„Abra kon na Masedonia”

1-3. (a) Fa a santa yeye tiri Paulus nanga den mati fu en? (b) Sortu sani wi o go luku now?

WAN grupu uma e gwe libi a foto Filipi na Masedonia. Fosi yu denki, den doro na a smara liba di nen Gangites. Soleki fa den gwenti, dan den e sdon na a syoro fu a liba fu begi a Gado fu Israel. Yehovah e luku den.​—2 Kron. 16:9; Ps. 65:2.

² Na a srefi ten dati wan grupu mansma di de moro leki 800 kilometer owstusei fu Filipi e gwe libi a foto Listra di de na zuidsei fu Galasia. Wan tu dei baka dati den e doro wan bigi pasi fu Rome di meki fu ston. A pasi disi e go na west-sei èn a e doro te na wan kontren na ini distrikt Asia pe furu sma e libi. Den man disi na Paulus, Silas nanga Timoteyus. Den de fayafaya fu waka a pasi fu go na Efeise èn na tra foto pe dusundusun sma de di musu yere fu Krestes. Ma fosi den kan bigin teki waka srefi, a santa yeye tapu pasi gi den, aladi Bijbel no e taki fa disi e psa. Den no e kisi primisi fu preiki na ini Asia. Fu san ede? Nanga yepi fu Gado en yeye, Yesus wani meki Paulus nanga den mati fu en waka psa na ini Pikin Asia, abra Egeus Se èn go te na a syoro fu a pkin liba dati di nen Gangites.

³ Wi na ini a ten disi kan leri prenspari sani fu a fasi fa Yesus tiri Paulus nanga den mati fu en, di den ben teki a spesrutu waka dati go na Masedonia. Sobun, meki wi go luku wan tu fu den sani di psa na a ten di Paulus teki en di fu tu preikiwaka leki zendeling. A preikiwaka disi ben bigin na a ten fu a yari 49.

„Gado ben taigi wi fu go” (Tori fu den apostel 16:6-15)

4, 5. (a) San psa di Paulus nanga den mati fu en ben de krosbei fu Bitinia? (b) Sortu besroiti den disipel teki èn san ben de a bakapisi?

⁴ Fu di Paulus nanga den mati fu en, no kisi primisi fu preiki na ini Asia, meki den go na noordsei fu preiki na den foto na ini a kontren fu Bitinia. Fu doro drape, den waka wan tu dei kande na tapu santipasi di ben de na mindri den kontren fu Frigia nanga Galasia pe yu no ben abi furu sma. Ma di den ben de krosbei fu Bitinia, Yesus gebroiki a santa yeye ete wan tron fu tapu pasi gi den (Tori 16:6, 7). Now den man disi musu fu ferwondru. Den sabi san den musu preiki èn fa den musu preiki, ma den no sabi pe den musu preiki. Den kisi na okasi fu go na Asia, ma den no kisi primisi fu preiki na ini a kontren dati. Den kisi na okasi fu go na Bitinia, ma agen den no kisi primisi fu preiki drape. Tòg Paulus ben de nomonomo fu tan suku okasi teleki a ben o feni wan sma di ben wani arki. Ne den man teki wan besroiti fu du wan sani di sma no ben gwenti du kande. Den go na west-sei èn den psa a wan foto baka a trawan. Den waka sowan 550 kilometer teleki den doro a lanpe fu Trowas pe sma ben gwenti teki boto fu go na Masedonia (Tori 16:8). Disi na a di fu dri leisi taki Paulus suku okasi fu feni sma di ben wani arki èn disi leisi a feni den.

⁵ Na Evangelie skrifiman Lukas, di ben de tu nanga Paulus nanga den mati fu en, e skrifi san psa: „Wan neti Paulus kisi wan fisyun: Wan man fu Masedonia ben e tnapu na en fesi èn a begi en: ’Abra kon na Masedonia fu yepi wi.’ Baka di a kisi a fisyun wi seti sani fu go na Masedonia, fu di wi kon ferstan taki Gado ben taigi wi fu go preiki a bun nyunsu gi den sma drape” (Tori 16:9, 10).a Now fosi Paulus ben sabi pe a ben musu preiki. Paulus ben musu fu breiti taki a no tapu nanga a preikiwaka fu en di a ben de afpasi. Wantewante den fo man teki boto fu go na Masedonia.

6, 7. (a) San wi kan leri fu den sani di psa nanga Paulus na a preikiwaka fu en? (b) Sortu dyaranti wi kan kisi te wi e luku na ondrofenitori fu Paulus?

⁶ San wi kan leri fu a tori disi? Luku san psa: Na baka di Paulus go na Asia, dan fosi a yeye fu Gado tapu en fu go doro. Na baka di Paulus ben de krosbei fu Bitinia, dan fosi Yesus taigi en fu no go drape èn na baka di Paulus doro na Trowas, dan fosi Yesus taigi en fu go na Masedonia. Na ini a ten disi, Yesus di de Edeman fu a gemeente kan tiri wi na a srefi fasi (Kol. 1:18). Fu eksempre, kande wi ben prakseri wan pisi ten kba fu go pionier noso fu froisi go na wan kontren pe moro Kownukondre preikiman de fanowdu. Ma a kan taki na baka te wi du wan sani fosi, Yesus o tiri wi nanga yepi fu Gado en santa yeye. Fu san ede? Luku na eksempre disi: Wan sma di e rèi wan wagi, kan meki a wagi go na a kruktu-anusei noso na a ret’anusei. Ma a kan du dati soso te a wagi e rèi kba. Na so Yesus e yepi wi tu fu du moro na ini a preikiwroko, ma na soso te wi e du wan sani fosi. Iya, te wi e meki muiti fu du dati, dan a o yepi wi trutru.

⁷ Ma san wi musu du te wi no abi bun bakapisi wantewante? Wi musu las’ati, fu di wi e prakseri taki a yeye fu Gado no e tiri wi? Nôno. Hori na prakseri taki Paulus srefi ben kisi fu du nanga problema. Ma tòg a tan suku okasi fu taki nanga sma teleki a feni sma di ben wani arki. Wi kan de seiker taki efu wi no e tapu fu suku „moi okasi fu du furu wroko”, dan wi o kisi blesi tu.​—1 Kor. 16:9.

8. (a) Ferteri fa a foto Filipi ben tan. (b) Sortu prisiri sani psa di Paulus preiki na wan ’presi pe sma ben gwenti begi’?

⁸ Baka di Paulus nanga den mati fu en doro na ini a distrikt Masedonia, den go na Filipi, wan foto pe den sma ben feni en wan bigi grani fu de borgu fu Rome. Gi den Rome srudati di ben go nanga pensyun kba èn di ben e libi na Filipi, a foto disi ben de neleki wan pkin Italiakondre. Dati wani taki dati Filipi ben gersi wan pkin Rome na ini Masedonia. Dorosei fu a portu fu a foto disi, na sei wan smara liba, den zendeling feni wan kontren pe den ben denki taki ’wan presi ben de pe sma ben gwenti begi’.b Na Sabat-dei den go na a presi dati èn den feni wan tu uma di ben kon makandra fu anbegi Gado. Den disipel go sdon drape èn den bigin taki nanga den uma. Wan uma di nen Lidia „ben e arki. . . Yehovah opo en ati bradi”. Den sani di Lidia leri fu den zendeling ben naki en ati so te taki en nanga en osofamiri teki dopu. Baka dati a meki Paulus nanga den mati fu en kon tan na en oso.c​—Tori 16:13-15.

9. Fa furu brada nanga sisa na ini a ten disi teki na eksempre fu Paulus èn sortu blesi den kisi?

⁹ Wi kan ferstan fa Paulus ben prisiri di Lidia teki dopu. Paulus ben musu fu breiti taki a ben teki a kari fu „abra kon na Masedonia” èn taki Yehovah ben teki en nanga den mati fu en fu piki a begi fu den uma disi di ben abi bigi lespeki gi Gado. Na ini a ten disi furu brada nanga sisa, awansi den yongu noso owru, awansi den trow noso no trow, e froisi go tu na kontren pe moro Kownukondre preikiman de fanowdu. Iya, wi sabi taki den e kisi fu du nanga problema, ma te fu kba den e fergiti den problema disi fu di den e prisiri srefsrefi te den feni sma di de leki Lidia èn di teki den tru leri fu Bijbel. Yu kan kenki wan tu sani na ini yu libi, so taki yu kan ’abra go’ na kontren pe moro preikiman de fanowdu? Yu o kisi furu blesi. Fu eksempre, luku Aron, wan brada di abi 26 yari èn di froisi go na wan kondre na ini Mindri-Amerika. A e taki san furu brada nanga sisa di ben du a srefi sani, e firi: „Sensi di mi froisi go na wan tra kondre fu du moro na ini a preikiwroko, mi kon sabi moro sani fu Bijbel èn mi kisi wan moro bun matifasi nanga Yehovah. Mi e prisiri srefsrefi te mi de na ini a preikiwroko. Mi e studeri Bijbel nanga aiti sma!”

„Den sma ati bron nanga Paulus nanga Silas” (Tori fu den apostel 16:16-24)

10. San ogri yeye ben e du fu gens a preikiwroko fu Paulus nanga den mati fu en?

¹⁰ A musu fu de so taki Satan ati bron di sma bigin panya a bun nyunsu na ini wan pisi fu grontapu pe sma ben gwenti du san en nanga den ogri yeye fu en wani. Fu dati ede wi no musu ferwondru taki ogri yeye ben gens a preikiwroko fu Paulus nanga den mati fu en. Di den tan go na a presi pe sma ben gwenti begi, wan umasrafu di ben abi wan ogri yeye na en tapu, bigin waka na baka Paulus nanga den mati fu en. A meisje disi ben meki moni gi den basi fu en fu di a ben taigi sma na fesi san ben o psa na ini den libi. A meisje ben e bari: „Den man disi na srafu fu a Moro Hei Gado. Den e ferteri unu fa unu kan kisi ferlusu.” A kan taki na ogri yeye ben meki a meisje bari den sani disi fu meki sma denki taki san a ben e taki èn san Paulus ben e leri sma, ben kmoto na a srefi presi. Na so den sma fu a foto no ben o man poti prakseri na den trutru disipel fu Krestes. Ma Paulus puru na ogri yeye na a meisje tapu èn na so a meisje no taki noti moro.​—Tori 16:16-18.

11. San psa nanga Paulus nanga Silas di den puru na ogri yeye na a meisje tapu?

¹¹ Di den basi fu na umasrafu kon si taki a no ben man meki moni gi den moro, den ati bron srefsrefi. Den srepi Paulus nanga Silas go na w’woyo pe den hei lantiman fu a foto ben e hori krutu. Den hei lantiman disi ben teki presi gi den tiriman fu Rome. Fu di den basi fu a meisje ben sabi taki den krutuman ben lobi fu krutu sma sondro fu abi nofo bewijs èn taki den ben abi wan tranga lobi gi a kondre, meki den taki wan sani leki disi: ’Den Dyu disi e tyari wan lo dyugudyugu kon, fu di den e leri sma tra gwenti di wi leki Romesma no kan teki abra.’ Den sani di den basi fu a meisje taki, naki na ati fu den sma drape. Bijbel e taki: „Ala den sma [na a w’woyo] ati bron nanga Paulus nanga Silas.” Ne den hei lantiman taigi sma fu „fon den nanga tiki”. Baka dati den srepi Paulus nanga Silas go na straf’oso. A waktiman fu a straf’oso trowe den man disi di ben kisi mankeri go te na bakasei fu a straf’oso èn a bui den na den futu (Tori 16:19-24). Di a waktiman fu a straf’oso tapu a doro, a straf’oso kon dungru pikapika. Wi kan ferstan taki a ben kon dungru so te taki Paulus nanga Silas pkinmoro no ben man si makandra. Ma Yehovah ben e luku.​—Ps. 139:12.

12. (a) Fa den disipel fu Krestes ben e si ferfolgu èn fu san ede? (b) Na sortu fasi Satan nanga den bakaman fu en e gens wi te now ete?

¹² Wan tu yari na fesi, Yesus ben taigi den bakaman fu en: „Den o frufolgu unu” (Yoh. 15:20). Sobun, di Paulus nanga den mati fu en abra go na Masedonia, den ben de srekasreka fu kakafutu gi gens. Di sma bigin gens den, den no si disi leki wan fasi fa Yehovah ben e sori taki a no feni den bun. Ma den si en leki wan fasi fa Satan ben e sori na atibron fu en. Na ini a ten disi den bakaman fu Satan e gebroiki den srefi sani di den bakaman fu en ben gebroiki na ini Filipi. Bedrigi gensman na skoro noso na wrokope e taki sani fu wi di no tru èn na so den e meki taki tra sma gens wi tu. Na ini son kondre, kerkisma di e gens wi e tyari wi go na fesi krutu èn den e taki wan sani leki disi: ’Den Kotoigi disi e tyari bruya kon fu di den e leri sma tra gwenti di wi no kan teki fu di „wi abi wi eigi bribi someni langa kba”.’ Na ini son presi, den e fon den brada nanga sisa fu wi èn den e trowe den go na ini straf’oso. Ma Yehovah e luku.​—1 Petr. 3:12.

Den „dopu wantewante” (Tori fu den apostel 16:25-34)

13. Fu san ede a waktiman fu a straf’oso aksi: „San mi musu du fu kisi ferlusu?”

¹³ Baka di someni bruya sani psa a dei dati, dan a musu fu de so taki Paulus nanga Silas ben abi ten fanowdu fu kisi densrefi. Ma na mindrineti a pen di den ben firi fu a fonfon di den kisi, saka someni taki den ben man ’begi èn singi prèisesingi gi Gado’. Ne wantronso wan gronseki kon di seki a heri straf’oso! Di a waktiman fu a straf’oso wiki, a si taki den doro opo èn a prakseri taki den strafman lowe. A ben sabi taki sma ben o strafu en efu a ben o meki den strafman lowe. Dati meki a „hari en fet’owru fu kiri ensrefi”. Ma Paulus bari: „No kiri yusrefi, wi alamala de dya!” Ne a waktiman fu a straf’oso di ben brokosaka trutru, aksi den: „Mi e begi unu, taigi mi san mi musu du fu kisi ferlusu?” Paulus nanga Silas no ben man ferlusu a man. Na soso Yesus ben man du dati. Sobun, den piki en: „Bribi na ini Masra Yesus, dan yu nanga den sma na ini yu oso o kisi ferlusu.”​—Tori 16:25-31.

14. (a) Fa Paulus nanga Silas yepi a waktiman fu a straf’oso? (b) Sortu blesi Paulus nanga Silas kisi di den hordoro nanga prisiri, aladi sma ben ferfolgu den?

¹⁴ A de so taki a waktiman fu a straf’oso ben wani kisi piki na tapu na aksi trutru? Paulus ben si taki a man ben abi wan krin ati. A waktiman no ben de wan Dyu èn a no ben sabi Gado Buku. Fosi a ben kan tron wan Kresten, a ben musu leri den prenspari tru tori fu Bijbel èn poti bribi na ini den tru tori disi. Sobun, Paulus nanga Silas teki den ten fu ferteri ’en a wortu fu Yehovah’. Den man disi poti so furu prakseri na a leri di den ben e leri a waktiman san skrifi na ini Bijbel, taki a kan taki den fergiti a pen fu a fonfon di den ben kisi. Ma di a waktiman fu a straf’oso si den bigi koti di den ben abi na den baka, a krin den soro fu den. Ne en nanga en osofamiri „dopu wantewante”. Iya, Paulus nanga Silas kisi furu blesi fu di den hordoro nanga prisiri, aladi sma ben ferfolgu den.​—Tori 16:32-34.

15. (a) Fa furu Kotoigi na ini a ten disi teki na eksempre fu Paulus nanga Silas? (b) Fu san ede wi musu tan go baka na den sma di e libi na ini a kontren fu wi?

¹⁵ Neleki Paulus nanga Silas, na so yu abi furu Kotoigi na ini a ten disi di preiki a bun nyunsu di den ben de na straf’oso fu a bribi fu den ede èn den ben abi bun bakapisi. Fu eksempre, wan ten ben de taki na ini wan kondre pe lanti tapu a wroko fu wi, pkinmoro afu fu ala den sma di tron Kotoigi drape, ben leri den tru tori fu Yehovah di den ben de na straf’oso (Yes. 54:17). Hori na prakseri tu taki na baka di a gronseki ben de, dan fosi a waktiman fu a straf’oso aksi yepi. Na so a de tu na ini a ten disi taki sma di no ben wani arki a Kownukondre boskopu fosi, e poti prakseri na a boskopu disi, baka te wan takru sani psa na ini den libi. Efu wi e tan go na den sma di e libi na ini a kontren fu wi èn wi tyari gobaka na den, dan wi e sori taki wi de klarklari fu yepi den.

„Den wani puru wi na straf’oso sondro fu sma sabi?” (Tori fu den apostel 16:35-40)

16. Fa a situwâsi kon kenki na a dei baka di sma wipi Paulus nanga Silas?

¹⁶ A m’manten baka di sma wipi Paulus nanga Silas, den hei lantiman fu a foto taigi sma fu lusu den. Ma Paulus taki: „Den wipi wi na fesi ala sma sondro fu tyari wi na fesi krutu èn den poti wi na straf’oso aladi wi na Romesma. Now den wani puru wi na straf’oso sondro fu sma sabi? Nôno, kwetkweti! Meki den srefi kon puru wi na straf’oso.” Di den hei lantiman yere taki den tu man ben de borgu fu Rome, den „kon frede” fu di den no ben hori den reti fu den man na prakseri.d Now a situwâsi kon kenki. Den hei lantiman ben meki den disipel kisi fonfon na fesi ala sma èn now den srefi lantiman disi ben abi fu aksi den disipel pardon na fesi ala sma. Den begi Paulus nanga Silas fu gwe libi Filipi. Den tu disipel du san den lantiman aksi den, ma den teki den ten fosi fu gi dek’ati na wan grupu nyun disipel di ben e kon bigi moro nanga moro. Baka dati den gwe libi a foto.

17. Sortu prenspari sani den nyun disipel leri di den si fa Paulus nanga Silas hordoro?

¹⁷ Efu sma ben hori den reti fu Paulus nanga Silas leki borgu fu Rome na prakseri, dan kande den no ben o wipi den (Tori 22:25, 26). Ma dati ben kan gi den disipel fu Filipi a prakseri taki den tu man disi ben gebroiki a posisi fu den fu wai pasi gi a pina di den ben abi fu pina fu Krestes ede. Sortu krakti dati ben o abi na tapu a bribi fu den disipel di no ben de borgu fu Rome? Te yu luku en bun, a wet no ben o tapu sma fu no wipi den disipel disi. Sobun, di Paulus nanga a mati fu en teki a fonfon, den gi den nyun bribiman wan moi eksempre. Den sori den taki bakaman fu Krestes man kakafutu te sma e ferfolgu den. Boiti dati, di Paulus nanga Silas aksi taki sma lespeki den reti di den ben abi leki borgu fu Rome, den dwengi den hei lantiman fu taki na fesi ala sma taki den du wan sani di no ben kruderi nanga a wet. Te den hei lantiman ben o du disi, dan dati ben o tapu den fu du ogri nanga den Kresten brada nanga sisa fu Paulus. Boiti dati, den wet fu lanti ben o gi den brada nanga sisa disi a dyaranti taki sma no du den ogri na ini a ten di ben o kon.

18. (a) Fa Kresten owruman na ini a ten disi e teki na eksempre fu Paulus? (b) Fa wi e ’opo taki gi a bun nyunsu èn fa wi e du ala san wi man fu meki lanti gi wi a reti fu preiki’?

¹⁸ Na ini a ten disi den owruman na ini a Kresten gemeente de wan moi eksempre te den e teki fesi na ini a gemeente. Ala sani di den Kresten skapuman disi wani taki den Kresten brada nanga sisa fu den e du, na dati den srefi e du tu. Neleki Paulus, na so wi e denki bun tu o ten èn fa wi o gebroiki den reti di lanti e gi wi fu kan suku kibri te sma wani du wi ogri. Te a de fanowdu, dan wi e go na den krutubangi fu a kondre pe wi e libi noso wi e go srefi na a hei krutubangi di e luku krutu afersi fu ala kondre, so taki wi kan kisi primisi fu anbegi Gado na wan fri fasi. Wi no wani kenki a fasi fa sani e go na ini a kondre, ma wi wani ’opo taki gi a bun nyunsu èn du ala san wi man fu meki lanti gi wi a reti fu preiki’. Na dati Paulus ben skrifi a gemeente na Filipi sowan tin yari baka di a kmoto na straf’oso drape (Fil. 1:7). Ma awansi fa den krutu-afersi dati waka, wi abi a fasti besroiti fu du a srefi sani di Paulus nanga den mati fu en ben du. Wi e tan ’preiki a bun nyunsu gi den sma’, awansi pe a yeye fu Gado e seni wi go.​—Tori 16:10.