Sori warderi gi den toe moro bigi demonstratie foe lobi

„Foe na sé foe wi, wi e sori lobi, foedi a ben lobi oen fosi.” — 1 JOHANNES 4:19.

1. Sortoe eksempre Jezus ben gi wi?

FA WI kan sori moro boen na warderi foe wi gi na bigi lobi di Jehovah Gado nanga Jezus Kristus ben sori gi wi? Wan prenspari fasi fa wi kan doe disi de foe tron wan bakaman foe Jezus di sondro foe weri ben gi kotoigi foe na nen èn na kownoekondre foe en Tata (1 Petrus 2:21). Sortoe eksempre Jezus ben gi wi? A ben doe disi ini den oso foe den sma, ini den djoe kerki, ini a tempel, tapoe den skoinsi sé foe den bergi èn na a se kanti foe Galiléa. Meki wi go loekoe négi difrenti fasi fa na wroko disi kande doe.

Na oso-foe-oso-activiteit

2. Fa joe kan horidoro ini na oso-foe-oso wroko?

² Na fosi fasi èn kande a moro aparti wan tapoe fa wi kan sori wi warderi de foe go oso-foe-oso nanga a boen noensoe foe Gado kownoekondre. Disi e aksi wan bigi fri foe taki sondro frede, bika nanga na activiteit disi alaten baka wi e kon langalanga foe tanapoe na fesi tra sma, a mindri soema foeroe sma de di e si oenoe leki lastiki sma. Lobi gi Gado nanga wi naaste sondro hoigri fasi de fanowdoe foe tan go doro-foe-doro, awinsi nofotron wi e kon na fesi foe mi-no-ke fasi èn atibron èn sma e behandel wi na wan sjen fasi ofoe wi e ondrofeni langalanga ferfolgoe. — Teki gersi nanga Ezechiël 3:7-9.

3. San na a bijbel fundamenti foe na oso-foe-oso-activiteit?

³ Na evangeliumtori pe den instructie skrifi foe Jezus gi en twarfoe apostel èn bakaten gi den sébitenti evangelium-prékiman, e sori krin dati den ben moesoe go oso-foe-oso te den ben e préki a boen njoensoe foe a kownoekondre (Mattéus 10:5-14; Lukas 10:1-7). Na ini Tori foe den Apostel 20:20 Paulus e ferteri dati a ben go oso-foe-oso. Sma ben tjari den wortoe disi kon na tapoe den herder fisiti di a ben tjari, ma vers 21 no e libi wi onseker ini a tori foe a activiteit tapoe san prakseri ben poti, bika Paulus ben taki moro fara: „Bika mi ben gi kotoigi finifini na den djoe èn na den Griki” — no na kristen brada nanga sisa — „foe a tori foe berow na Gado èn bribi na ini Masra Jesus.” Te wan owroeman e tjari herder fisiti, dan nofotron a no e fermane foe „abi berow na Gado èn bribi na ini Jezus”, ma e gi dek’ati na kompe-kristen foe abi moro foeroe warderi gi konmakandra ofoe gi na diniwroko, oefoe e jepi den nanga persoonlijk problema.

4. San e gi wi dek’ati foe teki prati na a oso-foe-oso-préki?

⁴ No wawan dati sowan sortoe fundamenti foe a bijbel de gi wi oso-foe-osowroko, ma ooktoe foe den froktoe foe den activiteit dati e kon na krin dati Jehovah blesi de na tapoe. Ija, „na waarheid e kisi reti nanga jepi foe en wroko” (Mattéus 11:19). Nofotron den sma di e go oso-foe-oso e si den krin bewijsi dati engel e tjari den go na sma di e angri foe dringi watra foe regtvaardikifasi. Na oso sma ben taki dati en leki wan man ofoe oema ben begi foe kisi jepi èn dati a fisiti foe a Kotoigi de a kon troe foe a begi dati.

5. Wi abi sortoe toemsi moi jepi gi wi oso-foe-oso-diniwroko, èn na tapoe sortoe difrenti fasi wi kan kisi jepi foe dati?

⁵ Fa na boekoe Tak-go-tak-kon nanga jepi foe a Bijbel de wan kefarlek boen jepi gi na velddienst foe wi! Na ini disi foeroe moi inleiding de gi bijbel takmakandra èn ooktoe boen bodoi foe boen foeroe tori foe a bijbel èn foe kerki. Abi na boekoe disi soboen alaten na joe, ma tan loekoe en ooktoe. Spesroetoe den pionier ben sori bigi warderi gi na warti velddienst jepi disi. Joe ben sa kan sori joe warderi gi na lobi foe Gado foedi oe e gebroiki na boekoe disi moro foeroe, èn nanga moro bigi doeltreffendheid?

6. Fa wi kan njan persoonlijk boen te wi e go oso-foe-oso nanga na Kownoekondreboskopoe?

⁶ Wi no mag frigiti dati persoonlek wi sa njan foeroe boen foe teki prati na oso-foe-oso-diniwroko. Efoe wi leki kristen e handri ini akroederi nanga wi bribi, dan a e kon moro krakti, efoe wi e taki nanga overtoigi dan wi égi overtoigi e kon moro tranga. Wi no kan ferteri tra sma foe wi howpoe sondro dati wi égi howpoe e kon moro faja. Te a e go foe den froktoe foe na jeje di skrifi na ini Galaciasma 5:22, 23, dan noti e go na fesi a teki prati geregeld na a oso-foe-oso-diniwroko. A moesoe de so, bika na bibel e djaranti wi: „Na sili di lobi prati sani nanga tra sma ensrefi sa kon fatoe, èn wan sma di e gi trawan watra foe dringi foeroe, ensrefi sa kisi ooktoe watra foe dringi foeroe.” — Odo 11:25.

Tjari gobaka

7, 8. Foe sortoe logis nanga praktis rede wi e tjari go baka?

⁷ Wan tweede fasi fa wi kan opo doe tapoe wan beon fasi tapoe a lobi di Gado nanga Kristus ben sori wi, de foe tjari gobaka go na den sma di ben sori na wan okasi na fesi belangstelling gi na Kownoekondreboskopoe. Paulus nanga Barnabas ben broko ede foe den sma na soema den ben préki gi (Tori foe den Apostel 15:36). Te joe loekoe en boen dan a de soso wan sani foe de consequent foe tjari gobaka. Te wi e gi kotoigi doro-foe-doro, na okasi ofoe na strati, dan wi e soekoe na den sma „di sabi a jeje nowtoe foe den” (Mattéus 5:3). A de krin dati a no nofo srefsrefi foe gi den te joe loekoe en boen wán grasi jeje watra ofoe wán pisi jeje brede. Efoe den wani foe go waka na pasi foe libi, dan den abi moro jepi fanowdoe.

⁸ Den fosi moeiti foe wi kan teki gersi nanga na prani foe waarheidsiri. Na soleki na apostel Paulus ben sori na ini 1 Korinte 3:6, 7 dan moro de fanowdoe. A no ben de nofo dati a ben prani. Den siri ben abi watra ooktoe fanowdoe én Apollos foe eksempre ben sorgoe na ini disi. Dan wi kan ferwakti dati Gado ben sa meki na siri gro èn ben sa meki froktoe. Na pisi disi foe na wroko wantoe sma e verwaarloos, èn tokoe wantoe sma e si en troetroe leki na moro makriki pisi foe na kristen diniwroko. Foe san-ede? Foedi den sna di wi e fisiti ben sori pikinso belanstelling kaba.

Hori osobijbelstudie

9. Foe san-ede joe moe poti en leki wan marki foe léi oso-bijbelstudi?

⁹ Efoe gobaka e tjari geregeld go na sma di abi belangstelling gi na Kownoekondreboskopoe, dan nofotron disi e meki wan osobijbelstudie kon — wan di foe dri fasi fa wi kan sori wi belangstelling. A kande troetroe a moro prisiri pisi foe wi diniwroko di e pai. Foe san-ede? Now, fa a de wan prisiri foe si sma e gro ini sabi èn warderi gi bijbel waarheid, e si den e tjari kenki kon ini den libi èn foe jepi den solanga te leki den doro a marki dati den gi densrefi abra foe doe a wani foe Gado èn foe teki dopoe! Den sortoe sma disi troetroe wi kan si leki wi jeje pikin èn wi leki den jeje papa nanga mama foe den. — Teki gersi nanga 1 Korinte 4:14, 15; 1 Petrus 5: 13.

10. Sortoe aprti eksempre e sori o warti a de foe léi oso-bijbelstudi?

¹⁰ Loekoe pikinso wan aparti eksempre. Wan zendeling di ben go oso-foe-oso tapoe wan Caribisch tabiki, ben kon ini kontakti nanga wan oena nanga man di ben de hippy èn na soema na oso no ben de netjes nanga ordelek srefsrefi. Tokoe den ben sori belangstelling. Na paar disi di no ben trow, ma di ben abi wel difrenti pikin ben teki wan bijbelstudi-jepi èn wan osobijbelstudi ben bigin nanga den. O moro na studi ben e go a fesi, o moro na oso èn den toe sma, papa nanga mama nanga den pikin foe den ben e kon loekoe moro boen. A no ben teki langa ofoe den toe sma ben aksi na zendeling foe trow den, sodati na pasi ben kan opo foe teki dopoe. Dan na njoen brada na wan boen dé ben meki a si en oto rijbewis nanga ala prisiri, na fosi-wan di oiti a ben kisi. Ija, bifo a ben tron wan Kotoigi foe Jehovah a no ben si na fanowdoe foe trow na lanti ofoe foe kisi wan rijbewijs, ma now a ben gi jesi na den wet foe Gado èn na di foe lanti.

Gi kotoigi na strati

11, 12. (a) Fa na bijbel e gi dek’ati foe abi wan prati na a gi kotoigi na strati? (b) Sortoe rede wi abi foe dati?

¹¹ Wan di foe fo fasi fa wi kan sori wi warderi gi san Gado nanga Kristus doe gi wi, de foe gi kotoigi na strati. Te wi abi prati na a wroko disi, dan na wan letterlek fasi wi e gi wisrefi abra foe meki Odo 1:20, 21 kontroe: „Na troe kon srefi e tan bari nanga tranga sten na strati. Tapoe den publiki pren dorodoro ai meki sma jere en sten. Na tapsé foe den woenjoewoenjoe strati ai bari.”

¹² Boen foeroe boen rede de foe ten prati geregeld na a pisi disi foe na Kownoekondreprékiwroko. Na ini foeroe gebied a e kon de moro moeilek foe miti den sma na oso. Den e teki prati na a wan ofoe tra vorm foe ontspanning ofoe den e wenkri ofoe de a wroko. Ooktoe foeroe sma e libi na ini flat — oso pe sma di e kon fisiti foe dorosé no kan kon inisé somaar ofoe pe sontron primisi de fanowdoe foe na waktiman foe mag waka go moro fara, foe no taki srefi foe den sma di e libi ini wan hotel. Ma gewoonlek sma de na strati foe si.

13. Sortoe bakapisi na gi kotoigi na strati sa abi? Verklari disi.

¹³ Wan owroeman ini den Verenigde Staten foe Amerkankondre e léi tapoe a momenti disi fo osobijbelstudi na sma nanga soema a ben kon ini kontakti foe a fositron ini a gi kotoigi na strati. A no de foe taki, dati a no e tanapoe drape en wawan, sondro foe taki wan sani (aladi na ini son kondre disi de a wan enkri fasi di a wet e gi pasi). Na presi foe dati nanga wan switi lafoe na en fesi èn nanga wan prisiri sten ai waka go a tapoe den sma di tanapoe tiri a tapoe wan presi e wakti wan bus ofoe e waka safrisafri. ’A taki foe en de switi, moksi nanga sowtoe’, èn a e sori wan boen fasi foe si sani srapoe ini a tori foe na fasi tapoe fa a moe taki nanga difrenti sma (Kolossesma 4:5, 6; 1 Petrus 3:15). No wawan a ben man opo osobijbelstudi nanga sowan sortoe fasi foe gi kotoigi na strati, ma a ben si ooktoe winimarki na ini a prati foe lectuur na foeroe sma. Ija, te joe weri krosi èn e loekoe krin èn makandra nanga wan switi lafoe na joe fesi nanga wan fasi foe taki fri sondro frede, dan na strati prékiwroko foe joe sa de doeltreffend srefsrefi. Te joe loekoe en boen dan féfi Kotoigi no so langa psa kaba ini publiki wenkri centra ben prati moro leki 30 eksemplaar foe na boekoe Libi — Fa a doe kon? Nanga jepi foe evolutie ofoe foedi Gado meki sani?, foeroe foe den na sma di ben sdon ini den oto.

Gi kotoigi na okasi

14. Fa na warde foe gi kotoigi na okasi e kon na krin?

¹⁴ Wan di foe féfi fasi fa wi kan sori warderi gi na bigi lobi gi Gado nanga Kristus ben sori wi, de foe gi kotoigi na okasi. Fa na fasi disi nofotron ben de doeltreffend, foe feni sma di e angri èn e dré-watra foe regtvaardikifasi èn foe prati lectuur! A de seker wan fasi nanga jepi foe san wi kan poti prakseri tapoe na rai di wi e feni na ini Efese 5:15, 16 ’foe bai na joisti ten gi wisrefi’. Wan zendeling ben bigin wan takmakandra nanga wan tra sma di ben e rij nanga en ini wan taxi. Na man sori belangstelling, gobaka ben tjari go èn wan bijbelstudi ben opo. Now a man dati de wan kristen owroeman. Na wan tra pe wan owroeman ben bigin wan takmakandra nanga wan oema di soleki bakaten kon a krin ben de bezig foe kenki en fasi foe begi foe trow nanga wan djoe man. A ben wan sabi soema ben libi fosi, Mozes, Noach, David, èn zo moro fara. A owroeman ben ferteri en dati a ben abi na Bijbeltori-boekoe fanowdoe, na ini san bijbeltori ben e behandel na ini na volgorde foe fa a ben psa ini a ten. Aladi a ben de wan freemdesma gi a oema, tokoe sondro draidrai a ben gi en na nen foe en nanga en adres nanga na bijdrage di ben de fanowdoe sodati a ben kan seni a boekoe gi en nanga jepi foe post.

15. San e jepi wi foe hori wi ai opo gi okasi foe gi kotoigi na okasi?

¹⁵ Sontron a kan psa dati wi, foedi wi e frede foe wan behandeling di no switi e draidrai foe bigin wan takmakandra nanga wan sma di sdon na wi sé na a pisten di wi e rij. Ma o foeroe tron a no e psa dati wi e kisi pai foeroe efoe wi tjari na dek’ati konmakandra foe doe en wel! Dati wi e warderi a boen fasi foe Gado èn froestan dati sma abi fanowdoe foe na waarheid, sa jepi wi foe abi na fanowdoe dek’ati. Ija, hori na ini prakseri dati „Gado no gi wi wan jeje foe frede, ma wan jeje foe krakti, lobi nanga foe gi wisrefi tranga leri”. — 2 Timóteus 1:7, Willibrordvertaling.

Gi freemdesma wan switi kon

16. Foe san-ede wi moe de esesi foe si freemde sma di e fisiti oen Kownoekondrezaal?

¹⁶ Wan foe den di foe siksi fasi fa wi kan sori dati wi de grantangi na Gado nanga Kristus de foe bari wan switi kon gi freemde sma di e fisiti wi Kownoekondrezaal. Lobi gi na naaste moe poesoe wi foe si ibri freemde sma esesi di e fisiti a presi foe wi foe anbegi. Meki wi feti a baka foe meki a firi ensrefi switi èn gi en na firi taki a de na mindri mati di abi opregti belangstelling gi en jeje tanboen. Seker a de so dati moro leki soso gridi foe sabi sani tjari en kon drape. A kande dati troetroe a e angri èn e dréwatra foe regtvaardikifasi. Opregti belangstelling di wi abi gi en, kan meki dati wi kan bigin wan oso bijbelstudi nanga en èn kan jepi en tapoe a pasi foe libi (Mattéus 5:3, 6; 7:13, 14). Efoe joe loekoe en boen dan sowan sani nofotron e psa. Wan zendeling foe na fosi klas foe na Wachttoren-Bijbelskoro Gilead ben taki dati den 2 moro boen bijbelstudie di ben gersi taki den o tron wan sani ben lei na sma di foe a fositron a ben miti ini a Kownoekondrezaal.

Gi kotoigi nanga a skrifi foe brifi

17. Sortoe bakapisi kan kon foe a gi kotoigi nanga jepi foe a skrifi foe brifi?

¹⁷ Wan di foe sébi fasi fa wi kan gi kotoigi leki wan sori foe na lobi di Gado nanga Kristus ben sori wi de foe skrifi brifi. Nofotron den sma di e gebroiki na fasi disi foe gi kotoigi, e kisi wantoe brifi baka pe sma e sori taki den de grantangi. Disi de wan fasi di wantoe foeroeten bedinari e gebroiki di kan de foe skinfasi ede den no man go oso-foe-oso foe wan pisten. Loekoe na eksempre pikinso di e kon now: Wan oso-famiri nanga twarfoe pikin ben de. Wan dé a papa ben kon si di a ben doro oso dati wan boi di ben lobi wan foe en oemapikin ben soetoe 5 foe den pikin kiri. A ben soekoe trowstoe na den kerki fesiman foe na kristenheid foe soso. Ne a kisi wan boen dé wan brifi foe wan freemdesma, wan Kotoigi di ben lési foe en rampoe ini koranti èn di ben wani trowstoe en. Wan waarheid-boekoe ben poti na ini na brifi. Disi ben de precies san a man ben soekoe. Now en ooktoe de wan faja Kotoigi.a

Gi kotoigi nanga jepi foe telefon

18, 19. Sortoe tra fasi foe préki na boen njoensoe, son sma e feni doeltreffend èn foe san-ede?

¹⁸ Na okasi di de foe meki gebroiki foe telefon ini a préki foe na Kownoekondre de wan di foe aiti warti fasi di de foe gi kotoigi. Moro nanga moro disi e sori taki a de wan switi èn doeltreffend fasi foe gi kotoigi. Moro nanga moro Kotoigi e kisi bekwaamheid ini a fasi disi foe a diniwroko, pe foeroe positief sé de na ini. Nanga disi wi e miti nanga boen foeroe sma di wi no e miti nanga jepi foe oso foe oso activiteit. Son sma kon si dati na préki disi nanga jepi foe telefon te ai psa na tapoe wan fasi pe wan sma e sori taki ai si sani boen — nanga wan switifasi, nanga tact èn bekwaam, srefi sma e teki en moro boen leki te wan sma fisiti den sortoe sma disi na oso.

¹⁹ Wan Japan gemeente ini wan kondre pe den e taki Ingrisitongo e gebroiki na telefonboekoe leki wan pisi foe a gebied foe den. Prékiman e bel sma di abi wan Japan nen èn efoe belangstelling sori, den e seti sani foe fisiti a sma dati. Tapoe a fasi dati den ben opo letterlek tintin tron bijbelstudi.

Gi kotoigi nanga wan boen fasi foe waka nanga libi

20, 21. Sortoe boen krakti wi waka nanga libi kan abi? Verklari disi?

²⁰ Wan di foe négi fasi fa wi kan tjari grani na Gado de nanga jepi foe wi boen waka nanga libi. Wan koranti skrifiman foe Rusland taki wan dé dati na toemsi boen waka nanga libi foe wi de a moro boen préki foe wi. Te joe loekoe en boen dan den koranti, radio nanga so moro fara nofotron baka ben gi komentaar tapoe na hei moraal foe Jehovah Kotoigi. Ini wan tori foe koranti ben tanapoe: „Sma kan kon sabi Jehovah Kotoigi heri boen leki den moro eerlek sma ini a Bondsrepubliek Doisrikondre.” Wan oemapikin ini wan oso-famiri foe Jehovah Kotoigi ben tjari na a bigin foe en njoen skoro-jari na Skoro-brochure gi en onderwijzer. A no ben wani teki en srefsrefi èn ben taki dati a no wani abi noti foe doe nanga Kotoigi. Ma baka wan pisten na toemsi boen waka nanga libi foe na oemapikin ben sorgoe dati a ben prijse en na ala fasi èn dati a fasi foe en nanga den Kotoigi ben kenki krinkrin. Na asrefi fasi a brifi ben de di wan papa nanga mama di alatoe ben de Kotoigi foe Jehovah ben kisi foe na onderwijzer foe den pikin foe den: „Den pikin foe joe e teki presi foe na marki di no kan figi poeroe foe na boen fasi foe na overtoigi foe joe bribi.”

²¹ Den sma di de ini na grontapoe, no kan taki wan boen sani foe Jehovah Kotoigi sondro foe gi Gado nanga Kristus grani, So a moe de. Jezus no ben taki dati wi moe meki wi leti skijn sodati den sma kan si wi boen wroko èn kan gi grani na wi herel Tata? (Mattéus 5:16). Ija, nanga wi toemsi boen waka nanga libi wi kan moi na waarheid (Titus 2:10). Dati wi toemsi moi waka nanga libi e gi Gado nanga Kristus grani èn e jepi trawan foe go waka na pasi foe libi, de seker wan krakti rede foe go broko wi ede srefsrefi foe en dati wi waka nanga libi alaten de sondro fowtoe.

22. Tapoe sortoe wan foe den fasi foe sori wi warderi wi sa go poti wisrefi èn foe san-ede?

²² Soleki wi ben si, dan foeroe fasi de fa wi kan sori wi warderi gi ala san Jehovah nanga Jezus Kristus doe gi wi, spesroetoe ini a tori foe den bigi demonstratie foe den foe lobi. Makandra nanga dati wi kan sori wi lobi gi wi naaste. — Markus 12:30, 31.

23. San de a lasti wan foe den fasi fa wi kan sori warderi gi Gado nanga Jezus?

²³ Meki wi no frigiti te foe kaba dati wi kan sori wi warderi gi den toe moro bigi demonstratie foe lobi foedi wi e hori na Avondmaal foe Masra. Tapoe na lasti neti di Jezus ben de a grontapoe leki libisma, a ben poti wan alajari memre-njanjan, de ben de foe brede nanga win — symbool foe en skin nanga en broedoe. A ben gi a komando dati na fesa disi foe memre en wi ben moe hori en (1 Korinte 11:23-26). A jari disi na Avondmaal foe Masra e fadon tapoe sonde 1 april baka te son dongo. Na a heri grontapoe Jehovah Kotoigi sa konnakandra foe gi jesi na a komando foe Jezus. No misi na konmakandra disi!

[Foetoewortoe]

Wan toe aksi foe loekoe san oen ben leri

◻ Fa èn pe Jezus ben gi kotoigi?

◻ Tapoe sortoe fasi te wi e waka a baka Jezus wi kan sori warderi gi a bigi lobi foe Gado?