Yɛ Bɔne Bɔ Yehowa Afa Ahyɛ Yɛ Ne, Bɔ Yeti Yeɛ Yɛnye Sɔ Ɔ

1-2. Atee beni aso yeɛ adasamma mukoraati te kyɛ abrandeɛ bɔ bɛhane yenwo dwirɛ wɔ ngyekyɛmuɛ 1 nanu ne ɔ?

ƐMƆMA yɛnea sɔ abrandeɛ he. Ɔte ebie bɔ ye awofoɛ le esikaa paa. Nakoso ɛlɛho bie ye awofoɛ nemɔ nyane asedɛnt, na bewuli. Edwirɛ ne maa ye wora bɔle paa. Nakoso né ɔhaw foforɛ bie wɔ berɛ. Yeɛ ole kyɛ, saa né ye awofoɛ nemɔ ma kerɛ pirikua bie, na basa batɔne abusua ne agyapadeɛ namu bɔ ɔnze yenwo hwee ɔ. Wɔ bɔbɔ ala nea oo, kyɛ ahaa bɛkɔyakyi abrandeɛ ne agyapadeɛ ne, kerɛ mmom yeɛ basoa bagua ye so ɔ. Afei bɛbɔ bɛma bɛ kerɛ ne koso, begyi ye so bɔ bede ɔ. Nakoso, sɛ ɔtwe ye nu sɛɛ po a, ɔngɔhora ye tua.

² Atee bie aso ne, yɛkɔhora yɛkɔha kyɛ yɛte kyɛ sɔ abrandeɛ ne. Adam ne Hawa bɔ bɛte y’awofoɛ bɔ belimoa ne, ne bɛte paradise nyemene nyemene bie anu, na né bɔne biala nne bɛnwo. (Gye. 1:27; 2:​7-9) Né ahaa bɛkɔhora bɛkɔtena ase daa wɔ anigye nu, bɔ nikyefee ngohia bɛ ɔ. Nakoso, nikyee biala sesane ofikyɛ bɛyɛle bɔne, na ɔmaa yenwo atee he amukoraati fili bɛ sa. Yede, agyapadeɛ beni yeɛ bɛfa bɛyakyili bɛ mmaamɔ ɔ? Bible ne ka kyɛ: “Kyɛbɔ bɔne nate sona ko [Adam] so wale wiase, na ye bɔne fale ewue wale nen, sɔ ala yeɛ ewue to petene mmenia mukoraa so ɔ, ofikyɛ kuro sona biala ayɔ bɔne.” (Rom. 5:12) Agyapadeɛ bɔ Adam fa yakyili yɛ ne, yeɛ ole bɔne ne ewue. Sɔ bɔne ne, ɔtekyɛ kerɛ pirikua bie bɔ sona biala ngɔhora ye tua ɔ.—Edw. 49:8.

3. Bɔne bɔ yɛyɛ ne, nzuati yeɛ yɛkɔhora yɛkɔfa yɛkɔtoto kerɛ nwo ɔ?

³ Bible ne fa bɔne toto kerɛ nwo. (Mat. 18:​32-35) Sɛ yɛyɛ bɔne a, né wayɛ tekyɛ bɔ yɛma Yehowa kerɛ ne, yeti ɔnea atee kyɛ yekotua. Sɛ Yehowa anyɛ bɔne fakyɛ nwo nhyehyɛɛ wamma yɛ a, ahaa yewu a, yatua yɛ kerɛ ne bɔ yelle anyelasoɛ biala ko ɔ.—Rom. 6:​7, 23.

4. (a) Sɛ Yehowa ammoka yɛ a, ahaa nzu yeɛ ɔkɔto mmenia bɔ bɔne wɔ yɛnwo ne mukoraati ɔ? (Edwein 49:​7-9) (b) Sɛ Bible ne ka bɔne a, yeɛ ole nzu? (Kenga edwirɛ bɔ ɔwɔ alaka nanu bɔ yenwa, “Bɔne” ne.)

⁴ Yenwo atee bɔ ofili Adam ne Hawa sa ne, sɛ ɔhale yɛ ngome a, ahaa yɛsa ngɔhora ngɔha ye llé. (Kenga Edwein 49:​7-9.) Sɛ Yehowa ammoka yɛ a, ahaa yewu a, yɛte kyɛ ngaka, ofikyɛ ahaa yelle anyelasoɛ biala kyɛ yɛkosa yɛkɔwa ngoa nu ɔ.—Nwo. 3:19; 2 Pet. 2:12.

5. Bɔne bɔ Adam fa yakyili yɛ ne, nzu yeɛ yɛ Baba bɔ okuro yɛ dwirɛ ne ayɛ afa yenwo ɔ? (Nea foto bɔ ɔwɔ Ɛwɛnelɛ Waen ne nyunu ne.)

⁵ Abrandeɛ bɔ yɛhane yenwo dwirɛ ahyɛaseɛ ne, sɛ biaa bie bɔ ole esikaa kã kyire ye kyɛ okotua sɔ kerɛ namu kɔma ye a, aso ahaa yenye ngɔgye? Aporowaa biala nne yenwo kyɛ ɔkɔyɛ ye fɛ paa, na ɔkɔpene so maa biaa ne kɔboka ye. Sɔ ala yeɛ Yehowa bɔ ɔte yɛ Baba bɔ okuro yɛ dwirɛ ne, wama yɛ akyɛdeɛ bie bɔ ɔnate so kotua bɔne bɔ Adam fa yakyili yɛ nanwo kerɛ ɔ. Yesu hyirehyirele ɛhe anu kyɛ: “Na kyɛbɔ Nyameɛ si hurole wiase dwirɛ nen, yiti yeɛ ɔmaa ɔfale Ɔwa komapɛ [bɔ ɔwole ye] ne mane ɔ, amaa ɔnate so ebiala bɔ okole ye koli ne wammini, na mmom wanya daa ngoa.” (Yoh. 3:16) Afei koso, sɔ akyɛdeɛ ne amaa yanya yenwo atee bɔ yɛne Yehowa kora fa adamvoa ɔ.

6. Edwirɛ benimɔ yeɛ Bible ne fa yɛ adwuma bɔ yɛbaasusu yenwo ɔ, na nzuati ɔ?

⁶ Yede, sɔ akyɛdeɛ bɔ odimu bɔ Yehowa nate so kɔfa yɛ bɔne anaa yɛ “kerɛ” kɔhyɛ yɛ ne, yɛkɔyɛ sɛɛ ne yanya so mvasoɛ? Edwirɛ biemɔ tekyɛ wasiesie yɛ ne Nyameɛ afia, mbata, ɔfale ye ngoa tole berɛ, ɔne bɛbua yɛ be bɔ Bible ne fa yɛ adwuma ne, ɔkɔboka yɛ maa yekonya sɔ dwirɛ nanwo mmuayɛɛ. Adesua he anu ne, yɛkɔnea bɔ sɔ dwirɛ he anu biala kyire ɔ. Mmerɛ bɔ yesusu yenwo ne, ɔkɔmaa yekonya anisɔ pirikua yɛkɔma Yehowa kyɛ wayɛ sɔ nhyehyɛɛ nemɔ wama yɛ ɔ.

BƆ YETI YEƐ WASIESIE YƐNE NYAMEƐ AFIA Ɔ

7. (a) Nzu bieku yeɛ ɔbɔle Adam ne Hawa ɔ? (b) Yɛbɔ yɛte Adam ne Hawa bosofoɛ ne, nzu yeɛ yehia ɔ? (Romanfoɛ 5:​10, 11)

⁷ Mmerɛ bɔ Adam ne Hawa yɛle bɔne ne, nna daa ngoa ngome yeɛ ɔbɔle bɛ ɔ, na mmom bɛne Yehowa bɔ né ɔte bɛ Baba ne koso afia sɛkyele. Ahyɛaseɛ ne, né Adam ne Hawa boka Nyameɛ abusua naso. (Luka 3:38) Nakoso mmerɛ bɔ bɛyɛle asoserɛ ne, Yehowa yele bɛ fili ye abusua nanu. Ɛhe sili kora yeɛ bɛwo mmaa ɔ. (Gye. 3:​23, 24; 4:1) Yeti yɛ bɔ yɛte bɛ bosofoɛ ne, odikyɛ besiesie yɛne Yehowa afia. (Kenga Romanfoɛ 5:​10, 11.) Atee foforɛ so ne, odikyɛ yɛne Nyameɛ afia sa yɛ kama. Nwomaa bie hane kyɛ, Greek dwirɛ bɔ yeɛ ole esiesie ɛne ebie afia ne, okyire kyɛ “ɛne wɔ pɔfoɛ bɛfa adamvoa ɔ.” Bɔ ɔyɛ nwanwa yeɛ ole kyɛ Yehowa yeɛ olimoa tuli sɔ agyirɛ ne ɔ. Yede ɔyɛle ye sɛ́?

MBATA NWO NHYEHYƐƐ

8. Nzu yeɛ ole (a) mbata? (b) mbata nikye?

⁸ Mbata te nhyehyɛɛ bɔ Yehowa yɛle kyɛbɔ ɔkɔyɛ a, mmenia bɔ bɔne wɔ bɛnwo ne, ɔne b’afia kosa kɔyɛ kama ɔ. Sɛ né ɛhe kɔhora kɔyɛ yé a, né odikyɛ nningyein bɔ Adam ne Hawa maa ɔbɔle yɛ ne, yenya ye sɔ pɛpɛɛpɛ yɛfa yesie ye gya nu. Greek tworɔnzɛm ne koso kã sɔ nhyehyɛɛ bɔ Yehowa yɛle nanwo dwirɛ kyɛ ɔte mbata nikye. (Rom. 3:25) Ɛhene yeɛ ɔmaa Nyameɛ de ebie tonu, na wamaa sona ne ahora ayɛ ye damvo ɔ.

9. Nhyehyɛɛ beni yeɛ Yehowa yɛle kyɛbɔ ɔkɔyɛ a, ɔkɔfa Yisraelfoɛ nemɔ bɔne kɔhyɛ bɛ ɔ?

⁹ Bɔ ɔkɔyɛ né Yisraelfoɛ nemɔ ne Yehowa afia ayɛ kama ne, ɔyɛle nhyehyɛɛ bie bɔ né okogyina so kɔfa bɛ bɔne kɔhyɛ bɛ ɔ. Yeti né bedi Mbata Kyẽa aluolue ne afoɛ biala. Sɔ kyẽa ne, né sɔfo panyi ne fa ngaka bɔ afɔleɛ ma mmenia namu. Bɔ ɔte yeɛ ole kyɛ, ngaka bɔ né bɛfa bɛbɔ afɔleɛ ne, né ɔngora ngyikyi ebiala bɔne, ofikyɛ nna kaka tipɛen yeɛ ole sona. Nakoso, sɛ né Yisraelfoɛ bɔ banu bɛnwo ne kɔso bɔ afɔleɛ ahoroɛ ne kyɛbɔ Yehowa nwa bɛyɛ ne a, né ɔfa bɛ bɔne kyɛ bɛ. (Heb. 10:​1-4) Bɔ né bɛyɛ ye mbata kyẽa ne, ɔne afɔleɛ ahoroɛ bɔ né bɛbɔ ne, né ɔmaa Yisraelfoɛ nemɔ kae kyɛ bɛte abɔnefoɛ. Yeti né behia nikyee bie bɔ ɔkɔhora kokyikyi bɛ bɔne koraa ɔ.

10. Nzu yeɛ Yehowa yɛle, kyɛbɔ ɔkɔyɛ a sona konya bɔne fakyɛ koraa ɔ?

¹⁰ Yede, nzu yeɛ Yehowa yɛle, kyɛbɔ ɔkɔyɛ a sona konya bɔne fakyɛ koraa ɔ? Ɔyɛle nhyehyɛɛ maa bɛfale Ɔwa bɔ okuro ye dwirɛ ne “bɛbɔle afɔleɛ komapɛ kyɛ ɔsoa mmeni pee bɛ bɔne.” (Heb. 9:28) Yesu ‘fale ye ngoa tole berɛ ɔfa lɛle mmeni pee ngoa,’ kyire kyɛ otuale yɛ bɔne nwo kerɛ. (Mat. 20:28) Yede, sɔ dwirɛ ne kyire sɛɛ?

YESU FALE YE NGOA TOLE BERƐ MANE YƐ

11. (a) Kyɛbɔ Bible ne maa yenwu ye ne, nzu yeɛ Yehowa yɛ mane yɛ ɔ? (b) Sona beni yeɛ né ɔkɔhora kotua yɛ bɔne nanwo kerɛ ɔ?

¹¹ Bible ne maa yenwu kyɛ Yehowa yɛle nhyehyɛɛ kyɛbɔ ɔkɔyɛ a, okotua bɔne bɔ Adam yɛle nanwo kerɛ, na wamaa yɛne ye ahora afa adamvoa. Ɔyɛle ye sɛ́? Kae kyɛ yenwo atee bɔ né Adam ne Hawa le ye kyɛ bɛkɔtena ase daa kyɛ mmenia bɔ bɔne nne bɛnwo ne, bɛmaa ɔbɔle bɛ. Yeti ebie bɔ né ɔtekyɛ Adam yeɛ né ɔkɔhora koosie ye gya nu ɔ. (1 Tim. 2:6) Sɔ sona ne, sana ɔyɛ brienzua bɔ (1) bɔne biala nne yenwo, (2) ole yenwo atee kyɛ ɔtena ase daa wɔ aseɛ he aso, ɔne (3) okuro kyɛ ɔkɔfa ye ngoa kɔbɔ afɔleɛ kɔma yɛ. Sona bɔ ɔte sɔ ne ngome yeɛ né ɔkɔhora kotua bɔ Adam ne Hawa maa ɔbɔle yɛ nanwo kerɛ ɔ.

12. Nzuati yeɛ Yesu hora tuale yɛ bɔne nwo kerɛ ɔ?

¹² Ɛmɔma yɛnea nningyein nza biemɔ bɔ yeti yeɛ né Yesu kɔhora kotua yɛ bɔne nwo kerɛ ɔ. (1) Né ɔte sona bɔ bɔne nne yenwo ɔ, na “wanyɔ bɔne biala.” (1 Pet. 2:22) (2) Né ole yenwo atee kyɛ ɔtena ase daa. (3) Né okuro kyɛ ɔfa ye ngoa bɔ afɔleɛ ma yɛ. (Heb. 10:​9, 10) Kyɛbɔ né mvomsoɛ nne Adam nwo mmerɛ bɔ né ɔyɛlle bɔne ne, sɔ ala yeɛ né Yesu koso te ɔ. (1 Kor. 15:45) Yeti Yesu nate ye wue naso tuale Adam bɔne nanwo kerɛ fa pata mane yɛ. (Rom. 5:19) Sɔ atee naso ne, Yesu ɔɔyɛle “Adam bɔ oli nziɛ.” Yesu yɛle sɔ yiele ne, né yenwo nhia kyɛ sona foforɛ kɔwa kootua Adam bɔne nanwo kerɛ ko. Yesu ‘fale ye nwo bɔle afɔleɛ pɛnko.’—Heb. 7:27; 10:12.

13. Nzonzoleɛ beni yeɛ ɔwɔ mbata, ɔne Yesu ngoa bɔ ɔfa tole berɛ nanu ɔ?

¹³ Yede, nzonzoleɛ beni yeɛ ɔwɔ mbata, ɔne Yesu ngoa bɔ ɔfa tole berɛ nanu ɔ? Mbata te nhyehyɛɛ bɔ Nyameɛ yɛle kyɛbɔ ɔkɔyɛ a, ɔne sona afia kosa kɔyɛ kama ɔ. Yesu ngoa bɔ ɔfa tole berɛ mane yɛ ne, yeɛ ɔmaa sɔ mbata ne hora yɛle yé ɔ. Ɛhene yeɛ ole ye mogya bɔ ohwie guale mane yɛ ne.—Ɛfe. 1:7; Heb. 9:14.

BƐNATE SO BABUA YƐ BE KYƐ YƐTE TENENEEFOƐ

14. Nzu yeɛ yɛbaasusu yenwo ɔ, na nzuati ɔ?

¹⁴ Mbata nwo nhyehyɛɛ bɔ Yehowa yɛle ne, nzu yeɛ wafi nu wawa ɔ? Bible ne fa edwirɛ pee kyirekyire bɔ wafi nu wawa nanu. Ɔwɔ nu kyɛ ndeaseɛ bɔ ɔwɔ sɔ dwirɛ nemɔ anu ne, ɔpena yɛ ko de, nakoso nu biala maa yenwu kyɛbɔ Yehowa nate mbata nwo nhyehyɛɛ naso maa yenya bɔne fakyɛ ɔ. Ɛmɔma yesusu sɔ dwirɛ nanu nyɔ nwo, na yɛnea mvasoɛ bɔ ɔwɔ nu biala so ma yɛ ɔ.

15-16. (a) Sɛ Bible ne ka kyɛ ‘bale ɛmɔ’ a, okyire sɛɛ? (b) Nzuati yeɛ ɛhe ka y’ahone paa ɔ?

¹⁵ Bible ne maa yenwu kyɛ ɔnate Yesu ngoa bɔ ɔfa tole berɛ mane yɛ nati, wamaa yale yɛnwo. Somafoɛ Petro hane ɛhe anwo dwirɛ kyɛ: ‘Ɛmɔse kyɛ, bra fiɛ bɔ ɛmɔ nana mɔ fa yakyili ɛmɔ ne, nna nningyein bɔ bɛporɔ te kyɛ ɛdwetɛ anaa sikaa kɔkorɛ yeɛ bɛfa belɛle ɛmɔ befili nu ɔ, na mmom Kristo bɔ ɔte kyɛ boaen ba bɔ ollili nnɛen bɔ ngekalewa biala nne ye nwo ne, ye mogya bɔ odi mu ne yeɛ bɛfa belɛle ɛmɔ ɔ.’—1 Pet. 1:​18, 19.

¹⁶ Ɔnate Yesu ngoa bɔ ɔfa bɔle afɔleɛ mane yɛ nati, wamaa yale yɛnwo yafi bɔne ne ewue bɔ ɔmaa yedi aworabɔlɛ ne sa nu. (Rom. 5:21) Yɛda Yehowa ne Yesu ase paa, ofikyɛ ɔnate ye mogya bɔ odi mu naso wale ye ngoa. Sɛ bɛnne nu a, ahaa yɛtte hwee.—1 Kor. 15:22.

17-18. (a) Sɛ bɛka kyɛ babua yɛ be kyɛ yɛte teneneefoɛ a, okyire sɛɛ? (b) Mvasoɛ beni yeɛ yanya yafi ɛhe aso ɔ?

¹⁷ Bible ne kã kyɛ babua yɛ be kyɛ teneneefoɛ. Bɔ ɛhene kyire yeɛ ole kyɛ, Yehowa afa yɛ bɔne ahyɛ yɛ koraa bɔ ɔnnea atee kyɛ yɛbɔbɔ yekotua yenwo kerɛ ɔ. Nakoso sɔ bɔ Yehowa yɛle ne, ongyire kyɛ wabua yenwo fɔ. Ofikyɛ nna pá bie bɔ yayɛ nati yeɛ wamaa yaayɛ teneneefoɛ ɔ. Afei koso, ongyire kyɛ ɔfoa yɛ bɔne bɔ yɛyɛ naso. Na mmom gyidie bɔ yele wɔ mbata nwo nhyehyɛɛ ne, ɔne Yesu wue nanu ne, ɛhene yeɛ Yehowa agyina so afa yɛ bɔne ahyɛ yɛ ɔ.—Rom. 3:24; Gal. 2:16.

¹⁸ Yede mvasoɛ beni yeɛ ɔwɔ so ma yɛ ɔ? Bɛbɔ babua bɛ be kyɛ teneneefoɛ ne, benu biemɔ ne Yesu koli bia wɔ anwuro na bɛkɔyɛ Nyameɛ mmaamɔ. (Tito 3:7; 1 Yoh. 3:1) Nyameɛ afa bɛ bɔne ahyɛ bɛ, yeti ommu bɛ kyɛ bɛte abɔnefoɛ ko. Ɛhene amaa banya yenwo atee kyɛ bɛkɔhɔ ye Ahennie nanu. (Rom. 8:​1, 2, 30) Bɛbɔ bɛnye la so kyɛ bɛkɔtena aseɛ he aso ne koso, babua bɛ be kyɛ bɛte teneneefoɛ. Ɛhene amaa Nyameɛ afa bɛ bɔne ahyɛ bɛ, yeti baayɛ ye damvomɔ. (Yak. 2:​21-23) Mmeni lɔen kandinga bɔ bekonya ngoa wɔ Amagedon ne, bɛkɔhora bɛkɔnea atee kyɛ bengowu llé. (Yoh. 11:26) Bɛbɔ bɛte “teneneefoɛ” ne “bɔnefoɛ” bɔ bawu ne koso, bekotingye bɛ bɛkɔwa ngoa nu. (Aso. 24:15; Yoh. 5:​28, 29) Ngakangaka, bɛbɔ bɛyɛ sotie bɛma Yehowa bɔ bɛwɔ aseɛ so ne, “bɛkɔhɔ Nyameɛ mma fawɔnwodi animnyam ne anu.” (Rom. 8:21) Amba, mbata nwo nhyehyɛɛ ne aboka yɛ paa. Ofikyɛ ɛhene yeɛ wamaa yɛne Yehowa bɔ ɔte yɛ Baba ne afia ayɛ kama ɔ!

19. Sɛɛ yeɛ Yehowa ne Yesu alo yɛ ɔ? (Kenga edwirɛ bɔ ɔwɔ alaka nanu bɔ yenwa: “Bɔ Okyire Ɔ.”)

¹⁹ Atee bie aso ne, né yɛ haw ne tekyɛ abrandeɛ bɔ yelimoa yɛhane yenwo dwirɛ wɔ adesua ne ahyɛaseɛ ne. Ɔnate kerɛ kandinga bɔ bɛfa bɛyakyili ye nati, né olle anyelasoɛ biala. Nakoso Yehowa alo yɛ paa, ofikyɛ ɔnate mbata nwo nhyehyɛɛ ne, ɔne Yesu wue naso wamaa yanya anyelasoɛ. Gyidie bɔ yele ye wɔ Yesu wue nanu ne, wale yɛ wafi bɔne ne ewue sa nu. Yehowa kɔhora kogyina ɛhene aso kɔfa yɛ bɔne kɔhyɛ yɛ koraa, ná wabua yɛ be. Bɔ ɔtra yemukoraati ne, yɛne Yehowa yɛ Baba bɔ ɔwɔ anwuro bɔ okuro yɛ dwirɛ ne kɔhora kɔfa adamvoa bɔ nu yɛ se paa ɔ.

20. Nzu yeɛ yekosusu yenwo wɔ adesũa bɔ oliberɛ nanu ɔ?

²⁰ Bɔ Yehowa ne Yesu ayɛ ama yɛ ne mukoraati ne, sɛ yɛkɔso yɛdwenedwene yenwo a, ɔkɔmaa yɛnye kɔsɔ bɔ bayɛ ne paa. (2 Kor. 5:15) Sɛ bɛnne nu a, ahaa yɛ dwirɛ yɛ anwumvo paa. Yede, sɛ Bible ne ka kyɛ Yehowa afa yɛ bɔne ahyɛ yɛ a, nzu deinn yeɛ okyire ma yenu biala ɔ? Yekosusu ɛhe anwo wɔ adesua bɔ oli berɛ nanu.