Ihwaniro ry’Intara ry’Ivyabona vya Yehova ryo mu 2003 Ryataziriwe ngo “Ninahaza Imana”

¹ Biciye ku mumenyeshakazoza wiwe w’umwizerwa Yesaya, Yehova yategetse ati: “Bantu banje, ni munyumvirize; hanga ryanje, muntege ugutwi.” (Yes. 51:4) Muri iki gihe c’iherezo kirushiriza kugora, ntitwemera none yuko kwitondera amabwirizwa ya Yehova bihambaye kuruta ikindi gihe ico ari co cose? Bumwe mu buryo ‘dutega ugutwi’ Yehova ni mu kugamburuka ibwirizwa ryiwe risaba gukoranira hamwe ku bw’ugusenga. Ese ukuntu turindiranye umushasharo akaryo kadasanzwe tuzohabwa n’amahwaniro yacu y’intara aba uko mwaka utashe! Inama Nyobozi y’Ivyabona vya Yehova yarasubiye kuringaniza ivy’uko amahwaniro y’intara menshi agirwa mu cibare cacu mu 2003.

² Nk’uko vyerekanywe mu nomero y’Umunara w’Inderetsi (mu Gifaransa) yo ku wa 1 Mukakaro 2002, amahwaniro mpuzamakungu azobera kandi mu bisagara vyacaguwe, hakaba n’abantu bazoyitaba bavuye hirya no hino kw’isi. Kubera yuko ibisagara bikeyi ari vyo bizoberamwo amahwaniro mpuzamakungu, amashengero yonyene yabwiwe ko azoja muri ayo mahwaniro ni yo azoshobora kuyitaba. Nk’uko twabimenyeshejwe hakiri kare, twarasabwe kurungika abazoserukira abandi ku mahwaniro mpuzamakungu ategekanijwe kubera muri Afirika y’Epfo. Ariko rero, amahwaniro y’intara yose azoba arangwamwo akayaga nka karya usanga kari mu mahwaniro mpuzamakungu. Abamisiyonari bazoba bari ku mahwaniro mu turere twinshi, kandi hazoba hari akaryo ko kwumviriza bimwebimwe mu vyo biboneye. Dushobora gukora iki kugira ngo twungukire bimwe bishitse kuri izo ndinganizo ziriko ziragirwa ubu ku bw’amahwaniro yacu azoba mu ci?

³ Uzobe Ariho Uri Imisi Yose: Kugira ngo twungukire bimwe bishitse ku macishabwenge atangwa biciye ku mugwi wa wa mushumba w’umwizerwa kandi w’incabwenge, dushaka kuraba neza yuko ari ho tuzoba turi ku bw’iyo porogarama yose uko ingana. (Mat. 24:45) Woba ukeneye gusaba umukoresha wawe ikonji kugira ngo witabe umusi umwumwe wose w’ihwaniro? Imbere y’uko Nehemiya asaba Umwami Aritazeruzi uruhusha rwo kuja i Yeruzalemu gusubira kwubaka impome z’aho, “[yarasenze] Imana Nyen’ijuru.” (Neh. 2:4) Ukwiye nk’ukwo nyene gusenga Yehova umusaba umutima rugabo kugira usabe umukoresha wawe ikonji kugira ngo witabe imisi itatu yose y’ihwaniro. Bite mu gihe umukoresha wawe agonanwa kuguha ikonji? Kumbure kumusigurira yuko amacishabwenge turonkera ku mahwaniro adufasha kuba abakozi b’inzirabugunge, b’abanyamwete kandi b’abizigirwa, vyoshobora kumufasha akavyakira neza. Vyongeye, nimba dufise abo mu muryango batizera, vyoba biranga urukundo tubamenyesheje hakiri kare bishoboka ivyerekeye imigambi yacu ijanye n’amahwaniro.

⁴ Nusenyere ku Mugozi Umwe n’Urwego Rujejwe ivy’Uburaro: Urwego Rujejwe ivy’Uburaro rw’aho iwanyu ruzomara amezi atari make rurondera uburaro bukwiye ku bw’iryo hwaniro. Nimba wipfuza gucumbika mw’ihoteri, turagusavye wandikire imbere y’igihe urwego rujejwe ivy’uburaro urumenyesha ayo ushobora kurihira umuntu umwe mw’ijoro rimwe be n’imisi azohamara. Kugira ngo umuntu yemererwe kubikirwa icumba mw’ihoteri, hoshobora gusabwa ko abanza kuriha amahera y’ingwati. Nimba ari ukwo biri, ukwiye kuba witeguriye gutanga ayo mahera.

⁵ Gufasha Abari n’Ivyo Bakeneye Bidasanzwe: Hoba hariho bamwebamwe mw’ishengero iwanyu boshobora gukenera gufashwa kugira ngo bitabe ihwaniro? Ivyo abageze mu za bukuru, ibimuga canke abari mu murimo w’igihe cose bakenera bidasanzwe vyitwararikwa ahanini n’incuti zabo b’Abakirisu, mugabo abakurambere n’abandi bazi uko ivy’abantu nk’abo vyifashe, barashobora na bonyene gusahiriza mu buryo buranga urukundo.

⁶ Komite y’Umurimo y’Ishengero izosubira kwihweza amafomu yose y’Ugusabirako Icumba Gikenewe mu Buryo Budasanzwe yatanzwe n’abamamaji. Ikoresheje inyobozo zerekanywe kuri iyo fomu, komite y’umurimo ikwiye kuraba nimba icasabwe cose ari igikenewe mu buryo budasanzwe kidashobora kwitwararikwa aho iwabo. Intunganyo nk’iyo igenewe gusa abamamaji bafise impagararo nziza, kimwe n’abana babo bigenza neza. Urwego Rujejwe ivy’Uburaro ruzovugana n’umunyamabanga w’ishengero mu gihe bagize ikibazo na kimwe ku biraba ivyasabwe bikenewe mu buryo budasanzwe.

⁷ Ukwitaba Irindi Hwaniro: Nimba uko ibintu vyifashe bisaba yuko witaba irindi hwaniro atari iryo wotegerejwe kwitaba kandi ukaba ukeneye kuronka icumba mw’ihoteri, turakwinginze urabe umunyamabanga w’ishengero ryanyu, akaba azogufasha kumenya aho worungika ikete ryawe risaba icumba co mw’ihoteri.

⁸ Turi Akabarore: Abantu boba babona itandukaniro riri hagati y’Ivyabona vya Yehova n’abantu bo muri iyi si? Cane nyene! Raba ibintu bimwebimwe vyavuzwe n’abahagarikiye amahoteri mu gisagara kimwe: “Twama nantaryo hari ivyo tugiranira ku bijanye n’amahwaniro, mugabo mwamye muri abantu dukorana neza kandi bafise umutima mwiza kurusha abandi bose.” “Ku ndwi iheze, hari uwundi mugwi w’idini twari kumwe. Itandukaniro riri hagati yanyu na bo riribonekeza.” “Turazi yuko dushobora kwama nantaryo twiteze ko mudufasha kandi tukaja inama.” Amajambo nk’ayo yavuzwe ntadufasha none gutahura ukuntu “ubgenge buva mw ijuru” bugira akosho keza kuri kamere yacu? (Yak. 3:17) Kubera turi “akābarore mw isi,” nimuze uburyo twigenza bwame bugaragaza icubahiro be n’ubwiza vy’Imana yacu Yehova.—1 Kor. 4:9.

⁹ Kubera yuko “ukw isi imeze uku, kugenda gushira,” turakeneye amahwaniro yacu y’intara kugira ngo adufashe kuguma turi maso mu buryo bw’impwemu. (1 Kor. 7:31) Kugira ivyo uringanije kugira ngo witabe umusi wose bizosaba akigoro, mugabo si ak’impfagusa. Ihwaniro ry’Intara ry’uyu mwaka ryataziriwe ngo “Ninahaza Imana” ryateguwe kugira ngo ridufashe kuguma dushikamye uko tukirindiriye ishitswa ry’urubanza rwa Yehova kuri iyi si ya Shetani. Ese tutoreka ngo hagire ikintu na kimwe kitubuza kwakira amacishabwenge Yehova yaduteguriye!—Yes. 51:4, 5.

[Box on page 3]

Ibihe Porogarama Izoberako

Ku wa Gatanu no ku wa Gatandatu

3:00 zo mu gitondo - 10:25 zo ku muhingamo

Ku w’Iyinga

3:00 zo mu gitondo - 9:25 zo ku muhingamo