‘Nimuze dushikirize ishikanwa rya Yehova’
IGIHE hari umuntu agukoreye ikintu kiranga ubuntu, werekana gute ko ukenguruka? Rimbura ukuntu abakuru ba gisirikare bo muri Isirayeli berekanye ko bakenguruka aho bamariye gutana mu mitwe n’Abamidiyani. Iyo ntambara bayirwanye inyuma y’aho Isirayeli icumuriye mu bijanye na Bayali y’i Peyori. Imana yarahaye intsinzi abasavyi bayo, maze iminyago igaburirwa abasoda 12.000 hamwe n’abandi Bisirayeli. Mu buryo buhuye n’ubuyobozi Yehova yari yatanze, abo basoda barahaye abaherezi ku vyo bari baronse, abandi Bisirayeli na bo baha Abalewi ibingana n’ivyo nyene.—Guh. 31:1-5, 25-30.
Ariko rero, abo bakuru ba gisirikare baripfuza kugira ibiruta ivyo. Babwiye Musa bati: “Abasavyi bawe baharūye igitigiri cose hamwe c’abarwanyi tujejwe kandi nta n’umwe muri twebwe vyavuzwe ko abuze.” Baciye bafata ingingo yo gushikiriza inzahabu hamwe n’udusharizo dutandukanye ngo bibe ishikanwa rya Yehova. Uburemere bwose hamwe bw’udusharizo tw’inzahabu bwashitse ku bilo birenga 190.—Guh. 31:49-54.
No muri iki gihe nyene, abantu benshi baravyurirwa umutima wo kwerekana ko bakenguruka ivyo Yehova yabakoreye. Vyongeye, abasavyi b’Imana biyeguye si bo gusa berekana mwene ukwo gukenguruka. Nk’akarorero, rimbura ibijanye n’umushoferi w’ibisi yatwara umugwi w’abari bavuye mu bindi bihugu akabajana ku kibuga c’inkino cagirirwamwo ihwaniro mpuzamakungu ryabereye muri Bolonye, mu Butaliyano mu 2009 akongera akabagarukana. Kubera ko yari umushoferi yiyubara cane kandi yitonda, abagendera mw’ibisi yiwe barafashe ingingo yo kumwandikira akajambo ko kumukengurukira no kumuha agashimwe kari kumwe n’igitabu Mu vy’ukuri Bibiliya yigisha iki? Uwo mushoferi yaciye yishura ati: “Ndemeye mpimbawe kwakira ako gakarata be n’ico gitabu, mugabo ndabasubije ayo mahera kubera yuko nipfuza kuyatangako intererano kugira ngo mubandanye ico gikorwa muriko murakora. Naho ntari Icabona ca Yehova, ndipfuza gutanga iyi ntererano kubera ko nabonye yuko mukora ibintu mubitumwe n’urukundo.”
Igihe wumva ushaka gukengurukira Yehova kubera ivyo yagukoreye, uburyo bumwe wobigira ni mu gutanga intererano ku bw’igikorwa Ivyabona vya Yehova barangurira kw’isi yose. (Mat. 24:14) Uburyo butandukanye bamwebamwe bahitamwo gutanga intererano, buri mu ruzitiro ruri kumwe n’iki kiganiro.
[Uruzitiro ku rup 20, 21]
UBURYO BUTANDUKANYE BAMWEBAMWE BAHITAMWO GUTANGA
INTERERANO KU BW’IGIKORWA KIRANGURIRWA KW’ISI YOSE
Abenshi barashira ku ruhande amahera, canke bakabika igitigiri kinaka c’amahera bazoshira mu dusandugu tw’intererano twanditseko ngo “Igikorwa kirangurirwa kw’isi yose.”
Ku kwezi ku kwezi, amashengero ararungika ayo mahera ku biro vy’Ivyabona vya Yehova bihagarikiye ibihugu akukira. Izo ntererano z’amahera zitangwa n’abavyishakiye, zoshobora no kurungikwa ata handi ziriwe ziraca kuri aderese ikurikira: Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201- 2483, canke na ho zikarungikwa ku biro vy’ishami vy’Ivyabona vya Yehova bihagarikiye igihugu ubamwo. (Intererano zitangwa n’abavyishakiye zavuzwe mu kiganiro kiri kumwe n’uru ruzitiro zirashobora kandi kurungikirwa ibiro vy’ishami vy’Ivyabona vya Yehova bikorera mu gihugu ubamwo.) Amasheki arungikwa kuri iyo aderese akwiye kuba yanditsweko yuko amahera yohabwa “Watchtower.” Ibintu vyo mu mabuye y’agaciro canke ibindi bintu vy’agaciro na vyo nyene vyoshobora gutangwa. Ivyo bintu vyoba bitanzweko intererano bikwiye guherekezwa n’ikete rigufi rivuga yuko ari ingabirano.
INDINGANIZO Y’IVYO GUTANGA AMAHERA YOSHOBORA GUSUBIZWA
Amahera yoshobora kurungikirwa ishirahamwe Watch Tower Bible and Tract Society of Pennsylvania, kugira riyakoreshe mu gikorwa kirangurirwa kw’isi yose. Ariko rero, ayo mahera yoshobora gusubizwa mu gihe nyene kuyatanga abisavye. Ushaka kumenya vyinshi kuri ico kibazo, turakwinginze ubaze mu kwandikira Ibiro vy’Umushingwabigega ukoresheje aderese iri ku mpera z’urupapuro rwa 21.
KURINGANIZA IVYO GUTANGA UMUNTU AVYISHAKIYE
Uretse ingabirano z’amahera, hariho ubundi buryo bwo gutanga intererano zo guteza imbere umurimo w’Ubwami urangurirwa kw’isi yose. Muri ubwo buryo harimwo ubu bukurikira:
Soransi: Izina Watch Tower Bible and Tract Society of Pennsylvania ryoshobora gutangwa ngo iryo shirahamwe ribe ari ryo ryakira amahera ya soransi y’ubuzima bw’umuntu canke imbitso y’amahera umuntu azokwikorako mu gihe akukurutse canke ahawe pansiyo.
Amakonte yo muri banki: Amakonte yo muri banki, impapuro zemeza amahera yabikishijwe muri banki, canke amakonte y’umuntu yakukurutse, birashobora kubikishirizwa ishirahamwe Watch Tower Bible and Tract Society of Pennsylvania canke bigashingwa yuko bizohabwa iryo shirahamwe nyene vyo niyapfa, hisunzwe ibisabwa n’ibanki y’aho umuntu aba.
Umutahe umuntu afise ahantu be n’ivyete bitanga uburenganzira bwo kwakira amahera aho ayafise: Ivyo na vyo nyene vyoshobora guhabwa ishirahamwe Watch Tower bwa ngabirano canke akaba ari ryo rihabwa kuganza ibisigi vy’uwapfuye.
Itongo canke inzu: Itongo canke inzu, kibure vyompi uko ari bibiri, mu gihe ari ibishobora kugurishwa, birashobora gutangwa bwa ntererano mu kubigaba. Mu gihe ari aho umuntu aba, nyene kubitanga arashobora gusigirwa aho aba arabaye, agashobora kubandanya kuhaba igihe cose asigaje kubaho. Imbere yo kugira amasezerano yo gushikiriza ico ari co cose muri ivyo, urabanza ubivugane n’ibiro vy’ishami vyo mu gihugu ubamwo.
Ukuza uraronka amahera ku yo uba waratanzeko ingabirano: Muri iyo ndinganizo, umuntu araha urwego kanaka rukoreshwa n’Ivyabona vya Yehova amahera canke inzandiko zemeza ko ayafise ahantu. Nyene gutanga na we, canke umuntu yagenywe na we, araronka amahera kanaka ku mwaka ku mwaka amufasha kubaho. Ku mwaka biba vyemejwe ko nyene gutanga ayo mahera agengwa n’iyo ndinganizo, aragabanirizwa ikori yahora ayatangako.
Ivyete vy’iragi be n’imbitso: Itongo canke amahera birashobora kuragwa ishirahamwe Watch Tower Bible and Tract Society of Pennsylvania biciye ku cete c’iragi canditswe mu buryo bwemewe n’amategeko, canke bigashobora kwitwa ko ishirahamwe Watch Tower Bible and Tract Society of Pennsylvania ari ryo rigabiwe icete cemeza imbitso umuntu afise ahantu. Imbitso iteza imbere ishirahamwe ry’ivy’idini irashobora gutuma umuntu akurwako amakori amwamwe.
Imvugo ngo “kuringaniza ivyo gutanga umuntu avyishakiye” yerekana ko nyene gutanga abanza kubitegekanya. Mu ntumbero yo gusahiriza abantu bipfuza guteza imbere igikorwa Ivyabona vya Yehova barangurira kw’isi yose biciye ku buryo bunaka bwo gutanga intererano, harateguwe agatabu mu congereza be no mu gisupanyoli kerekeye ugutanga kwo gushigikira umurimo w’Ubwami urangurirwa kw’isi yose (Charitable Planning to Benefit Kingdom Service Worldwide). Ako gatabu kanditswe kugira gatange amakuru ajanye n’uburyo butandukanye ingabirano zishobora gutangwa haba ubu canke biciye ku kubiraga ishirahamwe. Abantu benshi, bamaze gusoma ako gatabu no kubiganira n’abahanuzwajambo babo mu vy’amategeko canke mu vy’amakori, barashoboye gushigikira ibikorwa Ivyabona vya Yehova barangurira kw’isi yose bijanye n’ivy’idini be n’ivy’ugufasha abari mu ngorane, muri ico gihe nyene bararushiriza kuhungukira rwose mu bijanye no kuriha amakori. Ako gatabu umuntu arashobora kukaronka mu kugasaba ku biro biraba ivy’ukuringaniza ibijanye no gutanga umuntu avyishakiye.
Nimba ushaka kumenya ayandi makuru kuri ivyo, wobiganira n’ibiro biraba ivy’ukuringaniza ibijanye no gutanga umuntu avyishakiye, mu kwandika ikete ukoresheje iyo aderese ishizwe aho hepfo canke mu guterefona ibiro vy’ishami bikorera mu gihugu canyu ukoresheje izo nomero zerekanywe.
Ivyabona vya Yehova
B.P. 2150 Bujumbura
Telefone: (257) 22241110