Ingene twokwamamaza dukoresheje imeza canke ka kantu gafise amapine

Kwamamaza hakoreshejwe imeza canke ka kantu k’amapine biriko biratuma abantu b’imitima nziraburyarya bakwegerwa n’ukuri. (Yoh. 6:44) Ivyo vyatumye abakurambere bahimirizwa gutunganya ivyo kwamamaza ku mugaragaro mu bibanza birimwo uruja n’uruza rwinshi vyo mu cibare c’ishengero ryabo. Kubera ko izo meza n’utwo tuntu tw’amapine bitaguma ng’aho, akenshi ntibiba ngombwa ko dusaba abategetsi uruhusha. Ni bande bakwije ibisabwa vyo kwamamaza bakoresheje imeza canke ka kantu k’amapine? Ni abamamaji babona ibintu mu buryo bwiza, bambara kandi bitunganya mu buryo buteye iteka, kandi bazi kuyaga neza. Ibi bikurikira birerekana ivyo abamamaji bokora n’ivyo batokora kugira baroranirwe.

Ivyokorwa:

Nugaragarize igishika abarengana, ubahe ikaze kandi ubitwararike. Hari abamamaji bamwenyurira abarengana bakongera bakabaramutsa babigiranye igishika. Igihe uwuriko ararengana aravye ibiri kuri ya meza canke kuri ka kantu k’amapine, woshobora kuvuga uti: “Ubishimye wotora.”
Nuhagarare ahabereye. Mu bibanza bimwebimwe abamamaji birabagendera neza igihe bahagaze hafi y’imeza canke ya ka kantu gafise amapine. Abandi basanze guhagarara hafi bituma abahita bagonanwa guhagarara ngo barabe. Rero, bahagarara hirya gatoyi, bakarindira ko hagira umuntu yegera ivyo bisohokayandikiro.Hagize uwegera, nugerageze kumuyagisha, kumbure umubaze uti: “Woba wari umaze kwibaza ico kibazo?”
Nukoreshe Bibiliya kenshi gashoboka.
Hagize uwutora kimwe mu bitabu dukoresha mu kwigisha Bibiliya, nk’igitabu Ivyo Bibiliya yigisha, numusigurire intunganyo y’ukwiga Bibiliya. Numubaze ko womwereka ividewo Ni kubera iki ukwiye kwiga Bibiliya? ukoresheje telefone canke akandi kuma ka elegitoronike.
Igihe cose bishoboka nusabe uwuba yashimishijwe aderese yiwe. Nimba uwo muntu ataba mu cibare c’ishengero ryanyu, nuce wuzuza ka gapapuro Turabasavye mukurikirane uwu muntu yashimishijwe (S-43) uce ugaha umunyamabanga w’ishengero vuba bishoboka.