Okuyunjulira kw’Amishi Kwasherezize Bintu Binji—Bici Ebibliya Edesire?

Omu igulu lyoshi, abantu bali bahikirwa n’okuyunjulira kw’amishi kuli kwashereza bintu binji. Olole ezi raporo:

“Enkuba yaniaga omu kapitale k’e cihugo c’e Chine omu nsiku nsungunu zigezire yali ndarhi bwenene. Hamagera myaka 140 enkuba nnene ntyo erhalicisag’inia mweco cihugo. Egarhi ka Lwa Kalindarhu na Lwa Kasharhu, amishi g’enkuba yaniaga gali ga . . . buli bwa milimetre 744,8.”—AP News, Nsiku 2/8/2023.
“Lwa Kani, lo lwali lusiku lwa kabirhi kalemera mudarhi ohamagalwa Khanun alerha enkuba ndarhi n’empusi ndarhi bwenene emukondwe (sud) y’e Japon. Oko kwarhuma bantu babirhi bafâ . . . . Abantu bali barhanya oku oyo kalemera alerha enkuba ndarhi n’amishi gayo ganahikira okubwikira idaho oku buli bwa metre 0,6 kurhenga okw’idaho omu eneo y’entondo y’ekagarhi k’e Taïwan.”—Deutsche Welle, Nsiku 3/8/2023.
“Okuyunjulira kw’amishi kwabaga oku buzinda bw’omugobe gucizind’igera [omu Nouvelle-Écosse] kwadwirhwe n’enkuba ndarhi bwenene eri yania omu maeneo g’e Canada gaba oku burhambi bw’e nyanja Atlantique. Enkuba eri nk’eyo erhazindig’inia mw’ago maeneo omu myaka 50 egezire.”—BBC News, Nsiku 24/7/2023.

Bici Ebibliya edesire lugenda ebyo byoshi?

Ecimanyiso c’‘ensiku nzinda’

Ebiliya eyerekine oku rhulamire omu kasanzi kahamagalwa “nsiku nzinda.” (2 Timoteyo 3:1) Yezu alebire oku mwa gano mango girhu, rhwakabwine “eby’okuyobohya,” erhi bintu by’okulerha ecoba. (Luka 21:11) Okushanja kw’e climat kwarhumire haba ebintu by’okuyobohya lugenda ehewa biri byahikira bwenene buzira kulaliza, kanji-kanji, na binji bwenene.

Ecirhumire c’okuba n’obulangalire

Ebibliya edesire oku ebyo bintu binji by’okuyobohya biri byaba okw’igulu mwa gano mango bishinganine birhuhe obulangalire. Bulya gurhi? Yezu adesire ntya: “Amango mwabona okwo kuba, munamanye oku Obwami bwa Nyamuzinda buli hofi.”—Luka 21:31; Mateyo 24:3.

Ebintu rhuli rhwabona byaba ene biyerekine oku hano hofi-hofi Obwami bwa Mungu bwaba n’obuhashe loshi oku misi y’igulu, kuhiramwo n’amishi.—Ayubu 36:27, 28; Ennanga 107:29.

Ly’oyiga binji lugenda oku Obwami bwa Mungu bwayish’ikubûlamwo amazingira g’igulu, olole omwanzi gudesire “Ni Nani Atakayeiokoa Dunia?”