A nkama lowu Izaki a nga txhata na Rabeka a a ni 40 wa malembe. Phela a a mu zrandzra ngopfu swinene. Hi ku famba ka malembe, Rabeka a pswale vana vabidzri va mahahla.

A vito dzra lweyi a zrangiki a pswaliwa a ku li Esawu kasi dzra lweyi a landzreliki a ku li Yakobe. Esawu a a swi zrandzra ngopfu swinene ku fambafamba nhoveni a hlota swihazri (ku zingela), kasi Yakobe yene a a zrandzra ku tsrhama kaya.

Leswi Esawu a a li n’wana wa mativula, a a ni mfanelo ya ku kuma pfindla dzra dzrikulu ku tlula Yakobe. Wa swi tiva leswaku i yini pfindla? I hinkwaswu leswi papayi a swi siyelaka vana ntsrhaku ka loko a file, swa ku fana ni masimu kumbe mali. Kambe a pfindla ka ndangu wa Izaki a dzri patsra swidumbiso hinkwaswu leswi Yehovha a swi byeliki Abrahamu. Esawu a a nge na mhaka ni swidumbiso leswo, kambe Yakobe a a swi tiva leswaku swi ni lisima dzrikulu ngopfu swinene!

Siku dzrin’wana Esawu a ya ku hloteni ka swihazri a va a tlhela kaya na a kazrale ngopfu swinene, kutani a kuma Yakobe na a sweka swakuda swa ku nun’hwela. Hiloko a byela Yakobe a ku: ‘Ni twa ndlala, ni phamelinyana timbaweni leto.’ Yakobe a mu hlamula a ku: ‘Ni ta ku phamela, kambe ku sungula ni dumbisi leswaku ni ta yamukela pfindla dzraku.’ Kutani Esawu a ku: ‘A ni na mhaka ni pfindla mine! U nga tsrhama na dzrone, no djula ku da ntsem!’ U yanakanya leswaku leswi Esawu a swi yentxiki ku ve wutlhazri? Im-him, a swi vanga wutlhazri. Esawu a txintxise ntxhumu wa lisima ngopfu swinene hi timbaweni.

Loko Izaki a duhwale ngopfu swinene, a vona leswaku a a li nkama lowunene wa kuva a tovokisa n’wana wa mativula. Kambe Rabeka a pfuna xigumandzreni xake Yakobe akuva xi yamukela tovoko ledzro. Nkama lowu Esawu a nga swi tsrumbula leswo, a kwata ngopfu swinene lakakuva a djula ku dlaya Yakobe. Izaki na Rabeka a va djula ku sizrelela Yakobe. Xileswo va mu byela leswi: ‘Famba u ya tsrhama ni malume waku Labani, ku ya tlhasa loko Esawu a zrulela.’ Yakobe a yingiseta vapswele vake a va a ya tsrhama kaya ka malume wake Labani akuva a huluxa wutomi byake.

Yehovha a dumbise Yakobe leswaku a a ta mu sizrelela ku fana ni leswi a sizreleliki Abrahamu na Izaki. Yakobe a zruzrele ka mbangu lowu vitaniwaka Harani, lani a txhatiki kone nakone a ve ni ndangu lowukulu a va a ganya ngopfu swinene.

Ntsrhaku ka malembe manyingi, Yehovha a byela Yakobe a ku: ‘Tlhelela ka tiko ledzri u pswaliwiki ka dzrone.’ Xileswo, Yakobe ni ndangu wake va sungula liyendzro dzra ku tlhelela ka tiko ledzri Yakobe a pswaliwiki ka dzrone. Na va ha li ndleleni, vhanu va kukazri va byela Yakobe va ku: ‘Ku buya makwenu Esawu, a ni 400 wa vavanuna.’ Yakobe a txhava hikusa a yanakanya leswaku Esawu a djula ku mu dlaya, yene ni ndangu wake. Kutani a khongota ka Yehovha a ku: ‘Na kombela Yehovha, ni huluxi ka Esawu.’ Hi siku ledzri landzreliki, Yakobe a nyika Esawu swihiwa swinyingi, swa ku fana ni tihamba, timbuti, tihomu, makamela ni timbongolo.

Ka wusiku lebyiyani, nkama lowu Yakobe a a li wuswake, a vone ntsrumi! Kutani va sungula ku lwa. Va lwe wusiku hinkwabyu byi za byi ya xa. Nambileswi Yakobe a vavisiwiki, a nga godolanga. A ntsrumi yi mu byela yi ku: ‘Ni tsrhiki ni famba.’ Kambe Yakobe a yi byela a ku: ‘Im-him, a ni nge ti ku tsrhika loko u nga ni tovokisi.’

Hi wugamu a ntsrumi yi tovokisa Yakobe. Yakobe a a swi tiva leswaku Yehovha a a nge ti pfumelela kuva Esawu a mu dlaya.

Ka mixo luwani, Yakobe a vone Esawu ni vavanuna va 400 na va ha li kule. Yakobe a ya kumana na Esawu, loko a mu tsrhindzrekela a khinsama ka 7 a mahlweni kwake. Kutani Esawu a tsrutsruma a tsrhindzrekelela Yakobe, a va a mu barasara. Hi wubidzri byavu va sungula ku dzrila ngopfu swinene va tlhela va kondletela ku zrula. U yanakanya leswaku Yehovha a titwise kuyini loko a vona Yakobe a dzrivalelana na Esawu hi ndlela liyani?

Ntsrhaku ka leswo, Esawu a tlhelela kaya kwake nakone Yakobe a ya mahlweni ni liyendzro dzra ku tlhelela lomu a pswaleliwiki kone. A vana hinkwavu va Yakobe a va li 12 wa vone. A mavito yavu hi lawa: Rubeni, Simiyoni, Levhi, Yuda, Dani, Naftali, Gadi, Axeri, Isakari, Zebuloni, Yosefa na Benjamini. Ka vana lava va Yakobe, Yehovha a tizrise Yosefa akuva a huluxa vhanu vake. Wa swi tiva leswaku a swi yentxe hi ndlela yini? Hi ta swi vona ka xiyenge lexi landzrelaka.