Paridza Nenzwisiso
1 Kuva nenzwisiso kunoda kuti tinzwisise chimwe chinhu pamusoro pevanhu avo tinoparidza kwavari. Nei? Nemhaka yokuti kubudirira kwedu mukusvika mwoyo yavanhu kunotsamira pamano edu okupa shoko roUmambo nomutoo unofadza kwavari. Mukati momwedzi waJanuary, tichava tichigovera mhatsa dzemabhuku efundo yeBhaibheri ayo ungano ingava nawo. Kana kusina kudaro, vaparidzi vachashandisa bhuku raRugare Rwechokwadi Nokuchengeteka—Ungaruwana Sei? Zvikarakadzo zvinotevera zvingava zvinoshanda.
2 Kana ukasarudza kugovera bhuku ra“Rugare Rwechokwadi Nokuchengeteka—Ungaruwana Sei?” ungagona kunongedzera kumufananidzo uri papeji 4 ndokuti:
◼ “Uyu mufananidzo mufananidzo womunyori wemifananidzo weicho Bhaibheri rinodzidzisa pamusoro pechinangwa chaMwari chapasi. Chii chamunofunga kuti kwaizoda kuti imi nemhuri yenyu murarame muparadhiso yapasi? [Bvumira mhinduro.] Bhaibheri rinoratidza kuti rugare rwechokwadi nokuchengeteka zvichakurumidza kuva chaizvoizvo pasi pose uye kuti Paradhiso ichadzorerwa. [Rava Pisarema 37:10, 11.] Iri bhuku rinogona kukuratidzai chamunofanira kuita kuti mubetserwe neizvo Mwari achaita. Ndingada kukusiyirayi iyi kopi.” Kana pane kudavidza kwakanaka, ungatsanangura nokupfupikisa gadziriro yomupiro.
3 Kana ukaratidzira bhuku ra“Chengeteko Yenyika Yose Mukudzora kwo‘Muchinda woRugare,’” ungataura chimwe chinhu chakafanana neichi:
◼ “Mamiriyoni avanhu kupote nyika vanoshuva mufarwa, uyo unoratidzika kuva unovanzvenga pasinei hapo nenhamburiko dzavo dzose dzokuuwana. Vakawanda vanoona upenyu senhauwo zvayo yokurarama makore mapfupi mashomanene, kurera vana, uye kukarira zvakanakisisa rufu rwusati rwavasvikira.” Ipapo goverana mimwe yemifungo iri mundima 5 ne6 dziri papeji 172, rava Isaya 11:6-9 uye ratidza nokupfupikisa kuti chinangwa chaMwari ndechokusika nyika itsva, paradhiso yakadai seiyo inoratidzirwa papeji 172. Wana tsinhiro dzasaimba kupfurikidza nokubvunza mubvunzo wakadai sokuti: “Munonzwa sei pamusoro pekariro iyoyo?” Bvumira mhinduro, uye kana pane fariro, govera bhuku racho.
4 Kana kuti, uchishandisa bhuku rimwe chetero, ungagona kuvamba nenhau yazvino uno pamusoro pechinetso chenzanga chisina kupedzwa uye ipapo kubvunza, kuti:
◼ “Munofunga kuti vatungamiriri venyika pane rimwe zuva vachakwanisa kupedza ichi chinetso here? [Bvumira uye onga mhinduro yasaimba.] Tose zvedu tingaonga kurarama munyika umo urwu rudzi rwechinetso rwusingavipo. Ikoku kuchava chaikwoikwo mukutonga kwehurumende yaMwari yatinonyengeterera.” Rava Isaya 32:17, 18 kuratidza kuti rugare nokuchengeteka pakupedzisira zvichawanwa. Uyewo rava tsinhiro dzesumo pasi pomusoro uri papeji 2, uye tsanangura kuti bhuku racho rinogovera chibvumikiso chapaMagwaro chokuti icho Mwari anopikira nokuda kwapasi chichava chechokwadi mune ramangwana riri pedyo. Kana munhu wacho achionga mashoko acho, govera bhuku racho.
5 Kana ungada kuita mharidzo pfupi uchishandisa bhuku ra“Kupukunyuka Ndokupinda muPasi Idzva,” ungagona kuvhura bhuku racho papeji 4 ndokubvunza, kuti:
◼ “Chii chichaitika kuPasi? Vakawanda vanoshamisika pamusoro paikoku. Munofunga kuti richazombova paradhiso here?” Onga mhinduro yasaimba, uye ipapo rava kutaura kwokutanga kuri papeji 2. Govera bhuku racho.
6 Kunzwisisa kwakanaka kuchatigonesa kuziva zvinodikanwa uye fariro dzavanhu vatinosangana navo.—Zvir. 16:23.