra Nzamb. Chawiy lel, tufanyidin kurish nich chibachikin cha mu muchim cha kusal ‘yom yisangareshina mijimbu yetu ni yitongijok yetu’ ap mukat kusalau “antu a michid yikwau.” (Efes 2:3; 1 Pita 4:3; 2 Pita 2:10) Pakad ukwash wa Nzamb, tukutwishap kwipuk kuwil mu ‘mupit wa [Sakudimban], etu akwachikina kudiay ndiy ni kusal mudi mu rusot rend.’ (2 Tim. 2:26, TMK) Program wetu wa chitentam cha pakampwil cha dichuku dimwing cha muvu wa mudimu wa 2012 ukez kukwash muntu ni muntu wa pakach petu kusal mudimu wambatena nich yom yisatu ya kusambish yidia mu malembil ma sampul matazukinau anch, ‘el rusot rey arusala.’—Mat. 6:9, 10.
2. Ov, yipul ik yikezau kwakul pa chisu cha program?
2 Yipul Yikezau Kwakul: Patukuteshanya program winou, tukutan yakul ku yipul yiney: Ov, chom ik chidia cha usey mudi kutesh Dizu dia Nzamb? Ov, mutapu ik tukutwisha kwijik chidia rusot ra Nzamb piur petu? Ov, mulong wak tuswiridin kwikal nich rusot ra kukimb antu a mitapu yawonsu? Ov, mutapu ik tukutwisha kutan mwom uwamp ni usangareshina? En ansand, ov, chom ik uswiridinany kumekesh kudi Yehova? Ov, yiyukish ik yidiokidilinga mu kusal rusot ra Nzamb? Ov, mulong wak chiswapejina kongoj ni kuyikasikesh antu akwau?
3. Ov, mutapu ik tukutwisha kutambul sens ukwash udiokilinga ku yakudia yiney ya muspiritu?
3 Ikalany nich kashinsh ka kukumangan ni kutesh nawamp program. Chid chimwing cha Betel chatuminau mudi ntimesh ap kalam mwin kwendangan ukez kusot amumekesh mudi mwin kulond ngendj. Akutwish kusal mwamu kurutu ap kupwa kwa program chakwel ambamba pamwing ni mukajend, anch udi ngatan. Pa chisu ukuchirikanya ku yikumbu, “kangal wikalany in kutesh avuramedina,” pakwez chirikinany program winou mu wiswimp mu dijuku ni isambinany mutapu ukutwishanya kusal kwambatijan nich rusot ripandakena usey ra Nzamb.—Jak. 1:25.
4. Ov, mulong wak chidi cha usey anch twasal rusot ra Nzamb pa ndond yetu ya kusambish?
4 Piswimp ap antu alondwila maswir mau ayinau ni alikina kuziyil ku rusot ra Yehova akez kuyishesh. (1 Yoh. 2:17) Chawiy tumujikitishin Yehova rijekin mulong yakudia yiney pa chisu chiwanyidina chakwel atukwasha kusal rusot ra Nzamb pa ndond yetu ya kusambish!