Woba uvyibuka?

Woba warinovoye ugusoma inomero z’Umunara w’Inderetsi za vuba?

Raba rero nimba ushobora kwishura ibibazo bikurikira:

• Ni mu buryo bumwebumwe ubuhe Rusi yatanze akarorero keza?

Yari intangakarorero mu rukundo yakunda Yehova, mu rukundo rudahemuka yakunda Nawomi, be no mu kugaragaza kamere y’ubwira n’iyo kwicisha bugufi. Abantu bari bafise imvo yumvikana yo kubona ko ari “umugore aroranye” (Rusi 3:11).​—15/4, urupapuro rwa 23-26.

• Tuzi dute ko Yehova ababara abantu basanzwe?

Yabwiye Abisirayeli, abari barafashwe bunyamaswa mu Misiri, kutagirira nabi abagorwa (Kuvayo 22:21-24). Yezu, uwigana Se wiwe, yaritwararitse vy’ukuri abantu basanzwe, kandi abo yahisemwo ngo bamubere intumwa bari abantu “batari barize bakaba n’abantu basanzwe” (Ivyakozwe 4:13, NW; Matayo 9:36). Turashobora kwigana Imana mu kwitwararika abandi, nk’akarorero abakiri bato.​—15/4, urupapuro rwa 28-31.

• Ni imvo iyihe dufise yo kwemera yuko Yehova abona ivyo dukora?

Inkuru zo muri Bibiliya zerekana yuko Yehova abona ivyo abantu barangura. Yarabonye ikimazi Abeli yashikanye, kandi arabona ‘ibimazi vyacu vyo gukenguruka ari vyo mbuto z’iminwa’ (Abaheburayo 13:15). Yehova yari azi yuko Henoki yihatira kumuhimbara mu kugira ubuzima butyoroye kandi buranga inyifato runtu. Kandi Imana yarabona ingene umupfakazi atari Umwisirayeli w’i Zarefati yasangiye udufungurwa tw’intica ntikize n’umumenyeshakazoza Eliya. Yehova arabona kandi ibikorwa vyacu biranga ukwizera.​—1/5, urupapuro rwa 28-31.

• Ni kubera iki twovuga yuko inyuma ya Pentekoti yo mu 33 G.C., Abayuda bacitse abakirisu bategerezwa kwiyegurira Imana ubwabo?

Mu 1513 B.G.C., Abisirayeli ba kera baragiraniye ubucuti na Yehova biciye mu kumwiyegurira (Kuvayo 19:3-8). Kuva ico gihe, Abayuda bavukira muri iryo hanga ryiyeguye bari mw’isezerano ry’Ivyagezwe. Mugabo Yehova yarakuyeho iryo sezerano ry’Ivyagezwe biciye ku rupfu rwa Kirisitu rwashitse mu 33 G.C. (Ab’i Kolosayi 2:14). Mu nyuma, Abayuda baba bipfuza gusukurira Imana mu buryo yemera bategerezwa kuyiyegurira hanyuma bakabatizwa mu mazi mw’izina rya Yezu Kirisitu.​—15/5, urupapuro rwa 30-31.

• Kwosa imibavu vyoba bifise ikibanza mu gusenga kw’ukuri muri iki gihe?

Ikoreshwa ry’imibavu ryari mu bigize ugusenga kw’ukuri muri Isirayeli ya kera (Kuvayo 30:37, 38; Abalewi 16:12, 13). Mugabo isezerano ry’Ivyagezwe, harimwo n’ikoreshwa ry’imibavu, ryarangiranye n’urupfu rwa Kirisitu. Abakirisu barashobora kwihitiramwo nimba bokoresha imibavu ku bw’intumbero zitajanye n’ivyo gusenga, mugabo ntibiri mu bigize ugusenga kw’ukuri muri iki gihe. Inyiyumvo z’abandi zirakwiye kandi kwubahirizwa kugira ngo umuntu yirinde ivyo kubatsitaza.​—1/6, urupapuro rwa 28-30.

• Ni inkuru iyihe iherutse gusohoka yatumye benshi barushiriza kuzirikana ku vy’uko Yezu yabayeho?

Haravuzwe cane ivyerekeye isandugu y’amagufa yatowe muri Isirayeli. Biboneka ko ari iyo kuva mu kinjana ca mbere, kandi iharangatuweko amajambo avuga ngo: “Yakobo, mwene Yozefu, mwenewabo na Yezu”. Bamwebamwe babona yuko ivyo ari “ikimenyamenya co mu vyacukuwe ca kera kuruta ibindi vyose kitari ico muri Bibiliya cemeza” ko Yezu yabayeho.​—15/6, urupapuro rwa 3-4.

• Umuntu yiga gute gukunda?

Abantu biga gukunda ubwa mbere na mbere biciye ku karorero no ku kumenyerezwa bahabwa n’abavyeyi babo. Igihe umunega n’umukenyezi bakundana kandi bakubahana, abana barashobora kwiga gukunda (Abanyefeso 5:28; Tito 2:4). Naho umuntu atoba ava mu muryango urangwamwo urukundo, arashobora kwiga gukunda mu kwemera uburongozi bwa kivyeyi buva kuri Yehova, mu kuronka imfashanyo y’impwemu yera no mu gushigikirwa n’ikivukano ca gikirisu mu buryo buranga igishika.​—1/7, urupapuro rwa 4-7.

• Ewuzebi yari nde, kandi ni icigwa ikihe twokura ku buzima bwiwe?

Ewuzebi yari umutohozakahise wa kera, uwahejeje kwandika mu 324 G.C. igitabu kigizwe n’imbumbe cumi gifise umutwe uvuga ngo Kahise ka Ekeleziya (mu congereza). Naho yemera ko Data yariho imbere y’uko Umwana abaho, Ewuzebi yarivuguruje mu gihe ca ya nama y’i Nicée. Biboneka ko yiyobagije rya tegeko rya Yezu risaba abayoboke biwe ‘kutaba ab’isi’ (Yohana 17:16).​—15/7, urupapuro rwa 29-31.

• Yehova yoba yarahinduye ukuntu abona ivyo kwabira abagore benshi?

Oya, Yehova ntiyahinduye ukuntu abona ivyo kwabira abagore benshi (Malaki 3:6). Indinganizo y’Imana yerekeye umuntu wa mbere yari iy’uko ‘abana n’umugore wiwe akaramata’ bakaba umubiri umwe (Itanguriro 2:24). Yezu yavuze yuko umuntu yahukanye bitavuye ku busambanyi hanyuma akongera kwubakana n’uwundi aba abaye umusambanyi (Matayo 19:4-6, 9). Ukuba Yehova yararetse hakaba ivyo kwabira abagore benshi vyaheranye n’ishingwa ry’ishengero rya gikirisu.​—1/8, urupapuro rwa 28.