Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

1-7 KA MARSU

WUKOSI BYI NGA BIBELENI | ATINHLAYO 7-8

“Leswi Hi Swi Dondzraka Ka Minxaxa Ya Israyele”

Perspicaz vol-1 p. 525 § 7

Nhlengeletanu

A vayimeli va Israyele, hakanyingi a va tizrela xitsrhungu. (Ezr 10:14) Xileswo, ‘a tihosana ta tinxaka ti humexe timhamba ntsrhaku ka loko ku yakiwe tabernakele. (Tin 7:1-11) Nakone lava tiyisekisiki hi xifungu ‘a xipfumelelanu xa ku tiya’ a masikwini ya Nehemiya ku ve vaprista, Valevhi ni ‘vakulu va tiko’. (Neh 9:38–10:27) A nkama lowu na va-Israyele va zrendzrelekela mananga, a ku ni 250 wa vakulu va tiko lava tipatsriki na Kora, Datani, Abiramu na Oni akuva va pfukela Moxe na Aroni. (Tin 16:1-3) Yehovha a lelete Moxe leswaku a hlawula 70 wa vakulu va Israyele lava a va li valaviseli akuva va ta zrwala naye a ‘ntsrhwalu wa tiko’ lowu a a nge ti wu kota ku wu zrwala wuswake. (Tin 11:16, 17, 24, 25) Levitika 4:15 yi vulavula hi ‘vakulu va nhlengeletanu’, nakone swi tikomba na vayimeli va tiko a ku li vakulu, tihosana, vatsremi ni valaviseli.​—Tin 1:4, 16; Yš 23:2; 24:1.

Perspicaz vol-2 p. 876 § 3

Rubeni

A nxaxeni wa Israyele, a lixaka dzra Rubeni a dzri kumeka makazri ka Simiyoni na Gadi, a nyingitimu wa tabernakele. Loko va famba, a ntlawa lowu wa tinxaka tizrazru lowu a wu zrangeliwa hi lixaka dzra Rubeni a wu landzra lixaka dzra Yuda, Yisakari na Zebuloni. (Tin 2:10-16; 10:14-20) Nakone leswi hi leswi tinxaka ti swi yentxiki loko ti nyikela magandzrelo hi siku dzra ku khanguliwa ka tabernakele.​—Tin 7:1, 2, 10-47.

Sentinela 01/08/2004 p. 25 § 1

Nkatsrakanyu Wa Buku Dzra Atinhlayo

8:25, 26. Akuva ku tiyisekisiwa leswaku a ku bekiwa vavanuna lava fanelekaka a ntizrweni wa Valevhi ni hi ku va yanakanyela hi kola ka ntanga yavu, vavanuna lava kuliki a va byeliwa leswaku va yima kumbe ku tsrhika ntizro wa nsindzrisa. Nambitanu, a va pfumeleliwa ku tizra hi ku swi zrandzra akuva va pfuna Valevhi van’wana. Nambi leswi ku nga liki na ku wisa a xiyavelweni xa ku va muzrezri wa Mfumu namunhla, nsinya lowu wa nawu wu hi dondzrisa yinhla ya lisima. Loko mukriste a nga ha swi koti ku hetisisa byin’wana bya wutiyanguleli byakwe hi kola ka ku duwhala, a nga yentxa leswi a nga swi kotaka.

Tindzralama Ta Moya

Perspicaz vol-2 p. 717 § 2

Mativula, Wa Ku Sungula Ku Belekiwa

Leswi mativula ya xinuna ya va-Israyele a ku li vone lava a va ta sala va va tinhloko ta mindangu ntsrhaku ka loko vatatana vavu va file, a va ta yimela tiko hinkwadzru. Hi ndlela leyo Yehovha a hlaye ka leswaku tiko hinkwadzru a dzri li ‘mativula’ yakwe, a dzri li mativula hi kola ka xipfumelelanu lexi a xi hambiki na Abrahamu. (Eks 4:22) Leswi a huluxiki wutomi byavu, Yehovha a hlaye leswaku ‘a mativula hinkwawu ya xinuna . . . a makazri ka vana va Israyele, a ya vhanu ni ya swifuyu’ ma fanela ku hlawulekiseliwa yene. (Eks 13:2) Xileswo a mativula ya xinuna a ma nyikeliwa ka Yehovha.

8-14 KA MARSU

WUKOSI BYI NGA BIBELENI | ATINHLAYO 9-10

“Ndlela Leyi Yehovha A Kongomisaka Vhanu Vakwe Ha Yone”

Perspicaz vol-1 p. 39 § 6

Nxaxa

A ku zruzrisiwa ka nxaxa lowukulu wu ya hala ni hala (ka Atinhlayo 33 Moxe a vulavula hi kolomu ka 40 wa minxaxa) a ku li xikombiso xa ku hlamalisa xa ku hleleka. Loko tlavi dzri kapama a tabernakeleni, a nxaxa a wu tama wu va mbangwini wolowo. Loko tlavi dzri suka, a nxaxa na wone a wu zruzrisiwa. ‘Va gova hi ku leleta ka Yehovha, hi ku leleta ka Yehovha va famba.’ (Tin 9:15-23) Tinanga tibidzri ta prata, leti biwiki hi hamela, a ti tivisa xileleto lexo xa Yehovha a nxaxeni hinkwawu. (Tin 10:2, 5, 6) Ku txhayiwa ka ku hlawuleka ka nanga a ku li xikombiso xa leswaku a nxaxa wu fanela ku sekelekisiwa. Khambi dzra ku sungula ku yentxekiki leswi ku ve hi “siku dzra wu 20 ka wheti ya wubidzri hi lembe dzra wubidzri [1512 M.N.Y.]”. Areka dzra xipfumelelanu dzri zrangile loko ntlawa wa ku sungula lowu yaviwiki wu famba na wu zrangeliwa ha Yuda, ku landzrela Yisakari ku gamisa Zebuloni. Ku landzrela Vagerixoni ni Vamerari na va zrwali swilongo swa tabernakele leswi va yaveliwiki swone. Ku tlhele ku landzrela ntlawa wun’wana wa lowu a wu zrangeliwa ha Rubeni na a landzriwa hi Simiyoni na Gadi. A ntsrhaku kwavu a ku ta Vakheyati na va ni wuhlawuleko, ku nga ntlawa wa wuzrazru, lixaka dzra Efrayimi ku landzrela Manasi na Benjamini. Hi wugamu ku landzrela ntlawa lowu zrangeliwaka hi Dani na a landzriwa hi Axeri na Naftali. A ku ni mintlawa yibidzri leyi wun’we a wu zranga mahlweni na lowu wun’wana wu landzra he ntsrhaku.​—Tin 10:11-28.

Sentinela 15/04/2011 pp. 4-5

Xana Wa Byi Twisisa Wumboni Bya Nkongomiso Wa Xikwembu Nkulukumba?

Hi nga swi kombisisa kuyini leswaku ha wu tlangela nkongomiso wa Xikwembu Nkulukumba? Mupostola Pawulo a te: ‘Yingisetani vafambisi venu, n’wi tibeka hansi kwavu.’ (Hb 13:17) A hi minkama hinkwayu swi nabyalaka ku yentxa leswo. Hi xikombiso: A hi nge u ve mu-Israyele a nkameni wa Moxe. U vona tlavi dzri yima ntsrhaku ka ku famba mpfhuka wa ku leha. A wu swi tivi leswaku dzri ta yima nkama, siku, vhiki kumbe tiwheti tingani. Kutani u sungula ku tivutisa leswi ‘xana ni fanela ku xixa mintsrhwalu yanga hinkwayu?’ U nga sungula hi leswi nga swa lisima ngopfu ntsena. Kambe ntsrhaku ka masiku ma nga li mangani, na u nyenyetsekile hi leswi u nga swi kumikiki leswi u swi djulaka u sungula ku tlhantlhelela mintsrhwalu hinkwayu. Kutani loko u game ku tlhantlhelela, u vona tlavi kutani u fanela ku tlhela u pakela mintsrhwalu. A ku nga li xintizrwana. Kambe va-Israyele a va fanela ku ‘famba’.​—Tin 9:17-22.

Hi yentxa yini loko hi yamukela minkongomiso ya Xikwembu Nkulukumba, xana hi “tekela ku yi landzra”? Kumbexana hi pfana hi yentxa mintxhumu hi lani a hi yentxa ha kone khale? Xana hi fambisana ni minkongomiso leyimpswha, ya ku fana ni ku fambisa swidondzro swa Bibele, ku zrezrela vhanu lava khanelaka lidzrimi dzrimbeni a tikweni dzrezru, ku hamba wugandzreli bya ndangu vhiki ni vhiki, ku tizrisana ni Xihubyana Xa Ku Vulavulisana Ni swipiritana ni ku tikhoma hi ndlela leyinene loko hi li tinhlengeletanwini letikulu? Ndlela yin’wana ya ku kombisa ku tlangela Xikwembu Nkulukumba i ku yamukela swilayu. Loko hi djula ku teka xiboho lexikulu, a hi dumbi wutlhazri byezru, kambe hi djula nkongomiso wa Yehovha ni wa nhlengeletanu yakwe. Ku fana ni ntsrongwana lwa djulaka nkongomiso wa vapswele loko ku ni xidzedze, na hine hi djula nkongomiso wa nhlengeletanu ya Yehovha loko swizralanganya swa misava leyi swi hi kamalatela.

Tindzralama Ta Moya

Perspicaz vol-1 p. 236 § 6

Nhlengeletanu

Lisima Dzra Ku Hlengeletana. A lisima dzra ku va hi londzrovota hi lani ku heleliki a malulamiselo ya Yehovha ya ku va hi hlengeletana akuva hi pfuneka hi tlhelo dzra moya, dzri ntshimisisiwa hi ku tlangeliwa ka Paska lembe ni lembe. Wanuna mun’wana ni mun’wana lweyi a a basile nakone na a nga li ku yendzreni kambe a kalaka a nga dzri tlangeli Paska, a a fanela ku dlayiwa. (Tin 9:9-14) Loko Hosi Ezekiya a zrambe Vayuda ni va-Israyele akuva va ya Yerusalema kuva va ya tlangela Paska, xiyenge xa dzrungula dzrakwe hi lexi: ‘N’wine vana va Israyele, tlhelelani ku Yehovha . . . n’wi nga nonon’whise tinhamu tenu ku fana ni vatatana venu; tinyiketani ku Yehovha, n’wi nhingena mbangwini wakwe lowa ku xwenga lowu a wu xwengisiki hi masiku, n’wi tizrela Yehovha, Xikwembu Nkulukumba wenu, akuva mahlundzru yakwe ya ku lebya ma n’wi sukela . . . hikuva Yehovha, Xikwembu Nkulukumba wenu, a ni wumbilu ni lizrezre, a nga ka a nga n’wi fulazreli loko n’wi buya ku yene.’ (2Mk 30:6-9) Kutani ku va a nga kumeki hi vomu, a swi ta kombisa leswaku a landzrula Xikwembu Nkulukumba. Kutani nambi leswi mafexta ya ku fana ni Paska ma kalaka ma nga ha tlangeliwi hi vakriste, Pawulo a va kutxe akuva va nga tsrhiki ku hlengeletana ni vhanu va Xikwembu Nkulukumba a te: ‘Hi va hi yanakanyana, hi susumetana a lizrandzrwini ni swiyentxweni leswinene; hi nga tsrhiki ku hlengeletana, swanga hi leswi van’wana va swi toloveliki, kambe hi khongotelana; ngopfu na swone hikuva n’wi vona leswaku a siku dzri tsrhindzrekelaka kusuhi.’​—Hb 10:24, 25; vona CONGREGAÇÃO.

15-21 KA MARSU

WUKOSI BYI NGA BIBELENI | ATINHLAYO 11-12

“Ha Yini Hi Nga Fanelanga Ku Ngurangura?”

Sentinela 15/06/2001 p. 17 § 20

Vakriste vanyingi a va hambi timhaka ta tinkuku na va nga txhatanga. Nambitanu, hi fanela ku tivonela akuva hi nga vi na moya wa ku ngurangura, leswi nga ha yentxaka Xikwembu Nkulukumba a nga ha hi nyonxeli. Pawulo a hi dzrimuxa leswi: ‘Hi nga dzringeni [Yehovha], swanga hi van’wana ku [va-Israyele] va nga mu dzringa, va dlayiwe hi tinyoka. Kambe n’wi nga vi nwununwuta, swanga hi van’wana ku vone va nga nwununwuta, kutani va helisiwe hi muhelisi.’ (1 Ba-le-Korinte 10:9, 10) Va-Israyele va ngurangurele Moxe na Aroni, leswi liki va ngurangurele Xikwembu Nkulukumba hi ku kongoma, na va khala hi mana lowu va nyikiwiki wone hi hlolana. (Atinhlayo 16:41; 21:5) Xana Yehovha a vavisekenyana hi kola ka ku ngurangura kwavu ku tlula wuwoswani lebyi a va byi yentxa? Bibele dzri hlaya leswaku vhanu vanyingi lava a va ngurangura va diwe hi tinyoka va fa. (Atinhlayo 21:6) Ka khambi dzrin’wana na leswi swi nga si na yentxeka ku tlula 14.700 wa vapfukeli lava a va ngurangura va dlayiwile. (Atinhlayo 16:49) Xileswo, a hi fanelanga hi hlundzrukisa Yehovha hi ku va hi nga landzreleleli malulamiselo yakwe.

Sentinela 15/07/2006 p. 15 § 7

‘U Nga Nguranguri’

Vonela dzra va-Israyele dzri txintxile hakunene! Ku tlangela loku a va li nakone a ku sunguleni hi kola ka ku ntsrhunxiwa kwavu a Egipta ni ku tsremakanya kwavu a Lwandle dzra ku Pswhuka na va sizrelelekile swi yentxe leswaku va yimbelelela Yehovha a tinsimu. (Eksoda 15:1-21) Hi kola ka swikazratu leswi a va li na swone a mananga ni ku va va txhava Vakanana, a ku tlangela loku a va li na kone hi Xikwembu Nkulukumba, ku siviwe hi moya wa ku ngurangura. A matsrhan’wini ya ku tlangela Xikwembu Nkulukumba hi leswi a va huluxiki, a va mu nyika nandzru hi leswi a va vona ingiki a va tsrona swa kukazri. Nakunene, a ku ngurangura kwavu a ku kombisa ku kala ku tlangela malulamiselo ya Yehovha. Leswi ziki swi yentxa Yehovha a hlaya mazritu lawa: ‘Ndzri ta va ni nhlengeletanu leyi ya ku biha leyi ndzri n’wunun’wutela ku ya kota dzrini xana?’​—Atinhlayo 14:27; 21:5.

Perspicaz vol-1 p. 99 § 10

Mholova

Ku Ngurangura. Ku ngurangura ku hetana ntamu nakone ka hohlota. Va-Israyele, ntsrhakunyana ka loko va hume a Egipta, va ngurangurele Yehovha, va solasola ndlela leyi a a va zrangela ha yone hi ku tizrisa malandzra yakwe, Moxe na Aroni. (Eks 16:2, 7) Ntsrhakunyana, ku ngurangura kwavu ku hete ntamu Moxe lakakuva a kombela ni ku fa. (Tin 11:13-15) Ku ngurangura ku nga ha va khombo dzrikulu ka lwe a nguranguraka. Yehovha a vone swisolo leswi xitsrhungu a xi swi yentxela Moxe swanga hi loko xi swi yentxela yene hi ku kongoma. (Tin 14:26-30) Vhanu vanyingi va luzekeliwe hi wutomi hi kola ka ku solasola.

Tindzralama Ta Moya

Perspicaz vol-2 p. 278 § 5

Mana

Leswi mana a dzri tsrhamise xiswone. A mana a dzri ‘fana ni tinhleke leta ntlhohe ta koreyanda’ a ku ‘voneka’ ka dzrone a ku fana ni bideliyo, xa ku vonekela ni ku phatima ku fana ni perola. A dzri nandzrika ku fana ni ‘makati ya wulombe bya tinyonxi’ kumbe ‘makati lama swekiwiki hi mafuzra’. Loko va dzri silile kumbe va dzri kandzrile, a mana a dzri swekiwa kumbe dzri hamba makati.​—Eks 16:23, 31; Tin 11:7, 8.

22-28 KA MARSU

WUKOSI BYI NGA BIBELENI | ATINHAYO 13-14

“Lipfumelo Dzri Hi Pfuna Ku Va Ni Xixixi”

Sentinela 01/10/2006 pp. 16-17 §§ 5-6

Hi Ni Xixixi Hi Kola Ka Lipfumelo Ni Ku Txhava Xikwembu Nkulukumba

Tinhloli tibidzri, Yoxuwa na Kalebe a ti nga wu voni nkama wa ku nhingena Tikweni dzra Xidumbiso. Va hlaye leswaku Vakanana a va fana ‘ni swakuda ku vone’. ‘A xintsrhuti xavu xi sukile ku vone; Yehovha a na hine; n’wi nga va txhaveni.’ (Atinhlayo 14:9) Xana Yoxuwa na Kalebe a ve mphunta hi ku va ni vonela ledzrinene? Nikutsrongo. Vone ni tiko hinkwadzru va vone ndlela leyi Yehovha a tsrongahatiki ha yone tiko dzra Egipta kun’we ni swikwembu swa dzrone, hi ku tizrisa makhombo laya 10. Nakone va tlhele va vona Yehovha loko a suvisa Faro ni makhandzra yakwe a Lwandle dzra ku Pswhuka. (Amapsalma 136:15) Swi le livaleni leswaku, ku txhava loku tinhloli leta 10 a ti li na kone kun’we ni lava ti va kutxeteliki a ku nga twali. Swi mu vavise ngopfu Yehovha a za a ku: ‘Va ta yala va ya gama kwini xana a ku pfumela ku mine, nambi leswi ni hambiki swikombiso leswi a makazri kwavu?’​—Atinhlayo 14:11.

Yehovha e vhela a kongoma mhaka​—a wutoya lebyi tiko dzra Israyele a byi li na byone byi kombise ku pfumala lipfumelo. Ina, a lipfumelo ni xixixi swa fambisana, lakakuva mupostola Yohane a tsrale mayelanu ni yimpi ya moya leyi vakriste va nga ka yone: ‘A ku hlula loku hluliki misava, hi ku pfumela kwezru.’ (1 Yohan 5:4) Namunhla wa siku, lipfumelo dzra ku fana ni dzra Kalebe na Yoxuwa dzri yentxa leswaku ku zrezriwa madzrungula lamanene ya Mfumu a misaveni hinkwayu hi Timboni ta Yehovha leti tlulaka 6 milhões, vampswha, lava kuliki hi ntanga, lava tiyiki ni lava tsraniki mizrini. A ku na nala ni mun’we lweyi a nga kotaka ku miyeta khandzra ledzri, ledzri nga ni ntamu ni xixixi.—​Ba-le-Roma 8:31.

Tindzralama Ta Moya

Perspicaz vol-1 p. 740 § 1

Tiko Ledzri Xikwembu Nkulukumba A Dzri Nyikiki Israyele

HAKUNENE tiko ledzri Xikwembu Nkulukumba a dzri nyikiki Israyele a dzri li dzrinene. Loko Moxe a zrume tinhloli akuva ti ya vona Tiko dzra Xidumbiso ni ku buya ni leswi a swi bindzruliwa a tikweni ledzro, vone va ye buya ni magranada, makuwa ni xitxatxa xin’we xa xikulu xa mawuvha lexi a xi djula vavanuna vabidzri akuva va xi zrwala! Nambi leswi a va zruzrumela hi ku txhava ni ku pfumala lipfumelo va hlaye mazritu lawa: Kunene ‘i tiko dzra ntsrwamba ni wulombe.’​—Tin 13:23, 27.

29 KA MARSU–4 ABRILI

WUKOSI BYI NGA BIBELENI | ATINHLAYO 15-16

“Tivonele Ku Tikulisa Ni Ku Tidumba Ku Tlula Mpimu”

Sentinela 15/09/2011 p. 27 § 12

Xana Yehovha Awa Ku Tiva?

Nambi swilitanu, loko va-Israyele va li ndleleni ya ku ya Tikweni dzra Xidumbiso, Kora a sungule ku hlaya leswaku ndlela leyi Yehovha a a va zrangela ha yone vhanu vakwe a yi nga li yinene. Kutani vhanu van’wana va 250 lava a va li tihosana ta nhlengeletanu va yime na Kora akuva va dzringeta ku hamba ku txintxa ka kukazri. Kora ni van’wana a va ni miyanakanyu ya leswaku va ni wuxaka lebyinene na Yehovha. Va byele Moxe va ku: ‘N’wa tikulisa, hikusa nhlengeletanu hinkwayu, vhanu hinkwavu, va xwengile; Yehovha a li makazri kwavu.’ (Tin 16:1-3) Vona ndlela leyi a va tidumba ni ku tikulisa ha yone! Moxe a va byele leswi: ‘Yehovha a ta hi tivisa lava va nga vakwe.’ (Dondzra Atinhlayo 16:5.) Loko siku ledzri landzreliki dzri pela, Kora ni hinkwavu lava a va yima naye a ku pfukeleni ka Yehovha va file.​—Tin 16:31-35.

Sentinela 15/09/2011 p. 27 § 11

Xana Yehovha Awa Ku Tiva?

Moxe na Kora a va hambane ngopfu a mhakeni ya ku hlonipha malulamiselo ni swiboho swa Yehovha. Leswi va swi yentxiki a swi khumba ndlela leyi Yehovha a a va vona ha yone. Kora a a li Mulevhi wa Mukheyati nakone a a ni tindjombo tinyingi leti kumbexana a ti patsra ku vona ku huluxiwa ka va-Israyele a Lwandle dzra ku Pswhuka, ku seketela wuyavanyisi bya Yehovha bya ku dlaya va-Israyele lava kalaka va nga yingisetanga a Nhaveni ya Siyoni ni ku va a tizrisiwa kuva a zrwala areka dzra xipfumelelanu. (Eks 32:26-29; Tin 3:30, 31) Swi tikomba na Kora a tsrhame a dumbekile ka Yehovha ku dzringana malembe manyingi nakone a a hloniphiwa hi vhanu vanyingi a Israyele.

Tindzralama Ta Moya

Sentinela 01/09/1998 p. 20 §§ 1-2

Tiyiseka Leswaku U Zrangisa Leswi Nga Swa Lisima!

Yehovha a swi voni ku li xihoxo lexikulu swinene. Bibele dzri li: ‘Yehovha a byela Moxe a ku: A mhunu lweyo a ta dlawa.’ (Atinhlayo 15:35) I yini leswi yentxiki Yehovha a hlundzruka ngopfu mayelanu ni leswi mhunu lweyo a swi yentxiki?

Hi kola ka leswi, vhanu a va ni 6 wa masiku ya ku zrolela tihunyi ni ku lulamisela swakuda leswi vilelekaka, swiyambalu ni mbangu lowu va tsrhamaka ku wone. A siku dzra wu 7 a dzri fanela ku bekiseliwa swivileleko swavu swa moya. Nambi leswi a swi nga hoxekanga ku zrolela tihunyi, kambe a swi hoxekile ku tizrisa nkama lowu a va wu bekele ku gandzrela Yehovha ha wone. Nambi leswi vakriste va kalaka va nga li hansi ka Nawu wa Moxe, xana mhaka leyi a yi hi dondzrise leswaku na hine hi fanela ku zrangisa mintxhumu leyi nga ya lisima namunhla?​—Ba-le-Filipi 1:10.

5-11 KA ABRILI

WUKOSI BYI NGA BIBELENI | ATINHLAYO 17-19

“Mine, Ni . . . Pfindla Dzraku”

Sentinela 15/09/2011 p. 13 § 9

Xana U Teka Yehovha Swanga Yavelo Dzraku?

Yanakanya hi Valevhi lava kalaka va nga kumanga mbangu swanga pfindla dzravu. Leswi wugandzreli lebyi basiki a byi li ntxhumu wa lisima ka vone, a va fanela ku dumba leswaku Yehovha a ta yanelisa swivileleko swavu swa nyama, hikusa a va byele leswi: ‘Hikusa mine, ndzri yavelo dzraku.’ (Tin 18:20) Nambi leswi hi nga tizrikiki a tempeleni dzra xivizri ku fana ni vaprista ni Valevhi, hi nga va yetisela hi ku dumba leswaku Yehovha a ta yanelisa swivileleko swezru. Swanga hi leswi wugamu byi yaka byi tsrhindzrekela i swa lisima swinene ku dumba leswaku Xikwembu Nkulukumba a ta yanelisa swivileleko swezru.​—Mpf 13:17.

Sentinela 15/09/2011 p. 7 § 4

Yehovha I Yavelo Dzranga

Xana xiyavelo lexo a xi tlhamuxela yini ka Valevhi? Yehovha a hlaye leswaku a a ta va yavelo dzravu hi leswi a a ta va nyika ntizro wa ku hlawuleka swinene a matsrhan’wini ya ku va nyika tiko swanga pfindla. ‘Wuprista bya Yehovha’ a ku li pfindla dzravu. (Yš 18:7) Atinhlayo 18:20 yi hlaya leswaku a va nga ti va swisiwana. (Dondzra Atinhlayo 18:19, 21, 24.) Valevhi a va fanela ku nyikiwa ‘swa wukhume hinkwaswu swa Israyele dzri va pfindla dzravu, hi nkonta ya tizrelo ledzri va dzri tizraka’. Leswi swi tlhamuxela leswaku a va ta kuma wukhume bya ntsrhovelo ni bya swifuyu swa va-Israyele. Kutani vone a va fanela ku teka wukhume bya hinkwaswu leswi va swi kumiki, ‘leswa lisima ku tlula hinkwaswu’, leswaku va seketela ntizro wa vaprista. (Tin 18:25-29) Vaprista a va nyikiwa ‘leswa ku xwenga’ leswi va-Israyele a va swi tisela Xikwembu Nkulukumba a ndlwini ya wugandzreli. Xileswo, vaprista a va ni xivangelo lexi twalaka xa ku dumba leswaku Yehovha a a ta va nyika leswi va swi vilelaka.

Tindzralama Ta Moya

Despertai! 08/06/2002 p. 14 § 2

Munyu I Ntxhumu Wa Lisima

A munyu a wu tizriseliwa swanga xikombiso xa ku tiya ni ku hlwela ku honeka. Hi mhaka leyo, a Bibeleni a xipfumelelanu lexi nga helikiki a xi vitaniwa ‘xipfumelelanu xa munyu’, lani matlhelo ha mabidzri a ma talisa ku da swakuda, kun’we ni munyu, akuva va tsrimba xipfumelelanu. (Atinhlayo 18:19) A nawu wa Moxe a wu hlaya leswaku a ku fanela ku txheliwa munyu ka switlhavelo leswi a swi nyikeliwa a aletareni, leswi a swi kombisa leswaku a swi nga bolanga.

12-18 KA ABRILI

WUKOSI BYI NGA BIBELENI | ATINHLAYO 20-21

“Tama U Kombisa Moya Wa Ku Zrula Nambi U Langusana Ni Swiyimu Swa ku Bindzra”

Xihondzro Xa Ku Zrindzra 02/2019 p. 12 § 19

Djula Wumbulwa, U Nyonxisa Yehovha

Hi ta tingawula ku yentxa swihoxo. Tlhela u yanakanya ha Moxe. Hi madzana ya malembe a tame a va mbulwa nakone a nyonxise Yehovha. Kambe ke, loko liyendzro dzravu ledzra ku kazrata a mananga, ledzri tekiki 40 wa malembe, dzri ya ku heleni, Moxe a hluleke ku kombisa wumbulwa. Makwavu wa xisati, lweyi swi tikombaka na a li lweyi a nga mu pfuna ku huluka a Egipta, a a ha ku fa a va a lahliwa le Kadexi. Kutani va-Israyele va tlhele va ngurangura va ku a va nga tenderiwi ha hombe. Ka khambi ledzri va ‘kanetane na Moxe’ hi mhaka ya ku pfumala mati. Nambi leswi va voniki mahlolana hinkwawu lawa Yehovha a ma yentxiki hi ku tizrisa Moxe ni leswi a va li ni wumboni byinyingi hi malembe bya leswaku Moxe i muzrangeli lwa kalaka a nga tifeleli, vhanu va humexe swikhalu. A va khalanga hi mhaka ya ku pfumala mati ntsena kambe va tlhele va khala ha Moxe, swi yentxa ingiki a a li nandzru wakwe kuva va kumiwa hi tozra.​—Tin 20:1-5, 9-11.

Xihondzro Xa Ku Zrindzra 02/2019 p. 13 §§ 20-21

Djula Wumbulwa, U Nyonxisa Yehovha

Hi ku hlundzruka, Moxe a nga ha tamanga a va mbulwa. Matsrhan’wini ya ku vulavula ni zribye hi lipfumelo, hi ku landzra leswi Yehovha a a mu lelete swone, Moxe a holovele tiko a va a tidzrumisa. Hi ku landzrela, a be zribye kabidzri kutani mati ma sungula ku whaa! Ku tikukumuxa ni mahlundzru swi mu dohisile. (Ps 106:32, 33) Hi mhaka ya ku lahlekeliwa hi wumbulwa swa nkamanyana, Moxe a nga pfumeleliwanga ku nhingena a Tikweni dzra Xidumbiso.​—Tin 20:12.

Ka mhaka leyi, hi susa tindondzro ta lisima. Ya ku sungula, hi fanela ku ya mahlweni hi tikazrata akuva hi hlayisa moya wa wumbulwa. Loko ho byavutanyana ntsena, ku tikukumuxa ku nga tinyika ntamu ku hi dohisa hi mazritu ni swiyentxo. Ya wubidzri, ku kameka ku nga ha hi heta ntamu. Xileswo, ku djuleka kuva hi lwela ku tama hi va timbulwa nambi loko hi li ku kazratekeni.

Sentinela 01/09/2009 p. 19 § 5

Xikwembu Nkulukumba A Yavanyisa Hi Wululami

Xa ku sungula, Xikwembu Nkulukumba a nga mu leletanga Moxe leswaku a yavanyisa vhanu hi ku va byela leswaku i vapfukeli. Xawubidzri, Moxe na Aroni a va mu dzrumisanga Xikwembu Nkulukumba. Xikwembu Nkulukumba a te: ‘Leswi n’wi nga pfumelangakiki . . . a ku ndzri hlawulekisa.’ (Ndzrimana 12) Hi ku va a hlaye leswaku ‘hi ta n’wi humexela mati’, Moxe a swi hlayi ingiki hi loko yene na Aroni a ku li vone lava a va ta nyika xitsrhungu mati hi hlolana ku nga li Xikwembu Nkulukumba. Xawuzrazru, xikhatiso lexo a xi fambisana ni wuyavanyisi lebyi Xikwembu Nkulukumba a byi yentxiki a nkameni lowu khalutiki. Xikwembu Nkulukumba a yaleli xitukulwana xa ku sungula xa vapfukeli ku nghena Kanana, kutani a yentxe hi lani ku fanaka ka Moxe na Aroni. (Atinhlayo 14:22, 23) Xawumune, Moxe na Aroni a va li vazrangeli va Israyele. Lava nga ni wutiyanguleli lebyikulu va ta tihlamulela ka Xikwembu Nkulukumba.​—Luka 12:48.

Tindzralama Ta Moya

Sentinela 15/06/2014 p. 26 § 12

Xana U Vona Ku Tsrana Ka Van’wana Hi Lani Yehovha A Ku Vonaka Ha Kone?

Ka swiyimu hinkwaswu leswi, Yehovha a a ta va a mu khatisile Aroni, kambe a vone leswaku Aroni a a nga li mhunu wa ku biha. Swi tikomba na Aroni a pfumelele swiyimu kumbe nhlohlotelo wa vambeni wa ku tsrhika ku yentxa leswinene. Kambe a a swi pfumela swihoxo swakwe na kone a a yima ni wuyavanyisi bya Yehovha. (Eks 32:26; Tin 12:11; 20:23-27) Yehovha a hlawule ku xiyisisa lipfumelo dzra Aroni ni ku tisola kwakwe. Hi yo mhaka leyo, nambi ku khalute malembe manyingi, Aroni ni vatukulu vakwe a va ha dzrimukiwa swanga vhanu lava txhavaka Yehovha.​—Ps 115:10-12; 135:19, 20.

19-25 KA ABRILI

WUKOSI BYI NGA BIBELENI | ATINHLAYO 22-24

“A Ku Na Ntxhumu Lowu Nga Sivelaka Matovoko Ya Yehovha”

Testemunho Cabal pp. 53-55 § 5

Ku Zrezra ‘Madzrungula Lamanene Ha Yesu’

Namunhla ku fana ni dzaneni dzra ku sungula, ku xanisiwa ka vhanu va Xikwembu Nkulukumba a ku zanga ku yimisa ntizro wa ku zrezra. Ku sindzrisiwa ka vakriste kuva va ya mimbangwini ya ku hambanahambana​—ku nga va madjele kumbe matikweni man’wana—​ku yentxe leswaku dzrungula dzra Mfumu dzri twalisiwa a mimbangwini leyi nga siki na zrezriwa. Hi xikombiso, hi nkama wa Yimpi ya Wubidzri ya Misava, Timboni ta Yehovha ti kote ku zrezra a livaleni dzra Vanazi. Muyuda lwa kumaniki ni Timboni ta Yehovha ka livala dzroledzro a te: “Ku tiyisela ka swibotxhwa leswi nga Timboni ta Yehovha ku ni tiyisekise leswaku lipfumelo dzravu dzri seketeliwe a Matsralweni​—hi loko na mine ni va Mboni.”

Perspicaz vol-2 p. 247 § 3

Wuphunta

Wuphunta Bya Ku Pfukela Yehovha. Muprofeta Balama a a swi djula hi ku helela ku zruketela va-Israyele akuva a yamukela mali ka hosi Balaki wa Mumowabu, kambe Yehovha a nga swi pfumelelanga leswo. Loko mupostola Petro a tsrala mayelanu na Balama, a te ‘a mbongolo leyi yi nga liki na ku vulavula, yi yalela wusingi bya muprofeta hi ku vulavula hi zritu dzra mhunu’. Mayelanu ni wuphunta bya Balama, mupostola a tizrise zritu dzra Xigriki pa·ra·phro·niʹa, ledzri nga ha tlhamuxelaka ‘ku nga titivi’.​—2Pe 2:15, 16; Tin 22:26-31.

Tindzralama Ta Moya

Sentinela 01/08/2004 p. 27 § 2

Nkatsrakanyu Wa Buku Dzra Atinhlayo

22:20-22—Ha yini mahlundzru ya Yehovha ma pfuzrele Balama? Yehovha a a mu byelile muprofeta Balama leswaku a a nga fanela ku zruketela va-Israyele. (Atinhlayo 22:12) Nambitanu, muprofeta lweyi a fambe ni vavanuna va Balaki hi nkongometo wa ku ya zruketela va-Israyele. Balama a a djula ku nyonxisa Hosi ya Mowabu ni ku hakeliwa ha yone. (2 Petros 2:15, 16; Yuda 11) Nambi loko Balama a sindzriseke ku tovokisa va-Israyele a matsrhan’wini ya ku va zruketela, a djuli ku nyonxeliwa hi hosi hi ku yi byela leswaku a tizrisa vavasati lava gandzrelaka Bali leswaku va wonga vavanuna va Israyele. (Atinhlayo 31:15, 16) Xileswo, lexi yentxiki Xikwembu Nkulukumba a hlundzrukela Balama ku ve makwanga lawa muprofeta lweyi a a li na wone.

26 KA ABRILI–2 KA MAYU

WUKOSI BYI NGA BIBELENI | ATINHLAYO 25-26

“Xiyentxo Lexinene Xa Mhunu Mun’we Xi Nga Pfuna Vanyingi!”

Zrandzra Xikwembu Nkulukumba p. 118 §§ 1-2

‘Tsrutsrumani N’wi Txhava Vumbuye!’

MUPHASI wa tinhlampfi a yima hi lani ku taka dela leti a djulaka tone. A hlawula leswi zrandzriwaka hi tinhlampfi ta kone, a hulela ka ndzrovo kutani a txukumetela matini. A mamela ku za ku humelela nhlampfi yi luma ndzrovo, hi loko a gwimba nsiha kutani a ndzrovo yi hulela xihlaya xa nhlampfi, a yi koka a longela sakeni.

Hi ku fanana, vhanu na vone va nga phasiwa. Hi xikombiso, va-Israyele afa va li kusuhi ni ku nhingena a Tikweni dzra Xidumbiso, hi loko va tsrhamanyana a Mowabu. Hosi ya Mowabu yi dumbise ku fumba hi mali wanuna lweyi a vitaniwaka Balama loko o kota ku yentxa va-Israyele va weliwa hi khombo. Hi wugamu, Balama a ze a kuma ndlela ya ku yentxa va-Israyele va tikokela khombo. A hlawule hi wutlhazri leswi afa swi ta va phasa. A zrumele vanhwanyana va Mowabu akuva va ya nyanyula vavanuna va va-Israyele.​—Atinhlayo 22:1-7; 31:15, 16; Apfuletelo 2:14.

Zrandzra Xikwembu Nkulukumba p. 119 § 4

‘Tsrutsrumani N’wi Txhava Vumbuye!’

Ha yini va-Israyele va ku tala va phasiwe hi kungu dzra Balama? Va pimise ntsena hi ku tinyonxisa, va dzrivala hinkwaswu leswi Yehovha a va yentxeliki. Va-Israyele afa va ni swivangelo swinyingi swa kuva va dumbeka ka Xikwembu Nkulukumba. A va ntsrhunxe a wukazraweni bya Egipta, a va nyika swakuda a mananga, a tlhela a va buyisa a ndzrilakaneni wa Tiko dzra Xidumbiso na va sizrelelekile. (Ba-Heberu 3:12) Nambitanu va phasiwile hi wumbuye. Mupostola Pawulo a te: ‘Kambe hi nga yentxeni vumbuye, swanga hi van’wana ku vone va nga yentxa vumbuye; ka ti, hi siku dzrin’we, va wa.’—1 Ba-le-Korinte 10:8.

Tindzralama Ta Moya

Perspicaz vol-2 p. 1108 § 8-p. 1109 § 1

Ndzrilakanu

Swi tikomba ku ve ni swivangelo swibidzri swa ku yava tiko hi ku ya hi tinxaka: Ku yava tiko hi mpswhampswha ni hi ku ya hi ku kula ka lixaka. Swi nga yentxeka mpswhampswha a yi komba mbangu lowu lixaka a dzri ta wu kuma swanga pfindla, leswi a swi ta komba lomu mindzrilakanu ya pfindla a yi gama kone, ka ku fana ni le wuxeni, mpeladambu, n’walungu ni nyingitimu, a ku suhi ni timbale kumbe a tinhaveni. Xiboho lexi a xi tekiwa hi ku ya hi mpswhampswha a xi pfa hi ka Yehovha, leswi a swi ta yentxa leswaku tinxaka ti nga holovi nambi ku kweletana. (Pr 16:33) Xileswo, Xikwembu Nkulukumba a a kongomisa mintxhumu akuva va fambisana ni mazritu lawa Yakobe a ma hlayiki ka Genesis 49:1-33 loko a li kusuhi ni ku fa.

Ntsrhaku ka loko mpswhampswha yi kombe mbangu lowu lixaka dzra kukazri a dzri ta va kone, a ku tizrisiwa xivangelo xa wubidzri akuva ku kombisiwa mindzrilakanu: ku kula ka lixaka. ‘U ta yavanyisa tiko hi mpswhampswha hi mindangu yenu, lava taliki n’wi ta va nyika pfindla ledzrikulu, lava nga talangakikiki n’wi ta va nyika pfindla ledzritsrongo; a mun’wana ni mun’wana a ta yamukela leswi a yaveliwiki swone hi mpswhampswha.’ (Tin 33:54) A xiboho lexi a xi tekiwa hi ku ya hi mpswhampswha a xi tiyisekisiwa, kambe a swa ha koteka ku yentxa ku txintxa ka kukazri hi ku ya hi ku kula ka pfindla. Xileswo, loko ku voniwe leswaku a muganga wa Yuda a wu li wukulu ngopfu, a xiyenge xa pfindla dzrakwe xi pumbiwile, xi nyikiwa lixaka dzra Simiyoni.​—Yš 19:9.