Woba Uriko Ukorana Umugambi?
1 Yehova ni Imana y’imigambi. (Yes. 55:10, 11) Duhimirizwa kumwigana. (Ef. 5:1) Nta nkeka yuko ukwo ari ko bikwiye kumera mu buryo turangura igikenurwa cacu. Ni co gituma iki kibazo kibereye: “Woba ukorana umugambi?”
2 Imirimo urangura yo kwamamaza inkuru nziza inzu ku yindi, gushinga intahe akaryo kizanye no gutanga ibisohokayandikiro, yose igize umuce w’igikenurwa worangurana umugambi. Mugabo niwibuke yuko ibanga twahawe ritarimwo gusa kwamamaza inkuru nziza ariko ko ririmwo no guhindura abantu abigishwa. (Mat. 28:19, 20) Tumaze kubiba imbuto z’ukuri kw’Ubwami, birakenerwa ko tugaruka kuzivomera no kuza turazibungabunga tudahengeshanya, mu gihe duhanga amaso Yehova ngo akuze. (1 Kor. 3:6) Birakenewe ko dushira ku muzirikanyi ivyo gusubira kugendera abantu no gutanguza inyigisho za Bibiliya.
3 Agura Igikenurwa Cawe: Wama wumva umerewe neza igihe utereza amaso inyuma ku vyo waranguye mu murimo maze ukibwira uti: “Nararanguye ivyo nishinze.” Nkuko vyanditswe muri 2 Timoteyo 4:5, Paulo yahimirije ati: “Ushitse igikorwa c’ibango ryawe.” Ivyo birimwo kwongereza utwigoro twawe two gukurikirana ugushimishwa kwose kwabonetse. Mu rutonde rwawe rw’umurimo wo ku ndwi, nutegekanye igihe ntabanduka co gusubira kugendera abantu. Niwitwararike intumbero yo kugerageza gutanguza inyigisho za Bibiliya n’abakunda ubugororotsi. Uwo ni wo ukwiye kuba umugambi wawe igihe ugira uruhara mu gikenurwa.
4 Nubaze abamamaji uko biyumvise igihe babona abigishwa babo ba Bibiliya babatizwa kw’iteraniro. Baranezerewe kimwe n’ababatijwe. Bari baranguye umugambi uhambaye! Umwe mu bahindura abantu abigishwa yabiseruye muri ubu buryo: “Guhindura abantu abigishwa bisobanura guhindura abashemeza Yehova benshi kuruta. Bisobanura ubuzima ku bemera ukuri. Ndakunda cane kwigisha abandi ukuri—ni agahore ntiworaba! . . . Benshi mu bashitse ku gukunda Yehova bacitse abagenzi banje pfampfe.”
5 Iyumvire gushobora gusahiriza umuntu agacika umusavyi wa Yehova yamwiyeguriye! Ese ingene ari ikintu giteye umunezero! Ico camwa kiva ku kuba umuntu yakoranye umugambi mu gikenurwa.—Kol. 4:17.