Na fasi foe tjari joesrefi nanga trawan tapoe wan gadofasi

„Mi e skrifi joe . . . sodati joe kan sabi fa joe moe tjari joesrefi ini na osofamiri foe Gado, di de na gemeente.” — 1 Tim. 3:14, 15.

1, 2. Fa na bijbel kan jepi wi ini na fasi fa wi e tjari wisrefi nanga trawan?

WAN foe den winimarki di kristen sma abi foedi den e stoeka a bijbel, de, dati den e leri foe tjari densrefi nanga tra sma tapoe wan gadofasi. Srefi sma di de bekenti nanga na kristendom ofoe na bijbel, e agri dati koni nanga praktis waarde de ini rai leki disi: „Soleki joe wani den sma doe nanga joe, doe a srefi toe nanga den.” — Luk. 6:31.

² Na bijbel e gi wi foeroe moro leki soso algemeenheden na bradi tapoe na tori fa wi moe tjari wisrefi nanga trawan. A de gi wi rai foe na fasi fa wi moe tjari wisrefi nanga sma di de ini wan bepaalde spesroetoe matifasi nanga wi ofoe di de ini wan bepaalde situwasi. A so na bijbel foe eksempre e gi rai fa wan kristen oema moe libi nanga en masra di no de wan bribiman èn rai fa wi moe libi nanga mofinawan, malengri sma èn sma foe na tra sekse (1 Petr. 3:1-6; Ps. 41:1; Lev. 19:14; 1 Tim. 5:1, 2). Den Boekoe e gi sosrefi toe foeroe boen rai foe na fasi fa wi „moe tjari wisrefi ini na osofamiri foe Gado, di de na gemeente”. — 1 Tim. 3:15.

3. Foe sainde wi abi na tiri foe Gado fanowdoe ini na fasi fa wi e tjari wisrefi?

³ A de toemsi prenspari dati wi poti den sortoe rai disi foe Gado ini wi libi, bikasi Gado Wortoe e sori dati a sa kroetoe wi afoe, tapoe na gron foe na fasi fa wi e tjari wisrefi nanga trawan (Matt. 18:35; 25:40, 45; Openb. 2:23). Soboen, na presi foe wi meki san wan sma taki tjari wi ofoe san de joisti akroederi wi „firi”, dan wi moe abi na fasi foe David: „Meki mi joe pasi bekenti, o Jehovah; leri mi joe pasi. Meki mi waka ini joe waarheid èn leri mi, bikasi joe na mi Gado foe ferloesoe.” — Ps. 25:4, 5; 139:17, 21.

FA WI MOE TJARI WISREFI NANGA SONDARI

4. Foe sainde a de fanowdoe dati wi sabi fa wi moe tjari wisrefi nanga sondari?

⁴ Leki bakapikin foe Adam, ala libisma ben „sondoe èn no e doro na glori foe Gado” (Rom. 3:23; 5:12). Ma a situwasi foe wi no de sondro howpoe, bikasi „Kristus Jezus ben kon ini grontapoe foe ferloesoe sondari”. Ibri sma di èrkèn dati èn di e sori bribi ini Kristus, kan kisi pardon, wansi a ben libi wan sondoe libi ini na ten di psa. — 1 Tim. 1:12-16; 1 Kor. 6:9-11; Tori foe den Apostel 10:43; Rom. 6:12-14.

5. San moe doe efoe wan kristen ben doe wan bigi sondoe?

⁵ Ma fa a de nanga wan sma, baka di a ben kisi beraw, ben sori bribi ini Kristus èn ben tron wan dopoe kristen, e gi ensrefi abra na wan swakifasi ofoe e fadon go ini wan bigi sondoe? Ete a kan kisi pardon neleki na apostel Petrus ben kisi pardon, foedi a ben taki dati a no ben sabi Jezus. Efoe joe ben kisi foe jere dati wan kompe-kristen ben fadon gi wan bigi sondoe, san joe ben sa doe dan? Foe troe lobi ede, nanga ala prisiri joe ben sa wani si sote, dati na sma dati kisi jepi na jejefasi. Foeroetron a de den owroe man nanga jejefasi ofoe opziener ini na gemeente di kan gi na jepi disi. Nanga sortoe sani ini prakseri? Foe meki a kristen di lasi pasi kon boen baka na jejefasi. — Gal. 6:1; 1 Joh. 5:16; 2 Tim. 2:23-26; Jud. 23.

6. Efoe wan kristen di ben gi ensrefi abra na wan bigi sondoe, no ben abi beraw, san moe doe dan?

⁶ Sontron a de psa, dati wan sma di waka someni jari baka na pasi foe na troe kristendom, e skoifi komoto foe en, e gi ensrefi abra na wan takroe libifasi sondro foe frede Gado èn baka dati no e abi beraw, aladi den owroeman ben doe opregti moeiti foe jepi en. Ini na bijbel e kon na krin dati disi ben psa ini na fosi eeuw, èn a de psa ini na ten disi toe (2 Petr. 2:10-20). San moesoe doe dan? Ini en volmaakti koni nanga geregtigheid, Gado e ferteri dati wan krakti sani moe doe foe kibri na moreel nanga jeje krinfasi foe na gemeente, aladi na sani disi abi ooktoe leki bakapisi dati na sma di e doe na ogri, kisi ensrefi nanga wan seki di a seki. Gado Wortoe e komanderi: „Poeroe na sma di doe na ogri na oen mindri.” Disi wani taki dati a moe sluit uit foe na kristen gemeente. — 1 Kor. 5:13; 1 Tim. 1:20; teki gersi Deuteronomium 17:7.

7. Sortoe aksi e kon na fesi foe wan sma di ben sluit uit foe a gemeente?

⁷ A de wan sari sani dati a fasi fa wan sma e tjari ensrefi e meki so wan doe de fanowdoe, ma fa den loyaal memre foe na gemeente moe si èn behandel en te den sluit en uit kaba? Na fasi fa den moe tjari densrefi nanga en moe de a srefi leki nanga ibri birman ofoe birfraw, mati a wrokope, ofoe sma di wi e miti toevallig na strati? A fiti dati den gi odi na a sma di sluit uit ofoe hori srefi wan sjatoe taki te den e miti en? Èn san de foe taki te joe e wroko gi en ofoe te a de wroko na joe? O fara a de tapoe en presi dati kristen papa nanga mama, ofoe tra famiriman, taki nanga na sma ofoe de makandra nanga en? Foeroe foe den sortoe aksi disi e kon na fesi. Fa wi kan de grantangi, dati Jehovah Gado e gi wi tiri tapoe na tori fa wi moe doe nanga wan sma di doe ogri èn sluit uit.

NA RAI FOE JEZUS TAPOE A TORI FOE SMA DI DOE OGRI

8, 9. (a) Sortoe rai Jezus e gi foe wan sma di ben sondoe? (b) Tapoe sortoe sondoe Jezus e sori dja?

⁸ Ini wan ten pe Gado ben e handel ete nanga den djoe leki En pipel, Jezus ben gi rai tapoe a tori foe wan sma di ben sondoe. Den discipel foe Kristus di densrefi ben de djoe, ben sa froestan na rai disi ini na leti foe na situwasi di ben de ini a djoe gemeenschap. Ooktoe wi kan njan boen foe disi, bikasi na rai di Jezus ben gi, ben kan gebroiki bakaten, te Gado ben opo na kristen gemeente (Matt. 21:43). Kristus ben bigin en rai nanga den wortoe: „Te joe brada doe wan sondoe, go tjari en fowtoe kon a krin a mindri joe nanga en wawan. Efoe a arki na joe, dan joe ben wini joe brada.” — Matt. 18:15.

⁹ A de krin dati Jezus no ben taki foe wan „sondoe”, san wani taki wan ofoe tra pikin persoonlek fowtoe, soleki wi e lési ini Filipi 4:2, 3. (Teki gersi Odo 12:18.) A gersi leki a ben bedoel moro foeroe sondoe soleki bidrigi, ofoe gongosa, sondoe di ben bigi nofo, dati den ben sa kan meki, dati wan sma ben sluit uit foe na gemeenschap.a Efoe na sma di den ben sondoe na en, ben sa kan loesoe na afersi, foedi a de go na en brada ensrefi, dan a ben sa „wini en brada”; te na sondari ben sori dati a abi beraw, di komoto foe en ati èn a de proberi foe poti na ogri kon reti baka, dan a no de fanowdoe foe go moro fara nanga na afersi.

10, 11. San ben moe doe efoe na fosi stap no ben go boen?

¹⁰ San ben moe doe efoe na stap disi no ben kon boen? Jezus ben go moro fara: „Ma efoe (a sondari) no arki, teki dan wán ofoe toe ete nanga joe, sodati foe a mofo foe toe ofoe dri kotoigi den kan taki fa a tori de.” — Matt. 18:16.

¹¹ Den sma di ben moe go, ben moe de „kotoigi”, no soso neutral partij di ben sa proberi foe meki wan verzoening kon. A gersi dati den ben de sma di ben kan „kotoigi” foe na ogri di ben doe, foedi foe eksempre den ben sabi na kroederi foe moni di ben meki, sodati den ben kan kotoigi ofoe bidrigifasi ben de ofoe no ben de ini a tori. Ofoe efoe wan krontrak, ofoe so wan sani ben de, di nanga jepi foe en ben kan taki efoe ogri ben doe, dan koni brada nanga jeje fasi èn nanga ondrofeni tapoe den tori disi, ben kan teki go. Den ben kan jere den troe tori èn arki san a sma di den taki doe ogri ben sa taki ini na konmakandra disi, sodati den ben sa abi den kotoigi disi efoe den laatste stap ben sa moe doe.

12. San ben sa de na laatste stap, soleki Jezus ben tjari kon na krin?

¹² Jezus ben kari leki na laatste sani ini a tori foe na sondari: „Efoe a no arki den, taki dan nanga a gemeente. Efoe a no arki na gemeente, dan a moe de gi joe neleki wan sma foe den naatsi èn leki wan tolnaar” (Matt. 18:17). Ja, leki wan laatste moeiti foe meki na sondari drai komoto foe en pasi, na afersi ben sa kan tjari kon na fesi èn den kan arki san den kotoigi abi foe taki. Dan den ben sa man foe piri-ai gi na sma di ben doe ogri nanga jepi foe na Wortoe foe Gado. Ma efoe a wégri foe abi beraw, dan foe a boen foe na gemeente den ben sa opo doe wan sani foe gi en tranga leri, aladi den ben sa kibri na gemeente foe na takroe wroko foe en, foedi den e sluit en uit.

NO SONDRO LOBI GI LIBISMA NANGA TRAWAN

13, 14. Fa wi kan de séker dati Jezus no ben agri nanga wan fasi foe no sori lobi gi trawan?

¹³ Leki wan jepi foe bepaal fa wi moe tjari wisrefi nanga so wan sma, meki wi moe abi wan boen froestan foe den wortoe foe Jezus: „A moe de gi joe neleki wan sma foe den naatsi èn leki wan tolnaar.” Ini den hondro hondro jari a baka, son djoe méstri foe wet ben tjari wan tra loekoe kon na fesi, soleki dati wan djoe no ben kan gi jepi na wan heiden di ben de foe dede. So wan sondro ati fasi no ben sori wawan gi den heiden. Ini na agersitori pe Jezus ben meki kon na krin san a ben wani taki foe de wan boen naaste, na leviet leki na priester ben wégri foe gi jepi na wan kompe-djoe di ben kisi mankeri, aladi wan Samariasma ben doe dati wel bakaten. — Luk. 10:29-37.

¹⁴ Ma ini Mattéus 18:17 Jezus no ben kan bedoel, dati en discipel ben moe wégri foe doe sani foe sori lobi gi sma te foe eksempre wan ongolokoe ben sa psa ofoe te wan tranga fanowdoe sani ben sa de. Jezus ben sori so wan switifasi gi son heidensma. A ben doe disi foe eksempre gi wan Syro-Fenicis oema. Aladi Jezus, en discipel nanga na oema ben èrkèn dati na situwasi foe en no ben de wan gewoon wan, foe di a ben de wan heiden oema èn Jezus ben seni go na den djoe, ma tokoe Kristus ben dresi en oemapikin (Matt. 15:21-28; Mark. 7:24-30). Jezus ben sori so wan sortoe lobi gi sma, di wan Romein legre-edeman ben begi en foe dresi wan lan knekti di ben abi hebi pen. Na legre-edeman ben taki dati a no ben froewakti, dati Jezus, wan djoe leriman, ben sa go ini en oso. Tokoe den „owroeman foe den djoe” ben begi Jezus tranga foe sori sari-ati fasi gi na warti heidensma disi èn disi a ben doe toe (Luk. 7:1-10; Matt. 8:5-13). Soboen, nanga san Jezus ben taki, dati wan sma ben de „leki wan sma foe den naatsi èn leki wan tolnaar”, a no ben tapoe dati sari-ati switi fasi no ben moe sori. San a ben bedoel dan?

„LEKI WAN TOLNAAR”

15. Fa den djoe ben loekoe èn ben behandel tolnaar?

¹⁵ Meki wi go loekoe pikinso fa den djoe ben e loekoe èn behandel tolnaar:

„Den ben loekoe den publicanen (tolnaar) foe na Njoen Testamenti leki toriman ofoe sma di fadon komoto na bribi, di no de krin foedi den abi foeroe foe doe nanga den heiden, èn di de makriki wrokosani foe na sma di e kwinsi trawan. Den ben poti tapoe wan lin nanga sondari, . . . nanga hoeroe . . . nanga den heiden. . . . Foedi den ben libi na densrefi abra, foedi maniri sma ben hori den farawe foe den, meki den wan enkri mati ofoe kompe foe den ben de na mindri den sma di, neleki densrefi, ben de paria (wan sma di den wai poti a wan sé).” — „Cyclopaedia” foe anoe foe M’Clintock èn Strong, Deel VIII, blz. 769.

Ja, Jezus arkiman ben sabi heri boen dati den djoe ini algemeen ben e komoto na a pasi foe tolnaar. Den djoe nanga bigi tegoe den ben abi pikinso zakelek kontakt nanga den, foe pai na lantimoni di a wèt ben aksi.

16, 17. Fa Jezus ben tjari ensrefi nanga son tolnaar?

¹⁶ „Ma”, so wan sma ben sa kan aksi, „Jezus ben de makandra nanga tolnaar?” We now, meki wi go ondrosoekoe den troe tori:

¹⁷ Leki „na Lam foe Gado, di e poeroe na sondoe foe grontapoe gwe”, Jezus ben de na leti gi ala sma, aladi moro foeroe a ben poti en prakseri tapoe den djoe ini a ten foe en grontapoe diniwroko (Joh. 1:29; 8:12; Jes. 42:1, 6, 7; Matt. 10:5, 6; 15:24). A ben de leki wan datra di ben gi jepi na ala djoe di ben abi en moro fanowdoe, nanga sondari leki hoeroe, droengoeman nanga tolnaar, di ben e gebroiki foeroe tron bidrigi sani. Mattéus Levi, wan veragti tolnaar, ben de na mindri den sma di ben teki tapoe wan boen fasi na njoen boskopoe foe ferloesoe di Jezus ben tjari kon. Mattéus ben kari Jezus kon na en oso foe wan njanjan, sodati Mattèus srefi nanga tra tolnaar di ben abi belangstelling ben kan jere foe den wondroe njoen waarheid (Luk. 5:27-32; 19:1-10). Disi ben de sma di ben sondoe sondro dati den ben sabi moro betre, ma di ben de klari foe doe sani, dati leki wan bakapisi foe dati, den sondoe foe den ben sa kan „figi poeroe”. — Tori foe den Apostel 3:19; Hebr. 9:7.

18. Foe sainde na fasi fa Jezus ben handri nanga son tolnaar no ben de na patron foe san a ben taki ini Mattéus 18:17?

¹⁸ Den moeiti foe Jezus foe gi wan kotoigi na tolnaar di „ben kon na en” èn „di ben waka baka en” no de wan patron foe na fasi fa sondari di no abi beraw ben moe behandel (Mark. 2:15; Luk. 15:1). Fa wi kan de séker foe disi? Aladi Kristus ben njan nanga den sortoe tolnaar disi, na apostel Paulus ben gi kristen sma na komando „srefi foe no njan” nanga den sondari di ben sluit foe na gemeente (1 Kor. 5:11). A de wan logis sani toe foe taki dati Jezus ben sori en discipel dati den ben moe handri nanga wan sma di ben doe ogri, ma di no ben abi beraw akroederi na fasi fa den ben loekoe tolnaar na a ten dati. Na vertaling foe R. F. Weymouth e taki: „Loekoe den precies soleki joe e loekoe wan heiden ofoe wan tolnaar.” — Teki gersi New International Version; The New English Bible.

FA DEN BEN LOEKOE ÈN BEHANDEL HEIDENSMA?

19. San na bijbel abi foe taki foe den fasi mindri djoe nanga no-djoe?

¹⁹ Den apostel di ben jere Jezus e taki san tanapoe ini Mattéus 18:17 ben de djoe èn den ben sabi dati den kondreman no ben moksi densrefi nanga den heiden. Na Wèt ben e meki wan difrenti a mindri djoe nanga heiden, san ben abi leki marki foe hori den djoe aparti foe den naatsi di ben lontoe den (Deut. 7:1-4; Num. 15:37-41; Ef. 2:11-14). Na a pisi ten foe na Pascha ini 33 G.T. den djoe no ben go ini na paleisi foe na Romein tiriman, „sodati den no ben sa kon doti” (Joh. 18:28). Èn na difrenti na mindri djoe nanga den Samariasma, di ben teki srefi na Pentateuch, ben de so bigi, dati wan oema na a fonten ini Samaria ben froewondroe dati Jezus ben aksi en watra „aladi a ben de wan djoe”. — Joh. 4:9.

20. San wi kan leri foe Petrus ondrofeni nanga Cornelius foe na fasi fa djoesma ben behandel sma foe den naatsi?

²⁰ Moro fara wi kan taki dati ini 36 G.T. Gado ben seni na apostel Petrus go na a Romein legre-edeman Cornelius, foe sori dati heiden di no ben besnij, ben kan teki leki erfgenaam foe na Kownoekondre. Ma Petrus ben taki gi Cornelius: „Joe sabi heri boen dati wan djoe no abi pasi foe go moksi nanga wan sma foe wan tra ras ofoe foe go na en” (Tori foe den Apostel 10:28). Den wortoe foe Petrus e sori o tranga na firi ben de na den djoe, dati wan bradafasi no ben kan de nanga wan sma foe den naatsi. Di boiti dati, a ben kon de bekenti dati Petrus ben go na Cornelius, dan son djoe kristen ben meki trobi, dati Petrus „ben go ini na oso foe den sma di no ben besnij èn ben njan nanga den”. Ja, djoesma ben feni en wan takroe sani foe de makandra nanga wan „sma foe den naatsi” èn njan nanga den. — Tori foe den Apostel 11:1-3; teki gersi Galaten 2:12.

21. San joe denki den wortoe foe Jezus wani taki dati wan sondari di no abi beraw de „leki wan sma foe den naatsi èn leki wan tolnaar”?

²¹ A so fasi den Boekoe e jepi wi foe froestan na rai foe Jezus foe behandel wan sma di doe ogri èn di no abi beraw, foedi a no ben wani arki na a gemeente „leki wan sma foe den naatsi èn leki wan tolnaar”. Efoe wi gebroiki na rai foe Kristus ini disi ten, dan disi séker no wani taki, dati wi e loekoe na sma di doe na ogri leki wan gemiddelde sma ini na gemeenschap, bikasi dati no ben sa agri nanga na fasi fa den discipel foe Jezus ben froestan Jezus wortoe. Wi kan froestan disi te wi ondrosoekoe moro rai ini den kristen Griki Boekoe, èn disi sa jepi wi foe bepaal wi presi ini den disten situwasi foe na troetroe libi, pe sma di sluit uit foe a kristen gemeente, de ini na tori.

[Foetoewortoe]

SAN DEN WORTOE WANI TAKI „LEKI WAN SMA FOE DEN NAATSI ÈN LEKI WAN TOLNAAR”

Den djoe ben wai komoto foe na pasi foe tolnaar leki paria

Den djoe no ben go ini na paleisi foe wan heiden tiriman

Petrus ben taki dati wan djoe „no abi pasi” foe go na wan heiden

Den djoe kristen ben seki dati Petrus ben njan nanga Cornelius

[Prenki na tapoe bladzijde 260]

Den djoe ben e komoto na a pasi foe tolnaar, di sma ben si leki sondari. A wan enkri zakelek kontakt di den ben abi nanga den ben de foe pai lantimoni di a wèt ben aksi.