අපගේ අවධානය යොමු විය යුතු වෛද්‍ය ක්ෂේත්‍රයේ වැදගත් ප්‍රවණතාවක්
රෝගීන් සාරධර්ම පිළිබඳව දරන මත ගැන සහ ඔවුන්ගේ අයිතිවාසිකම් ගැන නීතික ක්ෂේත්‍රයේ සහ වෛද්‍ය ක්ෂේත්‍රයේ වෘත්තිකයන් දක්වන උනන්දුව වැඩි වෙමින් තිබේ. මේ මගින් නව සත්කාර හා ප්‍රතිකාර ක්‍රමවල වැඩි දියුණුවක් දක්නට ලැබී ඇති අතර, යෙහෝවාගේ සාක්ෂිකරුවන්ට මින් ප්‍රයෝජන ගත හැකිය. (ක්‍රියා 15:28, 29)
රුධිර ප්‍රවේශන භාවිතයෙන් ඇති විය හැකි අවදානම් සහිත තත්වයන් හා වියදම් සැලකිල්ලට ගනු ලැබූ බැවින් වෛද්‍ය කාර්ය මණ්ඩල රුධිර ප්‍රවේශන භාවිතය ගැන යළිත් සලකා බලමින් සිටී. රෝගීහු බොහෝදෙනෙක් රුධිර ප්‍රවේශනයක් කර නොගැනීමට දැඩිසේ උත්සුක වෙති. රුධිර ප්‍රවේශනයකින් තොරව සංකීර්ණ ශල්‍යකර්ම දැන් සිදු කෙරේ. ළමුන්ගේ විවෘත හෘද ශල්‍ය කර්ම, වකුගඩු සහ විකලාංග ශල්‍යකර්ම මේවාට ඇතුළත් වෙයි. රටවල් 150ක සිටින වෛද්‍යවරු සහ ශල්‍යවෛද්‍යවරු 1,00,000ට වැඩි ගණනක් රුධිර ප්‍රවේශනයකින් තොරව රෝගීන්ට ප්‍රතිකාර කිරීමට තම කැමැත්ත පළ කර සිටිති. ඔවුන් එසේ කිරීමට කැමති වී සිටින්නේ රෝගීන්ගේ තීරණවලට ගෞරව කිරීමක් වශයෙනි. අනවශ්‍ය ලෙස රුධිරය ප්‍රවේශනය කළ අවස්ථාවන් එන්ට එන්ටම වැඩි වන බව මෑතකදී කරන ලද අධ්‍යයනවලින් පෙනී යයි. පොදුවේ බලන කල, රුධිර ප්‍රවේශනවලින් සාර්ථක ප්‍රතිඵල අත් වී තිබෙන්නේ ඉතා අල්ප වශයෙනි. රුධිරය ප්‍රවේශනයේදී අහිතකර බැක්ටීරියාවන්ගෙන් දූෂණය වීම, වයිරස් ආසාදන සහ රුධිරය ප්‍රවේශනය ලබන්නාගේ ප්‍රතිශක්ති පද්ධතිය අකර්මණ්‍ය වීම සහ වෙනත් අත් වැරදි සිදුවීම වැනි අවදානම් සහිත තත්වයන් පවතී. බොහෝ විශේෂඥයන් නිගමනය කර ඇත්තේ, රුධිර ප්‍රවේශන වෙනුවට දෙන විකල්පයන් මගින් වඩාත් හොඳින් රෝගියාව රැකබලාගත හැකි බවත්, රෝගී සාත්තු වියදම් අවම වී ඇති බවත්, ඒවා ආරක්ෂාකාරී මෙන්ම ප්‍රායෝගික අඩු වියදම් සහිත ප්‍රතිකාර ක්‍රම බවත්ය. රක්ත හීනතාව ඇති වන්නේ රුධිර පරිමාවට සාපේක්ෂව රතු රුධිරාණු සෛලවල ප්‍රමාණය අඩු වීමෙනි. කලින් සිතුවාට වඩා බොහෝසෙයින් අඩු හිමොග්ලොබින් ප්‍රමාණයකින් ජීවිතය පවත්වාගැනීමට මිනිසුන්ට හැකි නමුදු මෙම තත්වයන් සමනය කිරීම පිණිස රුධිර පරිමාව වැඩි කරවන ඖෂධ දෙනු ලැබේ. රෝගියාගේ සිරුරේ රතු සෛල නිෂ්පාදනය යකඩ අඩංගු ද්‍රව්‍ය දීමෙන් උත්තේජනය කළ හැකියි. ඇතැම් අවස්ථාවලදී, ඖෂධීය එරිත්‍රොපොයටින් (EPO) මගින් රුධිර පරිමාවක් තුළ අඩංගු රුධිර සෛල ප්‍රමාණය (blood count) සාමාන්‍ය මට්ටමකට ගෙන ආ හැකියි. [ඇතැම් රටවල EPOවල රුධිරයෙන් ගත් ඇල්බියුමින් අඩංගුය. ක්‍රිස්තියානියෙක් එවන් ප්‍රතිකාරයක් පිළිගැනීම හෝ පිළිනොගැනීම හෘදය සාක්ෂිය හා සම්බන්ධ කාරණයකි.] ශල්‍යකර්මය අතරතුරේදී රුධිරය ගැලීම විවිධ ක්‍රමවලින් අවම කෙරේ. උදාහරණයක් වශයෙන්, දැඩි සැලකිල්ලකින් ශල්‍යකර්මය කිරීම, විද්‍යුත් ක්‍රමවලින් රුධිර වාහිනී පෑස්සීම, රුධිරය ගැලීම අඩු කරන ඖෂධ දීම සහ ශල්‍යකර්මය කරන අතරතුර ගලන රුධිරය යන්ත්‍රයක් තුළින් පිරිසිදු කර නැවත රෝගියාගේ රුධිර සංසරණ පද්ධතියට එක්කාසු කිරීම වැනි ක්‍රම දැක්විය හැකිය. [සැලකිය යුතුයි: ඇතැම් නිෂ්පාදන සහ ක්‍රම තෝරාගැනීම හෝ තෝරා නොගැනීම හෘදය සාක්ෂිය හා සම්බන්ධ කාරණයකි.] කුඩා දරුවන් සඳහා හෝ ජීවිත අවදානමකින් සිටින වැඩිහිටියන් සඳහා විකල්ප ප්‍රතිකාර දීම සරිලන්නේද? එසේය. නිදසුනක් වශයෙන්, බරපතළ හෘද දෝෂ තත්වයක් සහිතව ඉපදුණු වයස අවුරුදු හතරක දරුවෙක් රුධිර ප්‍රවේශනය නැතිව කරන ලද සංකීර්ණ ශල්‍යකර්ම කිහිපයකටම මුහුණ දුන්නේය. එක්සත් ජනපදයේ වැඩි වශයෙන්ම හදිසි ශල්‍යකර්ම කරන රෝහලක රුධිරය ප්‍රතික්ෂේප කරන යෙහෝවාගේ සාක්ෂිකරුවන් හා සම්බන්ධව සෑම වසරකම කරන සිය ගණනක් ශල්‍යකර්මවලදී මරණ අනුපාතය සෑහෙන තරමකින් අඩු වී ඇති බවක් පෙනී යයි. යම් ප්‍රතිකාරයක් පිළිගැනීම හෝ ප්‍රතික්ෂේප කිරීම පිළිබඳ රෝගියාගේ අයිතිවාසිකම්වලට ගෞරව කිරීම යහපත් සෞඛ්‍ය ප්‍රතිකාරවල මූලික චර්යා ධර්මවල එක් ප්‍රතිපත්තියකි. රුධිරය නොවන ප්‍රතිකාර ක්‍රම ගැන කලින්ම තේරීමක් කර තිබීම ක්‍රිස්තියානීන්ට වැදගත්ය. මන්දයත්, හදිසි තත්වයකදී අනතුරකට ගොදුරු වූ කෙනෙකුට තමාගේ පෞද්ගලික විශ්වාසයන් ගැන කතා කිරීමට හැකියාවක් නොතිබිය හැකි නිසාය. පූර්ව වෛද්‍ය නියෝග/මුදාහැරීම කාඩ් පත සහ සෞඛ්‍ය සාත්තුව සඳහා ස්ථාවර ඇටෝනි බලය (DPA) පෝරමය නිසි ලෙස පුරවා තැබීමෙන්, ඔහුට තමාගේ කැමැත්ත ගැන කලින් දැනුම් දිය හැකියි.
දැන් සාකච්ඡා කරන ලද ඇතැම් ප්‍රතිකාර ක්‍රම භාරගැනීම හෝ භාර නොගැනීම යමෙකුගේ බයිබලය මත පුහුණු කරන ලද හෘදය සාක්ෂියට එකඟව ගත යුතු පෞද්ගලික තීරණයකි. රුධිර ප්‍රවේශනයක් වෙනුවට ඔබ සහ ඔබේ දරුවන් වෙනුවෙන් ඔබ ලබාගැනීමට කැමති විකල්ප ප්‍රතිකාර ක්‍රමය කුමක්දැයි ඔබ තීරණය කර තිබෙනවාද? ඔබගේ තීරණය ගැනත් ඊට හේතුව ගැනත් ඔබගේ පවුලේ සිටින සාක්ෂිකරුවන් නොවන සාමාජිකයන්ව දැනුවත් කළ යුතුයි.—වර්ෂ 2000 ජූනි 15 සහ ඔක්තෝබර් 15 මුරටැඹ කලාපවල “පාඨකයන්ගෙන් ප්‍රශ්න” කොටස බලන්න.