දේවදූතයන් කියන්නේ මොන වගේ අයද?

දෙවියන්ව අපිට පේන්නේ නැහැ වගේ දේවදූතයන්වත් අපිට පේන්නේ නැහැ. මොකද එයාලට තියෙන්නේ අපිට වගේ “ඇට මස් නහරවලින් යුත් ශරීරයක්” නෙවෙයි. දෙවිට විශ්වාසවන්ත දේවදූතයන් ඉන්නේ ස්වර්ගයේ දෙවියන් ඉදිරියෙයි.—ලූක් 24:39; මතෙව් 18:10; යොහන් 4:24.

අතීතයේදී පොළොවට ඇවිත් යම් පැවරුම් කරන්න දෙවියන් සමහර දේවදූතයන්ට භාර දීලා තිබුණා. ඒ වෙලාවට එයාලා පොළොවට ඇවිත් තියෙන්නේ මිනිස් ස්වරූපයෙන්. පැවරුම කළාට පස්සේ ආයෙත් ස්වර්ගයට ගිහින් තියෙන්නේ දේවදූතයන් විදිහට.—විනිශ්චයකරුවෝ 6:11-23; 13:15-20.

දේවදූතයන් පොළොවට ආපු අවස්ථා ගැන සඳහන් කරද්දී වගේම එයාලා ගැන කතා කරන වෙන අවස්ථාවලදීත් බයිබලයේ එයාලව හඳුන්වලා තියෙන්නේ පිරිමින් විදිහට. ඒත් දේවදූතයන් අතර ගැහැනු, පිරිමි කියලා කොටස් දෙකක් නැහැ. එයාලා විවාහ වෙන්නේවත් වර්ගයාව බෝ කරන්නේවත් නැහැ. දේවදූතයන් කියන්නේ මුලින්ම පොළොවේ මිනිසුන් විදිහට ඉපදුණ අය නෙවෙයි. ඒ වෙනුවට යෙහෝවා දෙවියන් එයාලව නිර්මාණය කළා. ඒ නිසයි බයිබලයේ එයාලව “සැබෑ දෙවිගේ පුත්‍රයෝ” විදිහට හඳුන්වන්නේ.—යෝබ් 1:6; ගීතාවලිය 148:2, 5.

දේවදූතයන්ටත් භාෂාවක් තියෙනවා කියලා බයිබලයේ සඳහන් දේවලින් පැහැදිලියි. මිනිසුන්ට යම් දේවල් දැනුම් දෙන්න දෙවියන් දේවදූතයන්ව පාවිච්චි කරලා තියෙනවා. හැබැයි දේවදූතයන්ට නමස්කාර කරන්නවත් යාච්ඤා කරන්නවත් දෙවියන් අපිට අවසර දීලා නැහැ.—1 කොරින්ති 13:1; එළිදරව් 22:8, 9.

දසදහස් වර දසදහසක් දේවදූතයන් ඉන්නවා කියලා බයිබලයේ කියනවා. ඒකෙන් අදහස් කරන්නේ දේවදූතයන් බිලියන ගාණක් ඉන්නවා කියන එකයි.—දානියෙල් 7:10; එළිදරව් 5:11.

දේවදූතයන් මිනිසුන්ට වඩා හුඟක් ‘බලසම්පන්නයි.’ ඒ වගේම හුඟක් බුද්ධිමත්. මිනිසුන්ට හිතාගන්න බැරි තරම් වේගයකින් එක තැනක ඉඳන් තව තැනකට යන්න එයාලට පුළුවන්.—ගීතාවලිය 103:20; දානියෙල් 9:20-23.

දේවදූතයන් කොච්චර බලවත්, බුද්ධිමත් අය වුණත් එයාලටත් සීමාවන් තියෙනවා. එයාලා නොදන්න දේවලුත් තියෙනවා.—මතෙව් 24:36; 1 පේතෘස් 1:12.

දේවදූතයන්ව නිර්මාණය කරලා තියෙන්නේ එයාලටම කියලා පෞද්ගලිකත්වයක්, දෙවියන්ගේ ගතිලක්ෂණ වගේම තීරණ ගන්න නිදහස ඇතුවයි. ඒ නිසා මිනිසුන්ට වගේම එයාලටත් පුළුවන් හරි දේ කරනවාද, වැරදි දේ කරනවාද කියලා තීරණය කරන්න. හැබැයි දේවදූතයන්ගෙන් යම් පිරිසක් දෙවියන්ට විරුද්ධව වැඩ කරන්න තීරණය කරලා තියෙන එක නම් හරිම කණගාටුදායකයි.—යූද් 6.