Ibibazo vy’Abasomyi
Vyoba biranga ubukerebutsi ko Umukirisu w’ukuri yitaba ibirori vy’ugusabira uwapfuye canke vy’ubugeni bibera mw’isengero?
Tugize uruhara mu bwoko na bumwe bw’idini y’ikinyoma ntibihimbara Yehova kandi bikwiye kwirindwa. (2 Ab’i Korinto 6:14-17; Ivyahishuriwe 18:4) Ibirori vy’ugusabira uwasandavye bibera mw’isengero, aba ari inkuka y’imisa ikunda kuba irimwo insiguro ishigikira ivyiyumviro bidashingiye ku Vyanditswe nk’ukudahwera kw’ubugingo be n’impera ihabwa abantu beza bose yo mw’ijuru. Vyoshobora kandi kujamwo n’ivyo gukubita urumenyetso rw’umusaraba be no kwifatanya na patiri mu gisabisho. Ibisabisho be n’ibindi bintu bagira muri iryo dini bitandukanye n’inyigisho za Bibiliya, vyoshobora na vyonyene kuba mu bigirwa mu gihe c’ibirori vy’idini vy’ubugeni bibera mw’isengero canke ahandi hantu. Umukirisu ari mu mugwi abandi bose bariko baragira ikintu gikorwa mw’idini y’ikinyoma, vyoshobora kutamworohera kunanira umukazo wo kwifatanya na bo. Ese ukuntu kwoba ari ukubura ubukerebutsi umuntu yishize muri ako kosho!
Bite nimba Umukirisu yumvise ategerezwa kwitaba ibirori vy’ugusabira uwapfuye canke vy’ubugeni bibera mw’isengero? Nk’akarorero, Umukirisu w’umukenyezi yoshobora guhimirizwa n’uwo bubakanye atizera, ngo babe bari kumwe ku rubanza nk’urwo. Yoba yoshobora kujana na we ka burorerezi? Ku gusonera ivyipfuzo vy’umunega wiwe, uwo mukenyezi yoshobora gufata ingingo yo kujana na we, akagenda yafashe umwiyemezo wo kutagira uruhara mu birori na bimwe vy’idini. Ku rundi ruhande, yoshobora gufata ingingo yo kutajayo, afatiye ku ciyumviro c’uko uko ibintu vyifashe vyoshobora gutuma akazwa mu mutima birenze urugero, kumbure bikamutuma adohoka ku ngingo ngenderwako z’Imana. Ni we akwiye kwifatira ingingo. Akwiye kwumva ko ashize impungenge mu mutima, akagira ijwi ryo mu mutima ritamwagiriza ikibi.—1 Timoteyo 1:19.
Uko biri kwose, vyomubera vyiza gusigurira umunega wiwe yuko atoshobora kugira uruhara mu birori na bimwe vy’idini umutima uri mu nda canke ngo aje mu vyo kuririmba indirimbo z’idini kibure ngo yunamike umutwe igihe haturwa igisabisho. Yishimikije ivyo yamusiguriye, umunega yoshobora gutahura yuko igihe uwo mukenyezi wiwe yoba ari ho ari vyoshobora gutuma haduka ikintu kimaramaza uwo mugabo. Yoshobora guhitamwo kwijana bivuye ku rukundo akunda umukenyezi wiwe, ku kwubahiriza ivyo yemera, canke ku kwanka kumaramara. Ariko mu gihe yoshimika rwose ngo bajane, uwo mukenyezi yoshobora kugenda bwa murorerezi asanzwe.
Ikitokwirengangizwa coco ni ingaruka ukwitaba ibirori mu nyubakwa y’ivy’idini vyoshobora kugira ku bo dusangiye ukwemera. Ivyo vyoba vyoshobora gutsitaza bamwebamwe? Boba boshobora kugoyagoya mu vyo kwirinda ugusenga ibigirwamana? Intumwa Paulo ahimiriza ati: “Murobanure [“ibintu bihambaye kuruta,” NW],” muhore mutagira ubupfunya cank’ibigwisha gushitsa ku musi wa Kristo.”—Ab’i Filipi 1:10.
Igihe ari urubanza rwerekeye incuti ishika y’ivy’umubiri, hoshobora kubaho n’iyindi mikazo y’abo mu muryango. Uko biri kwose, Umukirisu ategerezwa kurimbura yitonze ibintu vyose vyerekeye ico kibazo. Mu bihe bimwebimwe yoshobora kubona ko ata ngorane zokwaduka yitavye ka burorerezi ibirori vy’ugusabira uwapfuye canke vy’ubugeni bibera mw’isengero. Ariko rero, ibintu vyohabera vyoshobora kwerekana yuko kwitaba ivyo birori, ikibi vyogirira ijwi ryiwe ryo mu mutima canke iry’abandi kirengeye ivyiza vyoshobora kuva mu kujayo. Uko vyoba vyifashe kwose, Umukirisu akwiye kuraba neza yuko ingingo afashe itazoca kubiri n’ivyo kugumana ijwi ryo mu mutima ritamwagiriza ikibi mu nyonga z’Imana n’abantu.