Woba uhimbarwa n’“agateka ko gutanga n’umutima ukunze”?

ABAKIRISU bo mu ntango b’i Filipi bari bazwi ko bashigikira batitangiriye itama ugusenga kw’ukuri. Mw’ikete Paulo yabandikiye ahumekewe n’Imana, yavuze ati: “Nama nantaryo nshimira Imana yanje igihe cose ndabibutse mu gutakamba kwanje kwose ku bwanyu mwese, uko ntakambana akanyamuneza, kubera umuganda mwaterereye ku nkuru nziza kuva ku musi wa mbere gushika n’ubu.” (Flp. 1:3-5) Paulo yaribuka neza igihe Lidiya n’abo mu rugo rwiwe babatizwa be n’ukuntu abigiranye agatima k’ubwakiranyi yagobereye Paulo n’abo bari bafatanije igikorwa co kwamamaza ngo bagume mu nzu yiwe.​—Ivyak. 16:14, 15.

Budakeye na kabiri, iryo shengero ryari riherutse gushingwa i Filipi ryararungikiye Paulo ibifungurwa incuro zibiri igihe yamara amayinga atari make ari kumwe n’abo basangiye ukwemera i Tesalonika, hakaba hari nko ku bilometero 160 uvuye i Filipi. (Flp. 4:15, 16) Haciye imyaka mikeyi, Abafilipi be n’abandi bavukanyi b’i Makedoniya barumvise ko abakirisu b’i Yeruzalemu bariko barahamwa bari n’ivyo bakeneye, maze baripfuza kubafasha naho bari mu marushwa n’“ubworo . . . bwinshi.” Paulo yaremeje ko ivyo mu vy’ukuri vyari “birengeye ubushobozi bwabo koko.” Yamara, yanditse ati: “Baguma batwinginga bashimitse rwose . . . ngo baterwe agateka ko gutanga n’umutima ukunze.”​—2 Kor. 8:1-4; Rom. 15:26.

Haciye nk’imyaka cumi Abafilipi babaye abakirisu, bari bagifise ako gatima nyene ko gutanga batitangiriye itama. Aho bumviye ko Paulo apfungiwe i Roma, bararungitse Epafurodito maze agira urugendo rw’ibilometero 1.287 n’amaguru yongera aca mu kiyaga, ashiriye iyo ntumwa ivyo ikeneye. Biragaragara ko Abafilipi bipfuza kuronsa Paulo ivyo akeneye kugira ngo ashobore kubandanya gukomeza abavukanyi no kwamamaza inkuru nziza, naho nyene yari apfunzwe.​—Flp. 1:12-14; 2:25-30; 4:18.

Muri iki gihe, abakirisu b’ukuri babona yuko ari agateka gushigikira igikorwa co kwamamaza Ubwami no guhindura abantu abigishwa. (Mat. 28:19, 20) Barateza imbere ivyungura Ubwami mu gutanga umwanya wabo, inguvu zabo n’uburyo bafise. Uruzitiro ruri kumwe n’iki kiganiro rurerekana uburyo bumwebumwe ushobora kugira ico uterereye mu gushigikira ico gikorwa catanzwe n’Imana.

[Uruzitiro ku rup. 22, 23]

UBURYO BUTANDUKANYE BAMWEBAMWE BAHITAMWO GUTANGA

INTERERANO KU BW’IGIKORWA KIRANGURIRWA KW’ISI YOSE

Abenshi barashira ku ruhande amahera, canke bakabika igitigiri kinaka c’amahera bazoshira mu dusandugu tw’intererano twanditseko ngo “Igikorwa kirangurirwa kw’isi yose.”

Ku kwezi ku kwezi, amashengero ararungika ayo mahera ku biro vy’Ivyabona vya Yehova bikorera mu bihugu akukira. Izo ntererano z’amahera zitangwa n’abavyishakiye, zoshobora no kurungikwa ata handi ziriwe ziraca kuri aderese ikurikira: Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201- 2483, canke na ho zikarungikwa ku biro vy’ishami vy’Ivyabona vya Yehova bihagarikiye igihugu ubamwo. (Intererano zitangwa n’abavyishakiye zavuzwe aho hepfo zirashobora kandi kurungikirwa ibiro vy’ishami vy’Ivyabona vya Yehova bikorera mu gihugu ubamwo.) Amasheki arungikwa kuri iyo aderese akwiye kuba yanditsweko yuko amahera yohabwa “Watchtower.” Ibintu vyo mu mabuye y’agaciro canke ibindi bintu vy’agaciro na vyo nyene vyoshobora gutangwa. Ivyo bintu vyoba bitanzweko intererano bikwiye guherekezwa n’ikete rigufi rivuga yuko ari ingabirano.

INDINGANIZO Y’IVYO GUTANGA AMAHERA YOSHOBORA GUSUBIZWA

Amahera yoshobora kurungikirwa ishirahamwe Watch Tower Bible and Tract Society of Pennsylvania, kugira riyakoreshe mu gikorwa kirangurirwa kw’isi yose. Ariko rero, ayo mahera yoshobora gusubizwa mu gihe nyene kuyatanga abisavye. Ushaka kumenya vyinshi kuri ico kibazo, turakwinginze ubaze mu kwandikira Ibiro vy’Umushingwabigega ukoresheje aderese iri ku mpera z’urupapuro rwa 23.

KURINGANIZA IVYO GUTANGA UMUNTU AVYISHAKIYE

Uretse ingabirano z’amahera, hariho ubundi buryo bwo gutanga intererano zo guteza imbere umurimo w’Ubwami urangurirwa kw’isi yose. Muri ubwo buryo harimwo ubu bukurikira:

Soransi: Izina Watch Tower Bible and Tract Society of Pennsylvania ryoshobora gutangwa ngo iryo shirahamwe ribe ari ryo ryakira amahera ya soransi y’ubuzima bw’umuntu canke imbitso y’amahera umuntu azokwikorako mu gihe akukurutse canke ahawe pansiyo.

Amakonte yo muri banki: Amakonte yo muri banki, impapuro zemeza amahera yabikishijwe muri banki, canke amakonte y’umuntu yakukurutse, birashobora kubikishirizwa ishirahamwe Watch Tower Bible and Tract Society of Pennsylvania canke bigashingwa yuko bizohabwa iryo shirahamwe nyene vyo niyapfa, hisunzwe ibisabwa n’ibanki y’aho umuntu aba.

Umutahe umuntu afise ahantu be n’ivyete bitanga uburenganzira bwo kwakira amahera aho ayafise: Ivyo na vyo nyene vyoshobora guhabwa ishirahamwe Watch Tower bwa ngabirano canke akaba ari ryo rihabwa kuganza ibisigi vy’uwapfuye.

Itongo canke inzu: Itongo canke inzu, kibure vyompi uko ari bibiri, mu gihe ari ibishobora kugurishwa, birashobora gutangwa bwa ntererano mu kubigaba. Mu gihe ari aho umuntu aba, nyene kubitanga arashobora gusigirwa aho aba arabaye, agashobora kubandanya kuhaba igihe cose asigaje kubaho. Imbere yo kugira amasezerano yo gushikiriza ico ari co cose muri ivyo, urabanza ubivugane n’ibiro vy’ishami vyo mu gihugu ubamwo.

Ukuza uraronka amahera ku yo uba waratanzeko ingabirano: Muri iyo ndinganizo, umuntu araha urwego kanaka rukoreshwa n’Ivyabona vya Yehova amahera canke inzandiko zemeza ko ayafise ahantu. Nyene gutanga na we, canke umuntu yagenywe na we, araronka amahera kanaka ku mwaka ku mwaka amufasha kubaho. Ku mwaka biba vyemejwe ko nyene gutanga ayo mahera agengwa n’iyo ndinganizo, aragabanirizwa ikori yahora ayatangako.

Ivyete vy’iragi be n’imbitso: Itongo canke amahera birashobora kuragwa ishirahamwe Watch Tower Bible and Tract Society of Pennsylvania biciye ku cete c’iragi canditswe mu buryo bwemewe n’amategeko, canke bigashobora kwitwa ko ishirahamwe Watch Tower Bible and Tract Society of Pennsylvania ari ryo rigabiwe icete cemeza imbitso umuntu afise ahantu. Imbitso iteza imbere ishirahamwe ry’ivy’idini irashobora gutuma umuntu akurwako amakori amwamwe.

Imvugo ngo “kuringaniza ivyo gutanga umuntu avyishakiye” yerekana ko nyene gutanga abanza kubitegekanya. Mu ntumbero yo gusahiriza abantu bipfuza guteza imbere igikorwa Ivyabona vya Yehova barangurira kw’isi yose biciye ku buryo bunaka bwo gutanga intererano, harateguwe agatabu mu congereza be no mu gisupanyoli kerekeye ugutanga kwo gushigikira umurimo w’Ubwami urangurirwa kw’isi yose (Charitable Planning to Benefit Kingdom Service Worldwide). Ako gatabu kanditswe kugira gatange amakuru ajanye n’uburyo butandukanye ingabirano zishobora gutangwa haba ubu canke biciye ku kubiraga ishirahamwe. Abantu benshi, bamaze gusoma ako gatabu no kubiganira n’abahanuzwajambo babo mu vy’amategeko canke mu vy’amakori, barashoboye gushigikira ibikorwa Ivyabona vya Yehova barangurira kw’isi yose bijanye n’ivy’idini be n’ivy’ugufasha abari mu ngorane, muri ico gihe nyene bararushiriza kuhungukira rwose mu bijanye no kuriha amakori. Ako gatabu umuntu arashobora kukaronka mu kugasaba ku biro biraba ivy’ukuringaniza ibijanye no gutanga umuntu avyishakiye.

Nimba ushaka kumenya ayandi makuru kuri ivyo, wobiganira n’ibiro biraba ivy’ukuringaniza ibijanye no gutanga umuntu avyishakiye, mu kwandika ikete ukoresheje iyo aderese ishizwe aho hepfo canke mu guterefona ibiro vy’ishami bikorera mu gihugu canyu ukoresheje izo nomero zerekanywe.

Ivyabona vya Yehova

B.P. 2150 Bujumbura

Telefone: (257) 22241110