“Wokwishura gute?”

1. Ni ibiki bikunda kugora benshi muri twebwe?

¹ Woba ukunda Ijambo ry’Imana mugabo bikaba bikugora kwibuka utuntu tw’ido n’ido twerekeye inkuru zo muri Bibiliya canke kwibuka aho amajambo manaka yo mu Vyanditswe ari? Woba wipfuza ko abana bawe batahura neza amakuru be n’inyigisho vy’ishimikiro vyo muri Bibiliya? Ikiganiro kivuga ngo “Que répondriez-vous?” (Wokwishura gute?) gisohoka buri kwezi ku rupapuro rwa 31 rwa Réveillez-vous!, kirashobora gufasha abato n’abakuze bompi kumenya neza Ijambo ry’Imana.—Ivyak. 17:11.

2. Ibice bitandukanye vyo mu kiganiro kivuga ngo “Wokwishura gute?”, umuntu yobikoresha gute?

² Ushobora gute gukoresha neza ico kiganiro? Réveillez-vous! yo muri Nzero 2006 yatanze ivyiyumviro bikurikira: “Nufate akanya ko kuraba ku rupapuro rwa 31 . . . Ibice bimwebimwe vyo kuri urwo rupapuro bizonezereza abasomyi bakiri bato; ibindi na vyo bizotuma abamaze igihe biga Bibiliya baraba niba bacibuka ivyo bize. Igice kivuga ngo ‘Situez dans le temps’ [Vyashitse ryari?] kizogufasha gukurikiranya ibihe abantu bavugwa muri Bibiliya babereyeho be n’igihe ibintu bihambaye vyabereyeko. Mu gihe inyishu zo mu gice kivuga ngo ‘Dans ce numero’ [Ibiri muri iyi nomero] umuntu azisanga muri iki kinyamakuru cose, inyishu z’ibindi bibazo vyose zozo umuntu azisanga ku rupapuro ruba rwatanzwe, zanditswe mu kazitiro gacuritse. Ni kubera iki none utobanza kugira ubushakashatsi imbere y’uko usoma izo nyishu zatanzwe, hanyuma ukabwira abandi ivyo wakuyemwo? Woshobora mbere no gukoresha ico kiganiro gishasha kivuga ngo Wokwishura gute?, kikaba ari co ugira umushinge w’ibiganiro bishingiye kuri Bibiliya mugira mu muryango canke muri kumwe n’abandi”.

3. Imiryango imwimwe yungukiye gute kuri ico kiganiro, kandi wewe ni ibice vyaco ibihe ukunda kuruta ibindi?

³ Mu vy’ukuri, imiryango myinshi irakunda gukoresha ico kiganiro bwa mushinge w’inyigisho y’umuryango. Inabibondo umwe yandika ati: “Twe n’umunega wanje twabonye vyoba vyiza dushize mu nyigisho yacu y’umuryango ca gice kivuga ngo ‘Aux enfants de chercher!’ [Abana abe ari bo barondera] kugira ngo itume agakobwa kacu k’imyaka itatu gashwashwanuka yongere ikaryohere. Turahimbarwa cane no kukabona gafata Réveillez-vous! yako n’umunezero mwinshi maze kakazingurura buri rupapuro gushika gatoye ivyo karondera”. Sebibondo umwe wo muri Berezile avuga ati: “Jewe n’agahungu kanje k’imyaka indwi turakunda cane ico kiganiro co muri Réveillez-vous!. Carafashije ka Moises kihweza neza, kurondera Ivyanditswe, gutahura amafoto be n’amagenekerezo”. Uwitwa Ashley, akaba afise imyaka umunani, yandika ati: “Ndabashimiye cane kubera ikiganiro ‘Wokwishura gute?’ kiboneka ku mpera ya Réveillez-vous!. Biciye kuri ico kiganiro narize ibintu vyinshi ku bijanye na Bibiliya”.

4. Umuryango ushobora gute gushira ikiganiro “Wokwishura gute?” mu mayagwa ukoresha mu nyigisho ya Bibiliya y’umuryango?

⁴ Ubona gute ugiye urakoresha ikiganiro “Wokwishura gute?” mu nyigisho yanyu y’umuryango? Woshobora gukoresha ca gitabu c’amaronderero citwa Index canke ca cegeranyo c’amayagwa yo mu bitabu vyacu citwa Watchtower Library kiri ku kadisiki kitwa CD-ROM, aho biboneka, kugira ngo urondere inyishu z’ibibazo bimwebimwe bigoye kuruta ibindi. Niwabigenza gutyo, uzoba uriko urigisha abana bawe kugira ubushakashatsi. Nimba ufise abana bakuze, ubona gute ubasavye kurondera inyishu z’ibibazo bigoye cane vyo mu gice kivuga ngo “Qui suis-je?” (Ndi nde?) canke ikivuga ngo “Vyashitse ryari?” imbere y’uko inyigisho y’umuryango itangura? Bazoheza rero babwire abandi ivyo bazoba bakuye mu bushakashatsi bagize, mu gihe c’inyigisho y’umuryango. Gukoresha neza urwo rupapuro rwa 31 ni uburyo bumwe abavyeyi bashobora kwisunga mu kwinjiza mu bana babo Ijambo ry’Imana, gutyo bakaba babafashije kumenya “ivyanditswe vyera” kuva bakiri impinja.—2 Tim. 3:15; Gus. 6:7.