Niwumvishe abandi igihe ubigisha
1. Gukoresha Ijambo ry’Imana mu buryo ngirakamaro mu busuku akenshi usanga birimwo n’iki?
1 Abasuku babishoboye nka kumwe kw’intumwa Paulo, baratahura yuko “[gu]koresha neza ijambo ry’ukuri” atari ugusubiramwo gusa mu majambo Ivyanditswe vyeranda. (2 Tim. 2:15) Twoshobora gute “kwumvisha” abandi igihe tubigisha dukoresheje Ijambo ry’Imana?—Ibik. 28:23.
2. Dushobora gute gutuma uwo turiko turayaga arushiriza guha agaciro Ijambo ry’Imana?
2 Nureke Ijambo ry’Imana ryivugire: Ubwa mbere, uwo muyaga numwerekeze kuri Bibiliya mu buryo butuma aha agaciro ubukerebutsi buva ku Mana tuyisangamwo. Kuba twizigiye Ijambo ry’Imana vyoshobora gutuma uwuriko aratwumviriza atega yompi icanditswe kiba kiriko kirasomwa. (Heb. 4:12) Twoshobora kwivugira gusa duti: “Jewe nasanze ari ngirakamaro kumenya ico Imana yiyumvira ku bijanye n’ico kibazo. Raba ico Ijambo ryayo rivuga.” Igihe cose bishoboka, nureke Ijambo ry’Imana ryivugire mu kurisoma muri Bibiliya nk’uko riri.
3. Uhejeje gusoma icanditswe, ni ibiki ushobora gukora kugira ufashe uwuriko arakwumviriza ngo atahure insobanuro yaco?
3 Ubwa kabiri, nusigure icanditswe uba uriko urakoresha. Abantu benshi usanga bibagora gutahura umurongo wo muri Bibiliya ari bwo bwa mbere bawusomewe. Akenshi usanga bikenewe ko usigura uwo murongo kugira ngo werekane isano bifitaniye n’ivyo muriko murayaga. (Luka 24:26, 27) Nushire ahabona amajambo ushaka gushimikako. Kumubaza ikibazo vyoshobora kugufasha kwiyemeza yuko iciyumviro yagitahuye neza.—Imig. 20:5; Ibik. 8:30.
4. Ni intambwe ya nyuma iyihe ikenewe kugira ngo wumvishe abandi igihe ubigisha?
4 Nimuzirikane ku Vyanditswe: Ubwa gatatu, niwihatire gushikira umuzirikanyi n’umutima. Nufashe uwo muriko murayaga abone ukuntu uwo murongo umwerekeye ku giti ciwe. Gufasha umuntu kuzirikana ku Vyanditswe birashobora kumwumvisha agahindura uburyo yiyumvira. (Ibik. 17:2-4; 19:8) Nk’akarorero, uhejeje gusoma Yesaya 12:2, woshobora kumufasha kuzirikana ku kuntu kumenya izina ry’umuntu ari ikintu gihambaye kugira ngo ugiranire na we ubucuti. Kumbure, nuce umubaza uti: “Woba ubona ko kumenya izina ry’Imana vyoshobora gutuma amasengesho yawe arushiriza kugira insobanuro?” Guhuza muri ubwo buryo ico canditswe n’ubuzima bw’uwo muriko murayaga birashira ahabona agaciro ngirakimazi gifise. Ubwo buryo bwo kwigisha bugufasha kwumvisha abandi ukoresheje Ijambo ry’Imana, buratuma abantu b’umutima nziraburyarya bakwegērwa bakaza gusenga ya Mana y’ukuri kandi nzima ari yo Yehova.—Yer. 10:10.