Emisisi Midarhi y’Idaho Yashurha Ecihugo c’e Turquie n’ec’e Syrie—Bici Ebibliya Edesire Lugenda Oko?

YAKUBULAGWA: Omu Nsiku 10/2/2023

Kuhika omu Nsiku 9/2/2023, bantu barhalusire 20 000 bo bali bamakafâ enyanya z’omusisi gw’idaho gwashurhaga ecihugo c’e Turquie n’ec’e Syrie Lwa Kazi. Amakumi g’ebihumbi by’abantu bayagalisire n’amagana g’ebihumbi gayaka emwababwe.

Komite ibirhi z’okuhâna oburhabale zahiragwaho n’Abahamirizi ba Yehova zigendekire zaha bene wirhu na bali birhu oburhabale n’okujira okwabo koshi lyo bayokola abahikirwe n’obo buhanya. (Abagalasiya 6:10) Bene wirhu barhumagwa n’etawi y’eyo munda bahisire nsa 24 enyuma z’omusisi okugera ciru akaba emboho yali nyinji n’ehali babalamagamo erhali nyinja. Babire n’obulyo bw’okurhuliriza omu hali y’omubiri n’ey’ekandalala abantu bahikirwe n’obo buhanya. (1 Petro 5:2) Emyanzi mihyahya lugenda obushiru bwirhu bw’okuhâna oburhabale yahirwa omu Cumpa c’Omwanzi.

Amandiko garhuyemezize n’obwalagale oku “Yehovaa aba hofi n’emirhima egayire; anacungule abavunisire omurhima.” (Ennanga 34:18, NWT) Eyi myanzi ekulikire eyimangire oku Bibliya yanakurhabala amango oli omu kanga kabi bwenene.

Evideo edesire Oburhulirize oku Bali Balaka, ehânyire amahano minja bwenene kuli balya bafîrirwe n’abazigirwa babo.
Omwanzi gudesire “Orhabale Omwana Wawe Arhaciyumvagya Kubi Erhi Myanzi y’Okuyobohya Erhuma” gulimo amakanuni g’Ebibliya gakarhabala abana bawe barhaciyumvagya kubi bwenene enyanya z’emyanzi mibi bali bayumva.

Lwa Kasi Nsiku 6/2/2023, emisisi midârhi y’idaho yashurha ecihugo c’e Turquie n’ec’e Syrie.

“Lwa Kasi, musisi muguma munene gw’idaho gwayirha bantu barhalusire 3 700 omu cihugo c’e Turquie n’omu eneo y’e nord-ouest y’e Syrie. Oko kwahikire omu mango g’emboho, n’oko kwarhuma ako kanga kaba kazibu bwenene oku bihumbi by’abantu bahezize enyumpa zabo n’okuyagalika. Ako kasanzi k’emboho karhumire kwaba kuzibu oku bantu b’okuhâna oburhabale okuyokola abafulumusire ogo musisi.”—Reuters, Nsiku 6/2/2023.

Rhuli rhwaciyumva kubi bwenene erhi rhwacisoma emyanzi ya ntyo eganirire obuhanya. Omu kasanzi ka ntyo, rhwanalangalira Yehova ? “Nyamuzinda wa ngasi burhulirize.” (2 Abakorinti 1:3) Anahâne “obulangalire . . . n’okurhuliriza olubaga lwage omu Mandiko Matagatifu.”—Abaroma 15:4.

Ebibliya enarhuyigirize:

Ebyali byalebirwe lugenda emisisi y’idaho.
Aha rhwakakûla oburhulirize n’obulangalire.
Gurhi Mungu anayusemwo amalibuko goshi.

Ly’obana ebi Ebibliya edesire lugenda eyi myanzi, osome emyanzi edesire:

a Yehova ly’izino lya Nnâmahanga.—Ennanga 83:18.