Fushata me rastin e Përkujtimit fillon më 17 mars
1. Çfarë fushate do të fillojë më 17 mars?
1 Përkujtimi mbahet çdo vit për të shpallur vdekjen e Jezuit. (1 Kor. 11:26) Prandaj, duam që edhe të tjerë të vijnë e të dëgjojnë për dhuratën e dashur të shpërblesës që dha Jehovai. (Gjoni 3:16) Këtë vit, fushata për të ftuar njerëzit në Përkujtim do të fillojë të shtunën më 17 mars. A po prisni me padurim të merrni pjesë sa më shumë në të?
2. Çfarë mund të themi kur të japim ftesën?
2 Ç’mund të themi? Është më mirë të bëjmë një prezantim të shkurtër. Mund të themi: «Përshëndetje. Kemi ardhur t’ju ftojmë si familje për një ngjarje të rëndësishme që këtë vit do të mbahet në mbarë botën më 5 prill. Do të bëhet një fjalim biblik falas që do të shpjegojë se çfarë ka bërë të mundur vdekja e Jezuit dhe çfarë po bën ai tani. Në ftesë tregohet adresa dhe orari i mbledhjes që do të mbahet në zonën tonë.» Kur të shpërndajmë ftesën në fundjavë, duhet të ofrojmë edhe revistat, nëse është e përshtatshme.
3. Si mund të ftojmë sa më shumë njerëz?
3 Të ftojmë sa më shumë: Qëllimi ynë është të ftojmë sa më shumë njerëz. Kështu që sigurohuni që të ftoni studentët tuaj të Biblës, rivizitat, të afërmit, shokët e punës a të shkollës, fqinjët dhe të njohur të tjerë. Pleqtë e kongregacionit do të japin drejtimin se si të mbulohet territori. Fushata jonë e përvitshme për të ftuar njerëzit në Përkujtim, ka rezultate të mira. Vitin e kaluar, kur një grua hyri në sallën ku u mbajt Përkujtimi, një përcjellës iu afrua që ta ndihmonte të gjente lajmëtarin që e kishte ftuar. Por, ajo tha se nuk njihte askënd aty dhe se e kishte marrë ftesën nga dikush që i kishte shpërndarë shtëpi më shtëpi atë ditë.
4. Pse duhet të marrim pjesë me zell në fushatë?
4 Ndoshta dikush do të vijë në Përkujtim ngaqë ju i keni dhënë ftesën. Por edhe nëse nuk vjen askush, përpjekjet tuaja të zellshme do të japin dëshmi. Ftesat që do të shpërndani, do të shpallin se Jezui tani është një Mbret i fuqishëm. Pjesëmarrja juaj e zellshme do t’u tregojë të gjithë atyre që na shohin, njerëzve në territor, lajmëtarëve të tjerë dhe ç’është më e rëndësishme, Jehovait, se e vlerësoni jashtë mase dhuratën e shpërblesës.—Kolos. 3:15.