58වෙනි පරිච්ඡේදය
රොටි සහ මුහුන්
දෙකපොලිසයේදී යේසුස් වටා විශාල සෙනඟක් එක්රොක් වෙනවා. වැඩි වශයෙන්ම අන්‍යජාතිකයන් වෙසෙන මේ පළාතට දුර ඈත ප්‍රදේශවල සිට බොහෝදෙනෙක් පැමිණෙනවා. ඔවුන් පැමිණ සිටින්නේ යේසුස්ට සවන් දීමටයි. ඔහුට කියා ඔවුන්ගේ රෝග සුව කරගැනීමටයි. ඔවුන් විශාල කූඩ රැගෙන ඇවිත් තිබෙනවා. සාමාන්‍යයෙන් ඔවුන් ඒවා භාවිත කරන්නේ අන්‍යජාතිකයන් වෙසෙන ප්‍රදේශ මැදින් ගමන් කරන විට ආහාර පාන රැගෙන යෑමටයි.
එහෙත්, අන්තිමේදී යේසුස් තම ගෝලයන්ට කතා කර මෙසේ පවසනවා. “මේ සමූහයා දැනටමත් දවස් තුනක් මා ළඟ සිටිති. ඔවුන්ට කන්න කිසිවක් නැති හෙයින් ඔවුන් ගැන මට අනුකම්පාවක් හැඟේ. මා ඔවුන්ව බඩගින්නෙන් ගෙදර යන්න හැරියොත්, ඔවුන් මඟදී ක්ලාන්ත වනු ඇත. එපමණක්ද නොව ඔවුන්ගෙන් සමහරෙකු දුර සිට පැමිණ තිබේ.”
“මෙවැනි හුදකලා තැනකදී මේ මිනිසුන්ව තෘප්තිමත් කරන්න කොහෙන් රොටි ලබාගන්නද” කියා ගෝලයන් අසනවා.
එවිට යේසුස් මෙසේ විමසනවා. “ඔබ ළඟ රොටි කීයක් තිබේද?”
“සතක්” සහ ‘කුඩා මසුන් කිහිපදෙනෙක්’ කියා ඔවුන් පිළිතුරු දෙනවා.
මිනිසුන්ට බිම හිඳගැනීමට උපදෙස් දෙමින් යේසුස් රොටි සහ මසුන් රැගෙන දෙවිට යාච්ඤා කරනවා. ඉන්පසු, ඒවා කඩා තම ගෝලයන්ට දෙන්න පටන්ගන්නවා. ඔවුන්ද ඒවා ජනයා අතරේ බෙදා දෙන අතර සෑමදෙනාම කා තෘප්තියට පත් වෙනවා. පුරුෂයන් 4,000ක් පමණ හා ස්ත්‍රීනුත් දරුවනුත් කෑ පසු ඉතිරි වූ කෑම ටික එකතු කරද්දී කූඩ හතක් පිරෙන්න තරම් ඉතිරි වී තිබෙන බව පෙනී යනවා!
යේසුස් සෙනඟ විසුරුවාහැර තම ගෝලයන් සමඟ බෝට්ටුවකට නැඟී ගලීල මුහුදේ බටහිර වෙරළට යාත්‍රා කරනවා. මෙහිදී පරිසිවරුන්, ස්වර්ගයෙන් ලකුණක් පෙන්වන්න කියා ඉල්ලමින් යේසුස්ව පරීක්ෂා කිරීමට වෑයම් කරනවා. මේ වතාවේදී, සද්දුසිවරුන්ගේ ආගමික නිකායේ සාමාජිකයනුත් ඔවුන් සමඟ සිටිනවා.
තමන්ව පරීක්ෂා කිරීමට ගන්නා ඔවුන්ගේ උත්සාහය දැනගෙන, යේසුස් පිළිතුරු දෙන්නේ මෙහෙමයි. “ඔබ සාමාන්‍යයෙන් පුරුදු වී සිටින්නේ සවස් වූ විට ‘අහස ගින්දර මෙන් රතු පාට නිසා කාලගුණය හොඳ වේ කියාද,’ උදේට ‘අහස ගින්දර මෙන් රතු පාට වී අඳුරුව තිබුණොත්, අද ශීත වැසි සහිත කාලගුණයක් වේ’ කියාද කීමටය. අහසේ ස්වභාවය තෝරා දෙන්න ඔබ දන්නහුය. නමුත් නියම කරන ලද කාලවල ලකුණු තෝරා දෙන්න ඔබට නුපුළුවන.”
ඒත් එක්කම යේසුස් ඔවුන්ව දුෂ්ට ද්‍රෝහි වූ පරම්පරාවක් ලෙස හඳුන්වමින්, පරිසිවරුන්ට කලින් පවසා තිබුණාක් මෙන් නැවතත් අනතුරු අඟවමින් පවසන්නේ ඔවුන්ට යෝනාගේ ලකුණ හැර වෙන කිසි ලකුණක් නොදෙන බවයි. ඉන්පසු, ඔහු එතැනින් පිටත් වී ඔහුගේ ගෝලයන් සමඟ බෝට්ටුවකට නැඟ, ගලීල මුහුදේ ඊශාන වෙරළෙහි තිබෙන බෙත්සයිදාව දෙසට ගමන් කරනවා. ගමන යන අතරතුරේදී, රොටි රැගෙන ඒමට ඔවුන්ට අමතක වී ඇති බව ගෝලයන් තේරුම්ගන්නවා. ඔවුන් ළඟ තිබෙන්නේ එක රොටියක් පමණයි.
පරිසිවරුන් හා හෙරොද්ට සහයෝගය දක්වන සද්දුසිවරුන් සමඟ මීට ටිකකට කලින් ඇති වූ ඝට්ටනය සිතේ තබාගෙන යේසුස් මෙසේ අවවාද කරනවා. “සෝදිසියෙන් සිටින්න. පරිසිවරුන්ගේද සද්දුසිවරුන්ගේද මුහුන්වලින් පරෙස්සම් වන්න බලාගන්න.” යේසුස් මුහුන් ගැන සඳහන් කරන විට ගෝලයන් සිතන්නේ ඔවුන්ට රොටි රැගෙන ඒමට අමතක වීම ගැන ඔහු සඳහන් කරන බවයි. ඉතිං, ඔවුන් මේ සම්බන්ධයෙන් එකිනෙකා සමඟ වාද කරන්න පටන්ගන්නවා. ඔවුන් තමා පැවසූ දේ වරදවා වටහාගෙන ඇති බව තේරුම්ගනිමින් යේසුස් මෙසේ අසනවා. “ඔබ ළඟ රොටි නොතිබීම ගැන වාද කරගන්නේ මන්ද?”
මෑතකදී, යේසුස් දහස් ගණනකට ආශ්චර්යවත් ලෙස රොටි සපයා දුන්නා. සමහරවිට, මේ අන්තිම ප්‍රාතිහාර්යය සිදු කරන්න ඇත්තේ දිනකට හෝ දෙකකට කලිනුයි. ඒ නිසා, රොටි නොතිබීම ඔහුට ප්‍රශ්නයක් නොවන බව ඔවුන් දැනගෙන සිටිය යුතුයි. ඔහු ඔවුන්ට මෙසේ මතක් කර දෙනවා. “ඔබට මතකද මා පුරුෂයන් පන්දහසට රොටි පහ කඩා දුන් විට, ඔබ ඉතිරි කෑමවලින් කූඩ කීයක් පුරවාගත්තාද කියා?”
“දොළහක්” කියා ඔවුන් පිළිතුරු දෙනවා.
“මා පුරුෂයන් හාරදහසට රොටි සත කඩා දුන් විට, ඔබ ඉතිරි කෑමවලින් විශාල කූඩ කීයක් පුරවාගත්තාද?”
“සතක්” කියා ඔවුන් පිළිතුරු දෙනවා.
“තවමත් ඔබට තේරෙන්නේ නැද්ද?” කියා යේසුස් අසනවා. “මා ඔබට රොටි ගැන කතා නොකළ බව ඔබ තේරුම් නොගත්තේ මන්ද? නමුත් පරිසිවරුන්ගේද සද්දුසිවරුන්ගේද මුහුන්වලින් පරෙස්සම් වන්න.”
අන්තිමේදී ගෝලයන්ට කාරණය වැටහෙනවා. රොටි පිපෙන්ට දමන ද්‍රව්‍යයක් වන මුහුන් යන වචනය භාවිත කළේ දූෂ්‍ය වීම අඟවන්නයි. ඒ නිසා, යේසුස් කතා කරන්නේ සංකේතාත්මක ලෙසයි කියා ගෝලයන් දැන් තේරුම්ගන්නවා. දූෂ්‍ය කරවන බලපෑමක් ඇති “පරිසිවරුන්ගේද සද්දුසිවරුන්ගේද ඉගැන්වීමෙන්” පරෙස්සම් වන ලෙසයි ඔහු ඔවුන්ට අවවාද කරමින් සිටින්නේ. මාක් 8:1-21; මතෙව් 15:32–16:12; NW.
▪ මනුෂ්‍යයන්ට ආහාර පාන රැගෙන යෑමට විශාල කූඩ තිබෙන්නේ ඇයි?
▪ දෙකපොලිසයෙන් පිට වී යෑමෙන් පසු, යේසුස් බෝට්ටුවෙන් කොහාටද ගමන් කරන්නේ?
▪ මුහුන් ගැන යේසුස්ගේ ප්‍රකාශය ගෝලයන් වරදවා වටහාගන්නේ කොහොමද?
▪ “පරිසිවරුන්ගේද සද්දුසිවරුන්ගේද මුහුන්” යන ප්‍රකාශයෙන් යේසුස් අදහස් කරන්නේ කුමක්ද?