“යේසුස්ව ආදර්ශයට ගනිමු” යන තේමාවෙන් යුත් දිස්ත්‍රික් සමුළුව ලොව වටා
ප්‍රචාරය කිරීමේ ව්‍යාපෘතිය විශේෂ අත් පත්‍රිකාවක් නැවතත් බෙදා දීමට සියලුම ප්‍රචාරකයන්ට ප්‍රස්තාවක් උදා වෙනවා
1 පසු ගිය වසරේ පැවති “ගැලවීම අත ළඟයි!” දිස්ත්‍රික් සමුළුව ලොව පුරා ප්‍රචාරය කිරීමට ගත් වෑයම සත්‍යය කෙරෙහි උනන්දුවක් දක්වන අය කෙරෙහි මහත් බලපෑමක් ඇති කළා. මෙම ඇරයුම පිළිගෙන යෙහෝවා දෙවිගේ සාක්ෂිකරුවන්ගේ සමුළුවකට පළමුවෙනි වතාවට සහභාගී වූ අය දෙවිගෙන් ලැබූ උපදෙස්වලින් මහත් ප්‍රබෝධයක් ලැබුවා. (යෙසා. 65:13) මේ නවකයන් එක්සත් ප්‍රේමණීය සහෝදරයන්ගේ ආශ්‍රයෙන් මහත් ප්‍රීතියක් ලැබුවාට සැකයක් නැහැ. (ගීතා. 133:1) “යේසුස්ව ආදර්ශයට ගනිමු” යන තේමාවෙන් යුත් දිස්ත්‍රික් සමුළුවෙන් වැඩි දෙනෙකුට ප්‍රයෝජන ගැනීම සඳහා නැවතත් අපි අත් පත්‍රිකාවක් බෙදා හරින්න සුදානම් වෙනවා.
2 පසු ගිය වසරේ ලැබූ සාර්ථකත්වය: ලෝකයේ නන් දෙසින් ලැබුණු වාර්තාවලට අනුව “ගැලවීම අත ළඟයි” යන සමුළුව ප්‍රචාරය කිරීමෙන් මහත් සාර්ථකත්වයක් ලබා තිබෙනවා. ශ්‍රී ලංකාවේ පැවැත්වූ එම සමුළුවට 6,931දෙනෙක් පැමිණියා. මෙය ලංකාවේ සාක්ෂිකරුවන් පැවැත්වූ සමුළුවකට පැමිණි වැඩිම පිරිසයි. එක් පුද්ගලයෙක් ශාඛා කාර්යාලයට මෙසේ ලිව්වා. “මම ‘ගැලවීම අත ළඟයි’ නම් යෙහෝවාගේ සාක්ෂිකරුවන්ගේ සමුළුවට එන්න බලාපොරොත්තු වෙනවා. මේ සමුළුව පවත්වන ස්ථානය මට දන්වන්න.” වෙනත් රටක සමුළු අත් පත්‍රිකාව බෙදාහැරීම ගැන එක් පුවත් පතක මෙසේ සඳහන් වුණා. “සමුළුවට කලින් හැම කෙනෙකුටම මෙම අත් පත්‍රිකාව ලබා දීම සඳහා සාක්ෂිකරුවන් විශේෂ වෑයමක් දරනවා. ඔවුන් වැඩිපුර වේලාවක් මේ සඳහා වැය කරනවා. බොහෝ දුර ඇවිදිනවා. ඒ වගේම වැඩි දෙනෙකුට පණිවිඩය බෙදා දීම සඳහා එය පවසන්නේ කෙටියෙන්.” වෙනත් නගරයක මෙම පත්‍රිකාව බෙදා දීමේ කාර්යය සම්බන්ධයෙන් මාධ්‍යය මගින් විස්තරාත්මක ලෙස වාර්තා කරනු ලැබුවා. අඩුම තරමින් ප්‍රවෘත්ති පත්‍ර තුනක් සමුළුවට පෙර අප කරන මේ ව්‍යාපෘතිය ගැන ප්‍රශංසා කළා. එක් වාර්තාකරුවෙක් පිටු දෙකක පමණ දීර්ඝ ලිපියක් ඉරිදා පුවත් පතක පළ කළා. එහි අපේ විශ්වාසයන්, සහෝදරත්වය, අත් පත්‍රිකාව බෙදා දීම හා සමුළුව ගැන විස්තර සඳහන් වුණා. එක් ප්‍රචාරකයෙක් කාන්තාවකට අත් පත්‍රිකාව දී ආරාධනා කළ විට ඇය මෙසේ පැවසුවා. “මම මේ ගැන දැන් පත්තරෙන් කියෙව්වා.” තවත් කාන්තාවක් මෙසේ පැවසුවා. “මම මේ දැන් ඔයගොල්ලන් ගැන පත්තරේ කියෙව්වා විතරයි ඔයාලා මෙතන. මේ මගේ ආරාධනා පත්‍රිකාවද? ඇත්තටම යෙහෝවා දෙවිගේ සාක්ෂිකරුවන් මේ කරන දේ හරිම හොඳයි.”
3 සමහර රටවල බොහෝ නවකයන් අත් පත්‍රිකාව අතැතිව සමුළු භූමියට ඇතුල් වෙනවා දකින්න ලැබුණා. සමහර අය සමුළුවට සහභාගී වීම සඳහා බොහෝ දුර ඈත සිට පැමිණියා. අපි උද්‍යෝගයෙන් මෙම පත්‍රිකාව බෙදා හැරීම නිසා සමුළුවට පැමිණෙන සංඛ්‍යාව වැඩි වී තිබෙනවා. එක් රටකින් වාර්තා වන පරිදි ඊට කලින් වසරට වඩා සියයට 27ක වැඩි වීමක් අද්දැක තිබෙනවා.
4 බලප්‍රදේශය ආවරණය කරන්න: සමුළුව පටන් ගැනීමට සති තුනකට පෙර අත් පත්‍රිකාව බෙදා දීම ආරම්හ කරන්න. ඔබේ සභාවට අයත් මුළු බලප්‍රදේශය පුරාම මෙම පත්‍රිකාව බෙදා දීමට උපරිමය කළ යුතුයි. මෙම ආරාධනා පත්‍රය ජනයා නැති නිවෙස්වල තබා එන්න එපා. යම් කෙනෙකුට කතා කරද්දී ඒ කෙනා හොඳ ප්‍රතිචාරයක් දක්වන බවක් පේනවා නම් එවැනි අයට මේ පත්‍රිකාව ලබා දෙන්න. සභාවට ලැබී තිබෙන සියලුම පත්‍රිකා තම බලප්‍රදේශයේ හැකි පමණ බෙදා දිය යුතුයි. වැඩිපුර තිබෙන පත්‍රිකා සභාවේ පුරෝගාමීන්ට බෙදා දිය හැකියි.
5 පැවසිය යුත්තේ කුමක්ද?: ඔබට මෙවැනි දෙයක් කිව හැකියි: “අපි මේ පත්‍රිකාව බෙදා හරින්නේ ළඟදී පැවැත්වෙන සමුළුවක් ගැන දැනුම් දෙන්නයි. මේ විදියට මුළු ලෝකයේම කරනවා. මේ ඔබේ ආරාධනා පත්‍රය. වැඩි විස්තර ඔබට මේ පත්‍රිකාවෙන් දැන ගන්න පුළුවන්.” කෙටියෙන් යමක් පැවසීම විශාල බලප්‍රදේශයක් ආවරණය කිරීමට අවස්ථාව ලබා දෙයි. ඒත් යම් හෙයකින් ගෙහිමියා යම් ප්‍රශ්නවලට පිළිතුරු ලබා ගැනීමට කැමති නම් ඒ සඳහා කාලය ගන්න. උනන්දුවක් දක්වන අය මුණ ගැසුණොත් ඔවුන් ගැන විස්තර සටහන් කර ගෙන හැකි විගස නැවත ගොස් හමු වන්න.
6 යේසුස්ව ආදර්ශයට ගැනීමට වෙර දැරීම කොතරම් වැදගත්ද! (යොහන් 3:36) ඉදිරියේදී පැමිණෙන දිස්ත්‍රික් සමුළුවෙන් අපි හැමෝටම යේසුස්ව ආදර්ශයට ගැනීම සඳහා උපකාර ලැබෙයි. “යේසුස්ව ආදර්ශයට ගනිමු” යන මාතෘකාවෙන් යුත් සමුළුවට අපි දෙන ප්‍රචාරය මගින් නැවතත් සියලු ජනයාට ලොකු සාක්ෂියක් ලැබෙනවාට සැකයක් නැහැ. ඒ නිසා හැකි පමණ දෙනාට මේ සමුළුවට සහභාගී වීමට ආරාධනා කරන්න. ලොව පුරාම කරන මෙම කාර්යයේ යෙදීමට ඔබ ගන්නා උත්සහයට යෙහෝවා දෙවිගේ ආශිර්වාද ඔබට ලැබේවා!