Kyɛbɔ Ekotu Ebie Foɛ Maa Ɔkɔboka Ye Ɔ

1. Nzuati yeɛ odikyɛ yetu ebie foɛ ɔ? Kyirekyire nu.

ASO ɛte ebie bɔ wɔnye gye yenwo kyɛ ekotu mmenia foɛ ɔ? Ebiemɔ wɔ berɛ a, ɛhe nyɛ se mma bɛ koraa. Nakoso, ebiemɔ de, ɔyɛ se kyɛ bɛkɔyɛ sɔ, na ɛyɛ a né besuro po. Kyɛbɔ ɔte biala ne, odwu mmerɛ bie a, odikyɛ yetu ebie foɛ. Nzuati ɔ? Ofikyɛ Yesu hane kyɛ, bɔ bɛkɔfa bekonwu ye nahorɛ asuafoɛ nemɔ yeɛ ole kyɛ, bekohurohuro bɛnwo dwirɛ. (Yoh. 13:35) Ɛhene ati, nikyee kõ bɔ yɛkɔyɛ yekohyire kyɛ yekuro aliemaamɔ dwirɛ yeɛ ole kyɛ yekotu bɛ foɛ mmerɛ bɔ yenwu ye kyɛ odikyɛ yɛyɛ sɔ ne. Bible ne kã kyɛ, ‘sɛ adamvoa kɔyɛ fɛ a, ogyi foɛtulɛ paa bɔ ɔfa ma naso.’—Any. 27:9.

2. Nzu yeɛ odikyɛ asafo nu mbanyi bɔ mmɔden kyɛ bɛkɔyɛ ɔ, na nzuati ɔ? (Nea alaka nanu dwirɛ bɔ yeɛ ole, “Afutue Bɔ Bɛfa Bɛma Wɔ Dapɛen Afia Adesua Nabo Ne” koso.)

² Odikyɛ asafo nu mbanyi nemɔ nwu atee pá bɔ bɛkɔfa so bekotu aliemaamɔ foɛ ɔ. Ofikyɛ bɛ yeɛ Yehowa ne Yesu aye bɛ kyɛ bɛnea asafo naso ɔ. (1 Pet. 5:​2, 3) Atee kõ bɔ bɛfa so bɛyɛ sɔ yeɛ ole kyɛ, bɛma tɔɔk bɔ ogyi Bible naso bɛfa betu yɛ foɛ wɔ asafo nanu. Odwu mmerɛ bie koso a, betu yɛnu biala foɛ, na bɛbɔ bahwe bɛnwo bafi Yehowa mmoaen nanwo ne po boka so. Yede, sɛ yɛte asafo nu panyi oo, yɛtte panyi oo, yɛkɔyɛ sɛɛ né yatu mmenia foɛ maa waboka bɛ?

3. (a) Yɛkɔyɛ sɛɛ né yahora yatu mmenia foɛ maa waboka bɛ? (Yesaya 9:6; Nea alaka nanu dwirɛ bɔ yeɛ ole, “Suesua Yesu Mmerɛ Bɔ Etu Ebie Foɛ Ne” koso.) (b) Nzu yeɛ yekosusu yenwo wɔ adesua he anu ɔ?

³ Sɛ yɛkɔhora yekotu mmenia foɛ maa ɔkɔboka bɛ a, odikyɛ yesuesua bɛbɔ Bible ne kã bɛnwo dwirɛ kyɛ né bɛse foɛ tu paa ne. Benu kõ yeɛ ole Yesu. Bible ne kã kyɛ ɔte “Foɛtulɛniɛ Nwanwaniɛ.” (Kenga Yesaya 9:6.) Adesua he anu ne, yɛkɔnea bɔ yɛkɔyɛ mmerɛ bɔ ebie baapena afutue fi yɛ berɛ ne. Yekosa koso yɛkɔnea bɔ yɛkɔyɛ mmerɛ bɔ yenwu ye kyɛ odikyɛ yetu ebie foɛ ne. Afei yɛkɔnea kyɛbɔ yekonwu mmerɛ bɔ ɔte pá kyɛ yetu ebie foɛ, ɔne kyɛbɔ yɛkɔyɛ ye ɔ.

MMERƐ BƆ EBIE BAAPENA AFUTUE FI YƐ BERƐ NE

4-5. Sɛ ebie ba yɛ berɛ kyɛ ɔbaapena afutue a, edwirɛ beni yeɛ odikyɛ yedimoa yebisa yɛnwo ɔ? Ma yenwo nneasoɛ.

⁴ Sɛ ebie ba yɛ berɛ kyɛ ɔbaapena afutue a, nzu yeɛ annea a ahyɛaseɛ ne yɛkɔyɛ ɔ? Ebiaa kyɛbɔ yekuro sona ne dwirɛ nati, yɛkɔpre yɛnwo yɛkɔma ye mmuayɛɛ. Nakoso koraka yɛkɔyɛ sɔ ne, odikyɛ yedimoa yebisa yɛnwo kyɛ: “Sɔ dwirɛ bɔ asomasi afa aato me nyunu ye, me yeɛ mefata kyɛ mefa yenwo afutue mema ye anaa?” Odwu mmerɛ bie a, bɔ yɛyɛ a ɔkɔboka sona ne paa yeɛ ole kyɛ, yekohyire ye maa ɔkɔhɔ ebie bɔ ole sɔ dwirɛ nanwo nimdeɛ ne berɛ.

⁵ Wɔde yɛfa ye kyɛ wɔ damvo bie bɔ ekuro ye dwirɛ afokyɛ serɛserɛ paa, yeɛ wabɔ wɔ amaneɛ ɔ. Ɔmaa enwuni ye kyɛ wabisa ebiemɔ maa bahyire ye ayire. Nakoso, ɔbaabisa wɔ koso maa ekyire ye ayire bɔ ɛnnea a, ɔkɔboka ye ɔ. Ebiaa né ɛse ayire bie, nakoso wɔ ahɔ a ɛtte dɔktaniɛ anaa nɛɛseniɛ bɔ ele sɔ anwonyerɛ nanwo nimdeɛ ɔ. Yeti, bɔ ɔkɔboka paa yeɛ ole kyɛ ɛkɔmaa okoonwu ebie bɔ ole sɔ anwonyerɛ nanwo nimdeɛ bɔ ɔkɔhora kɔnea ye ɔ.

6. Nzu yeɛ odikyɛ yɛyɛ kora né yafa afutue yama ebie ɔ?

⁶ Sɛ odwu mmerɛ bie na ebie fa edwirɛ bie to yɛ nyunu, na yenwu ye kyɛ yɛkɔhora yɛkɔfa yenwo afutue yɛkɔma ye po a, ɔnzɛkyɛ ɛberɛ nala yɛma ye mmuayɛɛ. Nzuati ɔ? Ofikyɛ Anyandera 15:28 kã kyɛ: “Teneneeniɛ dwene dwirɛ nwo koraka né wama mmuayɛɛ.” Yeti sɛ yɛse mmuayɛɛ bɔ odikyɛ yɛfa yɛma sona ne po a, odikyɛ yɛyɛ yenwo nhwehwɛmuɛ, yɛbɔ yenwo mbaeɛ, na yɛdwenedwene bɔ yɛkɔhã nanwo. Sɛ yɛyɛ sɔ a, ɔkɔmaa mmuayɛɛ bɔ yɛkɔfa yɛkɔma sona ne kɔyɛ bɔ Yehowa nye gye yenwo ɔ. Bɔ yɛkã ye, ebie tole diyifoɛ Natan. Ɛmɔma yɛnea.

7. Nzu yeɛ yesua yefi diyifoɛ Natan dwirɛ nanu ɔ?

⁷ Ɔhene Dawide ne diyifoɛ Natan lili ngɔmmɔ bie, na ɔhahyirele ye kyɛ ɔpena kyɛ osi asɔre awuro ma Yehowa. Ɛberɛ nala Natan tuli ye foɛ kyɛ ɔɔyɛ bɔ wahã ne. Nakoso, né ahaa odikyɛ odimoa bisa Yehowa. Nzuati ɔ? Ofikyɛ nna Dawide yeɛ né Yehowa pena kyɛ osi asɔre awuro ne ɔ. (1 Abe. 17:​1-4) Sɔ dwirɛ ne maa yenwu ye kyɛ, sɛ ebie pena afutue fi yɛ berɛ a, ɔnzɛkyɛ ‘yɛpe ndɛen yedwudwo.’ Yɛyɛ sɔ a, okohyire kyɛ yɛse nworɛ.—Yak. 1:19.

8. Nikyee foforɛ beni ati yeɛ odikyɛ yɛnea yé paa mmerɛ bɔ yetu ebie foɛ ne?

⁸ Ɛmɔma yɛnea nikyee foforɛ bɔ yeti yeɛ odikyɛ yɛnea yé paa mmerɛ bɔ yetu ebie foɛ ne. Bɛnwa sɛ ekyire aworowaa ayire a, wɔ bɔbɔ yeɛ ɛkɔte ɔ. Yeti sɛ yɛpere yɛnwo yetu ebie foɛ na ɛhene ati wanzi gyinayɛɛ pá a, bɔ okofi nu kɔwa ne, ebie kɔfa yɛnwo. Ɛhene ati yenwo hia paa kyɛ yekosusu nningyein yenwo yɛkɔhɔ siɛ kora né yatu ebie foɛ.

MMERƐ BƆ YENWU YE KYƐ ODIKYƐ YETU EBIE FOƐ NE

9. Koraka mbanyi nemɔ kɔfa afutue kɔma ebie ne, nzu yeɛ odikyɛ benwu ye ɔ? (Galatiafoɛ 6:1)

⁹ Sɛ odwu mmerɛ bie na aliemaa bie tu agyirɛ bie bɔ ɔkɔmaa ɔkɔɔyɛ “bɔne” a, odikyɛ mbanyi nemɔ fa yenwo afutue bɛma ye. (Kenga Galatiafoɛ 6:1.) Sɔ dwirɛ ne kyire kyɛ, ebiaa ne sona ne yɛ nningyein biemɔ bɔ ɔkɔmaa ɔkɔɔyɛ bɔne pirikua ɔ. Ɔba sɔ a, mbanyi nemɔ botayɛɛ yeɛ ole kyɛ, bɛkɔboka ye maa ɔkɔfa ngoa atee naso. (Yak. 5:​19, 20) Nakoso, ɔtte kyɛ bɛtele meda w’ase nala ne bapagya bɛ awaa, na mmom odikyɛ benwu ye kyɛ ɔte amba kyɛ sona ne tu sɔ agyirɛ ne. Ɛhene kɔmaa mvasoɛ kɔwa b’afutue naso. Ofikyɛ Yehowa afa yenwo atee ama yenu biala kyɛ yɛkɔhora yekosi nningyein nwo gyinayɛɛ kyɛbɔ yekuro ɔ. (Rom. 14:​1-4) Yede, sɛ mbanyi nemɔ le adanzeɛ kyɛ aliemaa bie atu agyirɛ bie bɔ ɔttemayé, na bɛpena kyɛ bɛfa yenwo afutue bɛma ye a, sɛɛ yeɛ odikyɛ bɛyɛ ye ɔ?

10-12. Sɛ mbanyi nemɔ pena kyɛ bɛfa afutue bɛma ebie bɔ ɔwalle bɛ berɛ kyɛ ɔpena afutue a, nzu yeɛ odikyɛ bɛyɛ ɔ? Ma yenwo mvandoho. (Nea foto ne koso.)

¹⁰ Ɔlla ase kyɛ mbanyi nemɔ kɔfa afutue kɔma aliemaa bie, mmerɛ bɔ ɔwalle bɛ berɛ kyɛ ɔpena afutue ne. Nzuati ɔ? Somafoɛ Pɔɔlo hane kyɛ ebie kɔhora kotu agyirɛ bie bɔ ɔttemaye kora né yenye awa yenwo so. Yeti koraka mbanyi nemɔ kotu ebie foɛ ne, nningyein biemɔ wɔ berɛ bɔ odikyɛ bedimoa bɛyɛ, na wamaa sona ne ahora atie b’afutue ne.

¹¹ Sɛ panyi bie kwaatu ebie foɛ a, ɔtekyɛ kuaniɛ bie bɔ ɔkwaalua nikyee wɔ aseɛ bɔ ɔyɛ se so ne. Koraka okolua aba ne, odimoa fundam aseɛ ne maa ɔyɛ mmerɛ, na osiesie so. Ɛhene maa ɔkora dua aba ne bɔ ɔmvɛ ɔ. Ye si ne, oguegua bɔ walua naso nzue, na wamaa wahora wanyi. Sɔ ala yeɛ sɛ asafo nu panyi bie pena kyɛ ɔfa afutue ma aliemaa bie a ɔte ɔ. Odikyɛ ɔyɛ nningyein biemɔ na wamaa wayɛ mmerɛ wama sona ne kyɛ okotie ye ɔ. Ebie yeɛ ole kyɛ, ɔkɔpena mmerɛ bɔ ɔte pá bɔ ɔne ye kɔbɔ ngɔmmɔ ɔ. Afei odikyɛ ɔmaa onwu ye kyɛ okuro ye dwirɛ paa, yeti ɔpena kyɛ ɔne susu edwirɛ bie anwo. Sɛ étu ebie foɛ na onwu ye kyɛ ekuro ye dwirɛ, na ɛdwene yenwo a, ɔngɔyɛ se kyɛ ɔkɔfa wɔ afutue ne kɔyɛ adwuma ɔ.

¹² Mmerɛ bɔ panyi ne ne ye bɔ ngɔmmɔ ne, ɔkɔhora kɔmaa okonwu ye kyɛ yɛmu yedi mvomsoɛ, yeti ɔwɔ nu alaa a odikyɛ betu yɛ foɛ. (Rom. 3:23) Afei odikyɛ ɔto yeboase ne aliemaa ne dwudwo obuo nu, na ɔmaa onwu Bible nu dwirɛ bɔ okyire kyɛ bɔ ɔyɛ ne ttemaye ɔ. Mmerɛ bɔ aliemaa ne ale ye mvomsoɛ ato nu ayie ne, panyi ne “kolua aba ne.” Ɛhene kyire kyɛ ɔkɔboka aliemaa ne maa okonwu bɔ ɔkɔyɛ na wamaa wahwe yenwo wafi sɔ nikyee nanwo ɔ. Ɛhene si ne, panyi ne “koguegua aba naso nzue.” Bɔ ɛhe koso kyire yeɛ ole kyɛ, ɔkɔkamvo aliemaa ne wɔ mmɔden bɔ ɔbɔ ye wɔ asafo nanu nanwo, na afei ɔne ye abɔ mbaeɛ.—Yak. 5:15.

13. Sɛ mbanyi nemɔ fa afutue ma ebie a, bɛkɔyɛ sɛɛ né baboka sona ne maa wate yebo?

¹³ Sɛ odwu mmerɛ bie na ɛfa afutue ma ebie a, bɔ ɛpena kyɛ sona ne nwu ye ne, ebiaa nna ɛberɛ koraa yeɛ né ye adwene wɔ ɔ. Nzu yeɛ mbanyi nemɔ kɔhora kɔyɛ kɔfa ɛhe anwo ɔ? Bɛkɔhora bɛkɔto bɛ boase bekobisa sona ne dwirɛ biemɔ. (Nwo. 12:11) Mmuayɛɛ bɔ sona ne kɔma ne, yeɛ ɔkɔmaa ekonwu ye kyɛ, wate afutue bɔ ɛfa ma ye nabo anaa ɔttele yebo ɔ.

MMERƐ BƆ ƆTE PÁ KYƐ YETU EBIE FOƐ, ƆNE KYƐBƆ YƐKƆYƐ YE Ɔ

14. Aso odikyɛ yɛfa afutue yɛma ebie mmerɛ bɔ yafɛ yaa anaa? Kyirekyire nu.

¹⁴ Yɛ mukoraati bɔne wɔ yɛnwo. Yeti odwu mmerɛ bie a, yɛkora yɛyɛ nikyeebie, anaa yɛkã edwirɛ bie maa mmenia fɛ yaa. (Kol. 3:13) Bible ne maa yenwu kyɛ, sɛ odwu mmerɛ bie a, yɛ koso ebiemɔ kora yɛ nikyeebie maa ɔyɛ yɛ yea paa. (Ɛfe. 4:26) Nakoso, ɔnzɛkyɛ yetu ebie foɛ mmerɛ bɔ yafɛ yaa ne. Nzuati ɔ? Ofikyɛ ‘sona yaafɛlɛ nna Nyameɛ tenenee ali.’ (Yak. 1:20) Bɛnwa sɛ ɛfɛ nwɔsea nwo yaa a, ɛkɔtɔ wɔ kena. Yeti sɛ yetu ebie foɛ mmerɛ bɔ yafɛ yaa a, sona ne ngɔhora ngonya y’afutue naso mvasoɛ biala. Bɔ yɛkã ye ngyire kyɛ sɛ ebie yɛ nikyee maa ɔha yɛ a, yɛngɔhora yɛngɔhã yenwo dwirɛ yengohyire ye. Nakoso, sɛ yɛmaa y’ahone ba ase kora né yadwudwo a, ɔkɔboka yɛ paa. Yɛkɔhora yekosua ɛhe anwo nikyee yekofi Elihu, bɔ ɔfale afutue pá mane Yob ne berɛ.

15. Nzu yeɛ yesua yefi bɔ Elihu yɛle nanu ɔ? (Nea foto ne koso.)

¹⁵ Yob damvo nemɔ hane edwirɛ pee bɛtole ye so ngyẽa pee, na ye koso ɔmaa benwuni kyɛ bɔ bɛkã ne, ɔtte nahorɛ. Mmerɛ bɔ né bedwudwo namu, né Elihu ayɛ konn otie, na né Yob nwo yɛ ye anwumvo. Nakoso mmerɛ bɔ Yob buale yenwo bẽ, ná ɔhane edwirɛ biemɔ bɔ ɔtte nahorɛ fale Yehowa nwo ne, Elihu fɛle yaa paa. Ɛhene po ne, onyane aboterɛ nwondɛle maa odwuli ye so kora yeɛ odwudwo ɔ. Na mmerɛ bɔ ne odwudwo kyire Yob ne koso, ɔmaa onwuni kyɛ obu ye. (Yob 32:2; 33:​1-7) Bɔ Elihu yɛle ne, yɛkɔhora yekosua nikyeebie bɔ yenwo hia paa yekofi nu. Yeɛ ole kyɛ, odikyɛ yenwu mmerɛ bɔ ɔte pá kyɛ yekotu ebie foɛ, ɔne atee pá bɔ yɛkɔfa so yɛkɔyɛ sɔ ɔ. Afei koso, odikyɛ yɛmaa sona ne nwu ye kyɛ yebu ye na yekuro ye dwirɛ.—Nwo. 3:​1, 7.

KƆSO TU MMENIA FOƐ, NA WƆ KOSO TIE AFUTUE

16. Nzu yeɛ esua fi Edwein 32:8 nanu ɔ?

¹⁶ Tworɔnzɛm bɔ adesua ne gyi so ne nwa, ‘Yehowa nye wɔ yɛ so, na okotu yɛ foɛ.’ (Kenga Edwein 32:8.) Sɔ dwirɛ ne maa yenwu ye kyɛ, nna afutue mbaen yeɛ Yehowa fa ma yɛ ɔ, na mmom ɔkɔso boka yɛ maa yɛkora yɛfa yɛyɛ adwuma. Yɛ koso yɛkɔhora yekosuesua Yehowa. Sɛ yɛfa afutue yɛma ebie a, odikyɛ yɛkɔso yɛhyɛ ye ngunaen kyɛbɔ Yehowa yɛ ne. Afei koso, odikyɛ yɛkɔso yɛboka ye, na wamaa wahora wasi gyinayɛɛ pá.

17. Asafo nu mbanyi bɔ bɛfa Bible nu afutue bɛma yɛ ne, bɛte kyɛ nzu? Kyirekyire nu. (Yesaya 32:​1, 2)

¹⁷ Sɔ mmerɛ he paa yeɛ odikyɛ yetu mmenia foɛ, na yɛ koso yetie afutue ɔ. (2 Tim. 3:1) Asafo nu mbanyi bɔ bɛfa Bible nu afutue bɛma yɛ ne, bɛte kyɛ “aseɛ wosee so asue bɔ ɔtengyɛ ɔ.” (Kenga Yesaya 32:​1, 2.) Yɛ damvomɔ bɔ bɛnga bɔ ɔkɔyɛ yɛsoanu fɛ, na mmom benya akokoduro bɛkã nahorɛ bekyire yɛ ne, bɛnoa dwirɛ tekyɛ “sikaa kɔkorɛ bɔ bafa bali adwii bagua ɛdwetɛ nu ɔ.” (Any. 25:11) Yede, ɛmɔma yɛ mukoraati yesua kyɛbɔ yekotu mmenia foɛ, na yɛ koso yɛhɔso yetie afutue.