රුධිරය එපා—වෛද්‍ය විද්‍යාව එම අභියෝගයට සාර්ථකව මුහුණ දෙයි
1 රුධිරය රහිත ප්‍රතිකාර ක්‍රම සම්බන්ධයෙන් කළ හැකි තේරීම් ගැන ඔබ කොතෙක් දුරට දන්නවාද? රුධිරය වෙනුවට යොදාගන්න සමහර දේවල් හා ඒවායින් කෙරෙන කාර්යය ඔබ තේරුම්ගෙන සිටිනවාද?
2 යෙහෝවාගේ සාක්ෂිකරුවන් රුධිර ප්‍රවේශනය ප්‍රතික්ෂේප කිරීමට බලපාන ප්‍රධානතම හේතුව වන්නේ ක්‍රියා 15:28, 29 මත පදනම් අපේ ආගමික විශ්වාසයයි. ලබාගත හැකි හොඳම ප්‍රතිකාරය ලබාගැනීමට අප කැමතියි. එහෙත් එහි කිසි විටෙකත් රුධිරය ඇතුළත් නොවිය යුතුයි. තමාගේ සිරුරට කළ යුතු දෙය කුමක්ද කියා තීරණය කිරීමේ අයිතිය තිබෙන්නේ රෝගීන්ටයි. රුධිර ප්‍රවේශනය වෙනුවට විකල්ප ප්‍රතිකාර කිරීම අප තෝරාගන්නේ ජීවත් වෙන්න තිබෙන ආශාව නිසායි.
3 රුධිරය විශාල වශයෙන් සිරුරෙන් ගලා යන අවස්ථාවක වහාම ගත යුතු පියවර දෙකක් වෛද්‍යවරුන් ඉදිරියෙහි තිබේ. ඉන් එකක් නම් රුධිරය ගලා යෑම නතර කිරීමයි. අනෙක් පියවර වන්නේ රෝගියාගේ රුධිර සංසරණ පද්ධතියේ තිබෙන රුධිර පරිමාව යථා තත්වයට පත් කිරීමයි. රුධිරය ප්‍රවේශනය කිරීම නිසා සෞඛ්‍යයට එල්ල වන අවදානම් කිහිපයක් තිබේ. ඒවා අතර හෙපටයිටිස්, ඒඩ්ස් හෝ රුධිරයෙන් ආසාදනය වන රෝගකාරක සඳහන් කළ හැක. රුධිර ප්‍රවේශනය මගින් ආසාත්මික ප්‍රතික්‍රියා ඇති විය හැකි අතර වැරදි වර්ගයේ රුධිරයක් ශරීරගත කිරීමටද ඉඩ තිබේ.
4 සැත්කමක් සිදු කිරීමේදී සිදු වන රුධිරය ගැලීම හැකි තාක් දුරට අවම කිරීමට වෙනත් රටවල සිටින ශල්‍ය වෛද්‍යවරුන්ට හැකියාව ලබා දෙන මෙවලම් කිහිපයක් තිබේ. ඒවා අතර විද්‍යුත් දහනය (electrocautery) ආගොන් කිරණ යොදා රුධිරය කැටිගැසීමට සැලැස්වීම (argon-beam coagulation), ෆයිබ්‍රින් මැලියම් (fibrin glue), රුධිර තනුකකරණය (hemodilution), සෛල බේරාගැනීම (cell salvage) හා වෙනත් දෑද තිබේ. කල් ගතවීමත් සමඟම මේ දේවල් මේ රට තුළද පහසුවෙන් ලබාගත හැකි තත්වයක් උදා වේවි. රුධිරය වෙනුවට ගනු ලබන ඕනෑම විකල්ප ප්‍රතිකාරයක තිබෙන ප්‍රයෝජන මෙන්ම අවදානම් ගැනද ඔබ දැනුවත්ව සිටිය යුතුයි. ඉතාමත් අමාරු සැත්කම් පවා රුධිර ප්‍රවේශනයක් නොමැතිව කළ හැකියි. උදාහරණයක් හැටියට වයසක තැනැත්තියකගේ උදරයේ ධමනියක් ප්‍රමාණයට වඩා විශාල වීම නිසා ඇයට සිදු කළ අන්තෝවාහිණික සැත්කම රුධිර ප්‍රවේශනයක් නොමැතිව සිදු කරන ලදි.
5 රුධිරය භාවිත නොකර යෙහෝවාගේ සාක්ෂිකරුවන්ට ප්‍රතිකාර කිරීමේ අභියෝගය බාරගැනීමට කැමැත්තක් දක්වන වෛද්‍යවරුන් ගණන වැඩි වෙමින් පවතී. රුධිර ප්‍රවේශනයක් නොමැතිව ප්‍රතිකාර හා සැත්කම් කිරීම යම් දවසක සියලුම රෝගීන් සඳහා නිර්දේශ කළ හැකි ප්‍රමිතියක් විය හැකියි.
6 බයිබල් ශිෂ්‍යයන්, සාක්ෂිකාරයෙකු නොවන විවාහක කලත්‍රයන් හා රුධිරය පිළිබඳ අපේ ස්ථාවරය ගැන ප්‍රශ්න කළ හැකි වෙනත් අය සමඟ රුධිරය එපා නමැති වීඩියෝ පටය නැරඹීම ප්‍රයෝජනදායක වන බවට සැකයක් නැත. මේ වීඩියෝ පටයේ ඉදිරිපත් කර ඇති ඕනෑම ප්‍රතිකාරයක් පිළිගැනීම හෝ නොපිළිගැනීම පෞද්ගලික කාරණයකි. එය හෘදය සාක්ෂියට එකඟව ගත යුතු තීරණයකි.—2000 ජූනි 15 සහ ඔක්තෝබර් 15 මුරටැඹ සඟරාවල පළ වූ “පාඨකයන්ගෙන් ප්‍රශ්න” නමැති කොටසද බලන්න.