Ukuntu Imana yitaho abaragi

Kw’isi yose hari abaragi nk’imiliyoni 70 kandi abenshi muri bo mu kuyaga, bakoresha rumwe mu ndimi z’ibimenyetso zihari, zikaba zirenga 200. Ikibabaje ni uko akenshi abaragi bafatwa nabi, nk’uko tubibona mu maraporo akurikira:

• «Hirya no hino kw’isi, akenshi abantu barirengagiza agateka k’abaragi be n’abatumva neza.»​—Vyavuzwe n’ishirahamwe ryo muri Amerika ryitaho abaragi (Association nationale des sourds, NAD).

• «Mu bihugu biri mu nzira y’amajambere, abaragi bari mu bantu bakenye cane kuruta abandi kandi biragorana ko biga, baronka akazi canke amakuru agezweho.»​—Vyavuzwe n’ishirahamwe ryo kw’isi yose riharanira agateka k’abaragi (Fédération mondiale des sourds).

Imana ibona gute abaragi? Bibiliya ivuga iki ku vyerekeye abaragi? Vyongeye, Ivyabona vya Yehova bariko bafasha gute abaragi muri iki gihe?

Ukuntu Imana ibona abaragi

Bibiliya iravuga ingene Yehovaa Imana yitaho abaragi. Yipfuza ko bafatwa nk’abandi bantu kandi bakaronka inyigisho aturonsa.

Icanditswe: «Ntuze utuke umuntu afise ubumuga bwo kutumva.»​—Abalewi 19:14.

Icanditswe: «Imana [nti]gira nkunzi.»​—Ivyakozwe 10:34.

Icanditswe: «Yezu [yagenda] . . . , yamamaza inkuru nziza y’Ubwami.»​—Matayo 9:35.

Icanditswe: Yezu yaranatumye ‘abatumva basubira kwumva, abatavuga na bo baravuga.’​—Mariko 7:37.

Icanditswe: «Amatwi y’abatumva a[zo]zibuka.»​—Yesaya 35:5.

Ico hasobanura: Yehova yari yaravuze ko abaragi bazokwumva.​—Yesaya 29:18.

Ukuntu Ivyabona vya Yehova bafasha abaragi muri iki gihe

Twebwe Ivyabona vya Yehova turabwira abaragi bo kw’isi yose ubutumwa bw’Imana butanga icizigiro. Ivyo tubigira gute? Turahindura Bibiliya n’amavidewo adufasha kwiga Bibiliya mu ndimi z’ibimenyetso zirenga 100. Vyongeye, turigisha Bibiliya tukagira n’amakoraniro mu rurimi rw’ibimenyetso. Ivyo vyose tubikorera abantu bose bashaka gufashwa n’Imana kandi tukabigira ku buntu. Uti kubera iki? Kubera ko Yezu yategetse ati: «Mwahawe ku buntu, mutange ku buntu.»​—Matayo 10:8.

Urashobora gushikira ivyo bintu vyose ukoresheje internet canke ukabivomera mu kuma kawe ubikuye kuri:

JW.ORG. Uri kuri urwo rubuga, nufyonde ku kamenyetso ko guhindura ururimi usanga hejuru kugira uronke ibihari mu rurimi rw’ibimenyetso wipfuza.

Programa ya JW Library yo mu rurimi rw’ibimenyetso. Nushire iyo programa mu kuma kawe. Uzoca ushobora kuvoma amavidewo yo mu rurimi rw’ibimenyetso canke kuyavuza ikibiriraho.

Ni ibikoresho vyo kwiga Bibiliya ibihe dusohora?

Bibiliya yo mu rurimi rw’ibimenyetso. Bibiliya y’isi nshasha yo mu rurimi rw’ibimenyetso rwo muri Amerika ni yo Bibiliya yatanguye gusohoka ari yose mu rurimi rw’ibimenyetso kw’isi yose. Ubu Bibiliya y’isi nshasha iraboneka ari yose canke igice mu ndimi z’ibimenyetso nyinshi, kandi ziguma ziyongera buri mwaka. (Kugira ubone urutonde rw’izo ndimi zose canke urabe Bibiliya kuri internet, nurabe uruzitiro ruvuga ngo «Bibiliya y’isi nshasha mu rurimi rw’ibimenyetso.»)

• Kugira umenye ukuntu batunganya Bibiliya mu rurimi rw’ibimenyetso, nurabe ividewo ivuga ngo Bibiliya y’isi nshasha yose iraboneka mu rurimi rw’ibimenyetso rwo muri Amerika (mu gifaransa).

• Kugira ubusomyi bwa Bibiliya birushirize kukuryohera, nuvome programa ya JW Library yo mu rurimi rw’ibimenyetso. Iyo programa iragufasha guhitamwo umurongo kanaka wo muri Bibiliya mu rurimi rw’ibimenyetso.

• Dmytro na Vita ni abavyeyi b’abaragi, abana babo na bo barumva. Nurabe ukuntu kuraba amavidewo ya Bibiliya yo mu rurimi rw’ibimenyetso buri musi bibagirira akamaro.

Amavidewo yigisha ivyerekeye Bibiliya. Ivyabona vya Yehova barasohoye amavidewo yo mu rurimi rw’ibimenyetso afasha abantu gutahura no gushira mu ngiro impanuro ngirakamaro Bibiliya itanga ku vyerekeye . . .

• Ingo n’imiryango

• Imiyabaga n’abageze mu bigero

• Abana

Ivyigwa vya Bibiliya. Niwige ubutumwa buri Bibiliya mu rurimi rw’ibimenyetso uri kumwe n’uwukwigisha. Muzokoresha umwanya wipfuza. Nusabe bakwereke ingene wokwiga Bibiliya ku buntu.

Jeson Senajonon aba muri Filipine. Nurabe ingene kwiga Bibiliya vyamufashije kuba umugenzi w’Imana.

Mario Antúnez yari umupasitori muri Honduras. Nurabe ingene Bibiliya yamufashije kuronka inyishu z’ibibazo yari afise, nk’uko yavyivugiye mu nkuru yiwe ivuga ngo: «Nari mfise ibibazo vyinshi ntari bwaronkere inyishu.» (mu gifaransa)

Amakoraniro n’ibikorane. Buri ndwi abaragi barakoranira hamwe kugira bige Bibiliya bongere basenge Imana, bari mu mashengero n’imigwi ikoresha ururimi rw’ibimenyetso hirya no hino kw’isi. Vyongeye buri mwaka, turatunganya ibikorane mu rurimi rw’ibimenyetso kugira twige Bibiliya. Muri ivyo biringo, haba hari abasobanurira abaragi b’impumyi. Turasohora kandi ibitabu biri mu nyuguti z’impumyi tukongera tukabitanga ku buntu.

• Nurabe ahabera ikoraniro hafi yawe.

• Nurabe ibijanye n’ibikorane tugira buri mwaka.

• Niwitabe Icibutso c’urupfu rwa Yezu, rukaba ari urubanza ruruta izindi zose tugira mu mwaka.

Uwitwa José Luis Ayala aba muri Megizike. Yavutse ari umuragi mu nyuma aca arahuma. Nurabe ukuntu yafashijwe kugira ashobore kwigisha neza Bibiliya.