Ingene twokoresha agatabu Ni bande bariko barakora ivyo Yehova agomba muri iki gihe?
Agatabu gashasha kagenewe kuyobora abatohoji ba Bibiliya kw’ishirahamwe
1. Ni ibintu bitatu ibihe agatabu Ivyo Yehova agomba kagenewe?
1 Woba waratanguye gukoresha agatabu gashasha Ni bande bariko barakora ivyo Yehova agomba muri iki gihe? Kagenewe (1) gufasha abatohoji ba Bibiliya kumenya abo turi bo, (2) kubafasha kumenya ivyerekeye ibikorwa turangura, no (3) kubereka ukuntu ishirahamwe ryacu rikora. Agatabu Ivyo Yehova agomba kagizwe n’ivyigwa biri ku rupapuro rumwerumwe vyoshobora kurimburwa bitagoranye mu kiganiro c’iminuta iri hagati y’itanu na cumi mugirana n’umutohoji muhejeje kwiga.
2. Nudondore ingene ako gatabu gatunganijwe be n’ibikagize.
2 Ingene gatunganijwe: Ako gatabu kagabuwe mu bice bitatu, igice kimwekimwe cose kikaba kivuga ibijanye n’umuce munaka werekeye ishirahamwe rya Yehova nk’uko vyerekanywe aho hejuru. Umutwe w’icigwa kimwekimwe cose mu vyigwa 28 bigize ako gatabu wanditse mu buryo bw’ikibazo, udutwe dutoduto twanditse mu ndome zizize na two ni inyishu z’ico kibazo. Ako gatabu karimwo amafoto yafatiwe mu bihugu birenga 50, akaba yerekana ko igikorwa cacu kirangurirwa kw’isi yose. Ivyigwa bitari bike vyo muri ako gatabu birafise uruzitiro ruvuga ngo “Nurondere kumenya n’ibindi,” ururimwo ibintu woremesha umutohoji gukora.
3. Twokoresha gute agatabu Ivyo Yehova agomba?
3 Ukuntu wogakoresha: Nutangure mu kwereka umuntu ikibazo kigize umutwe w’icigwa. Maze, igihe musomera hamwe icigwa, nushimike ku dutwe dutoduto twanditse mu ndome zizize. Mu nyuma, nimurimbure ibibazo vy’isubiramwo biri amaja munsi kuri buri rupapuro. Murashobora gusomera icarimwe icigwa cose canke mukaza murasoma ibice bice mwongera mubiganirako. Nuhitemwo ivyanditswe mwosoma mu vyanditswe vyatanzwe. Ntimwibagire kuganira ku mafoto be no ku ruzitiro ruvuga ngo “Nurondere kumenya n’ibindi.” Mu bisanzwe, ivyigwa bikwiye kurimburwa uko bigenda birakurikirana. Yamara, ntiwitinye gusimbira ku cigwa kijanye n’ikintu gikenewe muri uwo mwanya. Nk’akarorero, nimba hegereje iteraniro canke ihwaniro, mwoshobora gusimbira ku cigwa ca 11.
4. Kubera iki uhimbawe no kuba ufise ico gikoresho gishasha?
4 Igihe twiga Bibiliya n’umuntu, turamufasha kumenya Dawe wa twese wo mw’ijuru. Ariko rero, turakeneye kandi kumwigisha ivyerekeye ishirahamwe rya Yehova. (Imig. 6:20) Ese ukuntu duhimbawe kubona dufise ico gikoresho gishasha gituma bitworohera kubigira!