Igituma dukeneye Inyigisho y’igitabu y’ishengero

1. Indinganizo y’Inyigisho y’igitabu y’ishengero yatanguye gute?

¹ Mu 1895, imigwi y’inyigisho y’Abatohoji ba Bibiliya, nk’uko Ivyabona vya Yehova bitwa ico gihe, yamenyekanye ko ari Imigwi yo mu gaturuturu yiga Bibiliya. Imbumbe z’igitabu L’Aurore du Millénium ni zo zakoreshwa bwa shimikiro ry’iyo nyigisho. Mu nyuma, iyo migwi y’inyigisho yahavuye yitwa Imigwi y’Abanyaberoya yiga Bibiliya (Ivyak. 17:11). Akenshi, umugwi ugizwe n’abantu bakeyi warakoranira mu nzu y’umuntu ku mugoroba worohera abo muri uwo mugwi. Ukwo ni ko indinganizo y’Inyigisho y’igitabu y’ishengero yatanguye.

2. Dushobora gute guterera agacumu k’ubumwe mw’ “ihanahanwa ry’indemesho” ku nyigisho y’igitabu?

² Indemesho no gusahirizwa: Kubera yuko imigwi y’inyigisho y’igitabu iguma ari mitoyi, abacitaba bararonka akaryo kanini kuruta ko guserura ukwizera kwabo biciye ku nsasanuro batanga. Bituma haba “ihanahanwa ry’indemesho . . . , umwe wese [akaremeshwa] n’ukwizera kw’uwundi”.—Rom. 1:12, NW.

3, 4. Indinganizo y’inyigisho y’igitabu idufasha gute kurangura ubusuku bwacu?

³ Kwihweza ukuntu umucungezi w’inyigisho y’igitabu yigisha birashobora kudufasha ‘kuramiriza neza mw’ijambo ry’ukuri’ (2 Tim. 2:15). Nurabe ukuntu ashimika ku vy’uko ayo mayagwa ashingiye ku Vyanditswe. Nimba bibereye ku bijanye n’igisohokayandikiro kiriko kirihwezwa, yoshobora gushimika ku vyiyumviro nyamukuru biciye kw’isubiramwo risozera, akoresheje Bibiliya gusa. Akarorero keza atanga karashobora kudufasha kuryohora ukuntu twigisha mu busuku bwa gikirisu.—1 Kor. 11:1.

⁴ Uretse ko arongora icigwa co ku ndwi ku ndwi, umucungezi w’inyigisho y’igitabu araja imbere mu kwamamaza. Biciye ku gusenyera ku mugozi umwe n’umucungezi w’umurimo, umucungezi w’inyigisho y’igitabu arashiraho indinganizo ngirakamaro zijanye n’umurimo wo mu ndimiro. Ararondera gusahiriza abari muri uwo mugwi bose kugira ngo barangure ibanga ryabo rya gikirisu ryo kwamamaza inkuru nziza no guhindura abantu abigishwa.—Mat. 28:19, 20; 1 Kor. 9:16.

5. Umuntu umwumwe ukwiwe asahirizwa gute biciye ku nyigisho y’igitabu?

⁵ Umucungezi w’inyigisho y’igitabu aritwararika ukumererwa neza mu vy’impwemu kw’umwumwe wese mu bagize uwo mugwi. Ubwo bwitwararitsi arabugaragaza igihe ari ku makoraniro y’ishengero be n’igihe akorana n’abandi mu murimo wo mu ndimiro. Igihe agendeye abavukanyi i muhira iwabo, aca anaboneraho akaryo ko kubaremesha mu vy’impwemu. Bose bakwiye kutitinya kwegera umucungezi w’inyigisho y’igitabu kugira ngo abasahirize mu buryo bw’impwemu igihe cose babikeneye.—Yes. 32:1, 2.

6. (a) Abavukanyi bacu bo mu bihugu bimwebimwe bakomejwe gute n’ugukoranira mu migwi mitomito cane? (b) Ubwawe wungukiye gute ku ndinganizo y’inyigisho y’igitabu?

⁶ Gukomezanya: Mu bihugu aho igikorwa c’abasavyi b’Imana kibujijwe, abavukanyi kenshi usanga bakoranira mu migwi mitomito cane. Umuvukanyi umwe yibuka ibi: “Naho imirimo yacu ya gikirisu yari ibujijwe, igihe cose vyaba bishoboka twaragira amakoraniro yacu yo ku ndwi ku ndwi mu migwi y’abantu bari hagati ya 10 na 15. Ku makoraniro twarahakura inkomezi zo mu vy’impwemu, zivuye ku nyigisho yacu ya Bibiliya be no ku kwifatanya twagira inyuma y’iyo nyigisho. Twarabwirana ivyadushikira, kandi ivyo vyaradufashije gutahura yuko twese dufise urugamba rumwe” (1 Pet. 5:9). Ese natwe nyene twokomezanya mu gushigikira bimwe bishitse indinganizo y’Inyigisho y’igitabu y’ishengero.—Ef. 4:16.