Ngangu so Jésus asala na ndo azo ti sese

EDGAR GOODSPEED, mbeni zo ti kiringo na peko ti Bible, atene: “Aye kue so aÉvangile afa na ndo ye so Jésus atene ni gi lo oko na ambeni zo wala na lê ti azo mingi, peut-être lo tene ni gi na yâ ngbonga use. Ye oko, akete tënë so andu bê ti azo ngangu mingi, na tongaso a yeke na lege ni ti tene so mbeni zo so asala ngangu na ndo azo tongana ti lo ayeke dä pëpe.”

Na ngoi so Jésus Christ ahunzi lani kusala ti lo na sese na ngu 33 ti ngoi ti e, adisciple ti lo (akoli na awali) ayeke 120 tongaso (Kusala 1:15). Laso, azo ahon ngbundangbu use atene so ala yeke aChrétien. Azo kutu ngbangbo mingi ahinga Jésus tongana mbeni prophète. Afango ye ti lo ayeke lani na mbeni kota ngangu na ndo azo ti sese mobimba.

Même amokonzi-nzapa so ayeke ti vorongo ti aChrétien pëpe ahinga ngangu so Jésus asala ândö na ndo azo ti sese. Na tapande, mbeni rabbin ti aJuif, Hyman Enelow, atene: “Jésus aga mbeni zo so azo ahinga lo mingi, so azo amanda tënë na ndo ti lo mingi, mbeni zo so asala ngangu mingi na ndo azo na yâ mbaï ti vorongo ti azo.” Enelow atene nga: “Zo wa alingbi ti diko ngele ti ngangu so Jésus asala na ndo azo? Ndoye so lo pusu azo ti fa ni, dengo bê so lo mû, nzobe so lo pusu azo ti sala, beku na ngia so lo zia na yâ bê ti azo: aye so kue ade ti si lâ oko pëpe na yâ mbaï ti zo. Na popo ti azo so iri ti ala awu mingi nga na anzoni ye so azo ti nzobe asala, mbeni zo ti lingbi na ngangu so Jésus ayeke na ni na ndo sese ayeke dä pëpe. Lo ga mbeni zo so agbu bê ti azo mingi na yâ mbaï.” Mbeni mokonzi ti poroso ti aHindou, Mohandas K. Gandhi, atene lani: “Mbi de ti hinga mbeni zo so asala ye mingi teti azo ahon Jésus pëpe. Ti tâ tënë ni, mbeni ye ti sioni ayeke na yâ vorongo ti aChrétien pëpe.” Ye oko, lo tene na ndo ni: “Kpale ni ayeke na ala aChrétien. Ala yeke même ndulu oko pëpe ti sala ye alingbi na afango ye ni.”

Na yâ mbaï ti vorongo, a ninga awe so ala so atene ala yeke aChrétien adoro afango ye ti Jésus. Cecil John Cadoux, mbeni wasungo mbaï na ndo vorongo ti aChrétien, abâ so “guengo na li ni yeke yeke ti bubango ti nzoni salango ye na yâ Église” ayeke lani na “gbe ti lê ti azo so amû li ni na yâ vorongo ti aChrétien na ngu 140. . .” Lo tene: “Kiringo na peko ti anzoni salango ye so akozo Chrétien amû na nene ni asala si azo ti yâ ni aga tongana tanga ti azo ti sese kue.”

Bubango ti anzoni salango ye ague lani na li ni mingi na ngu 300 ti si na 400 tongana togbia ti aRomain Constantin aga Chrétien. Cadoux asû na mbeti: “Awasungo mbaï amanke pëpe ti bâ, nga ngoi na ngoi ti dema, wokongo yâ ti asalango ye so Église asala lani ti te mbele na Constantin.” Na yâ ti angu ngbangbo so aga na peko ti mbele so, azo so atene ala yeke aChrétien asala aye ti sioni mingi so abi zonga na ndo iri ti Christ.

Tongaso atënë so andu zo oko oko ayeke so: Ye wa Jésus afa na ngoi ti lo? Na afango ye ti lo alingbi ti ndu e tongana nyen?

[Foto na lembeti 3]

“Mbi de ti hinga mbeni zo so asala ye mingi teti azo ahon Jésus pëpe.”​—Mohandas K. Gandhi

[Foto na lembeti 3]

“Mbeni zo so asala ngangu na ndo azo tongana ti lo ayeke dä pëpe.”​—Edgar Goodspeed

[Lingu ti foto ni]

Culver Pictures