Soema sa sorgoe dati na dee foe pai sa de foe na boen foe wi?
„San mi kan doe efoe Gado opo tanapoe? En te a aksi frantwortoe, san mi kan piki hem?” — Job 31:14.
1. Foe sainde wi, di sondro jepi moe pina now ondro dem toestand foe now, e winsi dati wan dee foe pai kon ini wi tem, en o bigi?
WAN dee foe pai de wan boen sani. Foeroe foe wi e winsi dati sani poti reti foe na boen foe ibriwan foe wi. Ja, so wan dee, wi ben sa prisiri foe a kon. Na kroektoedoe di de, na kwinsi nanga bidrigi foe trawan, habi ooktoe krakti tapoe wi, ma wisrefi no kan doe noti foe tjari lekti kon. Wi no kan kari dem ogridoe soema kon foe aksi dem frantwortoe. Na troostoe foe wi de foe di wi sabi dati wan sani de ooktoe leki na „wet foe refensi”. Te foe kaba, reti sa kon soboen. We, efoe dati ben sa kan pasa ini wi libi! Ja, tapoe na heri grontapoe! Dan ibri soema di dem doe kroektoe nanga hem, ben sa njan boen foe hem.
2. San wi kan taki foe na sociaal nanga natuurlijk kontren foe wi, en sortoe frede a de tjari kon?
2 Na sociaal kontren foe wi no de so boen now. Libisoema e doti en pori srefi na natuurlijk kontren foe wi. Foe disi wan dee foe pai moe kon, en heresi, so dem sabiman tapoe na kontren foe ecologie e verteri wi. Libisoema no kan go doro foe poeroe dem natuurlijk proces foe na grontapoe na balans sondro foe ondrofeni te foe kaba dem bakapisi foe hem. Dem e frede dati na heri libisoema libi-makandra sa dede tapoe wan grontapoe, pe wi no kan libi moro.
3. San wi kan taki foe wan dee foe pai tapoe na tori foe gwenti, na meki klari foe oorlog en foe wan sani di soema e si leki wan sani di wi no kan meri en di de santa?
3 Wi ben sa kan prakseri ooktoe na a dee foe pai di moe kon foe na go na baka ini ala kondre foe dem boen gwenti. Ofoe na a dee foe pai di sa kon nanga na stree mindri dem kondre foe meki moro sroedati feti sani, bikasi na organisaatsi foe na Verenigde Naties no de wan krakti foe tapoe dem, ma ala naatsi, tapoe na tori foe veiligheid e go abra foe poti vertrouw tapoe na de klari foe dem sroedati makti foe dem. Ma ete wan tra kontren foe libisoema afersi de, di wan dee foe pai moe kon, wan kontren di foeroe foe wi kande noiti meri ete, foedi a de so wan santa sani. Foe sortoe kontren wi de taki? Religie!
4. Foe sainde religie verdini dati wan dee foe pai fadon kon na hem tapoe? en sortoe krakti a sa habi te disi pasa?
4 Foeroe soema e poeroe religie ini dem libi leki wan sani sondro betekenis, di no habi waarde en di de srefi ogri. Disi no wani taki dati religie no de wan foe dem moro prenspari krakti ini na libi foe na libisoema famiri. Pikinso soema, efoe joe kan taki dati dem de, kan komoto ondro na krakti foe hem. A de frantwortoe foe someni ogri ini na libi foe libisoema nanga naatsi, dati a verdini, dati wan dee foe pai fadon kon tapoe hem. Te disi pasa, dan a sa de wan onverwakti sani gi hondro hondro miljoen soema en dem bakapisi sa de toemsi bigi.
5. (a) Na sortoe fasi religie de na krakti di prati sani moro na grontapoe? (b) Foe sainde dem foeroe religie foe na kristenheid nanga dem tra kerki foe grontapoe no kan habi alamala na waarheid en de joisti?
5 Ini na libisoema historia, religie ben de na moro bigi krakti di tjari prati kon. A ben tjari prati kon mindri ras, naatsi, pipel lo nanga srefi famiriman. A habi foe wan tra religie ben tjari bita fasi nanga vooroordeel kon, en nanga sari wi moe taki dati disi ben tjari ogri stree nanga trobi di go doro hondro hondro jari te leki now. Na pisi foe na kerki grontapoe di wi sabi leki na kristenheid wi no kan poeroe na ini. Ini disi, a de na wan di e kon moro na fesi srefi. Nanga dem takroe oorlog di feti, na gebied foe hem dringi boen foeroe libisoema broedoe. Na frantwortoe foe disi de foe di a prati ini foeroe hondro hondro sekte nanga kerki. Na pratifasi disi wawan e bewijsi dati a no de san a de taki — kristen. Na kristenheid nanga na broeja foe hem religie nanga dem tra religie foe na tra pis foe grontapoe di prati dem na dem, no kan de alamala joisti. Wàn waarheid nomo de, en disi de absoluut, foedi a de akroederi nanga hemsrefi.
6. (a) Foe sainde meki ala naatsi moe kon tanapoe fesi wan dee foe pai en now makandra? (b) Soema moe de a soema di moe aksi ofoe gi pai na dem naatsi?
6 Dem religie di no e agri nanga makandra, na natuurlijk omgeving dem moreel wetti, na tiri foe dem libisoema afersi — ala naatsi habi foe doe nanga dem prenspari sani disi. No wan enkri naatsi de sondro fowtoe. Alamala bewijsi dati dem de pasa joisti wetti foe libi nanga regvaardiki wetti foe rigeri. Akroederi nanga na model foe na heri libisoema historia di pasa, ala naatsi moesoe kon tanapoe fesi wan dee foe pai. Dem naatsi sa go makandra ini na dee foe pai en dati sa de so foe na esesi communicatie (leki TV, telefoon, radio) en sani foe waka (leki oto, opolani) en foe di dem habi makandra fanowdoe. Ma soema ofoe san sa aksi ofoe gi pai? Na gado foe na naatsi foe ofoe foe dem foeroe gado foe dem? A sa de na wetenschap, di e kisi grani leki wan „santa kaw”? A sa de na Verenigde naatsi ofoe wan tra internationaal skin di e seti sani mindri communist nanga kapitalist naatsi ofoe mindri groepoe foe wrokoman nanga dem basi? Kwet-kweti, bikasi foedi dem sani disi no ben man wroko boen, meki na libisoema famiri kon ini wan moeiliki positsi. Soboen, te joe gebroiki joe verstan, dan joe e si dati a moe de wan ofoe tra koni soema di man kaka foetoe gi ala moeilijkheid foe dem volkoe, en di no e teki partij na mindri dem ras nanga naatsi, wan Almakti Soema nanga verstan di kan meki na dee foe pai de wan dee foe hari bro fri gi ala soema di lobi san de joisti.
SAN DE FANOWDOE FOE MEKI WAN DEE FOE PAI PE PARTIJ NO E TEKI
7. (a) Ini sortoe kondisi dem naatsi sa de tapoe na dee foe pai, disi wi de taki foe hem dja? (b) Sortoe kroetoebakra ben sa boen foe seti sani nanga dem naatsi?
7 Wi no de taki dja foe wan ofoe tra „kroetoedee” di soso de ini soema prakseri en di dem borgoe foe dem naatsi sa ondrofeni ini wan jejekondre baka dede. Wi e taki foe wan dee foe pai gi ala naatsi, aladi dem e wroko sref-srefi en de proberi foe meki na makti foe dem tan ini na rigeri vorm di dem verkisi. Dem naatsi sa tan na libi te na dee foe ondrosoekoe sani en foe pai kon nanga na Kroetoebakra di hee moro libisoema en di ala naatsi moe gi frantwortoe? Disi de na aksi di habi foe doe nanga wi leki libisoema di de memre foe dem naatsi disi di foeroe nanga fowtoe. Wi wani foe datede foe na dee foe pai wan Kroetoebakra di hee moro ala gado foe dem naatsi di no habi makti. Wan soema di dem goedoe, koni kondre no kan bai nanga wan tjoekoe. Wan Soema di no frede foe dem super sroedati makti foe na grontapoe, soleki Amerkankondre nanga communist Rusland.
8. (a) Soboen, soema wi wani leki na kriboi Kroetoebakra di e gi reti? (b) Sortoe sani ini hemel nanga grontapoe no ben kan verklaar logisch efoe so wan Soema no ben sa de?
8 O ja, ini wi ati wi lostoe, dati Na Moro Heewan foe na universum te foe kaba, sa opo tanapoe leki kriboi Kroetoebakra di e gi reti. Te wi tan prakseri disi, dan san, no wawan na pikin noifi grontapoe foe wi, ma moro foeroe na universum foe wi ben sa moe bigin sondro so wan Moro Heewan, so wan universeel Soeverein? Pe na harmoni, na ordefasi ini wi universum, nanga na precies fasi fa a de wroko ben sa de sondro so wan universele Wetgever? Pe a boen wrokomakandra foe ala sani di habi makandra fanowdoe en di de wan pisi foe na natuurlijk omgeving foe wi ben sa de, sondro so wan Ontwerper nanga Mekiman na wan enkri Fontein foe libi gi ala meti, bon nanga libisoema? Ala dem sani disi no ben sa de kwet-kweti. Sondro so wan Almakti Heewan no wan enkri verklaring ben sa de foe a de a libi foe dem!
9. (a) Fa no wan Soema e sori dati a de en a de wroko foe teego? (b) Fa Mozes ben kari hem nanga reti, en ini sortoe fasi a de nanga ala nationale groepoe?
9 Na erkenning foe so wan Soema no ben tjari hem so fara foe meki hemsrefi kon na libi komoto foe noti, ma dati ala dem meki sani disi ben de kaba bifo libisoema ben kon tapoe grontapoe en disi e sori en bewijsi dati a ben de en wroko foe teego. Nanga reti na bijbel e kari hem „na Gado foe dem gado en na Masra foe dem masra”. Na so na toemsi koni wetgever nanga afkati foe owroetem, Mozes, e kari hem. Mozes ben kan taki foe hem tapoe so wan fasi nanga na sabi di a ben sabi sani, bikasi hemsrefi ben de bekenti nanga dem gado foe na owroe Egypti, en boiti dati, „a ben kisi leri ini ala koni foe dem Egypti soema” (Deut. 10:17; Tori foe dem apostel 7:22). Hondro hondro jari bakatem, dem ben poti na prakseri foe na moro hee kroetoe ini na owroe Grikikondre, na kroetoe di ben hori kroetoe tapoe na Mars-bergi ini Athene, tapoe na Moro Hee Gado disi. Na okasi disi ben kon di na apostel Paulus ben taki gi na kroetoe dati: „Na Gado, di ben meki grontapoe nanga ala sani di de na ini . . . ben meki foe wàn soema ibri naatsi foe libisoema foe libi tapoe na heri grontapoe” (Tori foe dem apostel 17:24-26). Foe na hee di a hee moro ala nationale groepoe, meki dem e kari hem „Kownoe foe dem kownoe”. — Jer. 10:7.
10. Foe sainde na „Kownoe foe dem naatsi” disi man foe feti nanga ala sroedati politiek supermakti foe now leki hem feejanti?
10 Wi kan leesi moro foe na supernationaal Gado disi ini na santa Boekoe, di Mozes, Paulus nanga tra soema ben skrifi en di foeroe tron ben de ai-kotoigi foe dem sani di dem ben skrifi foe wi moe sabi. A ben sori dati a habi dem grontapoemakti lek a owroe Egypti, Assiria, nanga Babylon krin krin ondro hem makti. Na wan don sani foe prakseri dati a de soso wan foe dem foeroe gado foe na historia en dati a no de moro na libi 19 hondrojari psa kaba, di na laatste boekoe foe na bijbel ben skrifi. Na Gado disi no e dede, a de libi ini hemsrefi. Now now a man foe feti nanga ala tranga supermakti foe na modern grontapoe foe wi leki hem feejanti. Leki „Kownoe foe dem kownoe” a sa kari alamala foe dem foe gi hem frantwortoe. Disi sa de foe na teego tan-boen foe ala soema di lobi regvaardiki fasi nanga boenfasi.
NA WROKOSANI FOE GADO DI WI MOE HORI NA PRAKSERI
11. Fa Tori foe dem Apostel 17:31 e sori tapoe sortoe fasi au meki wan soema teki presi foe hem tapoe na dee foe pai e sortoe djaranti a ben gi?
11 Foe na dee foe pai di e kon, Gado habi wan soema di e teki presi gi hem, wan kompe-kroetoebakra. Na kristen apostel ben sori tapoe na oema disi di a ben taki moro fara nanga na kroetoe di ben de tapoe na Mars-bergi ini Athene (Grikikondre): „Hem (Gado) ben poti wan dee, pe a habi na prakseri foe kroetoe na heri grontapoe pe libisoema e libi ini retidoe nanga jepi foe wan man di a ben poti, en a ben gi ala soema wan djaranti, foedi a ben opo hem komoto foe dede.” — Tori foe den apostel 17:31.
12. Foe sainde na de foe na djaranti disi no de wan sani di wi no moe habi bisi nanga hem, soleki dem Griki kroetoebakra di ben arki Paulus ben doe?
12 Na Almakti Gado sa ben kan gi wan moro moi djaranti foe na kroetoedoe di a ben poti gi ala libisoema foe grontapoe leki na opobaka foe hem kompe-kroetoebakra foe na pinadede? Soso, foedi wi habi wan tra kerki leri, meki dati wi no habi foe si na „djaranti” foe Gado leki wan sani di wi no a bisi nanga hem, soleki na moro bigi pisi foe dem kroetoebakra foe na hee-kroetoe dati tapoe na Mars-bergi ben doe. Na „Kownoe foe dem naatsi” e gi na „djaranti” disi. A no de wan sani foe joe spotoe nanga hem, leki wan sani di no de wetenschappelijk en di de wan law sani. Ini na fosi hondro jari foe wi teri joe ben habi moro leki 500 ai-kotoigi foe na de foe so wan „djaranti”, pe joe ben habi srefi na apostel Paulus na ini.
13, 14. Foe sainde na Jezus Kristus di ben opo baka foe dede, leki wan djaranti foe Gado, no de moro na grontapoe? (b) Fa a doe kon dati Gado no tan hem wawan ini hem jejekondre?
13 Na „man” di na opobaka foe hem na dede de wan „djaranti” gi na kroetoedee di poti, de Jezus Kristus (1 Kor. 15:3-8, 12-20). Dati a no de now na grontapoe, doe kon foedi a ben gi hem volmaakti libisoema libi leki wan ofrandi en Gado ben opo hem baka foe dede, sodati na libisoema famiri di ben dede ben sa kan kisi wan opobaka toe en nanga disi ben sa kan kisi na okasi foe libi foe teego tapoe wan krin grontapoe, di sa kenki kon tron wan grontapoe paradijs. Leki wan paiman Gado ben hee hem go te na hemel en a sidon na a reti-anoe foe na Moro Hee Kroetoebakra, na Gado di habi na makti foe wiki dedewan. Jezus Kristus ben taki foe hemsrefi leki na „wan enkri gebore Pikin” foe Gado en „leki na bigin foe dem mekisani foe Gado” (Joh. 3:16; Openb. 3:14). Foe sainde?
14 Foedi a ben de na fosi mekisani foe Gado ini hemel en Gado ben gebroiki hem na a tem dati leki hem kompe-wrokoman ini na meki foe tra sani pe ben de na ini na grontapoe foe wi nanga dem fosi libisma foe grontapoe, Adam nanga Eva (Kol. 1:15, 16). Na meki foe dem engel di joe no kan si ben de bifo na meki foe na libisoema famiri. Nanga na meki foe „hem wan enkri Manpikin” nanga ala santa engel, no ben meki Gado ben tan hem wawan ini hem eegi jejekondre. Leki fa na tori foe na bijbel e sori wi, den na nomroe foe dem engel disi, di hee moro libisoema, pasa dem hondro hondro miljoen. — Ps. 104:4; Dan. 7:9, 10; Hebr. 1:7; 12:22.
15. Fa na wan enkri gebore Pikin foe Gado ben de wan tron „wan weiniki moro lagi leki dem engel”?
15 Gado sa habi ala dem myriaden engel dati tapoe na dee foe pai nanga ala dem grontapoe naatsi. Dem de ooktoe foe hem kompe-kroetoebakra gebroiki dem, na Soema di nanga jepi foe hem a sa kroetoe na heri grontapoe pe libisma e libi, tapoe wan vaste dee (Matt. 25:31, 32). Di Gado ben seni tapoe wan wondroe fasi hem wan enkri gebore Manpikin foe gebore komoto foe wan djoe wendje leki wan volmaakti libisoema tapoe grontapoe, Gado ben meki na Manpikin disi foe hem „wan weiniki moro lagi leki dem engel”. — Hebr. 2:9; Ps. 8:4, 5.
16. Gado ben opo Jezus na dede foe kisi sortoe presi en nanga sortoe boen prakseri?
16 San de now na presi foe na wan enkri gebore Manpikin disi foe Gado? Gado ben opo hem foe dede en poti hem hee tapoe dem engel, foedi te na a dede foe hem leki wan ofrandi a ben de sondro fowtoe, en a ben sori nanga dati, dati a ben de getrouw na Gado. Dati na Manpikin disi foe Gado, di ben gersi wan lam, ben kan gi na heri libisoema famiri dem boen foe hem ofrandi, meki Gado wiki hem komoto foe dede tapoe na dee di foe dri, ma no leki wan libisoema, foedi a ben offer hem libisoema natuur foe teego. Foe dati meki Gado ben opo hem baka foe dede foe kisi hemel libi en foe no dede moro en a poti hem hee tapoe ala engel (1 Petr. 3:22). Tapoe na fasi disi, a ben kan dini leki na „siri”, di nanga jepi foe hem ala naatsi foe grontapoe ben sa kisi wan blesi. — Gen. 22:18; Gal. 3:8-16.
17. San Paulus ben skrifi ini Hebreer 1:3-9 foe na glori foe Jezus Kristus leki na Pikin foe Gado?
17 Wi no moe de nanga prisiri foe na glori disi foe Jezus Kristus ini hemel? Ja, bikasi wi habi now wan moro positief loekoe tapoe na libi ini na tem di e kon. Na apostel Paulus di ben si tapoe wan wondroe fasi na Jezus Kristus di ben opo baka foe dede, ben skrifi foe na glori foe hem. Ini na brifi Hebreer pe a de teki Jezus Kristus leki na Messias foe dem bijbel profeeti-tori, a ben skrifi: „Na baka di a ben tjari wan krin foe sondoe kon, a go sidon na a reti-anoe foe na glori ini dem hee presi. Foe datede a kon moro boen leki dem engel, foedi a ben kisi wan nem di moro boen leki di foe dem . . . Ooktoe a de taki foe dem engel: ’A de meki hem engel de jeje en hem publiki dinari wan fajavlam’. Ma foe na Pikin: ’Gado de joe troon foe teego en na rigeri-tiki foe joe kownoekondre de na rigeri-tiki foe getrouwfasi. Joe ben lobi retidoe en kroektoedoe joe no wani si na ai. Foe datede meki Gado, joe Gado ben salfoe joe nanga oli foe toemsi bigi prisiri moro leki joe patna.’” — Hebr. 1:3-9.
18. San Gado sa doe nanga jepi foe na Manpikin disi foe na dee foe pai di e kon?
18 Nanga na Kownoe disi di poti hee moro dem engel en di de na Kroetoebakra di habi ala makti, Gado sa sorgoe dati nanga jepi foe hem, dati na dee foe pai di e kon sa de foe na teego boen foe wi.