“Ku Mana vyose birashoboka”

MU MPERA z’imyaka ya 1980, ku makoraniro wasanga uwuyobora Umunara w’Inderetsi ari we wenyene afise Umunara, kandi kenshi waba wandikishije iminwe. Narabajije umukurambere yitwa Genadi Gudadze ko tutoza turisohorera ibinyamakuru.

Ico gihe, abavukanyi basohora ibinyamakuru bikeyi bakoresheje akamashini bihinguriye gakoporora igisomwa. Kugira hame haboneka ibinyamakuru, bari bakeneye akamashini gakora neza gusumba, umuntu azi kwandikisha imashini, imashini yo kwandika, no kwama baronka impapuro za karubone. Ariko rero, ibikoresho vyose, mbere n’impapuro, vyategerezwa gusansumwa na leta kandi bigakurikiranwa n’urwego rudasanzwe rw’umutekano.

Hari umuntu tuzinanye yampaye imashini yo kwandika ayikuye mu mashini zitagikoreshwa kandi zitagicungerwa na leta. Mwene wacu yari azi kwandikisha imashini kandi yaremeye kudufasha. Abavukanyi barikoreye akandi kamashini, barabona n’ahantu bari kugurira impapuro za karubone. Vyose vyarikoze, kandi bidatevye twarasohoye Umunara w’Inderetsi wa mbere w’ikijeworojiya.

Ariko haradutse iyindi ngorane. Umusi umwe, Genadi yambwiye ati: “Ni ukurondera ahandi hantu tugurira impapuro.” Yari yabonye amakarato y’izo mpapuro mu biro bimwe vya leta mugabo ntiyazigura kuko abategetsi bamugumizako ijisho. None twari kuzironka gute? Naguma mvuga nti: “Kuzironka ntibishoboka!” Genadi yaciye ambwira ati: “Ntusubire kuvuga ngo ‘ntibishoboka.’ ‘Ku Mana vyose birashoboka’!”​—Mat. 19:26.

Bukeye, naragiye kuri ivyo biro, ngenda ndibaza uko biza kugenda. Yehova yaranyoboye ku mukozi waho w’umutima mwiza, aremera gushikana ikibazo canje ku muyobozi w’ivyo biro. Uwo muyobozi yari umugabo wiwe! Budakeye na kabiri, nari nsigaye ngurira impapuro kuri ivyo biro, kandi kuva ico gihe ntitwasubiye kubura ibikoresho.