Njira Za Maperekero Aumboni

Toera Kutomesa Mapfundziro a Bhibhlya pa Sabudu Yakutoma mu Nthanda ya Bwinja

“Tikuwangisa anyakuendekana athu toera kuleri Mabhibhlya awo. Mbwenye azinji asaona kuti Bhibhlya ndi yakunentsa kubvesesa. Imwe musaonambo tenepo? [Dikhirani ntawiro.] Onani pinalongwa apa.” Pangizani tsamba yakumalisa ya A Sentinela ya 1.° de Abril, pontho dingani pabodzi mphangwa ziri pantsi pa mbvundzo wakutoma, na lerini lemba ibodzi mwa malemba anagumanika mu ndima ineyi. Perekani marevista, pontho citani masasanyiro akubwerera toera kudinga mbvundzo unatowerera.

A Sentinela 1.° de Abril

“Onsene anacedza na ife asalonga pyakuthimbana na nyatwa. Pyenepi pisacitisa anthu anango kudzumatirwa thangwi ya cifuniro ca umaso. M’maonero anu ninji cinapingiza kakamwe anthu lero toera kukhonda tsandzaya? [Dikhirani ntawiro.] Bhibhlya isapikira kuti mwakukhonda dembuka Mulungu anadzamalisa nyatwa zinathimbana na ife lero. [Lerini Apokalipse 21:4.] Revista iyi isafokotoza kuti tisadikhiranji ntsogolo, pontho tinadziwa tani cifuniro ca umaso ngakhale cincino.”

Despertai! de Abril

“Uphanga m’mabanja ndi nyatwa inacitika pa dziko yonsene yapantsi. Anango asalonga kuti pinacitisa uphanga ndi makhaliro a munthu, makuziro adakhala na iye pa banjace, na kuona mavidyu anapangiza pyauphanga. M’maonero anu, ndi thangwi ipi ikulu inacitisa uphanga m’mabanja? [Dikhirani ntawiro.] Bhibhlya isapangiza kubverana kwadidi kunafunika kuti kuoneke pakati pa mamuna na nkazi. [Lerini Aefesi 5:33.] Revista iyi isafokotoza midida ya Bhibhlya yakuti isaphedza anyakumanga banja azinji toera kupembera m’mabanja awo.”