හදිසි තත්වයකදී ඔබ ලබාගන්නා ප්‍රතිකාර මොනවාද?
හදිසි ප්‍රතිකාර අවශ්‍ය වන අවස්ථා අප නොසිතූ මොහොතක පැනනැඟිය හැකියි. (යාකො. 4:14) ඒ සඳහා කල් තියා හොඳින් සූදානම් වීම නැණවත් දෙයක්. (හිතෝ. 22:3) ඔබ ලබාගැනීමට තීරණය කළ ප්‍රතිකාර ක්‍රම පිළිබඳ ලිඛිත වාර්තාවක් ඔබ ළඟ තිබෙනවාද? රුධිර රහිත ප්‍රතිකාර ක්‍රම රෝගීන්ගේ සුවසෙත හා අයිතිවාසිකම් රැක දෙයි (Transfusion-Alternative Health Care—Meeting Patient Needs and Rights) නමැති DVD තැටියේ තිබෙන Transfusion-Alternatives—Documentary Series යන දෙවන කොටසෙහි ඇති තොරතුරු ඒ සඳහා ඔබට උපකාරවත් වෙයි. එය නරඹා පහත සඳහන් ප්‍රශ්නවලට පිළිතුරු සලකා බලන්න. මෙහි සැත්කම් කරන දර්ශන කිහිපයක් තිබෙන නිසා එය කුඩා දරුවන් සමඟ නැරඹීම සුදුසුද කියා දෙමාපියන් තීරණය කළ යුතුයි.
(1) වෛද්‍ය ක්ෂේත්‍රයේ සිටින සමහර අය රුධිර ප්‍රවේශන ලබා දීම ගැන ඔවුන් දරන ආකල්පය වෙනස් කරගෙන තිබෙන්නේ ඇයි? (2) රුධිර ප්‍රවේශනයකින් තොරව කර තිබෙන බරපතළ සැත්කම් තුනකට උදාහරණ දෙන්න. (3) රුධිර ප්‍රවේශනයකින් තොරව ප්‍රතිකාර කිරීමට ලොව පුරා දහස් ගණනක් වෛද්‍යවරුන් සිය කැමැත්ත පළ කර තිබෙන්නේ ඇයි? (4) රුධිරය භාවිත කිරීම ගැන මෑතකදී කරන ලද අධ්‍යයනවලින් හෙළි වී තිබෙන්නේ කුමක්ද? (5) රුධිර ප්‍රවේශනයේ තිබෙන අනතුරු මොනවාද? (6) රුධිර ප්‍රවේශනයක් වෙනුවට විකල්ප ක්‍රම යොදාගැනීමෙන් තිබෙන ප්‍රයෝජන ගැන බොහෝ වෛද්‍යවරුන් පවසන්නේ කුමක්ද? (7) රක්ත හීනතාවට (ලේ අඩුකමට) හේතු මොනවාද? ඒ සඳහා තිබෙන ප්‍රතිකාර මොනවාද? (8) රෝගියෙකුගේ සිරුරේ රතු රුධිරාණු නිෂ්පාදනය වැඩි කළ හැක්කේ කෙසේද? (9) සැත්කමකදී රුධිරය පිට වීම අඩු කරගැනීම සඳහා යොදාගන්නා ඇතැම් ක්‍රම මොනවාද? (10) විකල්ප ප්‍රතිකාර ක්‍රම කුඩා දරුවන්ට හා අසාධ්‍ය රෝගීන්ට ලබා දීම සාර්ථකද? (11) වෛද්‍යවරු සැලකිලිමත් විය යුත්තේ රෝගියාගේ කුමන අයිතිවාසිකම ගැනද?
එම DVD තැටියේ දුටු ඇතැම් ප්‍රතිකාර ක්‍රම පිළිගන්නවාද නැද්ද යන්න, බයිබල් ප්‍රතිපත්තිවලට එකඟව පුහුණු කර ඇති ඔබේ හෘදය සාක්ෂියට අනුව ඔබ ගන්නා තීරණයක්. ඒ නිසා ඔබ ලබාගන්නා හෝ නොගන්නා ප්‍රතිකාර මොනවාද කියා තීරණය කිරීම සඳහා හදිසි තත්වයක් පැනනඟින තුරු සිටින්න එපා. තීරණයක් ගැනීම සඳහා ඔබට උපකාරවත් වන තවත් තොරතුරු “දෙවිගේ ප්‍රේමය” නමැති පොතේ හත්වන පරිච්ඡේදයෙන් සහ 2006 නොවැම්බර් අපගේ රාජ්‍ය සේවාවේ අතිරේකයෙන් සොයාගත හැකියි. ඔබ බව්තීස්ම වූ කෙනෙකු නම් ස්ථාවර ඇටෝනි බලපත්‍රයේ (රුධිරය එපා කාඩ්පතේ) ඔබේ තීරණය සඳහන් කර එය නිතරම ඔබ ළඟ තබාගන්න.
[3වන පිටුවේ වාක්‍ය කණ්ඩය]
ඔබ ලබාගැනීමට තීරණය කළ ප්‍රතිකාර ක්‍රම පිළිබඳ ලිඛිත වාර්තාවක් ඔබ ළඟ තිබෙනවාද?