INGINGO YA 14

Kugaragaza neza ingingo z’ingenzi

Abaheburayo 8:1

INSHAMAKE: Fasha abaguteze amatwi gukurikira ikiganiro cyawe, unagaragaze neza aho buri ngingo y’ingenzi ihuriye n’intego y’ikiganiro n’umutwe wacyo.

UKO WABIGENZA:

Zirikana icyo ugamije. Suzuma niba ikiganiro cyawe kigamije gusobanurira abantu ibintu runaka, kugira icyo kibemeza cyangwa kubashishikariza kugira icyo bakora, maze ugitange ukurikije iyo ntego. Kora uko ushoboye buri ngingo y’ingenzi uyihuze n’iyo ntego.

Jya wibaza uti: “Ni ibihe bibazo abantu bashobora kubaza kuri iyi ngingo? Ni ibiki batemera? Ni ryari bakwibaza ibyo bibazo cyangwa bakagaragaza ko hari ibyo batemera?” Noneho, kurikiranya ingingo z’ingenzi mu buryo butuma abaguteze amatwi bakurikira ibyo uvuga, bakabisobanukirwa kandi bakabyemera.
Tsindagiriza umutwe w’ikiganiro. Mu gihe utanga ikiganiro, jya ugaruka kuri uwo mutwe usubiramo amagambo y’ingenzi awugize cyangwa ukoresha amagambo asobanura kimwe na yo.
Garagaza ingingo z’ingenzi mu magambo yumvikana. Toranya gusa ingingo z’ingenzi zifitanye isano n’umutwe w’ikiganiro kandi uzigishe neza ukurikije igihe cyagenwe. Jya utoranya ingingo z’ingenzi nke, usobanure buri ngingo, uruhuke mu gihe uyirangije, kandi wumvikanishe ko ugiye ku yindi.

Ushobora kuvuga ingingo z’ingenzi mu ntangiriro y’ikiganiro cyawe, kugira ngo ufashe abaguteze amatwi gukurikira, cyangwa ukazisubiramo mu gihe usoza kugira ngo ubafashe kuzibuka.