‘Nkaana kɛko angokfundɔ’!

1. Wopo wɔkɔnge ilɛngɛ imɔtshi y’ipame ndɛnyɛ nkongi djeyalaki lande tá ekfundwelo?

YANA y’ipame imɔtshi yɛ yetaka Matthew ayalaka l’olando w’ekekete wɔlɔmbaki ngo ndowata mpaso efula. Lofu lɔmɔtshi, winá wɔ ndayalaka l’ɛnɔnyi esambele, nde nya nkfumbo kɛnde walendaki emisiɔ wɛ JW televiziɔ weposaká ngɔndɔ inkfumɔ. Tá ekomo kɛ nonghanyi kɛsɔ, iwɔ wekameyɛka yeembo yetepelaki wopo wɔ songolongola anto waso wa ngandji winá wɔ yongokfundɔ.b M’ɔkɔngɔ w’iwɔ nshiyɛ ndenda nonghanyi kɛsɔ, Matthew asɛmɛlaka te ambotshi wande, akotaka l’ɛwɔ, ko ashimelaka ante: “Papa, mama, ape nyomboka, ntsha lambovɔ, langokfundɔ lá ekfundwelo. Nyo nkoka nkonga lemi; akambo wangoheta ngo wɔlɔ.” Okoka nkanela wopo wɔ ambotshi wasɔ iyayale ladjɛ ndjoka winá wɔ yasipisoyɛ ambɔ wɔnawɔ alekɔ la nkongi djɛ wolo efula tá ekfundwelo?

2-3. Ladjikɛnge oyɛwɔ nkambo djɛ wɔlɔ ntɔnɔlaka lá daka dj’ekfundwelo?

² Angoyalaka wɔlɔ iso ntɔnɔlaka mbala la mbala tá daka djɛ Bible djɛ l’etsho weyaye djelendana l’ekfundwelo. (Dj. 5:28, 29) Lamo? Ladjikɛnde topewe kaanga ndambo daambi winá w’okokaso mpomana kaanga l’olando wɔ wolo kana la nyɔyi k’isasimoyɛ k’onto wɔso wɔ ngandji. (Los. 9:11; Dj. 4:13, 14) Nkongi djɛso dj’ekfundwelo nkoka ntokotshɛ́ djɛ nkfulumeyɛ ekakasano wɛ nghɔsɔ. (1 Te. 4:13) Afunelo ntoshikikɛka ente Papa kɛso kel’olongo ntolembetelaka wɔlɔ edjinge ntɔkɔpaka efula. (Luka 12:7) Kokanela tii lá lɛdji lɔkɔnge lɔ Yehova otolembetelande djɛ ndokalɔ ntotonga lonkina ngo la lonto lɔso edjinge la tokanyi tɔso toyalaki laso ntondo. Ɔsɔngo efula kɛ ngandji kɛ Yehova otokande djɛ ntɔpɛyɛ mbamba k’iso mbika lotshinda lotshinda edjinge kaanga ntokfundola ntsha alɔmbama!

³ Lá djamba djɛnɛ, tongoshishima donga djetotshinda djɛ ndjala la djawo tá daka dj’ekfudwelo. Masɔ, tongoshishima ɔkɔndɔ wemá Bible wokembɛ djawo w’otanaso etepela wɛ vɛrse dj’ɔsamisa ɔtɛ wɔso wɔ djamba djɛnɛ: ‘Nkaana kɛko angokfundɔ.’ (Dj. 11:23) L’ekomo, tɔngɛna wopo w’okokaso nangha djɛ nkongi dj’ekfundwelo ndeka ndjala nsɔsɔlɔ leso.

DONGA DJETOTSHINDA DJƐ NDJALA LA DJAWO TÁ DAKA DJ’EKFUNDWELO

4. Djɛ ndjala la djawo tá daka mɔtshi, eshikikelo kɛkɔnge k’oyɛso ladjɛ ndjala la kɛkɔ? Pɛyɛ ndjɔmbɔmba.

⁴ Djɛ ndjala la djawo ente daka ngokotshama, iso ladjɛ ndjala l’eshikikelo ente kanga lolakisa daka djɛkɔ alekɔ la mposɛ edjinge la nkfulu kana l’akoka wa nkotshɛ daka djɛkɔ. Ndjɔmbɔmba: Kɔsa djɛ lompopo lɔ wolo lombotshita mvulu kɛko lá lɛdji lɔ nyɛtshi efula. Ko ilongo yɛko imɔtshi amboyɛ edjinge ambokolaka ante: ‘Langɔkɔwɔngɛyɛ mvulu kɛko.’ Okoshimelande nde nsɔsɔlɔ, edjinge olekɔ l’eshikikelo ente nde alekɔ la mposɛ kɛ nkokotshɛ́. Ntsha wɛ ndjewaka ente nde angewake mpika amvulu wɔlɔ la alekɔ la mpeko nkfumɔ djɛlɔmbamá, mbɔ olekɔ lonkina l’eshikikelo ente nde alekɔ l’akoka wa nkokotshɛ́. Lasɔ ongoyala la djawo tá daka djɛnde. Iya koko, otepelaso mo lá nkambo djɛ daka djɛ Ndjambe djelendana l’ekfundwelo? Nde alekɔ nsɔsɔlɔ la mposɛ edjinge l’akoka wa nkotshɛ daka djɛsɔ?

5-6. Ladjikɛnge okokaso ndjala l’eshikikelo ente Yehova nkɔpaka nkfundola anto wambovɔ́?

⁵ Yehova alekɔ la mposɛ kɛ nkfundola waambovɔ? Ape l’ehamo, nde alekɔ la mposɛ. Nde atshindaka afunyi efula wa Bible dj’iwɔ mfuna daka djɛnde djelendana l’ekfundwelo kel’etsho weyaye. (Iza. 26:19; Oze. 13:14; Ndj. 20:11-13) Koko ntsha Yehova ambolaka daka, nde angokotshɛke winá enkfumɔ. (Yos. 23:14) Lá nsɔsɔlɔ, Yehova alekɔ la mposɛ kɛ nkawoyɛ anto wambovɔ́ lá lowiko. Ladjikɛnge okokaso ntepela nghɔsɔ?

⁶ Tokolenda etepela wɛ owandji wɔ nkfumbo Djɔbɔ. Nde ayalaki l’eshikikelo ante ntsha kaanga ambovɔ, Yehova angoyala la mposɛ kɛ ndɔwɛna la lowiko lonkina. (Djɔ. 14:14, 15, nɔtɛ.) Mposɛ kɛ nghɔsɔ ndeke lolekɔ la Yehova te enkambi wɛnde enkfumɔ wembovɔ́. Nde alekɔ la mposɛ kɛ nde ndaakfundola dj’iwɔ nkalɔ ndowika l’alemba wa wɔlɔ edjinge l’osasa. Iya otepelaso mo lá nkambo djɛ miliyara y’anto wavwisá koko watawá mbamba kɛ ndjeka akambo walendana la Yehova? Ndjambe kɛso kɛ ngandji nkɔpaka ndaakfundola edjinge iwɔ. (Ele. 24:15) Nde nkɔpaka ndaapɛyɛ mbamba k’iwɔ nkoma tolongo tɔnde edjinge mbika lotshinda lotshinda lanɛ lá looko. (Dj. 3:16) Nyɛnamaka papoo ente, Yehova alekɔ la mposɛ kɛ nkfundola anto wambovɔ́.

7-8. Ladjikɛnge okokaso ndjala l’eshikikelo ente Yehova alekɔ la nkfulu kɛ nkfundola waambovɔ́?

⁷ Yehova alekɔ lonkina edjinge la nkfulu kɛ nkfundola anto wambovɔ́? Ape l’ehamo! Nde alekɔ ‘Kanga-Nkfulu-Inkfumɔ.’ (Ndj. 1:8) Nde alekɔ la nkfulu kɛ ndongela atonyi ankfumɔ, ayale kaanga nyɔyi. (1 Kɔ. 15:26) Iso mbaka lokembo má ndjewa nghɔsɔ. Tokolenda ndjɔmbɔmba kɛ nkaana Emma Arnold. Lá Mbandji k’ape kel’andja w’otondo, nde nya nkfumbo kɛnde wapomanaka l’ekakasano wɛ wolo efula wilisá djawo djɛwɔ l’ohemba. Djɛ nkembe wɔnande m’ɔtɛ wɔ nyɔyi k’anto wawɔ wa ngandji wavwisá lá lokando lelá Nazi, Emma atepelaka ante: “Otayalawɔ nde anto wavɔ́ wapangowika lonkina, ntshimi ontonyi wɔso nyɔyi aleka Ndjambe wolo. Koko nkambo djɛsɔ mpalekɔ nsɔsɔlɔ!” Lá nsɔsɔlɔ, lako kaanga ekete keleka Yehova wolo! Ndjambe Kanga-Nkfulu-Inkfumɔ, kanga lotongisá lowiko alekɔ l’akoka wa nkawoyɛ anto wambovɔ́ lá lowiko.

⁸ Elonga kenkina k’otepelaso ente Ndjambe alekɔ l’akoka wa nkfundola wanɛ wambovɔ́ nde, nde alekɔ la wɔɔngɔ wopavungɛ nkambo. Nde ndjetaka yɔɔtɔ la yɔɔtɔ lá djiina djɛnde. (Iza. 40:26) Lonkina, nde mvungɔka anto wambovɔ́. (Djɔ. 14:13; Luka 20:37, 38) Nde nkoka mvungɔ ipa l’okakasano, akambo ankfumɔ walendana la wanɛ wandongokfundola, ndjila edjinge ɛnamelo kɛwɔ la nanghedji djɛwɔ, akambo wapomanisá lawɔ lá mbiko yɛwɔ, l’akambo w’iyavungɔka.

9. Ladjikɛnge oyɛ la djawo tá daka djɛ Yehova djel’etsho weyaye djelendana l’ekfundwelo?

⁹ Nyɛnamaka papoo ente, iso nkoka ndjala la djawo tá daka djɛ Yehova djɛ l’etsho weyaye djɛ nkfundola anto, ladjikɛnde nde alekɔ la mposɛ edjinge la nkfulu kɛ nkotshɛ daka djɛkɔ. Kolenda elonga kenkina ketotshinda djɛ ndjala la djawo tá daka djɛ Ndjambe dj’ekfundwelo: Yehova amboshiyɛka nkfundola anto l’etsho wemboheta. L’etsho wefunamaki Bible, nde apɛyɛka ampame imɔtshi, ndjila edjinge Yeso, nkfulu kɛ nkfundola waambovɔ́. Nyontshɔ toshishime ɔkɔndɔ ɔmɔtshi wɔ ekfundwelo kɛmɔtshi kɛ Yeso ndananghe k’ɔkɔndɔlawɔ lá Djɔanɛ shapitrɛ 11.

YESO AMBOVUSƐ ILONGO YƐNDE IMƆTSHI YƐ NGANDJI

10. Kɛkɔnge kenanghemisá lá Betani winá wɔ Yeso ndapoposanyɛka lá wedji w’ɔkɛdji wɔ Jɔrdanɛ, ko ndananghaka nge? (Djɔanɛ 11:1-3)

¹⁰ Wala Djɔanɛ 11:1-3. Kokanela nkambo dj’ehetisá lá Betani t’ekomo k’ɔnɔnyi 32 D.D. Yeso ayalaki la tolongo tɔ ngandji efula l’iwawandja yɛsɔ, Lazaro l’ankaana yɛnde ipe Mariya la Mata. (Luka 10:38-42) Koko Lazaro akfɔka olando, edjinge ankaana yɛnde ipe wayakiyanyɛka efula. Iwɔ watomelaka Yeso djoyi, koko lá mbamba kɛsɔ Yeso ayaláki l’onkonko onkina wɔ Jɔrdanɛ, iwawandja yɛ yananghaka etsho epe wɛ lɔkɛndɔ djɛ nkoma lá Betani. (Dj. 10:40) Yɛnyi nde, Lazaro avɔka winá wɔ anto w’awɛmbisá losango watakome le Yeso. Kaanga Yeso ndewe ante ilongo yɛnde ambovɔ, nde atshikalaka lonkina etsho epe l’edjena kɛ ndayalaka ko masɔ atshɔka tá Betani. Djɛkondeke winá wɔ Yeso ndookomaka, ko Lazaro amboshiyɛ mvɔ l’ilá k’etsho ɛnɛyi. Yeso anghonangha nkambo mɔtshi djengoyalá lá waapɔ wɔ tolongo tɔnde la djengolumɛ Ndjambe.—Dj. 11:4, 6, 11, 17.

11. Olakanyelo wɔkɔnge w’okokaso mba m’ɔkɔndɔ wɔnɛ lá nkambo djelendana la lotombe?

¹¹ Iso mbaka olakanyelo ɔmɔtshi lá kɛnɛ kelendana la lotombe má ɔkɔndɔ wɔnɛ. Kolenda: Winá wɔ Mariya nya Mata yatome djoyi te Yeso, iwɔ watɔlɔmbá djɛ nde ndjɛ lá Betani. Iyoshimela ngo ambɔ ilongo yɛnde yɛ ngandji alekɔ l’olando. (Dj. 11:3) Winá wɔ Lazaro ndavu, Yeso akokaka ndookfundola kaanga m’otale. Koko Yeso asɔnaka djɛ ntshɔ tá Betani djɛ ntɛnana la tolongo tɔnde Mariya nya Mata. Ongoyalake l’ilongo yekokotshɛ́ká ipa wɛ dɔɔlɔmba okotshɔ? Masɔ wɛ ndjewaka ente wɛ nkoka ndawɛkɛ tende lá ‘deko djɛ ndjolo.’ (Woo. 17:17) Ngo ngete Yeso, nyontshɔ toyale wopo wɔ tolongo tɔ nghɔsɔ te anto ankina! Winá wɔsɔ nyontshɔ tokalɔke l’ɔkɔndɔ wɔsɔ ndeke tolende kɛnɛ kehetisá m’ɔkɔngɔ.

12. Kɛkɔnge kɛ Yeso ndalake Mata, ko ladjikɛnge ndakoke ndjala la djawo tá daka djɛkɔ? (Djɔanɛ 11:23-26)

¹² Wala Djɔanɛ 11:23-26. Mata amboka ante Yeso ambokoma entshupa lá Betani. Ndombotshɔ́ mbala kɛkɔ kɛmɔ ntoopomanyɛ ko ndomboshimela ante: ‘Nkfumi, otayalawɔ nde oyalaka lanɛ, ntshimi nkaana kɛmi atasamba mvɔ.’ (Dj. 11:21) Ngo nsɔsɔlɔ, nde atakoka nkɔnɔla Lazaro. Koko Yeso akanelaki nangha nkambo mɔtshi djengokamoyɛ anto efula. Nde alakaka ante: ‘Nkaana kɛko angokfundɔ.’ Nde apɛyɛka Mata elonga kenkina kɛ ndjala la djawo ta daka djɛnde ante: ‘Ndekɔ ekfundwelo edjinge lowiko.’ Ee, Ndjambe ɔpɛyɛka nkfulu lá djiko djɛ lowiko edjinge nyɔyi. Ntondo, nde akfundolaka wɔna w’omoto ɔmɔtshi ngo ndambo m’ɔkɔngɔ wɔ nyɔyi kɛnde edjinge ankfundolaka lonkina olangala ɔmɔtshi, mbala imɔtshi ngo lofu lɔkɔ lɔ ndavu. (Luka 7:11-15; 8:49-55) Iya nde angokfundola onto wombovɔ́ l’ilá k’etsho ɛnɛyi edjinge demba djɛnde mbotateyɛ mpɔnda?

‘LAZARO, POSA!’

13. Lá nkilika Djɔanɛ 11:32-35, Yeso ndananghe nge winá wɔ ndɛnyi Mariya nya anto ankina walela? (Lenda lonkina ntshango.)

¹³ Wala Djɔanɛ 11:32-35. Kokanela kɛnɛ kehetisá m’ɔkɔngɔ. Mariya, nkaana kenkina kɛ Lazaro, ambotshɔ edjinge nde ntopomanyɛ Yeso. Ambokalɔ mpetola ngo etepela wɛ mama kɛnde ante: ‘Nkfumi, otayalawɔ nde olekɔ lanɛ, ntshimi nkaana kɛmi atasamba mvɔ.’ Nde nya anto wayalaki lande wayalaka la yɛnyi y’efula. Má nyɛna la ndjoka wopo w’iyalelaka, Yeso okaka yɛnyi y’efula. Nde alelaka m’ɔtɛ wɔ nkɛtshi k’efula kɛ ndokaka tolongo tɔnde. Nde okaka yɛnyi yeyalaká winá w’ovusɛwɔ onto wɔ ngandji. Nsɔsɔlɔ, nde ayalaka la mposɛ kɛ nyimɛ nkambo dj’aledjɛki!

14. Olakanyelo wɔkɔnge w’okokaso mba lá nkambo djɛ Yehova má kɛnɛ kɛ Yeso ndananghe winá wɔ ndɛnyi Mariya alela?

¹⁴ Kɛnɛ kɛ Yeso ndananghe winá wɔ ndɛnyi Mariya alela ntolakanyɛka ente Yehova alekɔ Ndjambe kelekɔ́ la nkɛtshi k’efula. Ladjikɛnge okokaso ntepela nghɔsɔ? Etengo isɛnyi lá djamba djemboheta, Yeso ayawokaki edjinge akanelaki ngo ngete Papa kɛnde lá lɛdji lɔ djɔ. (Dj. 12:45) Djɛkondeke winá w’owalaso ente Yeso alelaka m’ɔtɛ wɔ nkɛtshi k’efula kɛ ndokaka tolongo tɔnde toyalaki la yɛnyi, tokoka ntepela ente edjinge Yehova angoyalake la yɛnyi efula winá w’ɛnande alelo waso. (Yee. 56:8) Nkambo djɛsɔ mpakotshinde djɛ wɛ ndeka ndasukanyɛ la Ndjambe kɛso kɛ nkɛtshi k’efula?

15. Etengo ɔkɔndɔlawɔ lá Djɔanɛ 11:41-44, kɛkɔnge kehetisá lá nketa kɛ Lazaro? (Lenda lonkina ntshango.)

¹⁵ Wala Djɔanɛ 11:41-44. Yeso ambokoma lá nketa kɛ Lazaro ko ambashimela dj’iwɔ nyimɛ ve djedjipaki nketa. Mata ndomboshimela ante odjo wombokoka ntshinda nsolo. Yeso ndombokawoyɛ ante: ‘Ntakoshimela ente ntsha omboyala la djawo ɔngɛna lomo lɔ Ndjambe?’ (Dj. 11:39, 40) Masɔ Yeso awadjɛka wiso t’olongo ko alɔmbaka lá ntondo k’anto ankfumɔ. Nde akɔpaka mpɛyɛ Yehova lomo lonkfumɔ má kɛnɛ kɛ ndakɔpɛ nangha. Masɔ Yeso ndombowelela la djoyi djɛ wolo ante: ‘Lazaro, posa!’ Ko Lazaro aposaka má nketa alakɛndɛ! Yeso ananghaka nkambo dj’anto efula yakanelaka ambɔ mpakoke nanghema.—Lenda nɔtɛ kɛ wekelo kɛ Djɔanɛ 11:17 lá Falase.

16. Wopo wɔkɔnge ɔkɔndɔ w’otanaso lá Djɔanɛ shapitrɛ 11 okembɛwɔ djawo djɛso tá nkongi dj’ekfundwelo?

¹⁶ Ɔkɔndɔ w’otanasó lá Djɔanɛ shapitrɛ 11 nkembɛka djawo djɛso tá nkongi dj’ekfundwelo. Lá wopo wɔkɔnge? Kovungɔ daka djɛ Yeso ndalake Mata: ‘Nkaana kɛko angokfundɔ.’ (Dj. 11:23) Ngo ngete Papa kɛnde, Yeso ayalaka la mposɛ edjinge la nkfulu kɛ nkotshɛ daka djɛsɔ. Delo djɛnde dj’ɛnyɛka ente nde alekɔ la mposɛ k’efula kɛ nkomɛ nyɔyi edjinge yɛnyi yeyɛka má nyɔyi. Edjinge winá wɔ Lazaro ndapose má nketa alakɛndɛ, Yeso ɛnyɛka lonkina ante alekɔ la nkfulu kɛ nkfundola anto wambovɔ́. Lonkina, kokanela kɛnɛ kɛ Yeso ndavungola Mata: ‘Ntakoshimelá ente ntsha wɛ ndjala la djawo ɔngɛna lomo lɔ Ndjambe?’ (Dj. 11:40) Tolekɔ la donga djɛ wɔlɔ djɛ ndjawola ente daka djɛ Ndjambe djelendana l’ekfundwelo ngokotshama nsɔsɔlɔ. Iya kɛkɔnge k’okokaso nangha djɛ nkongi dj’ekfundwelo ndeka ndjala nkambo djɛ nsɔsɔlɔ leso?

KƐNƐ K’OKOKASO NANGHA DJƐ NKONGI DJ’EKFUNDWELO NDEKA NDJALA NSƆSƆLƆ LESO

17. Kɛkɔnge k’oyɛso ladjɛ mvungɔka winá w’owalaso ɛkɔndɔ welá Bible welenda l’ekfundwelo?

¹⁷ Walaka la tɔnɔlaka lá nkfundwelo djenanghemisá l’etsho wɛ ntondo. Bible ntepelaka ekfundwelo k’anto enanɛyi wakfundwisá djɛ ndoyala la lowiko lanɛ lá looko.c Ladjikɛnge ngɔpɔshi winá djɛ ndjeka ɛkɔndɔ wɛsɔ la nkɔmɛ nkfumɔ? Winá wɔ ngotananghe nkambo djɛsɔ, ongovungɔke ente iyayale nde anto wa nsɔsɔlɔ, ampame, amato, la dɛngɛ. Hona elakanyelo wokokɛ mba m’eteyi. Tɔnɔlá lá wopo wɔ ɔkɔndɔ ɔmɔ ɔmɔ ɛnyɛwɔ mposɛ la nkfulu kelekɔ́ la Ndjambe kɛ nkfundola anto tá lowiko. Nkambo deka nde, tɔnɔlaka lá ekfundwelo keleká djonyi, ntepela ente ekfundwelo kɛ Yeso. Vungɔ ente anto ndekana nkama itano wɛnaka ekfundwelo kɛ Yeso edjinge nkambo djɛsɔ ntɔpɛyɛ elonga kɛ wɔlɔ kɛ ndjala la djawo.—1 Kɔ. 15:3-6, 20-22.

18. Wopo wɔkɔnge w’okokɛ nkamba la teembo tɔsɔ totepela nkambo djɛ nkongi dj’ekfundwelo lá yopo yɛ wɔlɔ? (Lenda edjinge nɔtɛ.)

¹⁸ Ekameyɛka la tshumbaka ‘teembo telá nyuma’ totepela nkambo djɛ nkongi dj’ekfundwelo.d (Ɛfɛ. 5:19) Teembo tɔsɔ ntokotshɛka djɛ nkongi dj’ekfundwelo ndeka ndjala nkambo djɛ nsɔsɔlɔ leso edinge nkembɛka djawo djɛso tá nkongi djɛ ntshina djɛsɔ. Nyekameyɛke la nyekake teembo tɔkɔ, edjinge nyohone nsakiso k’etepela wel’eteyi lá wekelo wɔnyo wɔ nkfumbo. Kota etepela wɛ teembo tɔkɔ lá yimba la l’oloko wɔko. Masɔ ntsha ombopomana l’okakasano wɔ wolo kana ombovusɛ onto wɔko ɔmɔtshi wɔ ngandji, nyuma kɛ Yehova kengokovungola teembo tɔsɔ ko ongowa lokembo m’eteyi.

19. Akambo wakɔnge w’okokaso nkanelaka lá kɛnɛ kelendana l’ekfundwelo? (Lenda ipapango: “Kɛkɔnge k’okombolɛ ndaawopola?”)

¹⁹ Kamba l’ekanedji kɛko kɛ yimba. Yehova atɔpɛyɛka akoka wa iso nkanela edjinge ndawɛna etengo tolekɔ l’andja wa bango. Nkaana kɛmɔtshi apakisolaka ante: “Langɔsake winá efula djɛ nkanela edjinge ndawɛna etengo ndekɔ l’andja wa bango ko langoyawokake etengo ndjoka nsolo k’ansoso wa mɔngha lá Paradiso.” Kɔsa djɛ ombopomana l’ampame edjinge l’amato wa nkɔmano wawikaki l’etsho wefunamaki Bible. Onto wɔkɔnge w’okongelɛ l’oloko lukuluku djɛ mpomana lande ntondo? Weepó wɛkɔnge ngongowopola? Kokanela lonkina djɛ ombopomana l’anto wako wa ngandji wavwisá. Kokanela nkambo djɛ ntondo djɛ ngongaashimela, wopo wɔ ngongaasangela edjinge wisoyi w’osasa wa ngɔngɔkɛdjɛ má ndaawɛna.

20. Nkano djɛkɔnge dj’oyɛso ladjɛ ndɔsa?

²⁰ Tolekɔ nsɔsɔlɔ la djedjɛ te Yehova má daka djɛnde dj’ekfundwelo! Iso nkoka ndjala l’eshikikelo ente daka djɛsɔ ngokotshama ladjikɛnde Yehova alekɔ la mposɛ edjinge la nkfulu kɛ nkotshɛ daka djɛkɔ. Nyontshɔ tɔshi nkano djɛ nkindjɛ nkembɛ djawo djɛso tá nkongi djɛ ntshina efula djɛsɔ. Má nangha nghɔsɔ, tongoleka ndasukanyɛ la Ndjambe kɛso kanga lolaka onto l’onto wɔ l’anteyi kɛso ante: ‘Anto wako wa ngandji wangokfundɔ!’