හොඳින් නිරීක්ෂණය කරන්න
1 යෙහෝවා දෙවි සහ යේසුස් ක්‍රිස්තුස් ජනයාගේ විශේෂ අවශ්‍යතා හඳුනාගෙන ඔවුන්ට අවශ්‍ය උපකාර දීමට මහත් කැමැත්තක් දැක්වුවා. (2 ලේක. 16:9; මාක් 6:34) අපත් අපට හමු වන අය උනන්දුව දක්වන දේවල් හඳුනාගෙන, ඔවුන්ට සරිලන ලෙස ශුභාරංචි පණිවුඩය සකස් කරගමු.
2 හැම දෙයක්ම හොඳින් බලන්න: යේසුස් නිතරම සෝදිසියෙන් සිටි කෙනෙක්. (මාක් 12:41-43; ලූක් 19:1-6) එලෙසම අපත් නිවසකට යන විට, ඒ නිවසේ තිබෙන ආගමික ලාංඡන, වාහනවල ස්ටිකර් හෝ මිදුලේ සෙල්ලම් බඩු දෙස හොඳින් බැලුවොත්, සාර්ථක ලෙස ශුභාරංචිය ඉදිරිපත් කිරීමට අවස්ථාවන් පාදාගැනීමට අපට හැකි වේවි.
3 පුද්ගලයෙකුගේ මුහුණේ ඉරියව්වෙන්, හැසිරීමෙන් ඔහුට හැඟෙන විදිහ ගැන යමක් අපට තේරුම්ගන්න පුළුවන්. (හිතෝ. 15:13) සමහරවිට ඔහුගේ පවුලේ කෙනෙක් මිය ගොස් ඇති. නැත්නම් කටුක අද්දැකීමක් නිසා ඔහුට සැනසීමක් අවශ්‍ය වෙලා ඇති. ගැළපෙන බයිබල් පද කිහිපයක් ඔහුට කියවීම ඉතා හොඳයි. (හිතෝ. 16:24) ගෙවැසියා ලහි ලහියේ ගෙයින් පිටතට යනවාද? නැත්නම් අඬන අත දරුවෙක් වඩාගෙන සිටිනවාද? එහෙමනම්, පසු වේලාවක යෑම හොඳයි. මෙසේ, ‘එකිනෙකා කෙරෙහි අනුකම්පාවත්’ සැලකිල්ලත් දක්වන්නේ නම් යළි දිනක හමු වන විට මොහු හොඳින් සවන් දේවි.—1 පේතෘ. 3:8.
4 තැනට ගැළපෙන ලෙස කතා කිරීම: ඇතන්ස් නුවර “නාඳුනන දෙවි කෙනෙකුට” කැප කරන ලද පූජාසනයක් පාවුල් දුටුවා. මෙය දුටු ඔහු ශුභාරංචිය ඉදිරිපත් කළ විදිහ වෙනස් කළා. ඔහු කීවේ මෙයයි. “මා ඔබට ප්‍රකාශ කරන්නේ, ඔබ නොදන්නාකමින් භක්තිය පිරිනමන ඒ දේ ගැනය.” පාවුල් මේ විදිහට අනුන්ගේ සිත් නොරිදවා කතා කළ නිසා, එතැන සිටි සමහරෙක් පණිවුඩය අසා පසුව ඇදහිලිවන්තයන් වුණා.—ක්‍රියා 17:23, 34.
5 මේ විදිහට, අප පුද්ගලයන් ගැන හොඳින් නිරීක්ෂණය කරනවා නම්, එක් එක් පුද්ගලයා කැමති අකමැති දේවල් වටහාගෙන ඒ අනුව කතා කිරීමට අපට හැකි වේවි. සිත්වල තිබෙන දේවල් දැනගැනීමට ප්‍රශ්න අසන්න. උනන්දුව වැඩි කිරීම සඳහා ගැළපෙන බයිබල් පදයක් පෙන්වන්න. (හිතෝ. 20:5) හොඳින් දේවල් ගැන නිරීක්ෂණය කරමින් අනුන් ගැන අවංකවම උනන්දු වෙනවා නම්, ශුභාරංචිය දක්ෂ ලෙස ඉදිරිපත් කිරීමට අපට හැකි වෙනවා නොඅනුමානයි.