Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

4-10 KA JANERU

WUKOSI BYI NGA BIBELENI | LEVITIKA 18-19

“Tsrhama Na U Basile A Mahanyeleni Yaku”

Xihondzro Xa Ku Zrindzra 06/2019 p. 28 § 1

Ku Huluka Ntlhamu Wa Sathana Wa Swinavetisi Swa Tinkuku

Loko a xaxameta mikhuva ya ku nyenyentsa ya vamatiko, Yehovha a byele va-Israyele a ku: ‘N’wi nga yentxiseni xi swiyentxo swa tiko dzra le Kanana, ledzri ndzri n’wi yisaka ku dzrone; . . . Tiko dzri honiwile; hi leswo ke ndzri dzri yavukanyisa [khatisa] hi wusomboloki bya dzrone.’ Ka Xikwembu xa Israyele lexi xwengiki, mahanyela ya Vakanana a ma nyenyentsa swinene lakakuva a tiko ledzri a va hanya ka dzrone a dzri ntxhimile, dzri sala ni nsila.​—Lv 18:3, 25.

Sentinela 02/2017 p. 20 § 13

Yehovha A Kongomisa Vhanu Vakwe

Tihosi leti ta ku dumbeka a ti hambanile ni vhanu lava a va zrangela matiko man’wana, lava a va zrangela vhanu hi ku ya hi wutlhazri byavu! Vhanu lava a va fumiwa hi Vakanana a va yentxa mintxhumu ya ku nyenyentsa, ya ku fana ni ku famba tinkuku ni xaka dzra le kusuhi, ni swihazri, vavanuna kulobye nambi ku hamba magandzrelo hi vanavu ni ku gandzrela swifaniso. (Lv 18:6, 21-25) Tlhantakubidzri, vazrangeli a Babilona ni Egipta a va nga yi landzri milawu ya ku sizrelela lihanyu leyi Xikwembu Nkulukumba a yi nyikiki va-Israyele. (Tin 19:13) Kambe vazrangeli va va-Israyele a va kutxa tiko akuva dzri va ni wuxaka lebyinene na Yehovha, dzri landzrelela milawu ya Yehovha mayelanu ni ku basa ni ku tingawula wuwoswani. A swi li livaleni leswaku Yehovha hi yene a a va kongomisa.

Sentinela 01/07/2014 p. 7 § 2

Xana Xikwembu Nkulukumba A Ta Yentxa Yini Hi Wubihi Lebyi Nga Kone?

Xana ku ta yentxeka yini hi lava yalaka hi vomu ku txintxa mahanyela yavu, nakone va tamaka va yentxa swaku biha? Yanakanya hi xidumbiso lexi: ‘Hikuva lava lulamiki va ta yaka a misaveni: lava ku hetiseka va sala ku yone. Kambe lava ku biha va ta suvisiwa la misaveni; ni lava kanganyisaka va ta tsruvuliwa ku yone.’ (Amaproverbia 2:21, 22) Nkutxetelo wa vhanu va ku biha wu nga ha tiva kone. Ka swiyimo leswa ku zrula, vhanu lava yingisetaka va ta ya va hetiseka hi kutsrongokutsrongo.​—Ba-le-Roma 6:17, 18; 8:21.

Tindzralama Ta Moya

Sentinela 15/06/2006 p. 22 § 11

“Ni Wu Zrandzra Swinene Nawu Waku”

Xiyenge xa wubidzri xa nawu wa Moxe lexi kombisaka leswaku Xikwembu Nkulukumba awa zron’weka hi vhanu vakwe i lulamiselo dzra ku nkuhuna. Yehovha a hlaye leswaku loko mudzrimi wa mu-Israyele a tsrhovela a sin’wini yakwe a a fanela ku tsrhika lava pfumalaka va nkuhuna leswi siyiwiki hi vatsrhoveli. Vadzrimi a va nga fanelanga ku susa hinkwaswu a masin’wini lakakuva ku nga sali ni ntxhumu, nakone a va nga fanelanga va hlengeletela mawuvha ni mahlwazri lama saliki. Nyandzra ya trigu leyi dzrivaliwiki a yi nga fanelanga ku landzriwa. Ledzri a ku li lulamiselo ledzrinene dzra ku pfuna lava sweliki, valuveli, lava nga liki na vapswele kun’we ni mafelwa. Nakunene, ntizro wa ku nkuhuna a wu nga nabyali kambe a wu va pfuna kuva va nga fambi va kombela zimola.​—Levitika 19:9, 10; Deuteronoma 24:19-22; Amapsalma 37:25.

11-17 KA JANERU

WUKOSI BYI NGA BIBELENI | LEVITIKA 20-21

“Yehovha A Hlawula Vhanu”

Sentinela 15/10/2004 p. 11 § 12

Xana U Ni Xivangelo Xa Ku Va Ni Dumbo Ka Paradeyisi?

Ku ni ntxhumu wun’wana lowu hi kala hi nga fanelanga hi wu honisa. Xikwembu Nkulukumba a byele va-Israyele a ku: ‘N’wi ta bekisa swileleto hinkwaswu leswi ni mi leletiki swone namunhla, akuva n’wi va ni ntamu, n’wi nhingena, n’wi titekela tiko.’ (Deuteronoma 11:8) Ka Levitika 20:22, 24, ku tlhela ku vulavuliwa hi tiko ledzro: ‘Hileswo ke n’wi va bekisa swiyimiso swanga hinkwaswu, ni swiyavukanyiso swanga hinkwaswu, n’wi swi yentxa; akuva tiko ledzri ndzri n’wi yisaka ku dzrone n’wi ya yaka ku dzrone, dzri nga n’wi hlanti. Kambe dzri hlayile ku n’wine ndzri ku: n’wi ta da pfindla dzra tiko dzravu, ndzri taka n’wi nyika dzrone, dzri va dzrenu, a tiko dzra ntsrwamba ni wulombe bya tinyonxi.’ Ina, akuva va teka tiko ledzri va dumbisiwiki dzrone a swi ta ya hi ku va ni wuxaka lebyinene na Yehovha. Xikwembu Nkulukumba a pfumeleli Vababilona leswaku va hlula va-Israyele va tlhela va va susa tikweni dzravu, hi leswi va kalaka va nga mu yingisetanga.

Perspicaz vol-2 p. 314 § 7

Madapfindla

Ntxhumu wun’wana ni wun’wana lowu nyikiwaka madapfindla kumbe mhunu lwe a nga ni mfanelo ya ku yamukela ntxhumu wa kukazri loko n’winyi a fa; hinkwaswu leswi va yamukelaka ka vapswele swanga pfindla dzra ndangu. Zritu dzra Xiheberu ledzri tizrisiwaka ngopfu i na·chalʹ (kumbe na·chalahʹ). Leswi swi patsra ku nyika kumbe ku yamukela pfindla kumbe ntxhumu wa kukazri lowu nyikiwaka vana swanga pfindla dzra ndangu. (Tin 26:55; Ezk 46:18) Zritu ya·rashʹ dzri talisa ku tizriseliwa ka n’wana swanga ‘madapfindla’, kambe hakanyingi i ku ‘yamukela ntxhumu’ swi nge na mhaka leswaku u madapfindla kumbe im-him. (Gn 15:3; Lv 20:24) Dzri tlhela dzri tlhamuxela ku ‘teka kumbe ku hlongola’ na swi patsra yimpi. (Dt 2:12; 31:3) Ka mazritu ya Xigriki lama yelanaka ni pfindla ku tizrisiwa zritu kleʹros, ledzri hi ntumbuluku a dzri tlhamuxela ‘mpswhampswha’, ledzri gamiki dzri tlhamuxela ‘yavelo’ nakone hi wugamu dzri tlhamuxela ‘pfindla’.​—Mt 27:35; Min 1:17; 26:18.

Perspicaz vol-1 p. 279 § 1

Tinyanyana

Ntsrhaku ka ndhambhi, Nowa a teke ‘tinyanyana ta ku basa’ ku patsra ni swihazri swanga magandzrelo. (Gn 8:18-20) Ntsrhaku ka leswo, Yehovha a nyike vhanu mpfumelelo wa kuva va da tinyanyana kambe va nga di ngati. (Gn 9:1-4; dzringanisa Lv 7:26; 17:13.) A minkameni leyo a ‘ku basa’ ka tinyanyana ta kukazri a ku fambisana ni nkongomiso wa Nkulukumba, wa leswi yamukelekaka ku hamba magandzrelo hi swone; matsralwa ya Bibele ma komba leswaku, akuva swi tizrisiwa swanga swakuda, ni yin’we ku tone a yi hlayiwa leyi nga ni ‘ntima’ ku ya tlhasa lani ku nyikeliwiki Nawu wa Moxe. (Lv 11:13-19, 46, 47; 20:25; Dt 14:11-20) Wutsrhokotsrhoko bya leswi a swi yentxa tinyanyana ti va ni ‘ntima’ kumbe ti va leti nga basangakikiki a byi xaxametiwe hi ku kongoma a Bibeleni. Xileswo ntalu wa tinyanyana leti a ti hlayiwa leti kalaka ti nga basanga a ti hanya hi nyama kumbe mintsrumbu, kambe a ku nga li hinkwatu. (Vona POUPA). Ku yilisiwa koloko ku ye tikomba ntsrhaku ka loko ku simekiwe ntwananu lowumpswha, lani Xikwembu Nkulukumba a yiki swi khanyisa ka Petro hi ku tizrisa xivoniso.​—Min 10:9-15.

Tindzralama Ta Moya

Perspicaz vol-1 p. 572 § 7

Ku Titsremelela Mizri

A nawu wa Xikwembu Nkulukumba a wu yilisa kuva mhunu a titsremelela mizri hi mhaka ya vafi. (Lv 19:28; 21:5; Dt 14:1) Xivangelo hi leswaku Israyele a ku li tiko dzra ku xwenga ka Yehovha, tiko dzra ku hlawuleka. (Dt 14:2) Xileswo, Israyele a a nga fanelanga ku gandzrela swithombe nakone, ku dzrila mufi hi ndlela leyi, leyi patsraka ku titsremelela mizri ha vomu a ku bihe ngopfu ka tiko ledzri tivaka xiyimu xa vafi ni ledzri nga ni dumbo dzra ku pfuxiwa ka vafi. (Dn 12:13; Hb 11:19) Nakone ku yilisiwa ka ku titsremelela mizri a ku ta yentxa leswaku va-Israyele va nyika lisima leswi a Xikwembu Nkulukumba a swi hambiki, mizri wa mhunu.

18-24 KA JANERU

WUKOSI BYI NGA BIBELENI | LEVITIKA 22-23

“Leswi Minkama Ya Mafesta Yi Tlhamuxelaka Swone Ku Hine”

Perspicaz vol-2 p. 125 §§ 8-9

Festa Dzra Makati Laya Ku Kala Ku Kandzreliwa

Siku dzra ku sungula dzra festa dzra makati laya ku kala ku kandzreliwa a ku li nhlengeletanu leyikulu tlhelo savata. Hi siku dzra wubidzri, 16 ka Nisani, a ku fanela ku tekiwa nyandzra yin’we ya swizrangana swa sevhada yi yisiwa ka muprista, ku nga swizrangana swa ku sungula a Palestina. Na festa ledzri dzri nga se na hambiwa a ku nga fanelanga ku diwa ntxhumu ni xin’we xa ximpswha xa le masin’wini swa ku fana ni makati, nambi tindzroho leti nkantingiwiki ta ntsrhovelo lowumpswha. Hi ndlela ya ku fanekisela, muprista a a nyikela swizrangana leswo ka Yehovha hi ku swi yisa hala ni hala, hi hala tlhelo a va nyikela xihambana lexi hanyiki ha hombe lexo ko va ni lembe dzrin’we swanga gandzrelo dzra ku hisiwa ni mapa lama tsranisiwiki ni gandzrelo dzra swa ku nwa. (Lv 23:6-14) A ku nge na nawu wa ku hisa mapa a altarini, hi lani vaprista va gamiki va yentxa ha kone. A ku nge na magandzrelo ya le livaleni kumbe ya vhanu hinkwavu ya swizrangana ntsena kambe a ku ni malulamiselo ya leswaku ndangu wun’wana ni wun’wana kumbe mhunu mun’wana ni mun’wana lweyi a a ni masimu a Israyele a hamba magandzrelo ya swikhenso hi nkama wa festa.​—Eks 23:19; Dt 26:1, 2; vona PRIMÍCIA.

Ntlhamuxelo. Ku da makati lama kalaka ma nga kandzreliwanga hi nkama lowu a swi fambisana ni nawu lowu Moxe a wu yamukeliki ka Yehovha hi lani swi tsraliwiki ha kone ka buku dzra Eksoda 12:14-20, a wu patsra nawu lowu kongomiki lowu patsraka miyanakanyu yi nga ka ndzrimana 19 leyi liki: ‘A masiku a ma ve ntlhanu na mabidzri ku nga kumiwe handzrelo a tindlwini tenu.’ Ka Deuteronoma 16:3, a makati lama kalaka ma nga kandzreliwanga ma vitaniwa ‘kati dzra nhlomulo’, a ma ta va xidzrimuxo ka Vayuda lembe ni lembe hi ku suka kwavu ka xikahlula a tikweni dzra Egipta (lani a va nge he na nkama wa ku txhela handzrelo ka ntlatu [Eks 12:34]). A va ta dzrimukisa xileswo a xiyimu xavu xa nhlomulo ni wukazrawa leswi a va li ku swone leswi va nga ntsrhunxiwa ku swone hi lani Yehovha a hlayiki ha kone loko a te ‘akuva u dzrimuka masiku hinkwawu ya ku hanya kwaku a siku ledzri u nga huma a tikweni dzra Egipta ha dzrone’. Akuva va ntsrhunxiwile kutani va va tiko ni kuva va tiva leswaku Yehovha hi yene muhuluxi swi yentxe leswaku swi faneleka kuva dzri va dzrin’we dzra mafesta lawa mazrazru lawa va-Israyele a va ma yentxa lembe ni lembe.​—Dt 16:16.

Perspicaz vol-3 p. 224 § 3

Pentekosta

A swizrangana swa ntsrhovelo wa trigu a swi fanela ku khomiwa hi ndlela leyi hambaniki ni swizrangana swa ntsrhovelo wa sevhada. Wukhumi byibidzri bya efa dzra tizriko (4.4 L) lama txheliwiki handzrelo a ma fanela ku swekiwa ku huma makati mabidzri. A ma fanela ku va ya ‘wuyakweni byenu’, leswi liki a ma fanela ku fana ni lawa a ma hambiwa kuva ma diwa hi ndangu ku nga li ya swiyentxo swa ku xwenga. (Lv 23:17) Lawa a ma fambisana ni magandzrelo ya ku hisiwa ni magandzrelo ya swihono, ni swihambana swibidzri swa magandzrelo ya ku zrula, muprista a a zrendzrelekisela makati ni tihamba mahlweni ka Yehovha hi ku swi ntlhanteka mavoko a swi yisa hala ni hala leswi a swi kombisa leswaku a swi nyikela ka Yehovha. Ntsrhaku ka ku nyikela makati ni tihamba, kutani a swi lumba muprista akuva a da swanga gandzrelo dzra ku zrula.​—Lv 23:18-20.

Sentinela 15/05/2014 p. 29 § 11

Xana U Fambisana Ni Nhlengeletanu Ya Yehovha?

Nhlengeletanu ya Yehovha yi hi navelela leswinene loko yi hi kutxa ku landzrelela xileleto xa mupostola Pawulo lexi liki: ‘Hi va hi yanakanyana, hi susumetana a lizrandzrwini ni swiyentxweni leswinene; hi nga tsrhiki ku hlengeletana, swanga hi leswi van’wana va swi toloveliki, kambe hi khongotelana; ngopfu naswone hikuva n’wi vona leswaku a siku dzri tsrhindzrekelaka kusuhi.’ (Hb 10:24, 25) Mafesta lawa a ma yentxiwa lembe ni lembe ni tinhlengeletanu tin’wana ta wugandzreli a swi tiyisa wuxaka bya va-Israyele na Yehovha. Handle ka leswo, swiyentxakalo swa ku fana ni festa dzra ku hlawuleka dzra mintsronga swa nkameni wa Nehemiya a ku li minkama ya ku nyonxisa ngopfu swinene. (Eks 23:15, 16; Neh 8:9-18) Na hine hi ni ku nyonxa loku fanaka loko hi li mintlhanganwini ni tinhlengeletanu letikulu. Hi fanela ku yentxa hinkwaswu leswi hi nga swi kotaka akuva hi kumeka ka swiyentxakalo leswi hinkwaswu hikusa swi hi pfuna ku tsrhama hi li kusuhi na Yehovha nakone swi hi yentxa hi mu tizrela na hi nyonxile.​—Tito 2:2.

Tindzralama Ta Moya

Xihondzro Xa Ku Zrindzra 02/2019 p. 3 § 3

Hlayisa Wudumbeki Byaku!

Loko dzri tizriseliwa ku khanela hi hine swanga vatizreli va Xikwembu Nkulukumba, zritu wudumbeki dzri tlhamuxela leswaku hi zrandzra Yehovha hi mbilu hinkwayu nakone hi namazrela ka yene swanga Mhunu. Xileswo, hi zrangisa ku zrandzra ka Yehovha ka swiboho hinkwaswu leswi hi swi yentxaka. Vonanyana matizrela ya zritu ledzri a Bibeleni. Zritu “wudumbeki” dzri ni ntlhamuxelo lowu: lexi heleliki, lexi hetisekiki kumbe lexi nga kiyeleliwiki ha ntxhumu. Hi xikombiso, leswi va-Israyele a va nyika Yehovha switlhavelo swa swihazri, Nawu a wu ku swihazri swoleswo a swi fanela ku va leswi hetisekiki. (Lv 22:21, 22) Vhanu va Xikwembu Nkulukumba a va nga pfumeleliwi ku nyikela xihazri xa ku khuta, xa ndleve yin’we kumbe xa ku fa tihlo; nakone a va nga fanelanga ku nyikela xihazri xa ku vabya. Yehovha a a djula leswaku xihazri xi va lexi heleliki, xi hetisekiki kumbe xi nga kiyeleliwi ha ntxhumu. (Mlk 1:6-9) Hi nga swi twisisa leswaku ha yini Yehovha a djula mintxhumu leya ku hetiseka kumbe leyi heleliki. Loko hi xava ntxhumu wa ku fana ni handzru, buku kumbe xitizro, hi wu djula na wu helelile, wu hetisekile kumbe wu nga kiyeleliwi ha ntxhumu. A hi nge xavi handzru wa ku bola, buku dzra ku handzruka kumbe xitizro xa ku kiyeleliwa hi mapesa. Yehovha a titwisa xiswoswo hi lizrandzru ledzri hi mu kombaka dzrone, kumbe ku dumbeka kwezru. Ku djuleka dzri va ledzri heleliki, ledzri hetisekiki kumbe dzri nga kiyeleliwi ha ntxhumu.

25-31 KA JANERU

WUKOSI BYI NGA BIBELENI | LEVITIKA 24-25

“Lembe Dzra Jubilewu Ni Ku Ntsrhunxiwa Kwezru”

Perspicaz vol-2 p. 697 § 8

Ku Ntsrhunxeka

Xikwembu Nkulukumba Wa Ntsrhunxeko. Yehovha i Xikwembu Nkulukumba wa ntsrhunxeko. Yene a huluxe va-Israyele ka wukazrawa a Egipta. A va byele leswaku loko va yingiseta swileleto swakwe a va nga tiwela hi khombo. (Dt 15:4, 5) Davhida a vulavule hi ku ‘zrula’ kumbe ntsrhunxeko a mapangwini ya Yerusalema. (Ps 122:6, 7) Nambitanu a nawu a wu pfuna ka leswaku loko mhunu a swela a a ta tixavisa swanga xikazrawa akuva a kota ku tidisa ni ku disa ndangu wakwe. Kambe a nawu a wu pfumelela kuva Muheberu a ntsrhunxiwa hi lembe dzra wu 7. (Eks 21:2) Hi Jubilewu (ledzri a dzri yentxeka kan’we ndzreni ka 50 wa malembe), a ku huweleliwa ku ntsrhunxiwa ka vayakitiko hinkwavu. Muheberu mun’wana ni mun’wana a a ntsrhunxiwa nakone a a tlheliseliwa tikweni dzra valikwavu.​—Lv 25:10-19.

Perspicaz vol-2 p. 315 § 5

Pfindla

Swanga hi leswi pfindla dzra ndangu a dzri khalutisiwa ka xitukulwana xin’wana ku ya ka xin’wana a dzri nga fanelanga ku xavisiwa hi ku helela. Nakunene, a ku xavisiwa ka nsimu a swi fana ni ku yi volekisa lani a yi ta hakeliwa hi ntsrhovelo wa yone, a ku hlayiwa ntsrengo hi ku ya hi malembe lawa a yi ta tizra ku ya tlhasa Jubilewu, lani nsimu kun’we ni ntsrhovelo wa kone a swi tlhelela ka n’winyi wa kone hi ntshima, loko a a nga si swi tizrula kumbe ku tlheliseliwa swone. (Lv 25:13, 15, 23, 24) Nawu lowu a wu patsra ni miti leyi a yi li handle ka doropa, leyi a yi voniwa swanga livala. Kutani a miti leyi a yi biyeleliwe hi lipangu a yi fanela ku tizruliwa hi lembe ledzri xavisiwiki ha dzrone, loko a nga swi koti ku yi tizrula ndzreni ka lembe a yi lumba lweyi a yi xaviki kutani. Loko ku li miti ya Valevhi vone a va ni mfanelo ya ku ti tizrulela yone minkama hinkwayu, hikusa Valevhi a va nga na masimu swanga pfindla.​—Lv 25:29-34.

Perspicaz vol-2 p. 610 § 7

Jubilewu

Loko Nawu wa Jubilewu wu landzriwa a wu pfuna tiko akuva dzri nga vi ka xiyimu xa tingana lexi hi xi vonaka namunhla, lani hi kumaka swiyimu swibidzri swa vhanu, lava ganyiki ngopfu ni lava sweliki ngopfu. Lexi nyonxisaka hi leswaku, a tiko a dzri tiyisiwa hikusa a ku nga ti va ni mhunu lweyi a a ta va ka xiyimu xa le hansi ngopfu swinene hi swa timali, kambe hinkwavu a va ta yentxa hinkwaswu leswi va nga swi kotaka akuva va bindzrulisa tiko. Hi kola ka lulamiselo dzra tovoko dzra Yehovha mayelanu ni ntsrhovelo ni swileleto leswi a va nyikiwa swone a va kota ku va ni mfumu lowu hetisekiki ni lowu humelelaka loko va landzrelela swileleto swa Yehovha.​—Eza 33:22.

Tindzralama Ta Moya

Sentinela 01/09/2009 p. 22 § 4

Loko U Khunguvanyisiwile

Loko mu-Israyele a lwa ni mu-Israyele kulobye kutani a mu xokola tihlo, nawu a wu pfumelela leswaku a khatisiwa hi ku ya hi leswi nawu a wu hlaya swone. Nambitanu, lwa xokoliwiki tihlo kumbe va ndangu wakwe a va nga fanelanga va tidzrihisela. Nawu a wu djula leswaku va ya hlaya mhaka yavu ka vayavanyisi lava bekiwiki akuva mhaka yavu yi lulamisiwa hi la ku fanekelaka. Leswi vhanu a va tiva leswaku loko mhunu a gevenga kumbe a vavisa mun’wana a a ta khatisiwa, swi yentxe leswaku vhanu va tingawula ku swi yentxa. Kambe a ku na swinyingi leswi patsrekaka a mhakeni leyi.

1-7 KA FEVHERERU

WUKOSI BYI NGA BIBELENI | LEVITIKA 26-27

“Hi Nga Ma Yamukelisa Kuyini Matovoko Ya Yehovha?”

Sentinela 15/04/2008 p. 4 § 8

Fulazrela ‘Leswa Ku Ka Ndlela’

‘Lifuyu’ dzri nga ndzruluka Xikwembu hi ndlela yini? Hi xikombiso, yanakanya hi zribye ledzri a dzri kumeka a masin’wini ya va-Israyele va khale. Zribye dzroledzro dzri nga ha tizriseliwa ku yaka yindlu kumbe pangu. Kambe loko dzro hambiwa ‘kolona’ kumbe ‘xifaniso xa zribye’, a ku ta va xikhunguvanyiso ka vhanu va Yehovha. (Lv 26:1) Hi lani ku fanaka, ha yi djula mali nakone hi fanela ku yi tizrisa hi ndlela leyi fanelikiki. Ha yi djula akuva hi kota ku tihanyisa nakone hi nga yi tizrisa hi ndlela leyinene a ntizrweni wa Yehovha. (Ekl 7:12; Luka 16:9) Kambe loko hi zrangisa mali kutani ntizro wezru wa wukriste wu sala ntsrhaku nakunene mali yi ta ndzruluka xikwembu xezru. (Dondzra 1 Timoteo 6:9, 10.) A misaveni leyi lani ku hlongolisa lifuyu ku nga ntxhumu wa lisima a vhanwini hi fanela ku tiyiseka leswaku hi tsrhama na hi ni vonela ledzri fanelikiki a mhakeni leyi.​—1Tm 6:17-19.

Perspicaz vol-2 p. 21 § 2

Ku Hlamala

Hi kola ka ndlela leyi Yehovha a a tizrisana ni ku vulavulisana ha yone na Moxe a swi yentxa vhanu va hlamala (Xiheberu., moh·raʼʹ). (Dt 34:10, 12; Eks 19:9) Lava a va ni lipfumelo a va kombisa xitxhavu lexi yentiki ka wulawuli lebyi nyikiwiki Moxe. A va swi tiva leswaku Yehovha a vulavula hi ku tizrisa Moxe. Nakone va-Israyele a va fanela ku tlhela va kombisa xitxhavu ka mbangu wa ku xwenga wa Yehovha. (Lv 19:30; 26:2) Leswi a swi hlaya leswaku va kombisa xitxhavu lexikulu ka mbangu wa ku xwenga va va va gandzrela hi ndlela leyi Yehovha a va leletiki ha yone ni ku va va hanya hi ku ya hi milawu ya Yehovha.

Sentinela 01/03/1991 p. 17 § 10

Tsrhika Ku ‘Zrula Ka Xikwembu Nkulukumba’ Ku Bekisa Miyanakanyu Yaku

Yehovha a byele tiko a ku: ‘Loko n’wi famba hi swiyimu swanga, n’wi bekisa swileleto swanga, n’wi yentxa swone; lahu ndzri ta n’wi nyika timpfula hi minkama ya tone; a tiko dzri ta humexa minkelo ya dzrone, ni mizri ya nhova mi ta beleka mihandzru ya yone. Ndzri ta nyika tiko ku zrula, n’wi ta yetlela mi nga zruzrumelisiwi hi mhunu, ndzri ta helisa swihazri leswimfani tikweni, a lipanga li nga hundzri tikweni dzrenu. Ndzri ta famba makazri kwenu, ndzri va Xikwembu Nkulukumba wenu, n’wine mi va vhanu vanga.’ (Levitika 26:3, 4, 6, 12) Tiko dzra Israyele a dzri ta nyonxela ku zrula loku a dzri ta va nakone hi leswi tiko a dzri sizreleliwile ka valala va dzrone, a dzri ta va dzri fuyile nakone a dzri ta va ni wuxaka bya le kusuhi na Yehovha. Kambe leswi a swi ta koteka hi loko va namazrela nawu wa Yehovha.​—Amapsalma 119:165.

Tindzralama Ta Moya

Perspicaz vol-3 p. 265 § 2

Ntungu

Wu vangiwe hi kola ka ku fulazrela nawu wa Xikwembu Nkulukumba. A tiko dzra Israyele dzri dzrimuxiwe leswaku loko dzri kanya xipfumelelanu lexi Xikwembu Nkulukumba a xi hambiki na dzrone a a ta ‘zrumela ntungu a makazri ka dzrone’. (Lv 26:14-16, 23-25; Dt 28:15, 21, 22) Ka Matsralwa hinkwawu, a lihanyu ledzrinene, hi tlhelo dzra nyama ni dzra moya, dzri yelana ni matovoko ya Xikwembu Nkulukumba (Dt 7:12, 15; Ps 103:1-3; Pr 3:1, 2, 7, 8; 4:21, 22; Mpf 21:1-4), na kasi mavabyi ma yelana ni xidoho ni ku kala ku hetiseka. (Eks 15:26; Dt 28:58-61; Eza 53:4, 5; Mt 9:2-6, 12; Yh 5:14) Nambi leswi ku nga ntiyiso ka leswaku minkama yimbeni Yehovha Xikwembu Nkulukumba a vangele vhanu ku kazrateka ka kukazri ka ku fana ni nhlokonho ya Miriyamu, Uziya ni ya Geyazi (Tin 12:10; 2Mk 26:16-21; 2Th 5:25-27), kambe swi tikomba na minkama minyingi mavabyi ni mintungu a swi li swa ntumbuluku nakone a swi pfa hi kola ka ku va vhanu kumbe tiko dzri hanya hi xidoho. Va tsrhovele leswi va swi byaliki; mizri yavu yi xaniseke hi kola ka swiyentxo swavu swa ku biha. (Ga 6:7, 8) Mayelanu ni lava va tinyiketeliki a nxambyeni, mupostola a hlaye leswaku Xikwembu Nkulukumba a va ‘nyikete nxambyeni a ku naveleni ka timbilu tavu, akuva va tihona mizri yavu ve vone . . . na va tikumela hakelo ledzri fanekelaka ku lahleka kumbe swihoxo swavu’.​—Ro 1:24-27.

8-14 KA FEVHERERU

WUKOSI BYI NGA BIBELENI | ATINHLAYO 1-2

“Yehovha A Hlela Vhanu Vakwe”

Sentinela 01/12/1994 p. 9 § 4

Mbangu Lowu Fanelikiki Wa Wugandzreli Bya Yehovha A Wuton’wini Byezru

Loko a wu kote ku vona va-Israyele ha hombe na u li henhla loko va li minxaxeni a huleni, a wu ta va u vone yini? Inhaka u vone matende lama foliseliwiki ha hombe na ku tsrhama vhanu lava tlulaka 3 milhões wa vone lava yavukanyisiwiki hi mintlawa ya tinxaka tizrazru, a n’walungu, a nyingitimu, a wuxeni ni mpela dambu. Loko u ya u tsrhindzrekela i nhaka u voni ntlawa wumbenyani a makazri ka nxanxa. Ka mintlawa leya mune ka matende lamatsrongo a ku tsrhama va lixaka dzra Levhi. A makazri ka nxanxa ka mbangu lowu a wu biyeleliwe hi makapulana a ku ni muyaku wa ku hlamalisa ngopfu swinene. A ku li ‘tende dzra nhlengeletanu’, kumbe tabernakele, ledzri yakiwiki hi va-Israyele hi ‘mbilu leya wutlhazri’ hi ku landzra leswi Yehovha a va leletisiki xiswone.​—Atinhlayo 1:52, 53; 2:3, 10, 17, 18, 25; Eksoda 35:10.

Perspicaz vol-1 p. 39 § 1

Nxanxa

A nxanxa wa Israyele a wu li wukulu. A tinhlayu ti nga lanu henhla ti hamba ntsrengo wa kolomu ka 603.550 wa vavanuna na ku nga nkontiwi vavasati, vana, swiduhwati ni lava va nga swilema, 22.000 wa Valevhi, ni ‘nhlayu yikulu’ ya lava nga liki va-Israyele. Hinkwavu lava kumbexana va hamba ntsrengo wa kolomu ka 3.000.000 kumbe ku tlula. (Eks 12:38, 44; Tin 3:21-34, 39) A ku tiyisekiwi hi mbangu lowu nxanxa lowo a yaneti kone. Loko nxanxa wu simekiwe a mahlweni ka Yeriko, a timbaleni ta Mowabu, ku hlayiwa leswaku a wu ‘sukela Beti-Yeximoti ku ya tlhasa Abele-Xitimi’.​—Tin 33:49.

Tindzralama Ta Moya

Perspicaz vol-3 p. 396 § 10

Ku Titsralisa

Hi ntolovelo a ku tsralisiwa hi mavito ni hi lixaka hi ku ya hi mindangu. A ku nga li ku hlaya ntsena ntsrengo wa vhanu kumbe tinhloko ta mindangu. Ku tsralisiwa xitiko loku kumekaka Bibeleni a ku tizriseliwa ka swiyenge swinyingi swa ku fana ni ku hakela tinemba, ku yaveliwa ku tizra a wusotxhweni kumbe (ku Valevhi lava patsrekaka) ku tizra a mbangwini wa ku xwenga.

15-21 KA FEVHERERU

WUKOSI BYI NGA BIBELENI | ATINHLAYO 3-4

“Ntizro Wa Valevhi”

Perspicaz vol-3 p. 484 § 7

Muprista

Hansi ka Xipfumelelanu xa Nawu. Loko va-Israyele va li wukazraweni a Egipta Yehovha a tihlawulekisele mativula hinkwawu ya xinuna ya va-Israyele hi nkama lowu a helisiki mativula hinkwawu ya va-Egipta ka khombo dzra wu 10. (Eks 12:29; Tin 3:13) Nakunene, mativula lawa a ma ta lumba Yehovha akuva a ma tizrisela ku hamba ntizro wakwe wa ku hlawuleka. Xikwembu Nkulukumba inhaka a beke mativula hinkwawu ya xinuna ya ma-Israyele ni vazrindzri a mbangwini lowa ku hlawuleka. A matsrhan’wini ya leswo a ku li kungu dzrakwe dzra ku va a beka vaxinuna hinkwavu va lixaka dzra Levhi akuva va hamba ntizro lowu. A pfumelele leswaku Valevhi hinkwavu va xinuna va pfaleta tinxaka hinkwatu letin’wana leta 12 (ku patsra ni vana va Yosefa ku nga Efrayimi na Manasi swanga tinxaka tibidzri). Ku nkontiwa loku yentxiwiki ku kumiwe 273 wa mativula lava nga liki Valevhi lawa a ma ni wheti ku ya henhla hi ntanga ku nga nhlayu leyikulu ka vana va Levhi lakakuva Xikwembu Nkulukumba a kombele leswaku vavanuna hinkwavu lava va 273 va humexa ntlhanu wa maxekele swanga xitizrulo ku nga mali leyi a yi fanela ku nyikiwa Aroni ni vanakwe. (Tin 3:11-16, 40-51) Na leswi swi nga si na yentxeka Yehovha a tsravuxe vana va xinuna va Aroni ka lixaka dzra Levhi akuva va va vaprista va Israyele.​—Tin 1:1; 3:6-10.

Perspicaz vol-2 p. 693 § 10

Valevhi

Mintizro. A Valevhi a va vumbiwa hi mindangu mizrazru leyi a yi pfa ka vana va Levhi, Gerixoni, Kheyati na Merari. (Gn 46:11; 1Mk 6:1, 16) Ndangu wun’wana ni wun’wana a wu yaveliwe ku ya tsrhama kusuhi ni tabernakele a mananga. A ndangu wa Vakheyati wa Aroni wu ta dzima matende a mahlweni ka wuhlawuleko hi tlhelo dzra wuxa, a mindangu ya Kheyati yi gova kusuhi ni wuhlawuleko hi tlhelo dzra nyingitimu, a Vagerixoni va dzima matende yavu hi tlhelo dzra mpeladambu, a Vamerari va dzima matende yavu hi tlhelo dzra n’walungu. (Tin 3:23, 29, 35, 38) A ku dzima, ku hahlula ni ku zrwala tabernakele a ku li ntizro wa Valevhi. Loko ku tlhasa nkama wa ku zruzrisa tende dzra nhlengeletanu, Aroni ni vanakwe hi vone a va susa kapulana ledzri a dzri hambanisa mbangu wa ku Xwenga ni lowa ku Xwengisisa, va funeketa wuhlawuleko bya wumboni, aletari ni swibya swin’wana swa ku hlawuleka. A Vakheyati hi vone a va li vazrwali va mintxhumu leyi. A Vagerixoni a va zrwala makapulana ya tende, a xifukumeto, a makapulana ya linxoxa, mapindzra ya tabernakele, a Vamerari vone va ta bekisa tihumbu ta wuyaku, timhandzri ta byone ni swikhokhwana ni mavalelo ya byone, ni mapindzra ya tabernakele.​—Tin 1:50, 51; 3:25, 26, 30, 31, 36, 37; 4:4-33; 7:5-9.

Perspicaz vol-2 p. 694 § 2

Valevhi

A masikwini ya Moxe a Valevhi a fanela ku sungula ntizro wavu na va ni 30 wa malembe, wa ku fana ni ku zrwala tabernakele kun’we ni swibya swa dzrone loko va zruzra. (Tin 4:46-49) A va ta hamba mintizro yin’wana na va ni 25 wa malembe, kambe ku nga li mintizro ya ku bindzra ya ku fana ni ku zruzrisa tabernakele. (Tin 8:24) A masikwini ya Hosi Davhida a ntanga yi pumbiwile yi ya ka 20 wa malembe. A xivangelo lexi kombisiwiki hi Davhida hi leswaku a tabernakele (ledzri a dzri ta pfaletiwa hi tempele) a dzri nga ha ti vilela ku zruzrisiwa. Ku sukela ka lava nga ni 50 wa malembe a va nga ha yamukeli swiyavelo swa ku hamba mintizro ya ku fana ni leyi. (Tin 8:25, 26; 1Mk 23:24-26; vona IDADE, ERA.) A Valevhi a fanela ku tiva nawu hi wuyenti hikusa a va ta txhuka va vitaniwa akuva va ya dondzra nawu a livaleni va dondzrisa xitsrhungu.​—1Mk 15:27; 2Mk 5:12; 17:7-9; Neh 8:7-9.

Tindzralama Ta Moya

Sentinela 01/08/2006 p. 23 § 13

Tlhazriha​—U Txhava Xikwembu Nkulukumba

Mpfunu lowu Yehovha a wu nyikiki Davhida hi nkama lowu a a li ku kazratekeni wu mu yentxe a txhava swinene Xikwembu Nkulukumba a tlhela a mu dumba hi la ku yengetelekiki. (Amapsalma 31:22-24) Nambitasu, ka swiyentxakalo swizrazru swa ku hlawuleka, ku txhava Xikwembu Nkulukumba loku Davhida a li na kone ku tsranile kutani swi mu fambele ximatsri. Xiyentxakalo xa ku sungula xi fambisana ni lulamiselo dzra ku yisa areka dzra xipfumelelanu xa Yehovha a Yerusalema hi ku tizrisa nq’olo a matsrhan’wini ya ku va Valevhi va dzri zrwala hi makatla hi lani nawu wa Xikwembu Nkulukumba a wu hlaya hakone. Loko Uza, lweyi a a zrangela nq’olo, a khoma areka leswaku yi nga wi a tekele ku fa hi kola ka ‘xiyentxo lexi xa ku pfumala xitxhavu’. Ina, Uza a yentxe xidoho lexikulu kambe ku hlaya ntiyiso, i ku hluleka ka Davhida ku yingiseta nawu wa Xikwembu Nkulukumba leswi yentxiki ku va ni ntsrhovelo wa ku biha. Ku txhava Xikwembu Nkulukumba swi hlaya ku yentxa mintxhumu hi ku ya hi ku zrandzra kwake.​—2 Samuel 6:2-9; Atinhlayo 4:15; 7:9.

22-28 KA FEVERERU

WUKOSI BYI NGA BIBELENI | ATINHAYO 5-6

“U Nga Va Yetiselisa Kuyini Vanaziri?”

Perspicaz vol-3 p. 71 §§ 5-8

Munaziri

Hi leyi mintxhumu mizrazru leyi lava a va tihlambanyele ku va Vanaziri a va nga fanelanga ku yi yentxa: 1) a va nga fanelanga ku nwa leswi popswaka; nambi ku da swa mawuvha ya mambisi, ya ku wupfa kumbe ya ku woma, nambi ku nwa mati ya kone na ma bava kumbe na ma tsrokotsra; 2) a va nga fanelanga va byevula nhloko; 3) a va nga fanelanga va khumba ntsrumbu nambi wa xaka dzra le kusuhi, ku nga va tatana, mamana, makwavu wa xinuna kumbe wa xisati.​—Tin 6:1-7.

Xihlambanyu Xa Ku Hlawuleka. Lweyi a a hamba xihlambanyu lexi xa ku hlawuleka a a fanela ‘ku hanya swanga Munaziri a titsravukanisela Yehovha’ ku nga li ku djula ku kulungeliwa hi vhanu hi kola ka ku titsrona kwavu. Kambe ‘hinkwawu masiku ya ku titsravuxela kwakwe [Wunaziri, NM] a hlawulekile ku Yehovha.’​—Tin 6:2, 8; dzringanisa ni Gn 49:26.

Kutani swileleto leswi a swi nyikiwa Vanaziri a swi ni ntlhamuxelo wa ku hlawuleka a wugandzrelini bya Yehovha. Hi lani a swi li ha kone ka muprista lwenkulu, hi kola ka xiyavelo xakwe xa ku hlawuleka a a nga fanelanga ku khumba mintsrumbu nambi ya maxaka ya le kusuhi, a swi li hi ku fana ka Vanaziri. Hi kola ka wutiyanguleli byavu, muprista lwenkulu ni vapfunisi vakwe a va nga fanelanga ku nwa vhinyu kumbe swa ku nwa leswi popswaka loko va hamba mintizro yavu ya ku hlawuleka a mahlweni ka Yehovha.​—Lv 10:8-11; 21:10, 11.

Handle ka leswo a Munaziri, (xiheberu na·zirʹ) ‘a a ta tixwengisa hi ku tsrhika misisi a nhlokweni yakwe mi kula’, leswi a swi ta va xikombiso ka hinkwavu ka leswaku va tihlawulele ku va Vanaziri. (Tin 6:5) A zritu dzroledzri dzra dzrin’we dzra Xiheberu na·zirʹ a dzri tizriseliwa ka vhinya lowu kalaka wu nga ‘khakhatiwanga’ hi malembe ya ku hlawuleka ya Savata ni ya Jubilewu. (Lv 25:5, 11) Nakone i swa lisima ku tiva leswaku ka xipepezretana xa gole lexi a xi li ka xilembe xa muprista a ku tsraliwe leswi ‘a ku xwenga i ka Yehovha’, leswi a swi hlayiwa ‘xifungo xa ku hlawuleka xa ku tinyiketela [Xiheberu neʹzer, kumbe na·zirʹ]’. (Eks 39:30, 31) Hi lani ku fanaka a ngiyana leyi a yi tizrisiwa hi tihosi leti totiwiki ta Israyele na yone a yi vitaniwa neʹzer. (2Sa 1:10; 2Th 11:12; vona COROA; DEDICAÇÃO.) Mupostola a hlaya leswaku a bandleni dzra wukriste a misisi leya ku leha ya wansati a nyikiwe swanga hazri. I xidzrimuxo ku yene leswaku a ni xiyavelo lexi hambaniki ni xa wanuna, a fanela ku dzrimuka leswaku a fanela ku titsrongahatela malulamiselo ya Xikwembu Nkulukumba. Swileleto leswi swa ku fana ni ku nga tsremi misisi (leswi nga liki swa ntumbuluku ka vavanuna), ku nga nwi vhinyu hi ku helela, nambi xivileleko xa ku va lwa basiki ni ku nga vi na bati a swi dzrimuxa Munaziri a lisima dzra ku tinyiketela kwakwe ni ku titsrongahatela ku yentxa ku zrandzra ka Yehovha.​—1Ko 11:2-16; vona CABELO; COBERTURA PARA CABEÇA; NATUREZA.

Tindzralama Ta Moya

Sentinela 15/01/2005 p. 30 § 2

Swivutiso Swa Vadondzri

Kambe Samisoni a a li Munaziri hi ndlela leyi hambaniki. Loko a nga si na belekiwa ntsrumi ya Yehovha yi byele mamana wakwe yi ku: ‘Hikuva, lavisa, u ta va ni nyimba, u va u beleka wa ndzrisanyana; a likazri li nga ka li nga ti henhla ka nhloko yakwe; hikuva a n’wana a ta va Munaziri wa Xikwembu Nkulukumba, ne he khuzrini dzra mamana wakwe, hi yene lwa taka sungula ku huluxa va-Israyele a mavokweni ya Vafilista.’ (Abaṭemi 13:5) Samisoni a nga hambanga xidumbiso lexi hlambanyiwiki xa Wunaziri. A a li Munaziri lwa hlawuliwiki hi Xikwembu Nkulukumba, nakone a a ta va Munaziri lwa hlawuliwiki wutomi byakwe hinkwabyu. A nawu wa ku sivela ku khumba ntsrumbu a wu nga ti tizra ku yene. Loko a wo tizra kutani hi mphazamu a khumba ntsrumbu, a a nga ha ti swi kota ku tlhela a pfuxeta Wunaziri byakwe lebyi a byi sunguliki loko a ha belekiwa. Xileswo, handle ka ku ganaganeka, swivileleko swa vhanu lava a va ta va Vanaziri wutomi byavu hinkwabyu a swi hambana ni vhanu lava a va ta va Vanaziri hi ku swi zrandzra.