Ishure ryo mu 2015 rizodufasha kuryohora ukuntu twigisha

¹ Umwanditsi wa Zaburi Dawidi yanditse ati: “Amajambo y’akanwa kanje be n’ukuzirikana kw’umutima wanje nibibe ibihimbaye imbere yawe, ewe Yehova Gitandara canje n’Umucunguzi wanje.” (Zab. 19:14) Na twebwe dushaka ko amajambo yacu aba ayahimbaye kuri Yehova kubera ko duha agaciro agateka twatewe ko kuvuga ivyerekeye ukuri mw’ishengero no mu busuku. Ishure ry’ubusuku bwa gitewokarasi ni bumwe mu buryo Yehova akoresha kugira atumenyereze mu busuku. Iryo shure riba buri ndwi mu mashengero arenga 111.000 ari hirya no hino kw’isi. Ryarafashije abavukanyi na bashiki bacu bo hirya no hino kw’isi kandi bo mu mico kama itandukanye kuba abamamaji b’inkuru nziza babishoboye, bashoboye kwigisha mu buryo bujijura, burimwo ukwiyubara kandi ata bwoba.​—Ivyak. 19:8; Kol. 4:6.

² Ibizoshikirizwa mw’ishure ryo mu 2015 bizokurwa mu gatabu Numenye ibiri mw’Ijambo ry’Imana (igw), mu Minara y’Inderetsi no mu bindi bisohokayandikiro. Vyongeye, umwanya ivyiyumviro bikurubikuru be n’ikiganiro No. 1 vyamara warahindutse. Ingingo zikurikira ziravuga ibijanye n’ayo mahinduka kandi zirimwo ubuyobozi bw’ingene ibiganiro vyo mw’ishure bizoza birashikirizwa.

³ Ivyiyumviro bikurubikuru vyo muri Bibiliya: Abavukanyi bazoshikiriza ico kiganiro bazoba bafise iminuta ibiri yo guca irya n’ino iciyumviro kimwe ngirakamaro bakuye mu gisomwa ca Bibiliya co muri iyo ndwi. Biteguye neza bizotuma bashikiriza ishengero iciyumviro ngirakamaro mu mwanya wagenywe. Mu nyuma, abagize ishengero bazoca baronka ya minuta itandatu kugira bashikirize mu masegonda 30 canke adashika ivyiyumviro vyabashimishije mu gisomwa co muri iyo ndwi. Bisaba kwitegura neza no kwiga kwubahiriza umwanya kugira umuntu ashobore gutanga iciyumviro gitomoye mu masegonda 30, ariko tubigenjeje gutyo tuzoba turiko turimenyereza neza. Biratuma kandi abandi baronka umwanya wo gushikiriza ivyiyumviro bakuye mu bushakashatsi bagize.

⁴ Ikiganiro No. 1: Umwanya wagenewe gusoma Bibiliya waragabanijwe gushika ku minuta itatu canke idashika kandi igisomwa caragabanijwe. Abazoshingwa ico kiganiro bakwiye kuzosubiramwo kenshi ico gisomwa, bakagisoma n’ijwi ryumvikana bongera bitwararika kwatura neza no gusoma batadidinganya kugira ngo ivyo bazosoma bizotahurike. Abasavyi ba Yehova bose barakwiye kwihatira kumenya gusoma neza, kubera ko gusoma ari ikintu gihambaye mu gusenga kwacu. Ese ukuntu bidutera umunezero kuba abana bacu benshi bazi gusoma neza! Abavyeyi barakwiye gukezwa kubera utwigoro bagira turanga urukundo kugira ngo bafashe abana babo gusoma neza.

⁵ Ikiganiro No. 2: Ico ni ikiganiro c’iminuta itanu kizoshingwa mushiki wacu. Akwiye gukoresha umutwe-shimikiro watanzwe. Igihe ico kiganiro kiriko akanyenyeri (*), gikwiye kwerekezwa ku muce munaka w’umurimo wo mu ndimiro, bikagirwa mu buryo bwerekana ibintu bibaho koko mu cibare canyu kandi bishobora kuba ngirakamaro. Igihe ico kiganiro gishingiye ku muntu kanaka avugwa muri Bibiliya, umunyeshure akwiye gusoma yitonze amayagwa ari mu gisohokayandikiro catanzwe, agahitamwo ivyanditswe yokoresha kandi akerekana ico twokwigira kuri uwo muntu avugwa muri Bibiliya. Yoshobora gushiramwo n’ibindi vyanditswe bifitaniye isano n’umutwe-shimikiro. Umucungezi w’ishure azogena uwufasha nyene gushikiriza ico kiganiro.

⁶ Ikiganiro No. 3: Ico ni ikiganiro c’iminuta itanu gishobora gushingwa umuvukanyi canke mushiki wacu. Igihe ico kiganiro gishinzwe mushiki wacu, gikwiye gushikirizwa nk’uko vyerekanywe mu kiganiro No. 2. Igihe iki kiganiro No. 3 gishingiye ku muntu kanaka avugwa muri Bibiliya kandi kigashingwa umuvukanyi, uwo muvukanyi akwiye kugishikiriza mu buryo bw’insiguro afise mu bwenge abumviriza. Uwo muvukanyi akwiye guca irya n’ino umutwe-shimikiro watanzwe, agahitamwo ivyanditswe yokoresha kandi akerekana ico twokwigira kuri uwo muntu avugwa muri Bibiliya.

⁷ Igishasha ku bijanye n’ingene abavukanyi boshikiriza ikiganiro No. 3: Igihe ikiganiro No. 3 kiriko akanyenyeri (*) gihawe umuvukanyi, uwo muvukanyi akwiye kugishikiriza mu kugira umwerekano w’ugusenga kwo mu muryango canke w’ubusuku bwo mu ndimiro. Akenshi umucungezi w’ishure azoshinga uwufasha uwo muvukanyi be n’ikiringo mfatirwako. Uwufasha uwo muvukanyi akwiye kuba ari umuntu wo mu muryango wiwe canke uwundi muvukanyi wo mw’ishengero. Uwo muvukanyi yoshobora gushiramwo n’ibindi vyanditswe vyerekana ingingo ngenderwako zo muri Bibiliya zifitaniye isano n’umutwe-shimikiro. Rimwe na rimwe ico kiganiro gikwiye kuza kirashingwa umukurambere. Abakurambere boshobora kwihitiramwo uwubafasha be n’ikiringo mfatirwako. Nta gukeka ko bizoremesha abagize ishengero kubona abakurambere bariko barerekana ubuhanga bwabo bwo kwigisha bari kumwe n’abo mu miryango yabo canke uwundi muvukanyi.

⁸ Impanuro: Igihe cose umunyeshure ahejeje gushikiriza ikiganiro ciwe, umucungezi w’ishure azokoresha iminuta ibiri mu kumukeza be no mu kumuha impanuro zibereye zishingiye ku gitabu Niwungukire ku Nyigisho yo mw’Ishure ry’Ubusuku bwa Gitewokarasi. Igihe umucungezi w’ishure ahaye ikaze umunyeshure, ntazovuga kamere y’ivy’ukuvuga umunyeshure yahawe gukorerako. Igihe umunyeshure wese ahejeje ikiganiro ciwe, umucungezi w’ishure arakwiye kumukeza abikuye ku mutima, akavuga kamere y’ivy’ukuvuga uwo munyeshure yariko arakorerako, akongera akavuga mu buryo budomako igituma uwo munyeshure yitwararitse neza iyo kamere, canke agasigura abigiranye umutima mwiza igituma vyoba ngirakamaro uwo munyeshure arushirije kwitwararika iyo kamere.

⁹ Urukaratasi rw’impanuro rw’umunyeshure ruri mu gitabu ciwe c’Ishure ry’Ubusuku kuva ku rupapuro rwa 79 gushika ku rwa 81. Umunyeshure amaze gutanga ikiganiro ciwe, umucungezi w’ishure azokwandika mu gitabu c’uwo munyeshure kandi azomubaza mu mwiherero niba yarakoze umwimenyerezo ujanye na n’inuta yahawe gukorerako. Umucungezi w’ishure yoshobora gukeza uwo munyeshure no kumuha izindi mpanuro zubaka amakoraniro arangiye canke ikindi gihe. Umunyeshure wese akwiye kubona impanuro ahabwa mw’ishure ry’ubusuku nk’akaryo ko kumufasha gutera imbere mu vy’impwemu.​—1 Tim. 4:15.

¹⁰ Igihe umunyeshure arengeje umwanya, umucungezi w’ishure canke umufasha wiwe akwiye guca amugirira ikimenyetso, nko kuvuza inkengeri canke agakoma amashi, kugira amumenyeshe ko umwanya wiwe urangiye. Uwo munyeshure yumvise ico kimenyetso akwiye guca asozera iryungane yariko aravuga maze agaca ava ku mukiruruko.​—Raba igitabu Ishure ry’Ubusuku, rup. 282, ing. 4.

¹¹ Abakwije ibisabwa bose baremeshejwe kwiyandikisha mw’Ishure ry’ubusuku bwa gitewokarasi. (Raba igitabu Ishure ry’Ubusuku, rup. 282, ing. 6.) Iryo shure ryarafashije abasavyi ba Yehova kwamamaza inkuru nziza y’Ubwami no kuyigisha babigiranye ubujijutsi, icubahiro n’urukundo. Nta gukeka ko Yehova ahimbarwa no kuba aninahazwa n’abantu bose bariko barungukira cane kuri iryo shure!—Zab. 148:12, 13; Yes. 50:4.