Beraw di e tjari wan sma go baka na Gado
„Na boen-ati égifasi foe Gado e proberi foe tjari joe kon abi beraw.” — Rom. 2:4
1, 2. San wi moe froestan foe sondoe nanga a fasi fa Gado e si disi?
IBRIWAN foe wi kan firi dekati nanga den wortoe foe na psalm-singiman David:
„Jehovah abi sari-ati èn a abi boen-ati.
A no e kisi atibron esi èn a abi lobi boenfasi pasa marki.
A no doe nanga wi akroederi den sondoe foe wi;
èn a no ben tjari kon tapoe wi akroederi wi fowtoe san wi ferdini.
Soleki wan tata e sori sari-ati gi en manpikin,
a so Jehovah ben sori sari-ati gi den di e frede en.
Bikasi ensrefi sabi heri boen fa wi ben meki,
a abi ini prakseri dati wi de stof.” — Ps. 103:8, 10, 13, 14.
2 Alwasi Gado e froestan dati wi alamala de sondari, tog a wani jepi wi èn a de klari foe gi wi pardon (Ps. 32:1, 2). Na prenki di wi abi foe Gado no ben sa de soifri efoe wi no ben sa teki na heri fasi fa a de si sondoe. Aladi Psalm 103 e gi wi na djaranti dati Jehovah „e gi pardon na ala wi fowtoe”, tog ini disi den verplekti foe wi e kari toe nanga den wortoe: „Na lobi boenfasi foe Jehovah de foe ten di no abi marki, ja, foe ten di no abi marki gi den di e frede en . . . gi den di e denki na en komando, foe doe den.” — Ps. 103:3, 17, 18.
3. Foe sainde beraw de toemsi prenspari?
3 Fa a de efoe wan sma doe wan bigi sondoe, no abi beraw èn no e soekoe na sari-ati foe Gado leki tata, ma e go doro nanga a doe foe sondoe? Exodus 34:6, 7 e ferteri wi fa Jehovah de. Baka di ini na tekst disi krakti poti tapoe en sari-ati, a no kisi foe atibron esesi èn de klari foe en foe gi pardon foe fowtoe, dan disi e taki moro fara: „Ma kwetkweti a sa gi fri foe strafoe.” (Teki gersi Numeri 25:1-5; Ezechiël 33:12, 13) Soboen, wi no moe meki misbruik ofoe si en leki wan sani di e kon foe ensrefi. San wan troe anbegiman moe doe foe datede efoe a fadon go ini sondoe?
DOE SANI FOE GO BAKA NA GADO
4. Fa wi kan kisi pardon? (2 Kron. 7:13, 14)
4 Wan kristen di doe wan bigi sondoe na Gado wéti, abi pardon fanowdoe. Soema kan gi disi? Foe troe, soso Gado. Na apostel Johannes ben skrifi: „Efoe wi ferteri Gado wi sondoe, dan a de getrow nanga regtvaardiki foe pardon wi sondoe èn foe krin wi foe ala onregtvaardiki fasi.” — 1 Joh. 1:9; 2:1.
5, 6. Sortoe rai e gi na Jakobus 5:14-16 èn foe sainde a de wan redelek sani dati wan sma di doe ogri teki na rai disi na ati?
5 Te wan bigi sondoe doe, dan Gado e gi wan kristen di „e ferteri en sondoe”, na koni rai foe no misi foe doe ete wan sani. Ini wan context di e sori krin tapoe wan jeje siki pe „sondoe” de ini na tori, na discipel Jakobus ben skrifi: „Wan sma de a oen mindri di e siki? Meki a kari kon na en den owroeman foe na gemeente, èn meki den begi gi en, . . . Èn na begi foe bribi sa meki a sma di moe firi ensrefi boen, kon betre, èn Jehovah sa opo en. Èn efoe a ben doe sondoe, a sa kisi pardon.” — Jak. 5:14-16.
6 Na sani disi de redelek, bikasi wan kristen di fadon gi bigi sondoe, e sori dati ini séker marki a swaki na jeje sé èn a abi jepi fanowdoe. A ben sa kan njan boen foe den begi foe bribi foe den „owroeman foe na gemeente”. Den de ooktoe ini na positie foe gi en rai foe na bijbel nanga jepi, sodati a kan kisi en jeje krakti baka. Boiti dati, son sondoe de sondoe kontra a kristen gemeente, foedi den e tjari sjen nanga sari kon tapoe Gado pipel. Disi e meki dati a de moro srefi dati so wan sondari e soekoe na jepi foe den owroeman. — 2 Kor. 2:10.
7. Fa den owroeman e kisi foe sabi ogri di doe, sodati den kan jepi? (Odo 28:23; 29:24)
7 Efoe wan kristen ben gi ensrefi abra na bigi sondoe, dan a de wan sori foe koni nanga sakafasi foe en sé, te foe ensrefi a de go na den owroeman. „A sma di tapoe en sondoe („kibri”, Petrus-Canisiusvertaling), a no sa go boen, ma a sma di e ferteri èn libi en, den sa sori sari-ati” (Odo 28:13). Sontron wan sondari e poti a rai foe Jakobus na wan sé, leki wan bakapisi foe sjen, wan firi foe fowtoe ofoe wan mankeri foe troetroe beraw foe na ati. Ibri kristen di kon sabi na sondoe, moe gi na sma di doe na ogri na dekati foe drai baka gi en fowtoe èn go soekoe na jeje jepi di a abi fanowdoe. Ma efoe na sma di doe na ogri ete no wani go na den owroeman, dan na tra kristen moe ferteri den foe dati, sodati den kan gi na fanowdoe jepi. Na ala kristen na winsi moe de „foe meki wan sondari drai baka foe na sondoe foe en pasi”, èn soboen „ferloesoe en sili foe dede”. — Jak. 5:19, 20.
GI PIRI-AI NANGA NA WORTOE FOE GADO
8. Fa den owroeman e doe tapoe wan konmakandra foe a komte?
8 Te den memre foe wan kroetoe komte e konmakandra foe behandel wan afersi foe ogri di ben doe, den e soekoe ini begi na tiri foe Jehovah. Tapoe wan fasi di fiti gi lobi herder den owroeman e taki nangra pasensi nanga na sma a sani di gersi de a problema foe na ogridoe. (Ef. 5:1, 2; 1 Petr. 5:2, 3). Srefi te kotoigi de di kan taki dati ogri doe, na kroetoe komte e gi na sma tranga foe no wawan taki fri san de na ogri di doe, ma foe ferteri ooktoe san meki a kon so fara èn fa a de si a tori (Deut. 19:15; Joh. 8:17). Foe sainde disi de fanowdoe?
9, 10. San den owroeman e proberi foe doe tapoe wan komte-konmakandra di abi foe doe nanga a doe foe ogri?
9 Aladi den owroeman di e behandel na tori, e loekoe san na a fowtoe ofoe e overtoigi wan sma foe a doe foe ogri, na belangstelling foe den e go na a fosi presi na den kristen brada di wai komoto foe na boen pasi. Den wani meki den kon kisi beraw, sodati „kowroe ati kan kon foe na sé foe na persoon foe Jehovah” (Tori foe den Apostel 3:19). Efoe a sma no wani taki dati na ogri de so, no èrkèn na bigi di a bigi ofoe no e froestan dati a moe abi beraw, dan kande den moe gi den „overtoigi bewijsi foe en sondoe èn foe regtvaardiki fasi”. (Teki gersi Johannes 16:8). Ma te wi e gi so wan piri-ai di komoto foe Gado , wi no moe de nanga tranga-ati ofoe foe teki refrensi. Na bijbel e gi na dekati: „Gi piri-ai, strafoe, vermane, nanga ala pasensi èn koni foe leri sma” (2 Tim. 4:1, 2). Te nanga wan faste besroiti, èn nanga switifasi èn pasensi piri-ai gi, dan kande den kan doro na ati foe na sondari èn kan jepi en foe no wani si na ogri na ai èn drai go baka na Gado. — Jer. 3:12, 13.
10 Wi kan leri foe na eksempre foe Ezra. A ben sori den djoe krin a sondoe foe den. Disi no ben de na a fosi presi foe meki den kisi sjen, ma foe tjari den so fara foe stop nanga na ogri, foe doro na ati foe den, foe bewégi den foe no wani si na ogri na ai èn foe abi beraw. Den moe ferteri den sondoe foe den na Jehovah èn handri akroederi nanga dati foedi den e doe ala sani san de ini den makti foe meki na fowtoe libifasi kon tron noti (Ezra 10:7-14). Sosrefi toe na komte di e behandel wan tori foe bigi sondoe, abi na prakseri foe meki na sma di doe na ogri si na bigi foe na ogri èn foe froestan nanga en heri ati dati a moe abi beraw. — Jes. 1:18.
’GI PIRI-AI NA FESI FOE ALA SMA’
11. Soema abi wan piri-ai foe na bijbel fanowdoe?
11 Tapoe na tori foe konmakandra foe kroetoe sma di doe ogri, den owroeman e gebroiki den wortoe di Paulus ben skrifi gi Timotéus: „Piri-ai gi sma di e doe sondoe, na fesi foe ala sma (Letterlek: „na fesi na ai foe ala sma”) sodati den trawan kan abi frede toe” (1 Tim. 5:20). Den sma disi di ben doe sondoe de sma di, te na a ten, dati na piri-ai e gi troetroe, „ben go doro nanga sondoe” (Revised Standard Version), ofoe „e libi ini sondoe” (Nieuwe Vertaling foe na Nederlands Bijbelgenootschap).
12. Fa wan kroetoe komte e gebroiki na rai di tanapoe ini 1 Timotéus 5:20?
12 Ini na fosi eeuw, Timotéus, leki wan sma di Paulus ben seni èn di ben kisi makti, ben kan doe persoonlek den skrifi wortoe disi, „fesi na ai foe ala sma” di ben de ini na tori èn na fesi foe na sma di ben doe ogri. Ini na ten disi so wan piri-ai e gi nanga jepi foe wan komte foe owroeman na presi nanga jepi foe wán sma. Ini disi a no de fanowdoe dati na heri gemeente de ini na tori. Na a kaba foe na konmakandra foe na kroetoe komte, den owroeman e gi wan piri-ai nanga na bijbel foe na sondoe di ben doe, baka te den ben agri san de na fowtoe. Den e kari den kotoigi, di ben gi kotoigi foe na sondoe foe de na a konmakandra, sodati den sma disi di sabi na afersi, kan jere na piri-ai foe na bijbel. Na so fasi na piri-ai e gi „na fesi ala sma” ofoe „fesi na ai foe ala sma”. Den disi, ofoe den „trawan” di 1 Timotéus 5:20 e kari, kan kisi jepi tapoe a fasi disi foe abi wan gosontoe frede gi sondoe èn den moe tan farawe foe omstandigheden di kan tjari wi go ini sondoe.
A ABI BERAW?
13. Na fesi foe sortoe tjalansi owroeman e tanapoe te den e behandel wan tori foe bigi sondoe?
13 Wan foe den moro bigi tjalansi gi owroeman di e behandel tori foe ogridoe, de foe bepaal ofoe na sondari abi ofoe no abi troetroe beraw. Den no moe go nomo tapoe san de na dorosé foe si. Foedi den no kan lési na ati, meki den moe sori soboen wan bigi koni foe si boen nanga ogri, èn den moe sori balans fasi nanga koni, te den e kroetoe na ogri na fasi fa Gado wèti de èn san na sondari e taki èn e doe.
14, 15. Foe sainde den owroeman moe prakseri boen fosi te den moe teki na besroiti ofoe wan sma abi ofoe no abi beraw?
14 Den owroeman no moe de esesi foe taki dati beraw de. Foe sainde? We, efoe no nanga reti den taki dati wan sondari abi beraw, dan disi kan abi wan takroe krakti tapoe na heri ipi. Ma loekoe na a tra sé wan bijbel eksempre pe wan sma di ben doe ogri ini na gemeente Korinte ben de ini na tori. Baka wan pisi ten di a ben sluit uit, a ben teki baka ini na gemeente, foedi a ben abi troetroe beraw. Fa den brada nanga sisa ben moe handri nanga en? Den sma foe Korinte, di ben abi na froetrow dati tapoe wan joisti fasi sani kroetoe dati a ben abi beraw, ben kisi tranga „foe gi en pardon èn foe trowstoe en tapoe wan boen-ati fasi” èn „meki na lobi foe den gi en kon stéfi” (2 Kor. 2:6-8). Disi de now ooktoe so te wan komte agri dati wan sma di doe ogri abi beraw, Ma efoe den ben sa loekoe na afersi fowtoe èn meki wan sma di doe ogri drai kon baka ini na gemeente sondro a abi beraw, dan den ben sa tjari na moreel nanga jeje soifri-fasi foe ala sma ini na ipi kon ini gevaar. — 1 Kor. 5:6.
15 Na sortoe sani na komte moe loekoe foe bepaal ofoe na sma di doe na ogri abi troetroe beraw? Wan sma di abi beraw no e proberi foe taki boen foe en takroe libifasi ofoe foe krin ensrefi foe fowtoe. A de froestan o fowtoe, san a ben doe ben de èn a de firi ini en ati dipi sari dati a ben sondoe tége Gado (Jer. 3:25; Tori foe den Apostel 3:19). Den owroeman di e behandel wan afersi, foe datede moe loekoe boen efoe so wan sari de.
16, 17. (a) San de na difrenti na mindri na „sari foe grontapoe” nanga na „sari tapoe wan gadofasi?” (Hebr. 12:16, 17) (b) Sortoe krakti watra-ai nanga firi sa abi tapoe a kroetoe foe den owroeman?
16 Den owroeman kande sa moe kan meki wan difrenti na mindri na „sari foe grontapoe” nanga „sari tapoe wan gadofasi”, san „e meki beraw kon di e tjari ferloesoe” (2 Kor. 7:10). Wan sma di ben doe wan ogri, ben sa kan sari, foedi a de firi dati a fadon ofoe a de sjen kande, foedi den poeroe en bere kon na doro, ofoe a ben kan firi sari foedi a kan dati a sa kisi tranga leri. Ma so wan „sari foe na grontapoe” no wani taki, dati a de firi sari foedi a sondoe na Gado ofoe foedi a ben tjari sjen tapoe Gado nanga En pipel, sani di de marki foe a „sari tapoe wan gadofasi”. Aladi Esau ben kré watra-ai foedi a ben lasi na fosi gebortoe-reti, Jehovah ben sabi dati Esau no ben abi troetroe beraw di ben komoto foe na ati. Soboen, efoe wan sma di ben doe wan bigi sondoe, bari kré, dan den owroeman moe proberi foe bepaal ofoe disi kon foe „sari tapoe wan gadofasi”. Disi ben sa kan. Ini den dé foe Ezra „na pipel ben kré hebi”, baka di den ben jere na opregti begi, di a ben begi gi den, èn Petrus ben kré hebi foedi a ben taki dati a no ben sabi Jezus. — Gen. 25:29-34; 27:34; Ezra 10:1; Luk. 22:59-62.
17 Den eksempre disi foe na bijbel e poti krakti a tapoe foe sainde den owroeman no kan kroetoe soso tapoe na sori di wan sma e sori en firi. Libisma kenki ini a sori foe den firi foe den èn a dwengi foe densrefi. Soboen, efoe watra-ai o fadon ofoe no o fadon, na prenspari sani de, dati na ati foe a sma di doe a ogri ben seki èn a de kwinsi en toemsi ofoe a abi dipi sari dati a ben afrontoe Jehovah èn a ben doe ogri na a mati-fasi foe en nanga Jehovah (Ps. 51:1-4). Foe datede meki séker den owroeman sa aksi na sma di doe ogri ofoe a ben ferteri Jehovah ini begi èn neleki David ben aksi Gado pardon. — Ps. 32:3-5; 41:4; Jer. 31:19.
18. Fa a ferteri san psa e kon ini a tori?
18 Te a sma di doe na ogri ferteri fri na den „owroeman foe na gemeente” dan disi kan abi wan boen marki foe na fasi fa en ati de (Jak. 5:14, 16). Ma fa a de efoe a no ensrefi ferteri nanga en fri wani èn na troetroe fasi foe na tori e kon na krin baka te bewijsi ofoe kotoigi foe trawan poti na en fesi? En ati ben sa kan seki tog ete (drape, tapoe a konmakandra) èn a ben sa kan èrkèn en sondoe. (Loekoe na eksempre foe na beraw foe David foe en sondoe nanga Bethséba, ini 2 Samuël 12:1-3). Ma spesroetoe te piri-ai moe gi foeroe, bifosi a sma di doe ogri e bigin foe sori pikinso beraw, dan na komte moe loekoe boen. Den moe abi na overtoigi dati na sma di doe na ogri kenki en ati èn dati a de meki moeiti foe poti na ogri reti èn abi na faste besroiti foe tan farawe foe dati ini na ten di e kon. — 2 Kor. 7:10, 11; Openb. 3:19.
19. Fa wan sma di abi beraw moe prakseri foe na gemeente?
19 Wan sma di doe ogri moe abi sari foe na sjen di a tjari kon tapoe Gado gemeente. Di David ben sondoe foedi a ben go teri na pipel èn a ben froestan san a ben doe, a ben èrkèn na law libifasi foe en. Di bakaten a ben si den ogri bakapisi gi na heri naatsi, disi ben bewégi en foe taki: „Loekoe, mi ben sondoe èn mi ben doe fowtoe; ma den skapoe disi — San den ben doe?” (2 Sam. 24:10, 17) Na sma di ben doe na ogri e abi foe datede troetroe spéti foe na sari, na sjen nanga den problema di a ben tjari kande kon tapoe a gemeente?
„WROKO DI E FITI BERAW”
20-22. (a) Sortoe „wroko” ofoe „froktoe” den owroeman sa ondrosoekoe? (b) Gi eksempre fa wan sma di abi beraw, e meki den sortoe „froktoe disi ben sa kon”?
20 Na apostel Paulus ben gi sma tranga „foe abi beraw èn dati den drai go na Gado, foedi den e doe wroko di e fiti beraw” (Tori foe den Apostel 26:20). Di den djoe ini den dé foe Nehemia ben abi beraw, dati den ben teki dorosé oema, den ben sori na beraw foe den foedi den ben doe definitief sani (Neh. 9:1, 2; teki gersi Jona 3:5-10). Sosrefi toe den owroeman, te den e behandel wan tori foe bigi sondoe, sa abi belangstelling foe sabi ofoe na sma di doe ogri „ben meki froktoe di e fiti beraw”. — Matt. 3:8.
21 Efoe a ben sondoe na wan sma, a ben ferteri na a sma dati na sondoe di a ben doe èn dati a ben aksi en pardon? Efoe foe eksempre a de go foe soetadoe, a ben ferteri disi dan na en trowpatna èn a ben aksi pardon? Ofoe, efi na sma di ben doe ogri ben gi en srefi abra na bidrigi fasi, a ben doe sani foe pai na lasi? Ini son omstandigheden kande a no man foe pai ala lasi, ma ai sori dati a de doe redelek sani foe pai na lasi di kande de? (Luk. 19:8). Na punt de: O fara na sma di doe fowtoe „e meki froktoe kon di e fiti beraw?”
22 Kande na sondoe ben kon foedi a ben poti bijbel rai na wan sé. Foe eksempre, a ben kan teki prati na ontspanning nanga grontapoe mati, nanga hoeroedoe leki bakapisi foe na ongosontoe demakandra disi. Na sma di now lasi pasi meki wan kaba kon na a demakandra disi? (Odo 13:20; 1 Petr. 4:3, 4). A ben doe moeiti toe foe kon geregeld makandra nanga na pipel foe Gado èn a ben sori wan faja lostoe foe prijse Gado leki wan soifri anbegiman? Nowan foe den „froktoe” disi wawan de na wan enkri sani di tapoe na gron foe en kan bepaal dati na sondari abi beraw. Na belangstelling foe den owroeman sa de dati a abi gosontoe demakandra, e go na kristen konmakandra èn de fajafaja ini na velddienst, bikasi den e lostoe sani leki Gado, dati bewijsi moe de foe „wroko di fiti beraw”.
23. San na komte moe loekoe ini a tori foe sondoe di ben doe foeroe tron?
23 Na kroetoe komte moe broko den ede dati na gemeente tan krin èn den moe loekoe spesroetoe boen efoe kon na krin dati na sma di doe ogri foe wan langa pisi ten ben gi ensrefi abra na bigi sondoe ini kibri fasi. A srefi ben sa de so toe efoe den abi foe doe nanga wan sma di ben bow wan patron foe sondoe èn baka dati, leki fa a gersi, ben kon kisi beraw. Wantoe tron a ben handri fowtoe, ma foedi a gersi leki a ben abi beraw, ibri tron a ben kisi piri-ai, sodati a ben kan tan ini na gemeente. Now a ben sondoe baka. Ini den sortoe geval disi, den owroeman, di abi sosrefi toe na tanboen foe na heri ipi na prakseri, moe loekoe ofoe na libi di a de libi e sori troetroe dati a de meki „froktoe kon di e fiti beraw”. A no ben sori nanga en libifasi dati wi moe aksi wi srefi efoe a moe tan ini a gemeente foe Gado? — Ps. 119:104; Rom. 12:9.
24. San e bepaal efoe moro konmakandra moe hori nanga wan sma di doe ogri? (Hos. 5:4; Matt. 21:30).
24 Sontron wan kristen kon tranga ini ogri ofoe lobi foe stré, aladi a no de sori troetroe beraw wansi den owroeman doe opregti, pasensi moeiti (Pred. 8:11). Den no de verprekti foe konmakandra nanga so wan sma di doe ogri foeroe tron, leki den wani begi en foe abi beraw. Ma ini son geval den kan mene, dati agen den moe miti nanga na sondari, èn dati de te den bewijsi foe en firi, bewégi foe ati nanga beraw no de so krin. Baka te a ben kisi ten foe begi èn foe go denki a takimakandra foe a tron a fesi, dan na aksi efoe a abi beraw, kan kon moro na krin.
25. Foe sainde den owroeman abi wan hebi frantwortoe tapoe a tori foe ogridoe?
25 Na frantwortoe di den owroeman abi foe bepaal troetroe beraw, hebi. Den moe sori sari-ati-fasi, èn jepi sma di lasi pasi, ma di abi troetroe beraw. Na a tra sé den moe loekoe boen foe fowtoe firi gi a sma, di ben kan meki dati kefarlek sroedeki tan ini na gemeente. — Gal. 5:9.
JEPI NA GEMEENTE
26. Fa son geval ben sa kan behandel efoe soso wantoe sma sabi na ogridoe?
26 Ini son geval a de so dati kande bigi sondoe no ben kon èn no sa kon bekenti ini algemeen. Kande soso wantoe sma, soleki krosbé famiri ofoe den wantoe kotoigi di sabi na sondoe. (Aladi den disi de „den sma di de drape”, tog moe tjari kon na krin gi den dati a no ben sa de wan sori foe lobi te den ben sa go konkroe foe disi). Te na kroetoe komte de séker foe datede dati na sma di doe ogri abi beraw, dan a no de fanowdoe foe tjari na afersi kon moro fara a publiki, foedi „den sma di de drape” alamala ben jere na piri-ai foe na bijbel foe na tori èn a sondari abi beraw.
27, 28. Oten a kan de wan boen sani foe ferteri na gemeente dati wan sma kisi piri-ai?
27 Ini tra geval wan sondoe kan de bekenti ini na gemeente èn ofoe ini a gemeenschap. Ooktoe na sondoe kan de so, dati baka wan pisi ten a sa kon bekenti ini algemeen. So wan tori moe behandel tra fasi. Na heri gemeente moe kon korostoe foe na aksi ofoe na afersi ben behandel na wan joisti fasi. Den memre foe na gemeente kan njan ooktoe boen foe na rai foe na bijbel sodati den e kisi a jepi foe abi wan gosontoe frede gi sondoe.
28 A kan psa toe dati den owroeman abi na prakseri dati ini wan bepaalde geval den moe loekoe boen. Aladi na sma di doe sondoe kan abi now opregti beraw, ini a ten di psa a ben kan ben sori marki foe swakifasi ini en faste besroiti foe tan farawe foe a pasi di e tjari go na sondoe. Foe na koesoemi ede dati na gemeente sa tjari go ini gevaar foedi wan sma ini den mindri ben sa kan abi wan pori krakti, meki na komte foe owroeman kan teki na besroiti dati wan bijbel lezing moe hori foe gi bodoi.
29, 30. (a) Fa den owroeman sa gi a gemeente bodoi? (b) Sortoe waarde a abi foe behandel son geval na a fasi disi?
29 Ini den laatste geval di kari dja, den owroeman foe na gemeente kan seti sani foe behandel na afersi tapoe na alawiki dienstvergadering, èn no tapoe tra konmakandra. Ini na dienstvergadering ben sa kan meki bekenti dati na sma di ben doe ogri fositen ben kisi piri-ai foe na kroetoe komte èn ben sori beraw. Sosrefi toe na kroetoe komte ben kan feni en fanowdoe foe poti bepaalde skotoe gi na sma di ben doe ogri. Ini den skotoe disi ben sa kan de, dati a no mag teki prati na programma foe den konmakandra, no mag teki presi gi a gemeente ini begi ofoe no mag lési bijbeltekst ofoe mag gi kommentaar ini den konmakandra. Te den memre foe na komte poti wantoe skotoe, dan den kan ferteri den owroeman ofoe den e feni en fanowdoe ofoe den no e feni en fanowdoe dati disi meki bekenti na a gemeente. Den sortoe skotoe disi wanfroewan kan poeroe ini na ten di e kon.
30 Na a srefi neti, ma bakaten ini na dienstvergaderingprogramma, wan foe den owroeman di ben kisi na wroko dati, ben kan hori wan krakti bijbellezing. A no moe kari na sma di doe a ogri na nen èn sosrefi toe a no moe tjari fini pisi foe na tori kon na krin foe den froetrow bodoi di kon na krin ini na konmakandra foe na kroetoe komte. Ma a ben sa kan taki wel san a Wortoe foe Gado e taki foe na sortoe foe fowtoe ofoe sondoe, pe a tori e go foe en, na gevaar foe en, èn fa na sondoe disi wi kan tan fara foe en. Na heri gemeente kan njan boen foe so wan vermane foe na bijbel. — 2 Tim. 4:1, 2
31. Fa wi moe prakseri foe a fasi fa Gado e si beraw?
31 Wi alamala moe abi wan dipi beraw foe na de klari di Jehovah de klari foe teki opregti beraw. Séker wi no moe „teki a boenfasi foe Gado di wi no ferdini èn misi na marki foe en” (2 Kor. 6:1). Efoe wan sma ben sa doe disi tog, foedi a de fadon gi sondoe èn no e abi beraw foe sondoe, dan Gado e aksi na gemeente dati krakti stap doe. Den disi sa taki na tra nomroe di e kon foe Na Wachttoren.
[Faki na tapoe bladzijde 256]
SAN JOE LERI FOE BERAW?
Efoe wi ben doe wan bigi sondoe, dan wi moe ferteri disi na Gado èn gebroiki ooktoe na rai foe en Wortoe foe soekoe na jepi foe den „owroeman”.
Ini wan konmakandra foe na kroetoe komte, den owroeman e proberi foe bepaal san de na sondoe èn den e doe moeiti foe jepi na sma di doe ogri foe abi beraw.
Ini na konmakandra disi, dan „piri-ai a fesi ala sma di de drape” abi foe doe nanga den sma di de leki kotoigi ofoe di sabi na sondoe.
Wan sma di abi troetroe beraw, seki te ini na dipi foe en ati foedi a ben sondoe na Gado èn foedi a ben tjari sjen kon tapoe Gado nanga en pipel.
Den owroeman sa soekoe na marki foe „wroko di fiti beraw”
Aladi den memre foe na komte abi belangstelling foe jepi na sma di doe ogri, tog den e broko ede foe kibri na gemeente foe porifasi.