A waarheid ini a tori foe a sili de prenspari
„Oenoe sa sabi waarheid, èn waarheid sa meki oenoe kon fri.” — JOHANES 8:32.
1. Foe san ede a de prenspari foe ondrosoekoe den sani di wi e bribi ini a tori foe a sili nanga dede?
DEN sani di wan sma e bribi ini a tori foe dede èn ini a tori foe wan libi, baka te wan sma dede, moro foeroe e kon foe a relisi di wan sma abi èn a koeltoeroe pe a komopo. Soleki fa wi si kaba, dan den sani di sma e bribi e difrenti, foe na overtoigi di den abi taki a sili e doro en lasti marki soso baka te wan sma gebore foeroe leisi baka, te leki na idea taki wán enkri libi e bepaal fa a tamara foe wan sma sa de te foe kaba. Foe dati ede, wan sma kan abi na overtoigi taki te foe kaba a sa kon de wán nanga a moro hei sani di de, baka te a sma dede, wan tra sma kan abi na overtoigi taki a sa doro a nirvana, èn wan trawan kan abi na overtoigi taki a sa go na hemel leki wan pai di a kisi. San na a waarheid dan? Foe di den sani di wi e bribi abi krakti tapoe a fasi fa wi e tjari wisrefi, tapoe den sani di wi e doe èn tapoe den bosroiti di wi e teki, wi no moesoe broko wi ede dan foe feni a piki tapoe na aksi dati?
2, 3. (a) Foe san ede wi kan froetrow san bijbel e taki ini a tori foe a sili? (b) San na a waarheid ini a tori foe a sili, soleki fa a skrifi na ini bijbel?
2 Bijbel, a moro owroe boekoe di de na grontapoe, e tjari a historia foe libisma go baka te na a ten di Gado ben kria a fosi libisma sili. Den leri foe bijbel no abi den filosofia nanga gwenti foe libisma. Bijbel e taki krin foe a waarheid ini a tori foe a sili: Joe sili na joe, den dedesma no de kwetikweti moro, èn den wan di de na ini a memre foe Gado sa kisi wan opobaka te a reti ten foe en doro. San a wani taki gi joe te joe sabi a sani disi?
3 „Oenoe sa sabi waarheid, èn waarheid sa meki oenoe kon fri”, na so Jesus Krestes ben taigi den bakaman foe en (Johanes 8:32). Ija, waarheid e meki sma kon fri. Ma foe san a waarheid ini a tori foe a sili sa meki wi kon fri?
Kon fri foe frede èn foe a lasi di wi lasi-ati
4, 5. (a) Sortoe frede a waarheid ini a tori foe a sili e poeroe? (b) Fa a howpoe foe na opobaka ben gi deki-ati na wan tini di ben de so siki taki a no ben man kon betre moro?
4 „Moro foeroe sma frede dede èn den e proeberi foe no prakseri foe dede”, na so The World Book Encyclopedia e taki. „A wortoe ’dede’ srefi tron wan wortoe di sma foe Westsei kondre pikinmoro no e taki foe en”, na so wan historia skrifiman e taki. Èn na ini son koeltoeroe foeroe sma e gebroiki den wortoe leki „a sma foe oenoe no de moro” nanga „a sma foe oenoe gowe”, te den e taki dati wan sma dede. Te joe loekoe en boen, dan a frede disi di sma frede dede, na wan frede gi san den no sabi, foe di dede na wan dangratori gi moro foeroe sma. Te sma sabi a waarheid di e sori san e pasa te wi dede, dan den no frede someni moro.
5 Loekoe foe eksempre a fasi fa Michaelyn di ben abi 15 jari, ben denki. A ben abi leukemie èn wan sari dede ben e wakti en. En mama, Paula, e memre: „Michaelyn ben taki dati a no ben broko en ede taki a ben o dede, bika a ben sabi taki dede ben de foe wan sjatoe pisi ten nomo. Wi ben taki foeroe foe a njoen grontapoe foe Gado èn foe ala den sma di sa kisi wan opobaka na ini a grontapoe dati. Michaelyn ben abi foeroe bribi na ini Jehovah Gado èn na ini na opobaka — sondro foe tweifri wán momenti.” A howpoe foe na opobaka ben meki taki a jongoe oemapikin disi di ben abi deki-ati, no ben frede dede pasa marki.
6, 7. Fa a waarheid ini a tori foe a sili e meki taki wi no lasi-ati moro? Gi wan eksempre.
6 Fa a waarheid ben abi krakti tapoe a papa nanga mama foe Michaelyn? „A dede foe a jongoe oemapikin foe wi ben hati wi moro leki iniwan sani di oiti pasa nanga wi”, na so Jeff, en papa e taki. „Ma wi e froetrow krinkrin tapoe a pramisi di Jehovah pramisi na opobaka, èn wi e howpoe taki wan dei wi sa brasa wi lobi Michaelyn baka. Foe troe, wi sa de nanga makandra baka!”
7 Ija, a waarheid ini a tori foe a sili e fri wan sma foe a lasi-ati di a dede foe wan lobiwan e meki a sma lasi-ati. A no de foe taki, dati noti no kan poeroe a pen nanga a sari krinkrin di wan sma abi te wan lobiwan dede. Ma a howpoe foe na opobaka e froelekti a sari èn e meki taki a de moro makriki foe tjari a pen.
8, 9. Foe sortoe frede a waarheid di e taki foe a situwâsi pe den dedesma de na ini, e meki wi kon fri?
8 A bijbel waarheid di e taki foe a situwâsi pe den dedesma de na ini, e meki wi kon fri toe foe frede gi den dedesma. Sensi foeroe sma di wan ten ben keti na kroektoe bribi ceremonia di abi foe doe nanga den dedesma, e leri sabi a waarheid, den no e broko den ede moro nanga floekoe, sani di sma e si leki marki di e sori na fesi san o pasa, tapoe nanga obiasani, èn den no e gi diri sani moro leki ofrandi foe plisi den afo foe den, meki den no kon baka foe trobi den wan di de na libi. Foe troe, foe di den dedesma „no sabi notinoti”, dan den sortoe sani dati di sma e doe no abi krakti. — Preikiman 9:5.
9 A waarheid ini a tori foe a sili di de foe feni na ini bijbel, troetroe e meki sma kon fri èn a de foe froetrow. Ma loekoe so srefi wan toemoesi aparti howpoe di bijbel abi gi joe.
[Prenspari pisi na tapoe bladzijde 29]
A waarheid ini a tori foe a sili e meki joe kon fri foe a frede gi dede, frede gi den dedesma, a lasi-ati di a dede foe wan lobiwan e meki joe lasi-ati