Ibibazo vy’abasomyi

Vyoba bibereye ko Icabona ca Yehova yitaba ubugeni bw’incuti yiwe canke uwo bazinanye atari Icabona?

Ubugeni ni imanza ziteye umunezero, kandi birumvikana ko umukirisu ashima kwifatanya n’abandi muri uwo munezero. Ego ni ko abana bato baba batumiwe bakwiye gukurikiza ubuyobozi bw’abavyeyi babo canke bw’ababajejwe, abafise uburenganzira bwo gufata ingingo ya nyuma (Abanyefeso 6:1-3). Ariko none, tuvuge iki mu gihe umugabo atari Icabona ca Yehova asavye umukenyezi wiwe mukirisu kumuherekeza mu birori vy’ubugeni bibera mu rusengero? Ijwi ryiwe ryo mu mutima ryoshobora kumwemerera kujayo akaba gusa umurorerezi yiyemeje kutagira uruhara mu kintu na kimwe kijanye n’ugusenga cogirwa muri ivyo birori.

Muri rusangi rero, umuntu ni we yifatira ingingo nimba yokwitaba canke atokwitaba ibirori vy’ubugeni bunaka. Ariko rero, umukirisu wese arakwiye kumenya ko afise ico azobazwa na Yehova, gutyo akaba yorimbura ingingo ngenderwako zitari nke zo mu Vyanditswe igihe afata ingingo ijanye no kwitaba ubugeni bw’umuntu atari Icabona.

Igikwiye kuba igihambaye kuruta ibindi ku mukirisu, ni icipfuzo co gushimwa n’Imana. Yezu yavuze ati: “Imana ni Impwemu, kandi abayisenga bategerezwa kuyisenga mu mpwemu no mu kuri” (Yohani 4:24). Ku bw’ivyo, Ivyabona vya Yehova ntibisuka mu bikorwa vyo gusukiranya ukwizera, nk’amasengesho, imihamuro canke ibirori biteye kubiri n’ukuri kwo muri Bibiliya.​—2 Abakorinto 6:14-17.

Umukirisu aratahura yuko ingingo afata yoshobora kandi kugira ico ikoze ku bandi. Ufashe ingingo yo kuvyitaba, incuti zawe zoba zizobabazwa n’uko utagize uruhara mu kantu kose kagirwa muri ivyo birori vy’ubugeni? Urakeneye kurimbura kandi ico bishobora kugira ku bo musangiye ukwizera (Abaroma 14:13). Naho nyene wewe canke abandi bo mu rugo iwanyu mwoshika ku ciyumviro c’uko kwitaba ubugeni kanaka bw’uwutari Icabona ata ngorane biteye, ubwo vyoba bitazogira ingaruka mbi ku bavukanyi n’abavukanyikazi bawe? Vyoba bishobora gukomeretsa ijwi ryo mu mutima rya bamwebamwe?

Ibirori vy’ubugeni birimwo incuti zitari Ivyabona birashobora kubamwo ibintu bidatomoye. Bite ho mu gihe wosabwa kuba umuraganyi? Canke vyogenda gute mu gihe uwo mwubakanye atari Icabona kandi akaba ashaka kugira uruhara mu kantu kose kagirwa ngaho? Nimba ubwo bugeni bujanye n’ibirori vyo gusezerana muri Leta biyoborwa n’umucamanza canke uwuyiserukira, kuvyitaba kwoba gusa ari ukuba umurorerezi w’ibirori vyo gusezerana imbere y’amategeko.

Ariko rero, ibirori vy’ubugeni bigirirwa mu nyubakwa y’ivy’idini canke bihagarikirwa n’umukuru w’idini, biravyura amakenga yiyongereye. Kugira ngo ukurikize ijwi ryawe ryo mu mutima ryamenyerejwe na Bibiliya wongere wirinde kudohoka ku vyo wemera mu vy’idini canke gukora ikintu cohava gitera ubuyega abitavye ivyo birori, woshobora gufata ingingo yo kwirinda kubwitaba (Imigani 22:3). Wokwirinda uguhagarika umutima birenze ukongera ukabirinda n’abo mu muryango wawe uramutse usiguye imbere y’igihe ivyo wemera bishingiye kuri Bibiliya, ukabereka urugero woshikanako mu vyo wokora uramutse witavye urwo rubanza canke kumbure ukababwira ikindi kintu woshima gutunganya ku bwabo.

Abakirisu bamwebamwe, bamaze kurimbura bitonze ibintu vyose, boshobora gufata ingingo y’uko bitoba ari bibi kwitaba bwa barorerezi basanzwe ubugeni bw’uwutari Icabona. Mugabo, mu gihe umukirisu abonye yuko yitavye ivyo birori yohava ageragezwa kudohoka ku ngingo ngenderwako z’Imana, yoshobora gushika ku ciyumviro c’uko agiye yosanga yishe ibiruta ivyo yokijije. Nimba afashe ingingo yo kutitaba ubwo bugeni, mugabo agafata ingingo yo kuja mu birori bigirwa inyuma yaho, akwiye kwiyemeza “[gukora] vyose ku bw’ubuninahazwa bw’Imana” (1 Abakorinto 10:31). Mu gufata ingingo nk’izo, “umwe wese azokwikorera umutwaro wiwe bwite” (Abagalatiya 6:5). Rero, ico wohitamwo cose caba ikihe, niwibuke yuko kuguma ufise ijwi ryo mu mutima ryiza imbere ya Yehova Imana bihambaye cane.