35 MANASE
Yaragize umutima rugabo arigaya
MANASE yavutse bivuye ku gitangaro. Imana yarongereje umwami Hezekiya imyaka yo kubaho ku gitangaro, bica bituma uwo mwami mwiza ashobora kuronka umwana, ari we Manase. Ariko ikibabaje, Hezekiya yapfuye Manase afise imyaka 12. Ako gahungu kaciye kaba umwami, bidatevye gaca karahinduka ntikaba kagikurikiza akarorero keza ka se wako.
Manase yakoze ibicumuro vy’agahomerabunwa. Mu myaka myinshi yamaze ari umwami, yarakoze ibicumuro bikomeye, nko gusenga ibigirwamana no kuremesha abantu kubisenga, ubupfumu, mbere aranatanga abahungu biwe kw’ibimazi. Ku ntwaro yiwe, ububisha bwari bwiraye. Yaratumye Yeruzalemu igisagara c’Imana cagirwa n’amaraso mu kwica abantu benshi no mu gutuma abandi bakora ibibi nk’ivyo. Yehova yararungitse abahanuzi kumuburira ariko aranka kubumviriza. Rero, woshobora kwibaza ukuntu vyagenze kugira Manase afatwe nk’akarorero keza k’umuntu yagaragaje umutima rugabo. Reka tubirabe.
Umusi umwe, ubuzima bwa Manase bwarahindutse bukwi na bukwi. Kubera ko uwo mwami yari yaranse kwumviriza abahanuzi ba Yehova, Imana yararetse abakuru b’ingabo z’Abashuri baratera Ubuyuda. Bibiliya ivuga iti: «Manase bamufatisha ingobe, bamubohesha amapingu abiri y’umujumpu hanyuma bamujana i Babiloni.» Niwihe ishusho ukuntu uwo mwami w’umunyabwibone yamaramaye hamwe n’amagorwa yabonye muri urwo rugendo rurerure kandi rutoroshe yagize aja i Babiloni.
Manase yari inkozi y’ikibi katwa, ariko Yehova yaramuhaye akaryo ko guhinduka
Igihe Manase yari imbohe i Babiloni, ari mu ngorane nyinshi, yararonse umwanya wo kuzirikana ku vyo yari yarakoze. Ashobora kuba yaragize irungu rikomeye, mbere ariyumvira ko atagira gitabara. None za mana zose z’ikinyoma yasenga, mbere akaziha n’ibimazi vy’abana biwe, zari hehe ko zitaje kumufasha? Yarabonye ko yari akeneye kugira ico ahinduye. Ikintu ca mbere yakoze kwabaye ugusenga Yehova. Yaraciye bugufi, arasaba Yehova ngo amufashe. «[Yagumye] yicisha bugufi cane imbere y’Imana ya ba sekuruza.» Yehova yarabonye ko yahindutse maze aramufasha. Manase yabandanije kwicisha bugufi, Yehova na we arushiriza kumwiyegereza. (Zab. 138:6) Yarasenze «Yehova Imana yiwe» amusaba imbabazi. Emwe, ‘yagumye asenga.’
None Imana yakiriye gute ayo masengesho? Bibiliya ivuga iti: «Na yo igira akagongwe kubera ugutabaza kwiwe. Yumva ugutakamba kwiwe.» Imana y’ukuri yaragiriye imbabazi Manase yongera iramufasha mu buryo bukomeye. Iyo nkuru ibandanya iti: «Imusubiza i Yeruzalemu ku ntebe yiwe y’ubwami.» Manase yari aronse akaryo ko kwerekana neza nimba yari yarahindutse vy’ukuri.
Manase amaze gushika i Yeruzalemu, yari akeneye kwiheka kuri Yehova kugira ashobore gufasha abantu guhindura ingendo yabo mbi. Ivyo vyari bihambaye cane kubera ari we nyene yari yaratumye abantu bamara imyaka bakora ibintu vy’agahomerabunwa. Ashobora kuba yarahagarika umutima yibaza ko abantu batazomwumviriza canke ko boshavujwe no kumubona yarahindutse. Naho ivyo vyoba vyaramuteye ubwoba, yaragize umutima rugabo arakora ibigororotse. Yarubatse uruhome kugira akingire Yeruzalemu yongera arakura ibigirwamana vyari mu gisagara no ku rusengero rwa Yehova. Yarasanuye igicaniro ca Yehova, aca aragitangirako ibimazi. Yarakoze n’ikintu gishobora kuba cari kigoye gusumba ibindi, ni ukuvuga gushikiriza ijambo abanyagihugu. Yarahinduye ivyo yari yarababwiye kera, arabaremesha ku mugaragaro «gukorera Yehova Imana ya Isirayeli.» Uwo mwami yahoze ari mubi cane, yari yarahindutse vy’ukuri. Akarorero kiwe karatwereka neza kamere nziza cane Yehova afise, ko ari «mwiza kandi [y]iteguriye kubabarira!»—Zab. 86:5.
Ikibabaje, Manase ntiyashoboye gukosora ibintu vyose yari yarononye. Yehova yaramubabariye, ariko ntiyoretse guhana abantu b’inkozi z’ikibi kubera ububisha n’ubwicanyi bakoze ku ngoma ya Manase. Bobo ntibiganye umwami wabo ngo bigaye maze bahinduke. Mbere na Amoni umuhungu wa Manase ntiyiganye akarorero keza ko kwigaya ka se wiwe. Ariko birashoboka cane ko Manase yafashije cane umwuzukuru wiwe Yosiya kugira akunde Yehova. Yosiya ashobora kuba yama yibuka ukuntu sekuru wiwe yagaragaje umutima rugabo, aricisha bugufi maze arigaya. Inyuma y’imyaka myinshi Manase akora ibibi, yarahindutse vy’ukuri kandi mu gihe cose yari asigaje kubaho yagumye yibuka ko Umuvyeyi wiwe wo mw’ijuru yari yaramubabariye.
Soma iyo nkuru muri Bibiliya:
Ikibazo co kuganirako:
Manase yerekanye gute umutima rugabo?
Niwinjire mu mizi
1. Abamori ni bo bahora baba i Kanani. Kuba Manase «[yakoze] ibintu vy’ububisha biruta ivyo Abamori bose babayeho imbere yiwe bakoze» vyerekana iki? (2 Abm. 21:11; w00 1/11 14 ing. 5-6-wcgr; gl 10 ing. 5, akajambo k’epfo.)
2. Ni ibiki abacukuzi bubuye vyemeza ko Manase yabayeho be n’uko intwaro y’Abashuri yari ikomeye ico gihe? (it «Manassé» No. 4 ing. 2-wcgr) A
© The Trustees of the British Museum. Licensed under CC BY-NC-SA 4.0. Source
Ifoto A: Izina «Manase, umwami w’Ubuyuda» riraboneka ku kibumbano ca Esarihadoni
3. Ni igiki cerekana ko vy’ukuri Abashuri bafatisha ingobe abo bagize imbohe? (2 Ngo. 33:11; it «Crochet, Agrafe, Croc, Hameçon» ing. 4-wcgr) B
Ifoto B: Igicapo c’Abashuri co mu kinjana c’umunani imbere ya Kristu
4. Ni gute Yehova yapimishije Yeruzalemu «umugozi» yongera akoresha «inivo»? (2 Abm. 21:13; it «Niveau» ing. 2-wcgr)
Rondera ivyigwa wohakura
Iyi nkuru itwigisha iki ku bijanye no kwigaya?
Akarorero ka Manase katwereka gute ko naho Yehova aharira abacumuzi bigaya, babwirizwa gushikirwa n’ingaruka z’ibibi bakoze? (Yer. 15:3-5) C
Ifoto C
Ni mu buryo ubuhe wokwigana umutima rugabo wa Manase?
Zirikana mu buryo bwagutse
Iyi nkuru inyigishije iki ku vyerekeye Yehova?
Iyi nkuru ifitaniye isano irihe n’umugambi wa Yehova?
Ni ibiki nzobaza Manase niyazuka?
Rondera kumenya n’ibindi
Raba ingene akarorero ka Manase kafashije umuvukanyi kugaruka kuri Yehova.
Nimba bishika ukumva umenga ntubereye kubera ibicumuro wakoze muri kahise, iyi nkuru ya Manase yokuremesha gute?