Twofasha gute abazokwitaba Icibutso?
1. Ni intahe ikomeye iyihe izoshingwa ku wa 22 Ntwarante 2008?
1 Ku wa 22 Ntwarante 2008, abantu amamiliyoni hirya no hino kw’isi bazokwumva intahe ikomeye izoshingwa. Abazokwitaba Icibutso bazokwumva ivyerekeye urukundo rukomeye Yehova yagaragaje mu gutanga incungu ku bw’abantu bose. (Yoh. 3:16) Bazomenya ivyerekeye Ubwami be n’ukuntu Yehova azobukoresha mu gushitsa ivyo agomba kw’isi yose. (Mat. 6:9, 10) Bazokwibonera urukundo be n’ubumwe vy’abasavyi b’Imana bongere babone ukuntu twakirana mu buryo burangwa igishika.—Zab. 133:1.
2. Twoshobora gute gufasha abigishwa ba Bibiliya bitavye Icibutso?
2 Abigishwa ba Bibiliya: Mu bazokwitaba Icibutso hazoba harimwo abagitangura kwigana Bibiliya natwe. Nubamenyekanishe ku bavukanyi n’abavukanyikazi. Nubasigurire ibijanye n’amakoraniro agirwa buri ndwi wongere ubatembereze gatoyi mu Ngoro y’Ubwami. Mu gihe c’insiguro, umushikirizansiguro azoremesha mwene abo bantu kubandanya gutera imbere mu vy’impwemu. Urashobora gukoresha ivyo azovuga mu kuremesha abo mwigana Bibiliya.
3. Hokorwa iki mu kuremesha abamamaji bahororokewe bitavye Icibutso?
3 Abahororokewe: Mu bazokwitaba Icibutso hazoba harimwo abamamaji bahororokewe. Niwibwirize kubaramutsa ubigiranye igishika. Niwirinde kubabaza ibibazo vyo kubinjirira mu buzima canke kuvuga ibintu vyotuma bumva ubuyega. Haciye igihe gitoyi Icibutso kibaye, abakurambere bazogendera abantu bose bahororokewe bazoba bacitavye, babakeze kuri ako kigoro bagize, bongere babatumire n’igishika cinshi kw’ikoraniro ry’ishengero rikurikira.
4. Umwe wese muri twebwe yoshobora gute gufasha abashitsi?
4 Abashitsi: Muri abo bazokwitaba Icibutso, hoshobora kuba harimwo abo tuzinanyi canke abo mu muryango wacu twatumiye. Abandi na bo bashobora kuba bararonse agapapuro k’ubutumire mu gihe c’isekeza ridasanzwe. Igihe ubonye abantu utazi, niwibwirize kubidondorako wongere ubahe ikaze. Ushobora kuba utabazi kubera ko imbere y’aho batari bwitabe ikoraniro na rimwe mu makoraniro yacu. Mu kiyago mugiranira woshobora kurondera ukuntu wobonana na bo. Ubagendeye canke ukabakura gatoyi kuri telefone haciye imisi mikeyi Icibutso kibaye, woshobora kubaremesha kurondera kumenya n’ibindi, ukabasaba ko mwokwigana Bibiliya.
5. Twovuga iki kugira ngo dutanguze inyigisho ya Bibiliya?
5 Ivyavuzwe mu nsiguro y’Icibutso birashobora gukoreshwa mu gutanga ca gitabu Ivyo Bibiliya yigisha igihe usubiye kugendera umuntu yitavye Icibutso. Nk’akarorero, uwuzoshikiriza insiguro y’Icibutso azosoma Yesaya 65:21-23. Igihe usubiye kugendera umuntu yitavye Icibutso, woshobora gushiramwo ivy’iyo nsiguro, maze ukavuga uti: “Reka ndakwereke iyindi mihezagiro izoboneka biciye ku ncungu.” Nimuce mwihweza urupapuro rwa 4-5 mu gitabu Ivyo Bibiliya yigisha. Canke woshobora kuvuga uti: “Abantu benshi baribaza aho tuzobonera iranguka ry’ubuhanuzi bwa Yesaya.” Nimuce mwihweza ingingo ya 1-3 mu kigabane ca 9. Woshobora kandi kwerekeza gusa ku vyo umushikirizansiguro yavuze, ugaca usokorora igitabu Ivyo Bibiliya yigisha, hanyuma ukamwereka ingene inyigisho ya Bibiliya igirwa.
6. Ni uturyo utuhe dufise igihe tugamburuka rya tegeko Yezu yatanga ryo kwibuka urupfu rwiwe?
6 Umwe wese muri twebwe arashobora kurondera uturyo two gufasha inyigisho za Bibiliya, abamamaji bahororokewe be n’abashitsi bitavye Icibutso. (Luka 22:19) Nta nkeka ko Yehova azohezagira igikorwa cose ciyongereye mu murimo w’Ubwami turangura.