Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • w90 1/11 blz. 16-21
  • Na saka di wi e saka wi srefi ondro den hei tirimakti e anga fu tra sani

Felem no de na a pisi disi.

Sorry, wan sani no go bun di wi pruberi fu drai a felem.

  • Na saka di wi e saka wi srefi ondro den hei tirimakti e anga fu tra sani
  • A Waktitoren—A e taki fu Yehovah Kownukondre 1990
  • Edeprakseri
  • A srefi sortu tori
  • „Fu dati-ede yu e pai belasting tu”
  • „Gi ibriwan san a musu kisi”
  • „Frede” nanga „grani”
  • A saka fu yu srefi e anga fu tra sani
  • „Gi Gado yesi leki tiriman”
  • „Safri-atifasi nanga dipi lespeki”
  • A kresten fasi foe si tirimakti
    A Waktitoren—A e taki fu Yehovah Kownukondre 1994
  • Yu musu pai belasting-moni?
    A Waktitoren—A e taki fu Yehovah Kownukondre 2011
  • Na kresten luku tapu den hei tirimakti
    A Waktitoren—A e taki fu Yehovah Kownukondre 1990
  • Fu San Ede A De Prenspari fu Lespeki Sma Di Abi Frantwortu Posisi?
    A Waktitoren—A e taki fu Yehovah Kownukondre 2000
Moro sani
A Waktitoren—A e taki fu Yehovah Kownukondre 1990
w90 1/11 blz. 16-21

Na saka di wi e saka wi srefi ondro den hei tirimakti e anga fu tra sani

„Fu dati-ede wan tumusi fanowdu reide de gi yu fu saka yu srefi.” — ROME SMA 13:5.

1. Sortu muilek ondrofeni Yehovah Kotoigi ben psa na den anu fu den nazi hei tirimakti, èn disi ben de so fu di den „ben du san ogri”?

NA TAPU 7 yanuari 1940, Franz Reiter nanga feifi tra yongu Oostenrijk sma ben kisi dedestrafu nanga yepi fu guillotine. Den ben de Bibelforscher, Yehovah Kotoigi, èn den ben dede fu di den no ben kan tyari en kon ini akruderi nanga den konsensi fu teki fetisani go feti gi na Reich fu Hitler. Reiter ben de wan fu den dusundusun Kotoigi di dede ini Na Di Fu Tu Grontapufeti fu na bribi fu den. Furu trawan moro ben frudrage langa yari na ini concentratie kanpu. Ala den sma disi ben nyanpina fu „na feti-owru” fu na hei tirimakti fu den nazi fu di den „ben du san ogri”? (Rome sma 13:4). Kwetikweti! Den tra wortu fu Paulus e sori taki den kresten disi ben gi yesi na den kobot fu Gado na ini Rome sma kapitri 13, awansi den ben nyan pina fu na anu fu na tirimakti!

2. San na a tumusi fanowdu reide fu saka wi srefi na ondro den hei tirimakti?

2 Na ini Rome sma 13:5 na apostru e skrifi: „Fu dati-ede wan tumusi fanowdu reide de gi yu fu saka yu srefi, no wawan fu na atibron ede, ma so srefi fu yu konsensi ede.” A fesi fu disi Paulus ben taki taki a tyari di na tirimakti ben e tyari „na feti-owru”, ben de wan bun reide fu saka na en ondro. Ma now a e gi wan moro krakti reide: yu konsensi. Wi e meki muiti fu dini Gado „nanga wan krin konsensi” (2 Timoteyus 3:1). Na beibri e taigi wi fu saka wi srefi na ondro den hei tirimakti, èn wi e gi yesi fu di wi wani du san de yoisti na ini Gado ai (Hebrew sma 5:14). Iya, wi konsensi di oefen nanga yepi fu beibri e buweigi wi fu gi yesi na den tirimakti srefi te no wan sma de drape fu luku wi. — Teki gersi Preikiman 10:20.

„Fu dati-ede yu e pai belasting tu”

3, 4. Sortu nen Yehovah Kotoigi abi, èn fu san-ede kresten musu pai belasting?

3 Wantu yari psa kba sekiseki ben de na ini Nigeria fu na pai fu belasting. Difrenti sma ben lasi den libi, èn den tirimakti ben kari na yepi fu na legre. Den srudati ben kon na ini wan Kownukondrezaal pe wan konmakandra ben hori èn den ben wani sabi san na a marki fu na konmakandra. Di den ben kon yere taki a de wan beibri-studi konmakandra fu Yehovah Kotoigi, dan na ofsiri di ben abi na frantiwortu ben gi den srudati na komando fu gwe èn ben taki: „Yehovah Kotoigi a no sma di e sutu faya ini na tori fu belasting.”

4 Den Kotoigi disi fu Nigeria ben abi na nen taki den ben libi ini akruderi nanga Paulus wortu: „Bika fu dati-ede unu e pai belasting tu; bikasi den na Gado publiki dinari, di doronomo e dini na marki disi” (Rome sma 13:6). Di Yeises ben gi na lin: ’Pai caesar baka san na fu caesar’, a ben e taki fu na pai fu belasting (Mateyus 22:21). Kondre tirimakti e sorgu fu pasi, yepi fu skowtu, fu bibliotheek, fu transport sistema, fu skoro, fu postdienst, èn fu furu sani moro ete. Furutron wi e meki kobroiki fu den seti disi. A de soso wan yoisti sani taki wi musu pai fu den nanga yepi fu wi belasting.

„Gi ibriwan san a musu kisi”

5. San den wortu „gi ala sma san den musu kisi” wani taki?

5 Paulus e go moro fara: „Gi ibriwan san a musu kisi: na en di e aksi fu na belasting na belasting; na en di e aksi fu na edemoni, na edemoni; na en di e aksi fu frede, na frede dati; na en di e aksi fu grani, na grani dati” (Rome sma 13:7). Na wortu „ibriwan” wani taki tu ibri tirimakti fu kondre di de Gado publiki dinari. No wan yu kan puru na ini. Srefi efu wi e libi ondro wan politiek seti di wi srefi no lobi, toku wi e pai belasting. Efu na ini a kondre pe wi e libi relisi no abi fu pai belasting, dan den gemeente kan nyanbun fu dati. Èn neleki tra borgru, kresten kan meki kobroiki fu ala seti fu wet di meki fu no pai moro belasting leki san poti fu den pai. Ma nowan enkri kresten musu pruberi fu dukrun komoto fu no pai belasting na wan fasi di no de akruderi na wet. — Teki gersi Mateyus 5:41; 17:24-27.

6, 7. Fu san-ede wi musu pai belasting srefi efu a moni e kobroiki fu pai wan sani di wi no e agri nanga dati ofu srefi efu na tirimakti e frufolgu wi?

6 Ma kon meki wi taki now, taki wan belasting no e sori regtfardiki. Ofu efu wan pisi fu na belastingmoni e kobroiki now pikinso gi a pai fu wan sani di wi no e agri nanga en, so leki abortus sondro fu pai, brudu bank, ofu programa di no e akruderi nanga na prakseri fu wi ini na tori fu neutraliteit? Dan ete wi e pai ala wi belasting. Na a tirimakti musu tyari na frantiwortu fu na fasi fa a e kobroiki na belastingmoni. Wi no kisi na komando fu krutu na tirimakti. Gado na a „Krutuman fu grontapu” èn na en eigi ten a sa aksi den tiri frantiwortu fu na fasi fa den meki kobroiki fu na tirimakti fu den (Psalm 94:2; Yeremia 25:31). Wi e pai wi belasting te leki a de so fara.

7 San efu na tirimakti e frufolgu wi? Dan toku ete wi e pai belasting fu den aladei wroko di den e du gi wi. Fu den Kotoigi di ben ondrofeni frufolgu na ini wan Afrikan kondre, na Examiner di e kon a doro na ini San Francisco ben taki: „Yu ben sa kan si den leki borgru di de wan moderi. Den e pai den belasting kotrow leki wan prekti, den e sorgu gi siki sma èn den e feti nanga na man di sma no man leisi nanga skrifi.” Iya, den Kotoigi dati di ben kisi frufolgu ben pai den belasting fu den.

„Frede” nanga „grani”

8. San na a „frede” di wi e gi na a tirimakti?

8 Na „frede” na ini Rome sma 13:7 a no wan lagi fasi fu frede ma na presi fu dati, wan lespeki gi tirimakti fu kondre, wan frede fu psa na wet fu en. Na lespeki disi e sori fu na posisi di de ini a tori, no alaten fu na sma ede di abi na posisi. Te na beibri e taki na wan profeiti fasi fu na keisri Tiberius fu Rome, a e kari en „wan sma di de fu wisiwasi” (Danièl 11:21). Ma en ben de na keisri, èn na so wan fasi wan kresten ben musu frede en èn gi en grani.

9. San na wantu fasi fa wi e sori tirimakti fu libisma grani?

9 Fu na sori fu grani wi e hori faste na a kobot fu Yeises fu no gi titel di abi den fondamenti na tapu kerki posisi (Mateyus 23:8-10). Ma te a abi fu du nanga tirimakti fu kondre, dan wi de nanga ala prisiri fu kari den nanga ibri sortu titel di den e aksi kande fu gi den grani. Paulus ben kobroiki den wortu „Yu Excellentie” di a ben e taki nanga den granman fu Rome (Tori fu den Apostru 26:25). Danièl ben kari Nebukadnezar „mi Masra” (Danièl 4:19). Na ini na ten disi kresten e kobroiki kande wortu so leki „Edelachtbare” ofu „Yu Mayesteiti”. Den sa opo tanapu kande te wan krutuman e waka kon na ini na krutuzaal ofu sa boigi na wan lespeki fasi na fesi wan tiriman efu dati na a gwenti.

A saka fu yu srefi e anga fu tra sani

10. Fa Yeises ben meki kon na krin taki skotu de na san tirimakti fu libisma kan aksi fu wan kresten?

10 Fu di Yehovah Kotoigi e saka den srefi na ondro tirimakti fu libisma, dan fu san-ede Franz Reiter nanga so furu trawan ben musu pina? Fu di a saka di wi e saka wi srefi e anga fu tra sani èn na tirimakti no e erken alaten taki na beibri e poti den skotu fu san den kan aksi. Efu na tirimakti e aksi wan sani di de kontrari wan kresten konsensi di oefen, dan a e abra na skotu fu en di Gado poti gi en. Yeises ben meki wi frustan disi di a ben taki: „Pai keisri . . . baka san na fu keisri, ma Gado san na fu Gado” (Mateyus 22:21). Efu keisri e aksi san na fu Gado, wi musu erken taki Gado abi na fosi reti.

11. Sortu gronprakseri, di e sori taki skotu de san wan tirimakti fu libisma kan aksi, sma e teki na ala sei?

11 Dati na wan bosroiti di e nyan a makti di wan sma abi na ondro ofu di de verradelijk? Kwetikweti. Te yu e luku en bun, a de a bradi di a gronprakseri kon moro bradi èn di moro furu fu den nâsi di kisi leri e erken. Ini na di fu tinafeifi yarihondro wan seiker sma, Peter von Hagenbach, ben kon na fesi krutu fu di a ben poti wan ogri ati tiri na ini a kontren fu Europa pe en ben abi na tirimakti. A opo di a ben opo taki gi en srefi taki a ben du nomo san en masra, na hertog fu Bourgondië ben komanderi en, den no ben teki leki wan sani di leti. Na prakseri taki wan sma di e du ogri-ati sani, no e tyari na frantiwortu efu a e du den sani di wan hei tirimakti komanderi, ben tyari kon wan tu leisi na fesi fu sensi a ten dati — moro spesrutu fu na sei fu nazi orloku-ogriman a fesi na International Srudati Krutu na ini Neurenberg. Na prakseri dati den ben gwenti fu fruklari taki a no leti. Na Internationaal Srudati Krutu ben taki ini en strafu di a ben leisi: „Sma abi internationaal plekti di de moro hei leki nationaal plekti fu gi yesi di aparti tiri kan poti gi den.”

12. San na wantu beibri eksenpre fu futuboi fu Gado di ben weigri fu gi yesi na sani di tirimakti ben aksi èn di no ben de redelijk?

12 Gado dienstknekti alaten erken taki skotu de na a saka di den musu saka den srefi na ondro hei tirimakti fu den konsensi ede. Na ini a pisiten di Moses ben gebore na ini Egypte, Farao ben gi tu Hebrew vroedvrouw (wan umasma di e kon yepi te wan pikin musu gebore) na komando fu kiri ala nyun gebore Hebrew boi. Ma den vroedvrouw ben hori den beibi na libi. A ben fowtu fu den fu no ben gi yesi na Farao? Nono, den ben waka baka na konsensi fu den di Gado gi den èn Gado ben blesi den fu dati (Exodus 1:15-20). Di Israèl ben de na ini katibo na ini Babilon, Nebukadnezar ben aksi tranga den hei lantiman fu en, pe yu ben abi na ini den Hebrew sma Sadrak, Mesak, nanga Abednego, fu boigi na fesi wan popki di a ben poti na ini na lagi kontren fu Dura. Den dri Hebrew man ben weigri. Den ben du fowtu? Nono, fu di a gi yesi na a komando fu na kownu ben sa wani taki fu no gi yesi na a wet fu Gado. — Exodus 20:4, 5; Danièl 3:1-18.

„Gi Gado yesi leki tiriman”

13. Sortu eksenpre den fosi kresten ben gi ini na afersi fu na gi yesi na hei tirimakti san e anga fu tra sani?

13 Na a srefi fasi, di den dyu tiriman ben gi Petrus nanga Yohanes na komando fu stòp preiki fu Yeises, den ben piki: „Krutu gi unu srefi efu a regtfardiki na ini Gado ai fu arki unu moro leki Gado” (Tori fu den Apostru 4:19; 5:29). Den no ben kan tapu den mofo. Na tijdschrift The Christian Century e poti prakseri tapu ete wan tra bosroiti di den fosi kresten ben teki akruderi den konsensi: „Den fosi kresten no ben dini ini na legre. Roland Bainton e taki taki ’fu bigin nanga na kba fu na pisiten fu na nyuntestamenti te doro na tin yari fu 170-180 A.D. no wan enkri buweisi de taki kresten ben dini na ini a legre’ (Christian Attitudes Toward War and Peace [Abingdon, 1960], blz. 67, 68). . . . Swift e taki taki Yustinus Martyr ’ben teki en leki wan sani di e taki fu en srefi taki kresten ben kibri den srefi fu ogridu’.”

14, 15. San na wantu beibri gronprakseri di e tiri na gi yesi di den fosi kresten ben gi yesi na tirimakti fu libisma, san ben anga fu tra sani?

14 Fu san-ede den fosi kresten no ben dini leki srudati? Ibriwan fu den ben stuka Gado Wortu nanga wet finifini èn ben teki en eigi bosroiti tapu na fondamenti fu en konsensi di oefen nanga yepi fu na beibri. Den ben de neutraal, „no wan pisi fu grontapu”, èn a neutraal fasi fu den ben tapu den fu teki wan sei ini den kesekese fu na grontapu disi (Yohanes 17:16; 18:36). Boiti fu dati, den ben de fu Gado (2 Timoteyus 2:19). Lasi den libi gi lanti ben sa wani taki taki den ben gi keisri san ben de fu Gado. Morofara, den ben de wan pisi fu wan bradafasi a mindri ala nâsi di tai kon makandra ini lobi (Yohanes 13:34, 35; Kolose sma 3:14; 1 Petrus 4:8; 5:9). Den no ben kan teki nanga wan bun konsensi wapen go feti nanga a tyans fu kiri wan konpe kresten.

15 Boiti fu dati, kresten no ben kan teki prati na kerki kobroiki di ben pôpi so leki na anbegi fu na keisri. A bakapisi ben de taki sma ben si den leki „freemde èn kofarlek sma, èn na tra pisi fu a pipri, a no de fu taki, ben tanapu kontrari den èn no ben frutrow den” (Still the Bible Speaks, fu W. A. Smart). Aladi Paulus ben skrifi taki kresten ’ben musu gi frede na a sma di ben aksi fu na frede’, toku den no ben frigiti na moro bigi frede ofu lespeki gi Yehovah (Rome sma 13:7; Psalm 86:11). Yeises srefi ben taki: „No kon frede den di e kiri na skin ma no kan kiri na sili; ma frede na presi fu dati en di kan pori èn sili èn skin na ini Gehenna.”—Mateyus 10:28.

16. (a) Na tapu sortu kontren kresten musu wegi go-kon finifini na saka di den musu saka den srefi na ondro tirimakti fu libisma? (b) San na faki na tapu bladzijde 20 e prenki?

16 Leki kresten wi e miti nanga den sortu tyalensi disi ini na ten disi. Wi no kan teki prati na no wan enkri disiten fasi fu afkodrei — efu a e go now fu a meki fu wan gebaar di yu kan teki gersi nanga anbegi gi wan popki ofu sinbôl ofu a gi grani fu frulusu na wan sma ofu organisâsi (1 Korente sma 10:14; 1 Yohanes 5:21). Èn neleki den fositen kresten wi no kan degedege ini na tori fu wi kresten neutraal fasi. — Teki gersi 2 Korente sma 10:4.

„Safri-atifasi nanga dipi lespeki”

17. Sortu rai Petrus ben gi na den sma di ben pina fu den konsensi ede?

17 Na apostru Petrus ben skrifi fu wi bosroiti di teki akruderi wi konsensi èn ben taki: „Efu wan sma, fu na konsensi ede na fesi fu Gado, e horidoro na ondro sari sani èn e pina na wan onregtfardikifasi, dan disi de wan prisiri sani” (1 Petrus 2:19). Iya, a de wan prisiri sani gi Gado te wan kresten tanapu steifi aladi frufolgu de, èn boiti fu dati a abi na wini taki a bribi fu na kresten e kon tranga èn e kon soifri (Yakobus 1:2-4; 1 Petrus 1:6, 7; 5:8-10). Petrus ben skrifi so srefi: „Efu unu musu pina fu regtfardikifasi ede, dan unu de koloku. Ma no frede a sani di den e frede èn no kon bruya tu. Ma santa na Krestes leki Masra na ini yu ati, de alaten klariklari fu opo taki gi yu srefi a fesi ibriwan sma di e aksi fu yu wan reide fu na howpu di de na ini yu, ma du disi nanga safri-atifasi makandra nanga dipi lespeki (1 Petrus 3:14, 15). Fu tru bun rai!

18, 19. Efu na tirimakti e poti skotu gi na fri di wi abi fu anbegi Gado dan fa wan fasi fu dipi lespeki nanga redelijk-fasi kan de wan yepi?

18 Te frufolgu e opo ede kon, fu di na tirimakti e frustan na kresten bosroiti na wan fowtu fasi ofu fu di kerki tiriman fu na krestenheid e gi den tirimakti wan fowtu prakseri suma na Yehovah Kotoigi, dan na druk kan kon meki lekti kande te wi meki den tirimakti kon sabi san de tru. Fu di wan kresten e sori safri-atifasi nanga dipi lespeki meki a no e feti baka na skinfasi nanga den frufolguman. Ma a e kobroiki ibri yepisani fu a wet di de fu opo taki gi na bribi fu en. Baka dati a e libi na afersi na ini Yehovah anu. — Filipi sma 1:7; Kolose sma 4:5, 6.

19 Dipi lespeki e buweigi wan kresten tu fu go so fara leki a kan ini na gi di a e gi yesi na a tirimakti, sondro fu du en konsensi ogri. Efu fu eksenpre den e tapu den gemeente konmakandra, dan kresten sa feni wan fasi di sma no sa si esi-esi fu tan nyan na a tafra fu Yehovah. Na Moro Hei Tirimakti, Yehovah Gado, e taigi wi nanga mofo fu Paulus: „Meki wi luku makandra fu gi deki-ati fu sori lobi èn tumusi bun wroko, fu no libi den konmakandra fu wi, so leki fa son sma abi na gwenti” (Hebrew sma 10:24, 25). Ma den sortu konmakandra dati kan hori sondro fu sma si dati. Srefi efu soso wantu sma de drape, wi kan abi na frutrow taki Yehovah e blesi den sortu seti dati. — Teki gersi Mateyus 18:20.

20. Fa kresten kan handri efu den e tapu na publiki preiki fu na bun nyunsu?

20 Na so son tirimakti tapu na publiki preiki fu na bun nyunsu. Kresten di e libi na ondro den tirimakti dati, e memre taki nanga yepi fu Yeises srefi na Moro Hei Tirimakti ben taki: „Fosi na bun nyunsu [musu] preiki na ini ala nâsi” (Markus 13:10). Fu dati-ede meki den e gi yesi na a Moro Hei Tirimakti, awinsi san disi e kostu den. Pe a ben kan tu, den apostru ben preiki na publiki èn oso fu oso, ma tra fasi de tu fu miti sma, so leki okasi preiki (Yohanes 4:7-15; Tori fu den Apostru 5:42; 20:20). Furu tron den tirimakti sa meki a preikiwroko du sondro fu muilek dati efu soso na beibri e kobroiki — san e poti krakti a tapu a fanowdu fu ala Kotoigi kisi bun skoro ini a taki-go-taki-kon nanga yepi fu den Buku. (Teki gersi Tori fu den Apostru 17:2, 17.) Te kresten de fri èn sondro frede, ma toku na wan lespeki fasi, dan den kan feni furu tron fasi fu gi Yehovah yesi sondro fu kari na atibron fu den hei tirimakti kon na den tapu. — Titus 3:1, 2.

21. Efu keisri e frufolgu kresten na wan tumusi ogri-ati fasi, sortu fasi fu handri kresten musu teki?

21 Ma sontron den tirimakti e frufolgu den kresten sondro sari-atifasi. Dan nanga wan krin konsensi wi kan hori doro wawan fu du san yoisti. Na yongu Franz Reiter ben tanapu na fesi a teki fu wán fu den tu sei: fu degedege ini a tori fu en bribi ofu fu dede. Fu di a no ben kan stòp fu anbegi Gado, meki nanga deki-ati a ben waka go miti en dede. Na neti bifo a ben dede, Franz ben skrifi en mama: „Den sa kiri mi tamara mamanten. Gado tranga mi, so leki fa dati ben de alaten nanga tru kresten ini den ten di ben psa . . . Efu yu tan stanfaste te na dede, wi sa miti baka ini na opobaka.”

22. Sortu howpu wi abi, èn fa wi musu handri na ini na pisiten disi?

22 Wan dei na heri libismafamiri sa de na ondro soso wán wet, na di fu Yehovah Gado. Te na a ten dati, wi musu hori den seti fu Gado nanga wan bun konsensi èn tan hori a saka di wi e saka wi srefi na ondro den hei tirimakti, wan saka fu wi srefi di e anga fu tra sani, aladi na a srefi ten wi e gi yesi na wi Soeverein Masra Yehovah ini ala sani. — Filipi sma 4:5-7.

Yu kan memre disi ete?

◻ San na a tumusi fanowdu reide fu saka wi srefi na ondro den hei tirimakti?

◻ Fu san-ede wi no musu draidrai fu pai den belasting di keisri e aksi?

◻ Sortu grani wi musu gi den tirimakti?

◻ Fu san-ede a saka di wi e saka wi srefi na ondro keisri de soso wan sani di e anga fu tra sani?

◻ Efu wi e kisi frufolgu fu di keisri e aksi san na fu Gado, fa wi musu du dan?

[Faki na tapoe bladzijde 20]

Lespeki no anbegi

Wan mamanten na a ten fu les, Tera, wan yongu Canadees Kotoigi fu Yehovah, ben si taki na meistri ben teki wan konpe studenti go na dorosei fu na klas fu wantu syatu pisiten. Leti na baka dati na meistri ben aksi Tera safri efu a ben wani go nanga en na a kantoro fu na edeman fu skoro.

Di den kon drape, Tera ben si taki na Canadees fraga ben poti abra na skrifitafra fu na edeman fu skoro. Na meistri ben gi Tera na komando fu spiti na tapu na Canadees fraga! A ben taki taki fu di Tera no ben singi na singi fu na kondre èn no ben taigi na fraga odi, meki reide no ben de fu san-ede a no ben kan du so wan sani. Tera ben weigri èn ben tyari kon na krin taki aladi Kotoigi no e anbegi na fraga, toku den abi lespeki gi dati.

Di den doro baka na ini a klas na meistri ben meki bekenti taki di dyonsro a ben pruberi wan sani. A ben teki tu studenti wan fru wan go na a kantoro fu na edeman fu skoro èn ben gi den na komando fu spiti na tapu na fraga. Aladi na fosi studenti ben teki prati na ceremonie fu na nâsi, a ben spiti na tapu na fraga di den ben taigi en fu du dati. Kontrari fu dati, Tera no ben singi na singi fu na kondre èn no ben taigi na fraga odi; ma toku a ben weigri fu broko na fraga saka na a fasi disi. Na meistri ben meki kon a krin taki Tera ben de na sma di ben sori na yoisti lespeki. — Yaribuku 1990 fu Yehovah Kotoigi.

[Sma di abi a reti foe a prenki na tapoe bladzijde 16]

French Embassy Press & Information Division

USSR Mission to the UN

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma